Home-Study nga Leksyon

Joseph Smith—Kasaysayan 1:1–65; Doktrina ug mga Pakigsaad 2 (Unit 2)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang sila nagtuon sa Joseph Smith—Kasaysayan 1:1–65 ug Doktrina ug mga Pakigsaad 2 (unit 2) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Joseph Smith—Kasaysayan 1:1–20)

Nakat-unan sa mga estudyante gikan sa kasinatian ni Joseph Smith sa pagpaningkamot nga makahibalo kon hain nga simbahan ang tinuod nga kon kita mangutana sa Dios inubanan sa hugot nga pagtuo, Siya motubag sa atong mga pag-ampo. Sila mag-focus diha sa kamatuoran nga si Joseph Smith nakakita sa Dios nga Amahan ug sa Iyang Anak, si Jesukristo. Gikan sa kasinatian ni Joseph Smith, nakat-unan usab sa mga estudyante nga ang Dios nga Amahan ug si Jesukristo buhi ug nga ang Langitnong Amahan ug si Jesukristo managlahi nga personahe. Agig dugang, nadiskubrihan sa mga estudyante nga kon matinguhaon kitang mangita sa tabang sa Dios kon si Satanas maningkamot sa pagpasagmuyo kanato, ang Dios moluwas kanato.

Day 2 (Joseph Smith—Kasaysayan 1:21–26)

Gikan sa kasinatian ni Joseph Smith, nakat-unan sa mga estudyante nga atol sa malisud nga mga panahon makakuha kita og kalig-on gikan sa mga ehemplo sa matinud-anong mga indibidwal diha sa mga kasulatan. Pinaagi sa pagtuon kon giunsa pagsagubang ni Joseph Smith ang pagpanggukod nga iyang nasugatan pagkahuman sa Unang Panan-awon, nakat-on ang mga estudyante sa mga doktrina ug mga baruganan nga makatabang nila kon sila mag-atubang og oposisyon tungod sa ilang mga pagpamatuod. Agig dugang, ang mga estudyante nakat-on nga pinaagi sa pagbuhat sa mga baruganan nga gitudlo diha sa mga kasulatan, makabaton kita og usa ka pagpamatuod sa kamatuoran niini.

Day 3 (Joseph Smith—Kasaysayan 1:27–54; Doktrina ug mga Pakigsaad 2)

Si Joseph Smith nagtinguha nga masayud sa iyang kahimtang sa atubangan sa Dios. Miila siya sa iyang kasaypanan ug mga kahuyang ug mibati og kaguol. Sama ni Joseph Smith, kon kita moila sa atong mga kasal-anan ug mobati og kaguol tungod niini, makaampo kita ngadto sa Langitnong Amahan alang sa kapasayloan. Gitun-an sa mga estudyante ang pagbisita ni Moroni ngadto ni Joseph Smith ug nakat-unan nga ang Dios adunay ipabuhat kang Joseph Smith nga mokaylap sa tibuok kalibutan. Kini nga buhat naglakip ni Elijah nga mipahiuli sa gahum sa pagbugkos dinhi sa yuta sa dili pa ang Ikaduhang Pag-anhi ni Jesukristo.

Day 4 (Joseph Smith—Kasaysayan 1:55–65)

Gipamanlandungan sa mga estudyante ang saad ni Moroni ngadto ni Joseph Smith nga ang mga palid mapanalipdan, ug ilang nakat-unan nga kon kita modawat sa responsibilidad ug mogpreserbar nianang nahatag sa Ginoo kanato, Siya mohatag sa Iyang panalipod ug tabang. Samtang ang mga estudyante nagtuon sa istorya bahin ni Martin Harris nga mikuha sa mga kopya sa mga titik sa bulawan nga mga palid ug sa paghubad ni Propesor Anthon ug Dr. Mitchel, ilang nakat-unan nga ang mga panagna sa mga sulugoon sa Ginoo mahitabo.

Pasiuna

Kini nga leksyon motabang sa mga estudyante nga mapalawman ang ilang pagsabut sa Unang Panan-awon ni Joseph Smith. Makahatag usab kini kanila og usa ka oportunidad nga makat-on sa paningkamot nga gikinahanglan aron sa pagpangita og mga tubag sa mga pangutana ug sa paghatag og bili sa ilang katungdanan sa pagkat-on sa ebanghelyo. Makat-unan sa mga estudyante ang mga paagi sa pagpalig-on sa ilang pagtuo batok sa pagpanggukod ug oposisyon nga ilang masinati.

Mga Sugyot alang sa Pagtudlo

Joseph Smith—Kasaysayan 1:5–20

Ang Dios nga Amahan ug ang Iyang Anak, si Jesukristo, mipakita ngadto ni Joseph Smith

Hangyoa ang mga estudyante sa paghunahuna mahitungod sa usa ka panahon nga sila nagtinguha og tubag sa usa ka pangutana nga espirituhanon o may kalabutan sa ebanghelyo. Dayon ipangutana ang mosunod:

• Unsa man ang inyong gibuhat aron makaplagan ang tubag sa inyong pangutana?

Pahinumdumi ang mga estudyante nga si Joseph Smith sama sa pangidaron sa kadaghanan sa mga estudyante sa seminary sa dihang nabalaka siya mahitungod sa usa ka mahinungdanong pangutana ug nagsugod sa pagpangita sa tubag. Samtang ang kasinatian ni Joseph Smith talagsaon, ang mga panghitabo nga misangpot niini mao ang usa ka sumbanan nga mahimong sundon sa matag usa kanato aron makadawat og tabang ug mga tubag gikan sa Dios.

Mahimo nimong isugyot nga markahan sa mga estudyante ang mga pulong nga “Ako nakahibalo sa akong kaugalingon” sa Joseph Smith—Kasaysayan 1:20.

Bahina ang mga estudyante ngadto sa mga grupo nga magtinagurha o tinagutlo. Hangyoa ang matag grupo sa pagbasa sa Joseph Smith—Kasaysayan 1:8, 11–12, 14–15, nga mangita kon unsa ang gibuhat ni Joseph Smith aron makadawat og tubag sa iyang pangutana. Dapita ang matag grupo sa pagpadala og usa ka representante ngadto sa pisara aron magrekord og usa ka importanting elemento nga nakit-an sa iyang grupo. Sultihi ang klase nga dili parehasan ang bisan unsang item diha sa pisara. Kon maglisud ang mga estudyante sa pagpangita kon unsay gibuhat ni Joseph, mahimo nimo silang tabangan pinaagi sa pagsugyot og pipila sa mosunod: gibuhat ni Joseph ang seryoso nga pagpamalandong (paghunahuna), mitambong sa mga miting sa simbahan, mituon sa mga pagtulun-an sa lain-laing mga denominasyon, mituon sa mga kasulatan, nag-ampo nga may determinasyon.

Ipangutana ang mosunod:

• Unsa nga baruganan ang inyong makat-unan gikan ni Joseph Smith mahitungod sa unsay gikinahanglan aron makat-on og espirituhanon nga mga butang? (Bisan og ang mga estudyante mahimong mogamit og lain-laing mga pulong, kinahanglan nilang mahibaloan ang mosunod nga baruganan: Ang espirituhanong pagkat-on nagkinahanglan og paningkamot sa atong bahin. Mahimo nimong isulat sa pisara kini nga baruganan.)

• Ngano kaha nga importante man alang kanato nga mopakita og paningkamot aron makat-on og espirituhanon nga mga kamatuoran?

• Sa unsang paagi nga ang paggamit niining baruganan makatabang kaninyo sa inyong personal nga pagtuon sa Doktrina ug mga Pakigsaad niining tuiga?

Dapita ang usa ka estudyante sa pagbasa og kusog sa Joseph Smith—Kasaysayan 1:16–17, ug hangyoa ang klase nga magsunod diha sa ilang mga kasulatan ug mangita kon unsa ang mga nasinati ni Joseph samtang siya naningkamot nga makabaton og kahibalo.

• Sumala sa bersikulo 17, kinsa man ang nakita ni Joseph Smith? (Siguroa nga maklaro nga si Joseph Smith nakakita sa Dios nga Amahan ug sa Iyang Anak, si Jesukristo.)

• Unsa ang iyang nakat-unan atol niining panan-awon mahitungod sa duha ka mga personahe?

Hangyoa ang usa ka estudyante sa pagbasa og kusog sa mosunod nga pamahayag ni Presidente Joseph F. Smith, kinsa mipasabut sa kamahinungdanon sa Unang Panan-awon:

“Ang pinakamahinungdanong panghitabo nga sukad nahitabo sa kalibutan, sukad sa pagkabanhaw sa Anak sa Dios gikan sa lubnganan ug sa iyang pagkayab sa langit, mao ang pag-anhi sa Amahan ug sa Anak ngadto nianang batang lalaki nga si Joseph Smith” (Gospel Doctrine, 5th ed. [1939], 495).

• Sa imong pamati ngano kaha nga importante nga makabaton og pagpamatuod nga ang Langitnong Amahan ug si Jesukristo tinuod gayud nga mipakita ngadto ni Joseph Smith?

Dapita ang usa ka estudyante sa pagbasa og kusog sa Joseph Smith—Kasaysayan 1:18–20, ug hangyoa ang mga estudyante sa pagpangita kon unsa ang nakat-unan ni Joseph sa iyang kaugalingon tungod sa iyang paningkamot sa pagbuhat inubanan sa hugot nga pagtuo. Dayon ipangutana ang mosunod:

• Unsa man ang nakat-unan ni Joseph sa iyang kaugalingon?

• Unsa man ang atong makat-unan gikan sa kasinatian ni Joseph Smith mahitungod kon unsay mahitabo kon magtuon kita sa pulong sa Dios ug dayon buhaton kon unsay atong nabasa? (Ang mga tubag mahimong maglakip sa mosunod nga kamatuoran: Kon makugihon kitang magtuon sa pulong sa Dios ug mobuhat inubanan sa hugot nga pagtuo, nan mahibaloan nato ang mga kamatuoran sa ebanghelyo sa atong kaugalingon mismo. Mahimo nimong isulat kini nga baruganan diha sa pisara ug dapita ang mga estudyante sa pagsulat niini diha sa margin sa ilang mga kasulatan.)

• Sa unsa kaha nga paagi nga kining kamatuoran makatabang sa usa ka higala o sakop sa pamilya kinsa dunay mga pangutana mahitungod sa ebanghelyo?

• Sa unsa kaha nga paagi nga kining kamatuoran makatabang kaninyo sa inyng mga pangutana o mga problema?

Joseph Smith—Kasaysayan 1:20–65; Doktrina ug mga Pakigsaad 2

Si Joseph Smith naminyo ni Emma Hale, nakadawat sa bulawan nga mga palid, ug gisugdan ang paghubad

Hangyoa ang mga estudyante sa pagribyu unsa ang nahitabo ngadto ni Joseph Smith pagkahuman sa iyang Unang Panan-awon. Siguroa nga ilang masabtan nga ang Propeta nakasinati og grabing pagpanggukod human makasulti sa uban bahin sa panan-awon. Dapita sila sa pagbasa sa katapusan sa Joseph Smith—Kasaysayan 1:20 nga sila lang, magsugod sa mga pulong nga “Kini ingon og. …” Dayon pangutan-a ang mga estudyante sa mosunod nga mga pangutana:

• Sumala ni Joseph Smith, nganong nakasinati siya og hilabihan nga pagpanggukod sa ingon kabatan-on? (Naggikan ang pagpanggukod sa impluwensya ni Satanas tungod kay siya nahibalo nga si Joseph Smith mahimong “usa ka tigdisturbo ug tigsamok sa gingharian [ni Satanas].”)

• Unsa ang pipila ka mga sitwasyon diin kamo o ang uban ninyong kaila lagmit makasinati og pagpanggukod karon?

Dapita ang usa ka estudyante sa pagbasa og kusog sa Joseph Smith—Kasaysayan 1:24–25. Hangyoa ang klase sa pagsunod ug motino kon unsay atong mahimo aron makaangkon og kusog atol sa malisud nga mga panahon.

• Unsay atong mahimo atol sa malisud nga mga panahon aron makabaton og kusog nga mahimong matinud-anon? (Ang mga estudyante mahimong mohatag og lain-laing mga tubag. Siguroa nga ilang mahibaloan ang mosunod nga baruganan: Atol sa malisud nga mga panahon, makakuha kita og kusog gikan sa mga ehemplo sa matinud-anon nga mga indibidwal diha sa mga kasulatan. Mahimo nimong isulat kini nga baruganan diha sa pisara ug dapita ang mga estudyante sa pagsulat niini diha sa margin sa ilang mga kasulatan.)

Dapita ang mga estudyante sa pagribyu sa Joseph Smith—Kasaysayan 1:24–25, nga mangita sa mga pulong nga tingali makahatag nila og kaisug o kusog sa pagbuhat sa unsay matarung sa mga panahon sa pagpanggukod. Human maka-report ang mga estudyante sa unsay ilang nakit-an, mahimo nimong isugyot nga ilang markahan ang mga pulong nga “Ako nakakita og usa ka panan-awon; ako nasayud niini, ug ako nasayud nga ang Dios nasayud niini, ug ako dili makalimud niini.”

Ipangutana sa mga estudyante ang mosunod:

• Unsa ang gitudlo niini nga mga pulong diha kaninyo mahitungod sa pagpamatuod ni Joseph Smith sa Unang Panan-awon?

• Sa unsang paagi nga kining mga pulong makatabang kaninyo kon adunay tawo nga mohagit sa inyong pagpamatuod o molutos kaninyo tungod sa inyong gituohan?

Tapusa kini nga leksyon pinaagi sa pagpakigbahin sa imong pagpamatuod sa mga baruganan nga nahisgutan dinhi niining leksyon. Dapita ang mga estudyante sa pagpakigbahin sa ilang mga kasinatian o mga pagbati mahitungod niining mga kamatuoran.

Sunod nga Unit (Doktrina ug mga Pakigsaad 3–7; 10; Joseph Smith—Kasaysayan 1:66–67)

Sa unsang paagi nga ang unang 116 ka mga pahina sa Basahon ni Mormon nga gihubad ni Joseph Smith nawala ug wala na gayud mahibalik? Samtang magtuon ang mga estudyante sa sunod nga unit ilang makat-unan ang mahitungod ni Martin Harris ug ang nawala nga manuskrito. Makat-unan usab nila ang mahitungod sa tambag sa Ginoo niadtong nagtinguha sa pagserbisyo sa Dios.