Leksyon 145
Doktrina ug mga Pakigsaad 135, Bahin 2
Pasiuna
Mao kini ang ikaduha sa duha ka leksyon sa Doktrina ug mga Pakigsaad 135 ug ang pagkamartir ni Joseph ug ni Hyrum Smith niadtong Hunyo 27, 1844. Niini nga leksyon ang mga estudyante maghisgot sa papel nga gidala ni Propeta Joseph Smith diha sa kaluwasan sa mga anak sa Dios.
Mga Sugyot alang sa Pagtudlo
Doktrina ug mga Pakigsaad 135
Ang pagmartir kang Joseph ug Hyrum Smith gipahibalo
Sa dili pa magklase, i-display ang litrato ni Joseph Smith diha sa atubangan sa kwarto (tan-awa sa Libro sa mga Hulagway sa Ebanghelyo [2009], nu. 87; tan-awa usab sa LDS.org). Mahimo nimong ikonsiderar ang paghangyo sa klase sa pagkanta sa “Praise to the Man” (Hymns, nu. 27) alang sa debosyonal nga himno. Sa dili pa manganta sa himno, ipasabut nga si W. W. Phelps misulat sa mga pulong sa himno agi og paghinumdom ni Propeta Joseph Smith human sa pagkamartir.
Sugdi ang leksyon pinaagi sa pagpangutana sa mosunod:
-
Nakaistorya na ba kamo og tawo kinsa dili miyembro sa Simbahan mahitungod ni Propeta Joseph Smith? Kon mao, bahin sa unsa man ang inyong giistorya? (Kon walay nakasinati niini, pangutan-a ang mga estudyante kon unsa ang ilang gustong isulti sa uban bahin ni Joseph Smith.)
Pahinumdumi ang mga estudyante nga ang Doktrina ug mga Pakigsaad 135 naglakip sa usa ka pahibalo sa pagkamartir ni Joseph ug Hyrum Smith. Dapita ang usa ka estudyante sa pagbasa og kusog sa unang sentence sa Doktrina ug mga Pakigsaad 135:3. Hangyoa ang klase sa pagsunod.
-
Unsa ang mensahe niini nga bersikulo? (Kinahanglang ipahayag sa mga estudyante nga si Joseph Smith nakahimo og daghan pa, gawas lamang kang Jesukristo, alang sa kaluwasan sa mga tawo niini nga kalibutan, kay ni bisan kinsa nga tawo nga nakapuyo dinhi.)
-
Unsa ang nabuhat ni Propeta Joseph Smith alang sa atong kaluwasan ug kahimayaan? (Isulat ang mga tubag sa mga estudyante diha sa pisara.)
Dapita ang usa ka estudyante sa pagbasa og kusog sa nahibilin sa Doktrina ug mga Pakigsaad 135:3. Hangyoa ang klase sa pagsunod, nga mangita sa mga pulong nga naghulagway kon unsay nahimo ni Joseph Smith alang sa atong kaluwasan. Hangyoa ang mga estudyante sa pagpangita og dugang nga mga item aron ipuno ngadto sa lista sa pisara.
Dapita ang usa ka estudyante sa pagbasa sa mosunod nga pamahayag ni Presidente Joseph F. Smith. Hangyoa ang klase sa pagpaminaw kon si kinsa ang naimpluwensya sa buhat ni Propeta Joseph Smith.
“Ang buhat nga gihimo ni Joseph Smith dili lamang kutob niining kinabuhia, apan may kalabutan usab kini ngadto sa umaabut nga kinabuhi, ug sa kinabuhi nga nanglabay na. Sa laing pagkasulti, may kalabutan kini niadtong nakapuyo sa kalibutan, niadtong kasamtangang namuyo ug niadtong umaabut pa nga mamuyo human kanato. Dili lang kini butang nga may kalabutan sa tawo samtang siya buhi pa, apan sa tanang tawhanong pamilya gikan sa tibuok kahangturan” (Gospel Doctrine, 5th ed. [1939], 481).
I-refer ngadto sa paghulagway bahin ni Joseph Smith nga mipagawas sa Basahon ni Mormon ug sa Doktrina ug mga Pakigsaad diha sa bersikulo 3. Aron matabangan ang mga estudyante nga mas makasabut sa kamahinungdanon niining buhat, dapita ang usa ka estudyante sa pagbasa og kusog sa Doktrina ug mga Pakigsaad 135:6. Hangyoa ang klase sa pagsunod, nga mangita og rason sa pagpagawas sa Basahon ni Mormon ug sa Doktrina ug mga Pakigsaad.
-
Sumala sa bersikulo 6, nganong gipagawas ang Basahon ni Mormon ug ang Doktrina ug mga Pakigsaad? (Ang mga estudyante mahimong mogamit og laing mga pulong, apan kinahanglan silang mahibalo sa mosunod nga kamatuoran: Ang Basahon ni Mormon ug ang Doktrina ug mga Pakigsaad gipagawas alang sa kaluwasan sa kalibutan.)
-
Sa unsa nga mga paagi nga kining mga basahon makatabang sa pagdala sa kaluwasan sa kalibutan?
-
Sumala sa bersikulo 6, unsa ang nakapahimo sa Basahon ni Mormon ug sa Doktrina ug Pakigsaad nga malakip sa labing bililhon nga mga basahon nga mahimo ninyong maangkon?
Hangyoa ang mga estudyante sa pagpamalandong sa unsay ilang nahimo sa Basahon ni Mormon ug sa Doktrina ug mga Pakigsaad sa ilang kinabuhi.
-
Unsay atong mahimo aron ikapakita ang atong pagpasalamat alang sa gihimong sakripisyo ni Joseph ug ni Hyrum Smith sa pagpagawas niining mga basahon?
Dapita ang mga estudyante sa pagsulat diha sa ilang mga class notebook o mga scripture study journal og usa ka piho nga paagi nga sila makapakita sa ilang kamapasalamaton alang sa mga sakripisyo nga nahimo aron mapagawas kining mga basahon.
I-refer ngadto sa lista nga nasulat diha sa pisara sa pagsugod sa leksyon. Ipamatuod nga pinaagi sa pagtabang sa pagpahiuli sa kasulatan, tinuod nga doktrina, awtoridad ug mga yawe sa priesthood, mga ordinansa alang sa mga buhi ug sa mga patay, ug sa pag-organisar sa Simbahan ni Jesukristo, si Joseph Smith mitabang sa tanang anak sa Dios nga makabaton sa hingpit nga paagi sa mga panalangin sa Pag-ula.
Ipasabut nga ang pipila ka mga tawo mahimong masayop sa pagsabut sa mga pagbati o pagtuo sa mga Santos sa Ulahing mga Adlaw mahitungod ni Propeta Joseph Smith. Dapita ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley. Hangyoa ang klase sa pagpaminaw kon unsa ang pagtan-aw sa mga miyembro sa Simbahan ngadto kang Joseph Smith kalabut sa Langitnong Amahan ug ni Jesukristo. Kon posible, mahimo nimong hatagan og kopya ang matag estudyante og kopya niining pamahayag.
“Kita wala magsimba sa Propeta. Nagsimba kita sa Dios ang atong Mahangturon nga Amahan ug sa nabanhaw nga Ginoong si Jesukristo. Apan atong giila ang Propeta; kita nagsangyaw kaniya; kita mitahud kaniya; mitamud kita kaniya isip usa ka instrumento diha sa mga kamot sa makagagahum sa pagpahiuli diha sa yuta ang karaan nga mga kamatuoran sa balaan nga ebanghelyo, uban sa priesthood diin pinaagi ang awtoridad sa Dios gigamit diha sa mga kalihokan sa Iyang Simbahan ug alang sa mga panalangin sa Iyang mga katawhan” (Joseph Smith Jr.—Prophet of God, Mighty Servant,” Liahona, Dis. 2005, 2).
-
Sa inyong kaugalingong mga pulong, unsaon ninyo sa pagpasabut ang mga pagbati sa mga miyembro sa Simbahan mahitungod ni Propeta Joseph Smith?
Dapita ang mga estudyante sa paghunahuna bahin sa epekto sa pagpangalagad ni Propeta Joseph Smith diha sa ilang mga kinabuhi ug sa minilyon ka kinabuhi sa tibuok kalibutan. Isulat ang mosunod nga mga pangutana diha sa pisara, ug hangyoa ang mga estudyante sa pagtubag niini diha sa ilang mga class notebook o mga scripture study journal:
Sa unsang piho nga mga paagi nga tingali ang inyong kinabuhi mahimong lahi kon wala pa ang pagpangalagad ni Propeta Joseph Smith?
Sa unsang paagi nga si Propeta Joseph Smith naka-impluwensya sa inyong kahibalo ug relasyon uban sa Langitnong Amahan ug ni Jesukristo?
Hangyoa ang usa ka estudyante sa pagbasa og kusog sa mosunod nga pamahayag ni Presidente Thomas S. Monson. Hangyoa ang klase sa pagpaminaw kon sa unsang paagi nga makatabang kita sa uban nga makasinati og kalipay sa ebanghelyo.
“[Si Propeta Joseph Smith] nagbilin og usa ka panulundon nga makapahimo sa [minilyon ka] sumusunod karon sa kada kontinente sa pagsangyaw kaniya isip usa ka propeta sa Dios. Hinaut nga, matag usa kanato, maningkamot sa pagpadayon sa panan-awon ni Propeta Joseph alang niining buhat ug sa pagpalambo sa iyang kabilin pinaagi sa atong mga buhat ug mga pagpamatuod ngadto sa uban, nga sila unta makaila kaniya sama sa atong pagkaila kaniya ug nga sila mahimong makasinati og kalinaw ug hingpit nga kalipay sa ebanghelyo nga iyang gipahiuli” (“Brother Joseph,” Church News, Dis. 31, 2005, 4).
-
Sa unsang paagi nga kita makatabang sa uban nga makasinati og hingpit nga kalipay sa ebanghelyo sigun sa gipahiuli pinaagi ni Propeta Joseph Smith?
Ipasabut nga ang nahabilin nga mga estudyante sa klase mahimong mopakigbahin sa ilang mga pagpamatuod ni Propeta Joseph Smith ug sa Pagpahiuli sa ebanghelyo. Dapita sila sa pagkonsiderar gamit ang ilang mga tubag gikan sa naunang kalihokan sa pagsulat samtang mopahayag sila sa ilang mga pagpamatuod.
Tapusa pinaagi sa paghatag sa imong pagpamatuod kang Propeta Joseph Smith ug sa Pagpahiuli. Dapita ang mga estudyante sa pagpangita og mga oportunidad sa mosunod nga pipila ka adlaw nga ipakigbahin sa uban ang ilang mga pagpamatuod bahin ni Propeta Joseph Smith ug sa iyang tahas sa pagpahiuli sa ebanghelyo ni Jesukristo.
Komentaryo ug Background nga Impormasyon
Si Propeta Joseph Smith mao ang usa ka saksi ni Jesukristo
Gitamud nato si Propeta Joseph Smith inubanan sa balaang pagtahud tungod sa unsay iyang nabuhat alang sa atong pagsabut kang Jesukristo ug sa Iyang misyon. Si Elder D. Todd Christofferson sa Korum sa Napulog Duha ka mga Apostoles miingon:
“Pinaagi sa iyang personal nga pakig-uban sa Ginoo, sa iyang paghubad ug pagmantala sa Basahon ni Mormon, ug sa pagsilyo sa iyang pagpamatuod uban sa iyang martir nga dugo, si Joseph nahimong nag-unang tigpadayag ni Jesukristo sa Iyang tinuod nga kinaiya isip balaan nga Manunubos. Si Jesus walay laing mas gamhanan nga saksi ni mas maunungon nga higala kay ni Joseph Smith” (“Natawo Pag-usab,” Liahona, Mayo 2008, 79; italics gidugang).
Ang impluwensya ni Joseph Smith
Niadtong tingpamulak sa 1844, si Josiah Quincy, kanhi mayor sa Boston, Massachusetts, ug unya presidente sa Harvard University, uban sa iyang ig-agaw nga si Charles Francis Adams, anak sa kanhi Presidente sa Estados Unidos nga si John Quincy Adams, mibisita sa Nauvoo. Migahin sila og usa ka adlaw uban ni Propeta Joseph Smith. Mga tuig ang milabay, si Josiah Quincy misulat sa iyang kasinatian:
“Dili gayud kini kadudahan nga ang ubang text-book sa umaabut, alang sa mga henerasyon nga wala pa gipanganak, maglakip og usa ka pangutana nga sama niini: Unsa nga makasaysayanong Amerikano sa ikanapulog siyam nga siglo ang nakapakita og labing gamhanang impluwensya sa mga kapalaran sa iyang katagilungsod? Ug dili gayud kini imposible nga ang tubag ngadto nianang pangutana mahimong nahisulat sama niini: Si Joseph Smith, ang Mormon nga propeta” (Figures of the Past: From the Leaves of Old Journals [1888], 376).