Wala madugay human sa pagpahiuli sa Aaronic Priesthood sa Mayo 1829, duha ka lalaki mibisita ni Propeta Joseph Smith sa Harmony, Pennsylvania: ang igsoong lalaki ni Joseph nga si Hyrum ug si Joseph Knight Sr. Ang duha ka mga lalaki mipahayag sa ilang tinguha sa pagserbisyo sa Dios ug sa pagtabang sa Pagpahiuli sa ebanghelyo. Ang Doktrina ug mga Pakigsaad 11 nagrekord sa pinadayag sa Ginoo ngadto ni Hyrum Smith kalabut sa unsa nga paagi iyang ma-estabilisar ang katuyoan sa Zion. Ang Doktrina ug mga Pakigsaad 12 nagrekord sa mga pinadayag sa Ginoo ngadto ni Joseph Knight Sr. ug sa unsa nga paagi siya, usab, makatabang sa pagtukod sa kawsa sa Zion.
Nakakat-on si Hyrum Smith kon sa unsa nga paagi siya makatabang sa pag-establisar sa katuyoan sa Zion
Hangyoa ang mga estudyante sa paghunahuna og panahon nga sila gustong mokuyog o moapil sa usa ka takus nga kalihokan o katuyoan, sama sa pagplano og kalihokan sa Simbahan, paghimo og serbisyo alang sa usa ka tawo nga nanginahanglan, o pag-apil sa usa ka klub sa eskwelahan o organisasyon.
Unsa ang inyong gikinahanglang buhaton aron moapil sa kalihokan o katuyoan? (Ang mga estudyante mahimong mosugyot og mga butang sama sa pagpirma, pagsulat og mga porma, pakigsulti ngadto sa tawo nga nagdumala, o ubang mga lihok nga nagpakita sa ilang tinguha sa pag-apil.)
Dapita ang mga estudyante sa pagbasa sa mga ulohan sa seksyon alang sa Doktrina ug mga Pakigsaad 11 ug 12, nga mangita sa mga pangalan sa duha ka indibidwal kinsa nagtinguha sa pag-apil diha sa buhat sa Ginoo. Dayon dapita ang mga estudyante sa pagbasa og hilum sa Doktrina ug mga Pakigsaad 11:27 ug 12:7 ug ilha kinsa pa ang gidapit sa Ginoo sa pagtabang sa Iyang buhat.
Kinsa pa ang gidapit sa Ginoo sa pagtabang sa Iyang buhat? (Ang tanan niadtong kinsa nagtinguha sa pagtabang Kaniya.)
Aron matabangan ang mga estudyante nga makasabut sa konteksto sa Doktrina ug mga Pakigsaad 11, ipasabut nga ang pinadayag niini nga seksyon gidirekta ngadto ni Hyrum Smith, kinsa miadto sa Harmony, Pennsylvania gikan sa Palmyra, New York, aron makigkita sa iyang igsoong lalaki nga si Joseph. Si Hyrum malagmit nakaamgo sa bag-ong mga panghitabo, sama sa pag-uswag sa paghubad sa Basahon ni Mormon. Gusto niyang mahibalo kon sa unsa nga paagi siya makatabang ni Joseph diha sa buhat sa Ginoo. Si Joseph nangutana sa Ginoo ug nadawat kini nga pinadayag. (Aron matabangan ang mga estudyante nga makaila sa kaimportante sa tinguha diha sa buhat sa Dios, mahimo nimong isugyot nga markahan nila ang mga pulong magtinguha, mga tinguha, ug nagtinguha diha sa Doktrina ug mga Pakigsaad 11:3, 8, 10, 14, 17, 21, 27.)
Dapita ang mga estudyante sa pagbasa og hilum sa Doktrina ug mga Pakigsaad 11:5–9. Hangyoa ang katunga sa klase sa pag-ila sa mga panalangin nga gisaad sa Ginoo ngadto ni Hyrum. Dapita ang laing katunga sa klase sa pag-ila unsay kinahanglan nga buhaton ni Hyrum aron maangkon kadto nga mga panalangin. (Samtang nagtubag ang mga estudyante, tingali kinahanglan nimong ipatin-aw nga “ang mga misteryo sa Dios” [D&P 11:7] mga espirituhanong mga kamatuoran nga nailhan lamang pinaagi sa pagpadayag.)
Unsa nga mga kamatuoran ang atong makat-unan gikan sa Doktrina ug mga Pakigsaad 11:8 mahitungod sa pagtinguha sa pagbuhat sa buhat sa Ginoo? (Sa pagtubag sa mga estudyante, hatagi og gibug-aton ang mosunod nga mga kamatuoran: (1) Kita makadawat og mga panalangin gikan sa Dios base sa atong mga matarung nga mga tinguha. (2) Kon kita nagtinguha sa pagbuhat sa buluhaton sa Dios, mahimo kitang paagi sa paghimo sa daghang kaayohan.)
Isulat ang mosunod nga pangutana diha sa pisara: Unsa ang akong mabuhat nga “[mahimong] paagi sa pagbuhat og daghan nga kaayohan” sa akong henerasyon?
Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 11:10–14. Hangyoa ang klase sa pagsunod, nga mangita sa tambag nga gihatag sa Ginoo ni Hyrum nga motabang kaniya sa paghimo og daghang kaayohan. Kon mahuman og basa ang mga estudyante, dapita ang pipila ka mga estudyante sa pagsulat sa unsay ilang nakit-an ubos sa pangutana diha sa pisara. Mahimo usab nimong isugyot nga kopyahon sa mga estudyante kining lista diha sa ilang mga class notebook o mga scripture study journal. (Ilang dugangan ang lista samtang ang leksyon magpadayon.)
Unsa kahay ipasabut sa pagbutang sa imong pagsalig diha sa Espiritu?
Sumala sa Doktrina ug mga Pakigsaad 11:12–13, unsaon nimo pag-ila ang impluwensya sa Espiritu? (Ang mga estudyante mahimong mogamit og lahi nga mga pulong, apan kinahanglan ilang ilhon ang mosunod nga mga kamatuoran: 1) Ang Espiritu sa Ginoo naggiya kanato sa pagbuhat og maayo, sa pagpaubos, ug sa paghukom sa matarung nga paagi. (2) Ang Espiritu naglamdag sa atong mga salabutan ug nagpuno sa atong mga kalag og hingpit nga kalipay.)
Samtang naghisgot kamo niining mga kamatuoran, mahimo nimong dapiton ang mga estudyante sa pagribyu sa scripture mastery passage nga Doktrina ug mga Pakigsaad 8:2–3. Mahimo usab nimong isugyot nga isulat sa mga estudyante kining scripture mastery reference diha sa margin tupad sa Doktrina ug mga Pakigsaad 11:12–14.
Sumala sa Doktrina ug mga Pakigsaad 11:12–13, unsa ang pipila ka mga paagi nga ang Espiritu maka-impluwensya sa atong mga salabutan ug sa atong mga kasingkasing?
Kanus-a ka nakasinati sa impluwensya sa Espiritu sa usa niini ka mga paagi? Sa unsa nga mga paagi kini nga kasinatian migiya kanimo sa “pagbuhat og maayo”?
Ang Ginoo nagmando ni Hyrum Smith sa pagpangandam alang sa iyang tawag sa pagsangyaw
Dapita ang usa ka estudyante sa pagbasa og kusog sa Doktrina ug mga Pakigsaad 11:15–16. Hangyoa ang klase sa pagsunod, nga mangita unsay gusto sa Ginoo ni Hyrum Smith nga andamon sa pagbuhat. Tabangi ang mga estudyante sa pagpasabut nga si Hyrum Smith gimandoan sa dili pagsangyaw hangtud siya gitawag sa pagbuhat niini.
Sumala niini nga mga bersikulo, ngano nga si Hyrum Smith “[mag]paabut sa mubo nga panahon” sa dili pa siya pagatawgon sa pagsangyaw sa ebanghelyo? (Tingali kinahanglan nimong ipasabut nga ang pulong “hangtud ikaw makaangkon sa akong pulong, akong lig-on nga sukaranan, akong simbahan, ug akong ebanghelyo” nagpasabut sa kamatuoran nga ang Simbahan wala pa ma-organisar ug ang Basahon ni Mormon wala pa gimantala.)
Dapita ang usa ka estudyante sa pagbasa og kusog sa Doktrina ug mga Pakigsaad 11:17–20 samtang ang klase nagsunod, nga mangita sa unsay gisulti sa Ginoo nga gikinahanglang buhaton ni Hyrum aron mahimong epektibo nga tigsangyaw sa ebanghelyo. Mahimo nimong idugang ang mga tubag sa mga estudyante sa lista diha sa pisara. Mahimo usab nimong dapiton ang mga estudyante sa pagsulat sa ilang mga tubag.
Unsa kaha ang gipasabut sa pagmatinud-anon ngadto sa Ginoo sa imong tibuok nga kasingkasing? (Tingali kinahanglan nimong ipasabut nga dinhi niining konteksto ang pulong nga pagmatinud-anon nagpasabut sa pag-unong ngadto sa usa ka butang sa hugot ug walay pagduha-duha nga paagi.)
Isulat ang mosunod nga baruganan diha sa pisara: Ang paghupot sa mga sugo nag-andam kanato sa espirituhanong paagi sa paghimo sa buhat sa Ginoo.
Sa unsa nga paagi nga ang paghupot sa mga sugo karon nag-andam kanimo alang sa misyonaryo nga serbisyo, kaminyoon, ug serbisyo diha sa Simbahan sa umaabut nga mga tuig?
Dapita ang usa ka estudyante sa pagbasa og kusog sa Doktrina ug mga Pakigsaad 11:21–22. Hangyoa ang klase sa pagsunod, nga mangita og lain pang butang nga kinahanglang buhaton ni Hyrum aron matabangan siya nga mahimong epektibong tigsangyaw sa ebanghelyo.
Unsa ang gisulti sa Ginoo ni Hyrum nga iyang kinahanglang buhaton aron makahimo sa pagpahayag sa Iyang pulong ngadto sa katawhan? (Mahimo nimong idugang ang pagtuon sa mga kasulatan diha sa lista sa pisara.)
Unsa ang kalainan tali sa pagtuon sa mga kasulatan aron mahibalo sa pulong sa Dios ug sa pagbasa lamang sa mga kasulatan?
Unsa ang gisaad sa Ginoo ni Hyrum ug sa uban kinsa nagsunod sa sundanan nga gitudlo sa Doktrina ug mga Pakigsaad 11:21–22? (Ang mga estudyante kinahanglan nga makaila sa mosunod nga baruganan: Kadtong nagtuon sa mga pulong sa Ginoo makadawat sa Iyang Espiritu ug sa gahum sa pagkumbinsir sa uban sa kamatuoran sa ebanghelyo.)
Ang Ginoo nagtambag ni Joseph Knight kon sa unsa nga paagi maestablisar ang katuyoan sa Zion
Ipakita sa mga estudyante ang mga pangalan sa pipila ka bantugang mga indibidwal. Pangutan-a kon sila sukad nakadungog ba sa mga indibidwal nga imong ginganlan ug sa daklit ipasabut nganong sila mga bantugan kaayo. Dayon pangutan-a kon sila nakadungog ba sukad og usa ka tawo nga ginganlan og Joseph Knight Sr.
Paghunahuna og mga indibidwal diha sa imong ward o branch kinsa nagserbisyo sa matinud-anon ug hilum nga paagi. Sa unsa nga paagi sila nagtabang sa pagtukod sa gingharian sa Dios?
Aron matabangan ang mga estudyante sa pagkat-on mahitungod ni Joseph Knight Sr. ug sa iyang kontribusyon sa Pagpahiuli sa ebanghelyo, dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 12. Ipasabut nga si Joseph Knight Sr. dili bantugan karon, apan iyang gisuportahan si Propeta Joseph Smith og pagkaon ug ubang mga kinahanglanon atol sa malisud nga trabaho sa paghubad sa Basahon ni Mormon. Ang Doktrina ug mga Pakigsaad 12 nagrekord og pinadayag nga gihatag sa Ginoo ngadto ni Joseph Smith alang ni Joseph Knight Sr. sa Mayo 1829. Dapita ang usa ka estudyante sa pagbasa og kusog sa Doktrina ug mga Pakigsaad 12:6–8. Hangyoa ang klase sa pagsunod, nga mag-ila sa matarung nga mga kinaiya nga kinahanglang mapanag-iya niadtong gustong motabang diha sa buhat sa Ginoo.
Sumala sa Doktrina ug mga Pakigsaad 12:8, unsa nga mga kinaiya ang gikinahanglan sa Ginoo niadtong gustong motabang sa Iyang buhat?
Sa unsa nga paagi kamo nagpalambo niini nga mga kinaiya sa inyong kinabuhi?
Sultihi ang mga estudyante nga si Joseph Knight Sr. makanunayong naningkamot sa pagpalambo ug sa pagbansay niining matarung nga mga kinaiya. Mihatag siya og temporal ug espirituhanong panabang ngadto ni Joseph Smith sa tibuok nga pagpangalagad sa Propeta. Human sa daghang katuigan nga nadawat ni Joseph Smith ang pinadayag nga girekord diha sa Doktrina ug mga Pakigsaad 12, girekord niya ang mosunod kalabut sa pagkamatinud-anon ni Joseph Knight:
Imahe
Prophet Joseph Smith
“Si Joseph Knight, Sen., … nagmatinud-anon ug nagmatinuoron, ug makiangayon ug sulundon, ug mahiyason ug maloloy-on, dili gayud motipas ngadto sa tuo o sa wala. … Usa siya ka matarung nga tawo” (History of the Church, 5:124).
Aron sa pag-awhag sa mga estudyante sa pagpamalandong ug sa paggamit unsay ilang nakat-unan karon, dapita ang pipila ka mga estudyante sa pagpakigbahin kon unsaon nila sa pagtapos ang mosunod nga mga pulong: “Aron matabangan ang Ginoo sa Iyang buhat, ako …”
Mahimo nimong tapuson pinaagi sa pagpahayag kon unsaon nimo sa paghuman kini nga mga pulong.
Si Elder Orson Pratt sa Korum sa Napulog Duha ka mga Apostoles milarawan sa gahum sa pulong sa Dios:
Imahe
Elder Orson Pratt
“Usa ka mensahe sa yanong kamatuoran, kon gipadala gikan sa Dios—kon gimantala pinaagi sa balaang awtoridad, pinaagi sa balaanong dinasig nga mga tawo, motuhop sa salabutan sama sa mahait nga duha ka suwab sa espada, ug moguba sa nigamot nga mga kadaot, sa lig-ong gahum sa karaang sayop ug tradisyon, nga gikonsiderar nga sagrado tungod sa kadugay na niini ug nahimong bantugan tungod sa tawhanong kaalam. Kini nagputol uban sa hingpit nga katukma tali sa kamatuoran ug kasaypanan—tali sa doktrina ni Kristo ug sa mga doktrina sa mga tawo; dali nga gun-ubon ang matag lantugi nga gigamit sa tawhanong pagkat-on batok niini. Mga opiniyon, mga tinuohang inimbento sa dili dinasig nga mga tawo, ug mga doktrina nga gikan sa mga eskwelahan sa relihiyosong pagtuon, tanan nahanaw sama sa yamog sa kabuntagon—tanan nawad-an og kahulugan kon itandi sa usa ka mensahe nga direkta gikan sa langit” (“Divine Authority—or was Joseph Smith Sent of God?” Orson Pratt’s Works on the Doctrines of the Gospel [1945], 1:1).
Doktrina ug mga Pakigsaad 11:9. Unsa ang gipasabut sa “ayaw pagsulti og lain gawas sa paghinulsol ngadto niini nga kaliwatan”?
Si Presidente Joseph Fielding Smith miingon:
Imahe
President Joseph Fielding Smith
“Kon ang Ginoo motawag sa iyang mga sulugoon sa pagsangyaw og walay lain kon dili ang paghinulsol, wala siya magpasabut nga sila dili mahimong mosangyaw og bunyag, ug motawag diha sa mga tawo sa pagsunod sa mga sugo sa Ginoo, apan siya nagtinguha nga ang tanan nga ilang isulti ug buhaton maanaa sa espiritu sa pagdala sa mga tawo ngadto sa paghinulsol. Bisan kinsa nga misyonaryo nga mapakyas sa pagbuhat niini sa iyang pangalagad nagpasagad sa iyang katungdanan” (Church History and Modern Revelation, 2 ka mga bol. [1953], 1:57).
Ang Matinud-anon sa Tinuhoan nagtudlo sa mosunod mahitungod sa paghinulsol:
“Ang paghinulsol mao ang usa sa unang mga baruganan sa ebanghelyo (tan-awa sa Mga Artikulo sa Hugot nga Pagtuo 1:4). Mahinungdanon kini sa imong kalipay niini nga kinabuhi ug hangtud sa kahangturan. Ang paghinulsol mas labaw pa kay sa pag-ila lamang sa sayop nga mga binuhatan. Usa kini ka kausaban sa hunahuna ug kasingkasing nga maghatag kanimo og bag-ong panan-aw mahitungod sa Dios, mahitungod sa imong kaugalingon, ug mahitungod sa kalibutan. Naglakip kini sa pagpalayo sa sala ug pagpaduol ngadto sa Dios alang sa kapasayloan. Nag-aghat kini tungod sa gugma alang sa Dios ug sa kinasingkasing nga tinguha sa pagsunod sa Iyang mga sugo” (Matinud-anon sa Tinuhoan: Usa ka Pakisayran sa Ebanghelyo [2004], 128–129).
Gipasabut ni Presidente Joseph Fielding Smith nga kini nga tambag ngadto ni Hyrum Smith magsilbi isip “maayong tambag alang kanatong tanan karon. Adunay pipila ka mga miyembro sa Simbahan kinsa ingon og nagmulo tungod kay ang Ginoo wala maghatag og mga pagpadayag nga ibutang diha sa Doktrina ug mga Pakigsaad, sama sa sinugdan, ug sila nangutana nganong ang pagpadayag mihunong diha sa Simbahan. Sa kasagaran kini mao ang sitwasyon nga kining mga kritiko dili matinud-anong naghupot sa mga sugo nga nahatag na sa Ginoo ug ang ilang mga mata buta ngadto sa kamatuoran nga ang pagpadayag ug ang paggiya sa Ginoo gigahin kanunay ngadto sa Simbahan. Walay usa nga adunay espiritu sa pag-ila mapakyas sa pagkakita nga ang kamot sa Ginoo naggiya niini nga mga tawo gikan sa sinugdan ug kini nga paggiya makita karon sama sa ubang mga panahon ngadto sa tanan kinsa mapainubsanon ug adunay mahinulsulong espiritu. (Tan-awa sa Jacob 4:8.)” Church History and Modern Revelation, 2 ka mga vol. [1953], 1:57; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 26).