Doktrina ug mga Pakigsaad 38:1–16

Pasiuna

Niadtong Disyembre 1830 gipadayag sa Ginoo ngadto ni Propeta Joseph Smith ang usa ka sugo alang sa Simbahan nga magpundok didto sa Ohio (tan-awa sa D&P 37). Pagka-1831 ang Ginoo mihatag sa pagpadayag nga narekord karon diha sa Doktrina ug mga Pakigsaad 38, nga mipasabut sa pipila ka rason nganong ang mga Santos kinahanglang magpundok didto sa Ohio. Mihatag usab Siya og mga sugo aron makagiya kanila sa panagpundok. Kini nga leksyon naglangkob sa unang 16 ka bersikulo sa seksyon 38. Niini nga pagpadayag, gisultihan ni Jesukristo ang mga miyembro sa Simbahan nga anaa Siya sa ilang taliwala. Gihulagway usab Niya kon kinsa ang makalahutay sa Iyang Ikaduhang Pag-anhi, mipasidaan sa mga Santos bahin sa kakuyaw, ug mihatag sa mga Santos og pag-awhag.

Mga Sugyot alang sa Pagtudlo

Doktrina ug mga Pakigsaad 38:1–7

Gisultihan ni Jesukristo ang mga miyembro Iyang Simbahan nga anaa Siya sa ilang taliwala

Dapita ang mga estudyante nga ilista diha sa ilang mga class notebook o mga scripture study journal ang pipila ka sugo nga ilang gibati nga sayon ra nilang masunod. Dapita dayon sila sa pagkonsiderar kon hain sa mga sugo ang lisud nilang masunod ug kon ngano man. (Ang mga estudyante mahimo usab nga mosulat niining mga hunahuna kon sila mobati nga komportable sa pagbuhat niini.)

Ngano kaha nga ang ubang mga sugo lisud man natong masunod?
Unsay nakapadasig kaninyo sa pagtuman sa mga sugo nga alang kaninyo lisud sundon?

Pahinumdumi ang mga estudyante nga niadtong Disyembre 1830, gisugo sa Ginoo ang mga Santos sa New York nga magpundok didto sa Ohio (tan-awa sa D&P 37). Alang sa pipila niining mga miyembro sa Simbahan, kini nga sugo lisud kaayong sundon. Niadtong Enero 2, 1831, ang mga Santos gikan sa nagkadaiyang mga branch sa New York naghimamat sa panimalay ni Peter Whitmer Sr. alang sa ikatulong komperensya sa Simbahan. Atol sa komperensya, ang pipila ka miyembro sa Simbahan nangutana bahin sa sugo nga mamalhin ngadto sa Ohio.

Ngano kaha nga lisud man alang sa pipila ka Santos sa pagsunod sa sugo nga mobiya sa New York ug magpundok didto sa Ohio?

Mahimong kinahanglan nimong ipasabut nga dili tanan nga diha sa komperensya ang nakasabut sa kaalam niini nga sugo. Ang pipila dili modawat niini isip pulong sa Ginoo, ug ang uban nagduha-duha nga mobiya sa ilang malambuong mga umahan ug komportable nga mga kahimtang alang sa kawalay kasiguroan sa usa ka bag-ong dapit. Dunay dakong posibilidad nga daghan ang maalkansi sa ilang kabtangan ug ang uban tingali dili pa gani makabaligya sa ilang kabtangan.

Ipasabut nga atol sa Enero 1831 nga komperensya, nag-ampo si Joseph Smith ngadto sa Ginoo aron makakat-on pa og dugang bahin sa sugo nga magpundok didto sa Ohio. Ang Ginoo mitubag pinaagi sa pinadayag nga narekord karon diha sa Doktrina ug mga Pakigsaad 38. Pahibaloa ang mga estudyante nga samtang magtuon sila niini nga pagpadayag, makakat-on sila sa mga kamatuoran nga makatabang kanila samtang maghimo sila og mga pagpili kalabut sa mga sugo nga alang nila lisud sundon.

Dapita ang usa ka estudyante sa pagbasa og kusog sa Doktrina ug mga Pakigsaad 38:1–3. Hangyoa ang klase sa pagsunod, nga mangita sa mga kamatuoran nga atong makat-unan bahin ni Jesukristo. Samtang motubag ang mga estudyante, mahimo nimong isugyot nga ilang markahan ang mga pulong nga dunay kalabutan sa ilang mga tubag.

Unsa nga mga kamatuoran ang atong makat-unan bahin ni Jesukristo gikan niining mga bersikulo? (Samtang motubag ang mga estudyante, tabangi sila nga makahibalo sa mosunod nga doktrina: Si Jesukristo nasayud sa tanang mga butang.)
Sa unsang paagi kaha nga ang pagsabut nga si Jesukristo nasayud sa tanang mga butang nakatabang sa mga Santos kinsa gisugo nga mobalhin ngadto sa Ohio?
Sa unsang paagi kaha nga kining kamatuoran makatabang usab kanato sa higayon nga manlimbasug kita sa pagsunod sa mga sugo sa Ginoo?

Ipasabut nga sa wala pa makadawat niining pagpadayag, nagtrabaho na si Joseph Smith sa dinasig nga bersyon sa Biblia ug nakadawat sa unsay nahibaloan karon nga Moises 6–7 diha sa Perlas nga Labing Bililhon. Kining mga kapitulo nag-istorya bahin sa usa ka propeta nga ginganlan og Enoch ug sa iyang katawhan. Tungod sa ilang pagkamatarung ug panaghiusa, gitawag sa Ginoo kini nga katawhan og Zion. Dapita ang mga estudyante sa pagbasa og hilum sa Doktrina ug mga Pakigsaad 38:4 ug mangita kon unsay gibuhat sa Ginoo alang ni Enoch ug sa iyang katawhan. Hangyoa ang mga estudyante sa pag-report sa unsay ilang nakaplagan. Mahimong kinahanglan nimong ipasabut nga sa dihang gigamit sa Ginoo ang mga pulong nga “akong kaugalingon nga sabakan,” nagpasabut Siya sa Iyang presensya.

Sumala sa bersikulo 4, unsa ang usa ka butang nga gibuhat sa katawhan ni Enoch nga nakapahimo sa Ginoo sa pagdala kanila ngadto sa langit? (Mituo sila sa Iyang pangalan.)
Unsa ang giingon sa Ginoo nga Iyang nabuhat alang niadtong kinsa mituo sa Iyang ngalan? Unsay inyong gibati bahin sa Manluluwas tungod niana?

Dapita ang usa ka estudyante sa pagbasa og kusog sa Doktrina ug mga Pakigsaad 38:5–7. Hangyoa ang klase sa pagsunod, nga mangita kon unsay gisulti ni Jesukristo kon asa Siya.

Diin man si Jesukristo sigun sa Iyang gisulti?
Kanus-a man ninyo gibati nga duol ra ang Manluluwas bisan kon dili ninyo Siya makita?

Doktrina ug mga Pakigsaad 38:8–12

Gihulagway sa Ginoo kon kinsa ang makalahutay sa Iyang Ikaduhang Pag-anhi

I-display ang litrato nga Ang Ikaduhang Pag-anhi (Libro sa mga Hulagway sa Ebanghelyo [2009], nu. 66; tan-awa usab sa LDS.org). Ipasabut nga samtang gitabangan sa Manluluwas ang mga Santos sa New York nga makasabut sa kaimportante sa pagpundok didto sa Ohio, naghisgot Siya bahin sa Iyang Ikaduhang Pag-anhi.

Hangyoa ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 38:8–10. Dapita ang klase sa pagsunod, nga mangita kon unsay gipadayag sa Manluluwas bahin sa Iyang Ikaduhang Pag-anhi. Mahimong makatabang ang pagpasabut nga kadtong kinsa “makalahutay sa adlaw” (D&P 38:8) sa Ikaduhang Pag-anhi mao kadtong kinsa, imbis nga malaglag, mahimong magpabilin sa yuta uban sa Manluluwas kon Siya moabut.

Sa unsang paagi nga kining mga bersikulo makatabang kanato nga makasabut sa kaimportante nga malimpyo sa dili pa ang Ikaduhang Pag-anhi?

Dapita ang mga estudyante sa pagbasa og hilum sa Doktrina ug mga Pakigsaad 38:11–12 ug mangita sa paghulagway sa Ginoo sa mga kahimtang nga mahitabo sa yuta sa dili pa ang Ikaduhang Pag-anhi. Dayon hangyoa ang mga estudyante sa pag-report kon unsay ilang nakat-unan. (Aron matabangan ang mga estudyante nga makasabut niining mga bersikulo, mahimo nimong ipasabut nga ang paghulagway sa mga anghel nga naghulat sa “pag-ani sa yuta” usa ka pakisayran ngadto sa sambingay sa Bag-ong Tugon bahin sa mga trigo ug mga bunglayon [tan-awa sa Mateo 13:24–30; D&P 86:1–7], diin ang mga trigo [kadtong mga matarung] gipundok sa wala pa sunoga ang mga bunglayon [kadtong mga dautan].)

Unsa nga mga ebidensya ang inyong nakita nga ang mga kahimtang nga gihulagway diha sa bersikulo 11 nahitabo karon?
Unsay atong mabuhat aron magpabiling limpyo taliwala niining mga kahimtang?

Doktrina ug mga Pakigsaad 38:13–16

Ang Ginoo nagpasidaan sa mga Santos bahin sa kakuyaw ug naghatag kanila og pag-awhag

Ipasabut nga agig dugang sa paghisgot bahin sa Iyang Ikaduhang Pag-anhi, mihatag ang Ginoo og pasidaan kalabut sa kakuyaw nga giatubang sa mga Santos. I-refer ang mga estudyante ngadto sa Doktrina ug mga Pakigsaad 38:12 ug ipangutana ang mosunod:

Sa katapusan sa bersikulo 12, unsay gitudlo sa Ginoo bahin sa kaaway sa mga Santos?

Tabangi ang mga estudyante nga makasabut nga ang mga pulong nga “ang kaaway naghiusa” mahimong nagpasabut sa kinatibuk-an sa kamatuoran nga si Satanas ug ang iyang mga pwersa nagkahiusa batok sa mga Santos sa ulahing mga adlaw. Mahimong nagpasabut usa kini sa mga tawo nga mga kaaway sa mga Santos nianang panahona nga kining pagpadayag gihatag. Hangyoa ang usa ka estudyante sa pagbasa og kusog sa Doktrina ug mga Pakigsaad 38:13, ug dapita ang mga estudyante nga mangita kon unsa ang mga tinguha sa naghiusang kaaway. Dapita ang mga estudyante sa pag-report sa unsay ilang nakit-an.

Unsay mabuhat sa Ginoo kon maanaa kita sa kakuyaw? (Ang mga estudyante mahimong mohatag og nagkadaiyang mga tubag. Siguroa ang paghatag og gibug-aton sa mosunod nga baruganan, ug isulat kini sa pisara: Ang Ginoo makapasidaan kanato bahin sa kakuyaw.)

Hatagi ang mga estudyante og pipila ka gutlo nga mamalandong sa mga mensahe nga gihatag sa mga propeta sa Ginoo ngari kanato sa kinatibuk-ang komperensya ug pinaagi sa mga gimantala sa Simbahan.

Sa unsang mga paagi nga kining mga mensahe nahimong mga pasidaan gikan sa Ginoo bahin sa espirituhanon o pisikal nga mga kakuyaw nga atong giatubang?
Sa unsa pang mga paagi nga kamo gipasidan-an bahin sa espirituhanon o pisikal nga mga kakuyaw?

Dapita ang mga estudyante sa pagbasa og hilum sa Doktrina ug mga Pakigsaad 38:14–15 ug mangita kon giunsa pag-awhag sa Ginoo ang mga Santos atol niining panahon sa kakuyaw ug kawalay kasiguroan. Hangyoa ang mga estudyante sa pag-report sa unsay ilang nakaplagan.

Dapita ang usa ka estudyante sa pagbasa og kusog sa Doktrina ug mga Pakigsaad 38:16. Hangyoa ang klase sa pagsunod ug mangita kon unsay gihatag sa Ginoo ngadto sa mga Santos alang sa ilang kaluwasan. Tabangi ang mga estudyante nga makasabut nga ang sugo nga gipasabut mao ang sugo nga mamalhin gikan sa New York ngadto sa Ohio.

Sa unsang paagi kaha nga ang sugo nga mobalhin gikan sa New York nahimong alang sa pisikal nga kaluwasan sa mga Santos?
Sa unsang paagi nga ang sugo nga magpundok sa Ohio nahimong alang sa ilang espirituhanon nga kaluwasan?

Idugang ngadto sa baruganan nga naa sa pisara aron mabasa kini sama sa mosunod: Ang Ginoo makapasidaan kanato bahin sa kakuyaw ug makahatag kanato og mga sugo alang sa atong proteksyon.

Sa unsang paagi nga ang pagtuman sa mga sugo sa Ginoo makapanalipod kanato?
Kanus-a man kamo mibati nga gipanalipdan kamo pinaagi sa pagtuman og usa ka sugo? (Mahimo nimong hatagan ang mga estudyante og panahon sa pagpamalandong sa ilang mga tubag sa dili pa mohangyo nga motubag sila.)

Dapita ang mga estudyante sa paghinumdom sa kalihokan sa sinugdanan sa klase diin naghunahuna sila bahin sa mga sugo nga lisud nilang sundon. Hangyoa sila sa pagkonsiderar kon sa unsang paagi nga kining mga sugo mahimong mga panalangin gikan sa Ginoo aron sa pagpanalipod kanila gikan sa espirituhanon o pisikal nga mga kakuyaw.

Sa unsa nga paagi nga ang paghinumdom sa kamatuoran nga gisulat diha sa pisara nakaawhag kaninyo kon nga mosunod sa mga sugo sa Ginoo, ilabi na kon ang pagsunod niadtong mga sugo mahimong lisud?

Tapusa pinaagi sa pagdapit sa mga estudyante sa pagpakigbahin sa ilang mga pagpamatuod sa abilidad sa Ginoo sa pagpasidaan kanato bahin sa kakuyaw ug sa paghatag og mga sugo nga, kon sundon, makahatag kanato og proteksyon. Mahimo usab ikaw nga mopamatuod bahin niining kamatuoran.

Komentaryo ug Background nga Impormasyon

Doktrina ug mga Pakigsaad 38:16. “Alang sa inyong kaluwasan Ako mohatag nganha kaninyo og sugo”

Si Presidente George Albert Smith nagtudlo:

“Sa dihang bata pa ko akong nasayran, o naghunahuna nga ako nasayud, nga ang mga sugo sa Ginoo mao ang Iyang mga balaod ug mga patakaran aron sa paggiya kanako. Abi nako nga sa pagkadili masulundon niadto nga mga balaod ang silot mosunod. … Apan samtang nagkadako na ko akong nakat-unan ang leksyon sa laing panglantaw, ug karon alang kanako ang gitawag nga mga balaod sa Ginoo … mga maanindot lamang nga musika sa tingog sa atong Amahan sa langit sa Iyang kalooy ngari kanato. Kini mga pahimangno ug tambag lamang sa usa ka mahigugmaong ginikanan, kinsa mas naghunahuna sa atong kaayohan kay sa mahimo sa yutan-on nga mga ginikanan, ug sa ingon kadtong mga tambag nga sa usa ka higayon daw nagdala og mabangis nga pangalan sa balaod ngari kanako mao na karon ang mahigugmaon ug malumong tambag sa usa ka Langitnong Amahan nga labawng maalamon. Ug busa moingon ko nga dili lisud alang kanako nga motuo nga mao kini ang labing maayo alang kanako nga mosunod sa mga sugo sa Dios” (Mga Pagtulun-an sa mga Presidente sa Simbahan: George Albert Smith [2011], 228).