Doktrina ug mga Pakigsaad 99–100

Pasiuna

Si Propeta Joseph Smith nakadawat sa pagpadayag nga narekord sa Doktrina ug mga Pakigsaad 99 niadtong Agosto 29, 1832. Niini nga pagpadayag, ang Ginoo mitawag ni John Murdock sa pagpadayon sa pagserbisyo isip usa ka misyonaryo. Si Joseph Smith nakadawat sa pagpadayag nga narekord sa Doktrina ug mga Pakigsaad 100 niadtong Oktubre 12, 1833, samtang siya ug si Sidney Rigdon didto sa New York nagtrabaho isip mga misyonaryo. Niini nga pagpadayag, ang Ginoo misiguro kanila nga maayo ra ang ilang mga pamilya didto sa Ohio. Ang Ginoo mihupay usab kanila mahitungod sa mga Santos sa Missouri kinsa nag-antus og pagpanggukod.

Mga Sugyot alang sa Pagtudlo

Doktrina ug mga Pakigsaad 99

Ang Ginoo mitawag ni John Murdock sa pagpahayag sa ebanghelyo

Dapita ang mga estudyante sa paghunahuna nga usa ka higala kinsa dili miyembro sa Simbahan mangutana kanila ngano nga ang usa ka tawo andam nga mohatag og 2 ka tuig o 18 ka bulan sa iyang kinabuhi aron moserbisyo og misyon.

Unsaon ninyo pagtubag kini nga pangutana?

Hangyoa ang usa ka estudyante sa pagbasa og kusog sa mosunod nga impormasyon mahitungod sa usa ka tawo nga ginganlan og John Murdock. Dapita ang mga estudyante sa pagpaminaw sa mga sakripisyo nga gihimo ni John Murdock sa pagserbisyo sa Ginoo.

Si John Murdock miimbestigar og daghang mga simbahan ug nakaingon nga ang tanang mga relihiyon nahisalaag. Hinoon, sa ulahing bahin sa 1830, mibasa siya sa Basahon ni Mormon ug mibati sa Espiritu Santo nga misaksi sa kamatuoran niini. Siya nabunyagan niadtong Nobyembre 5, 1830. Sa wala madugay human niadto, miserbisyo siya og misyon, nagbunyag og 70 ka tawo sulod sa upat ka bulan didto sa Orange, Ohio, ug Warrensville, Ohio.

Niadtong Abril 30, 1831, sa wala madugay human si Brother Murdock mipauli gikan sa iyang misyon, ang iyang asawa, nga si Julia, namatay human manganak og kaluha. Niadtong Hunyo 1831, ang Ginoo mitawag kaniya sa pag-adto sa Missouri ug pagsangyaw sa ebanghelyo sa iyang maagian (tan-awa sa D&P 52:8–9). Sa dili pa siya molakaw, kinahanglan niyang siguroon nga ang iyang lima ka anak, ang tanan ubos sa edad nga siete, maatiman. Nakigsabut siya og pipila ka mga indibidwal nga moatiman sa iyang mas dagko nga mga anak, ug si Joseph ug Emma Smith misagop sa kaluha. Alang sa nahibilin sa1831 ug sa unang katunga sa 1832, si John Murdock misangyaw sa Michigan Territory, Indiana, Missouri, ug Ohio. Sa dihang mipauli siya ngadto sa Hiram, Ohio niadtong Hunyo 1832, nag-antus siya sa mga epekto sa usa ka dugay na nga sakit. Nahibaloan niya nga usa sa iyang kaluha nasakit ug namatay tungod sa kabugnaw atol sa usa ka pag-ataki kang Joseph Smith.

Unsay nakapadani ninyo niini nga istorya ni John Murdock?

Ipasabut nga si Joseph Smith nakadawat og pagpadayag nga narekord sa Doktrina ug mga Pakigsaad 99 niadtong Agosto 29, 1832, mga duha ka bulan human si Brother Murdock miabut gikan sa iyang ikaduhang misyon.

Dapita ang mga estudyante sa pagbasa og hilum sa Doktrina ug mga Pakigsaad 99:1, ug mangita unsay gitawag sa Ginoo nga buhaton ni John Murdock.

Unsa ang gisugo sa Ginoo nga buhaton ni John Murdock?
Sa unsang paagi nga kining tawag sa misyon misulay sa hugot nga pagtuo ug pagkamasulundon ni Brother Murdock?

Dapita ang usa ka estudyante sa pagbasa og kusog sa Doktrina ug mga Pakigsaad 99:2–3. Hangyoa ang klase sa pagsunod, nga mangita kon unsay gisaad sa Ginoo ni John Murdock.

Unsa nga mga doktrina ug mga baruganan ang atong makat-unan gikan sa mga bersikulo 2–3? (Ang mga tubag sa mga estudyante mahimong maglakip sa mosunod: Nagrepresentar kita sa Ginoo kon mangalagad kita og misyon. Kon kita modawat ug mosunod sa mga sulugoon sa Ginoo, nagdawat ug nagsunod kita Kaniya.)
Sa unsang paagi kamo gipanalanginan sa inyong pagsunod sa mga sulugoon sa Ginoo?

Dapita ang usa ka estudyante sa pagbasa og kusog sa Doktrina ug mga Pakigsaad 99:4–5. Hangyoa ang klase sa pagsunod, nga mangita kon unsay gisulti sa Ginoo nga mahitabo niadtong mosalikway sa mensahe nga itudlo ni John Murdock kanila.

Sumala sa bersikulo 4, unsa ang sangputanan sa pagsalikway sa mensahe sa ebanghelyo nga gisangyaw sa mga sulugoon sa Ginoo?

Dapita ang usa ka estudyante sa pagbasa og kusog sa Doktrina ug mga Pakigsaad 99:6–8. Hangyoa ang klase sa pagsunod, nga mangita og ebidensya nga ang Ginoo nakahibalo sa mga panginahanglan ni John Murdock ug sa mga sakripisyo nga iyang gihimo.

Unsa ang gipakita sa mga pulong sa Ginoo ngadto ni John Murdock?

ipasabut nga si Brother Murdock misunod sa tambag sa Ginoo. Nakigsabut siya alang sa iyang tulo ka kamagulangang mga anak nga mopuyo sa lain-laing mga pamilya sa Missouri, ug mibiya siya niadtong Septyembre 1832 aron mosangyaw sa ebanghelyo. Miserbisyo siya og daghan pang mga misyon, ug dayon mipauli siya ngadto sa iyang mas magulang nga mga anak didto sa Missouri. Matinud-anon siyang nagserbisyo sa Ginoo sa nahibiling panahon sa iyang kinabuhi.

Doktrina ug mga Pakigsaad 100:1–12

Ang Ginoo mihatag ni Joseph Smith ug Sidney Rigdon og makahupay nga mga pulong ug instruksyon

Isulat ang mosunod nga pangutana diha sa pisara: Unsa ang pipila ka mga kabalaka nga naa sa mga misyonaryo inig sugod nila sa ilang mga misyon? Dapita ang usa ka estudyante nga mahimong tigsulat ug mosulat sa mga tubag sa mga estudyante diha sa pisara. (Ang mga tubag sa mga estudyante mahimong maglakip sa mosunod: Unsaon nako pagpangita sa mga tawo nga katudloan? Unsaon nako pagkahibalo unsay isulti? Magkauyon kaha kami sa akong mga kompanyon? Okay ra ba kaha ang akong pamilya samtang wala ko?)

Ipasabut nga niadtong Abril 1833 usa ka tawo nga ginganlan og Freeman Nickerson miapil sa Simbahan didto sa New York ug miadto sa Kirtland, Ohio. Sa dihang nahimamat ni Freeman si Joseph Smith, iyang gihangyo ang Propeta sa pagbisita sa pamilya Nickerson sa New York ug Canada. Sila si Joseph Smith ug Sidney Rigdon miuyon sa iyang sugyot, ug mibiya sila sa Kirtland uban kaniya niadtong Oktubre 5, 1833. Sa ilang maagian, gisangyaw nila ang ebanghelyo. Sa ilang pag-abut sa panimalay sa Nickerson didto sa Perrysburg, New York, si Joseph nakadawat og pagpadayag nga narekord sa Doktrina ug mga Pakigsaad 100.

Dapita ang mga estudyante sa pagbasa og hilom sa pasiuna sa seksyon hangtud sa Doktrina ug mga Pakigsaad 100, mangita kon unsay gikabalak-an nila ni Joseph Smith ug Sidney Rigdon sa ilang pag-abut sa New York. Human maka-report ang mga estudyante sa ilang nakit-an, ipasabut nga si Joseph Smith misulat sa iyang journal sa iyang gikabalak-an: “Gibati nako pag-ayo nga ang Ginoo nag-uban namo apan nabalaka pag-ayo sa akong pamilya” (Journals, Volume 1: 1832–1839, vol. 1 of the Journals series of The Joseph Smith Papers [2008], 14).

Dapita ang usa ka estudyante sa pagbasa og kusog sa Doktrina ug mga Pakigsaad 100:1–2. Hangyoa ang klase sa pagsunod, nga mangita sa tubag sa Manluluwas sa kabalaka nila ni Joseph Smith ug Sidney Rigdon.

Unsa nga mga pulong niini nga mga bersikulo ang nakapahupay sa kabalaka nila ni Joseph Smith ug Sidney Rigdon? Sa unsa nga paagi nga kini nga mga bersikulo makatabang sa mga misyonaryo karon?

Dapita ang usa ka estudyante sa pagbasa og kusog sa Doktrina ug mga Pakigsaad 100:3–4. Hangyoa ang klase sa pagsunod, nga mangita unsay gisaad sa Ginoo ngadto nila ni Joseph Smith ug Sidney Rigdon.

Unsa sa imong hunahuna ang gipasabut sa “usa ka masangputon nga pultahan” nga naabli alang sa pagpakigbahin sa ebanghelyo?
Unsa ang pipila ka mga paagi ang Ginoo “moabli sa mga pultahan” alang kanato sa paghimo sa misyonaryo nga buhat?

Dapita ang mga estudyante sa pagbasa og hilum sa Doktrina ug mga Pakigsaad 100:5–8, nga mangita sa dugang nga mga saad gikan sa Ginoo. Human maka-report ang mga estudyante unsay ilang nakit-an, isulat sa pisara ang Kon , dayon .

Unsay atong makat-unan gikan sa mga bersikulo 5–6? (Ang mga estudyante mahimong mogamit og lain-laing mga pulong, apan kinahanglan nilang ilhon ang mosunod nga baruganan: Kon atong ipataas ang atong mga tingog sa pagpakigbahin sa ebanghelyo, dayon ang Ginoo motabang nato nga makahibalo unsay isulti.)
Sumala sa bersikulo°7, sa unsang paagi ang Ginoo gusto nga isangyaw sa mga misyonaryo ang ebanghelyo?
Sumala sa bersikulo 8, unsay gisaad sa Ginoo kon kita mosangyaw sa ebanghelyo uban sa “kaligdong sa kasingkasing” ug “diha sa espiritu sa kaaghup”? (Ang mga estudyante kinahanglang mopahayag sa mosunod nga baruganan: Kon mopakigbahin kita sa ebanghelyo ngadto sa uban sa kaligdong sa kasingkasing ug diha sa espiritu sa kaaghup, dayon ang Espiritu Santo mosaksi sa atong mensahe.)

Dapita ang mga estudyante sa paghunahuna og higayon sa dihang ang Ginoo mitabang nila nga makahibalo unsay isulti samtang sila mipakigbahin sa ebanghelyo. Dapita usab sila sa paghunahuna og higayon sa dihang gibati nila ang Espiritu nga misaksi sa butang nga ilang gisulti. Dapita ang pipila ka mga estudyante sa pagpakigbahin sa ilang mga kasinatian.

Dapita ang usa ka estudyante sa pagbasa og kusog sa Doktrina ug mga Pakigsaad 100:9–12. Hangyoa ang klase sa pagsunod, nga mangita sa mga instruksyon nga gihatag sa Ginoo ngadto nila ni Joseph Smith ug Sidney Rigdon.

Sumala sa bersikulo 12, ngano nga sila si Joseph Smith ug Sidney Rigdon “mihimo sa [ilang] mga kasingkasing nga malipay”?
Unsa kaha ang gipasabut sa saad sa bersikulo 12 nganha kaninyo kon kamo nagserbisyo og misyon?

Ipasabut nga ang misyonaryo nga mga paningkamot nila ni Joseph Smith ug Sidney Rigdon adunay malungtarung impluwensya sa Simbahan. Pananglitan, si Joseph Smith ug Sidney Rigdon misangyaw ngadto sa dako nga grupo didto sa panimalay sa Nickerson ug sa dugang nga mga grupo didto sa Canada. Ang mga misyonaryo mibunyag og dul-an sa 20 ka indibidwal, lakip ni Moses Nickerson, ug miorganisar og branch sa Simbahan. Niadtong1836, si Parley P. Pratt mibisita niana nga branch samtang siya nagserbisyo og misyon sa Canada. Si Moses Nickerson mipaila ni Elder Pratt ngadto ni John Taylor. Si Elder Pratt mibunyag ni John Taylor, kinsa nahimong malampusong misyonaryo ug nahimong Presidente sa Simbahan.

Doktrina ug mga Pakigsaad 100:13–17

Ang Ginoo mihupay nila ni Propeta Joseph Smith ug Sidney Rigdon kabahin sa mga pagsulay sa mga Santos sa Missouri

Ipasabut nga mga duha ka bulan sa wala pa mobiya si Joseph Smith niini nga misyon, si Oliver Cowdery nagdala og balita gikan sa Missouri nga ang mga kaaway sa Simbahan nahimo nang bayolente batok sa mga Santos sa Ulahing mga Adlaw. Gipadala ni Joseph Smith sila si Orson Hyde ug John Gould sa paghatag og tambag gikan kaniya ngadto sa mga Santos sa Missouri. Kini nga biyahe makuyaw tungod kay moagi sila sa mga dapit nga duol sa mga mangugubot nga panon nga anti-Mormon. Ang Propeta nabalaka kang Brother Hyde ug Brother Gould ug sa tanang mga Santos nga gipanggukod didto sa Missouri.

Dapita ang usa ka estudyante sa pagbasa og kusog sa Doktrina ug mga Pakigsaad 100:13–17. Hangyoa ang klase sa pagsunod, nga mangita sa unsay gisulti sa Ginoo ni Joseph Smith. Hangyoa ang mga estudyante sa pag-summarize unsay ilang nakit-an.

Unsa nga saad ang inyong nakita sa mga bersikulo 15–17? (Ang mga estudyante mahimong mogamit og laing mga pulong, apan kinahanglan nilang ilhon ang mosunod nga baruganan: Ang tanang mga butang molihok alang sa atong kaayohan kon kita maglakaw sa katarung sa atubangan sa Ginoo.)
Unsa sa imong hunahuna ang ipasabut sa “maglakaw sa katarung” sa atubangan sa Ginoo?
Sa unsa nga paagi nga ang saad sa mga bersikulo 15–17 makatabang ninyo sa malisud nga mga panahon?

Dapita ang pipila ka estudyante sa paghatag og mga ehemplo kon sa unsa nga paagi ilang nakita nga natuman kini nga saad. Mahimo usab nga imong ipakigbahin ang imong pagpamatuod niini nga kamatuoran. Dapita ang mga estudyante sa paghunahuna og piho nga mga butang nga ilang mabuhat aron “maglakaw sa katarung” sa atubangan sa Ginoo.

Komentaryo ug Background nga Impormasyon

Doktrina ug mga Pakigsaad 100:1. “Ako mohimo ngadto kanila unsa ang akong buot buhaton nga maayo”

Si Elder Dallin H. Oaks sa Korum sa Napulog Duha ka mga Apostoles mitudlo:

“[Ang Ginoo] mohimo og mas labaw pa kay sa unsay labing maayo alang kanato. Buhaton Niya unsay labing maayo alang kanato ug alang sa tanang mga anak sa atong Langitnong Amahan. … Ang Ginoo nakahibalo labaw pa sa atong nahibaloan ug … tubagon niya ang atong mga pag-ampo sa paagi nga labing maayo alang nato ug alang sa iyang ubang mga anak” (“Faith in the Lord Jesus Christ,” Ensign, Mayo 1994, 99).

Doktrina ug mga Pakigsaad 100:3. “Usa ka masangputon nga pultahan pagabuksan diha sa naglibut nga mga rehiyon”

Niadtong 1833, ang misyonaryo nga mga paningkamot miandam sa rehiyon libut sa silangan sa Lake Erie ug habagatang kasadpan sa Lake Ontario alang sa kalamboan sa Simbahan. Sa ting-init nianang tuiga, ang Evening and Morning Star mimantala og mga sulat gikan sa lain-laing mga misyonaryo nga mihulagway sa malamboong mga paningkamot sa pagkakabig sa dapit diin silang Joseph Smith ug Sidney Rigdon nag-proselyte. Si Sylvester Smith mi-report nga 15 ka mga simbahan na-establisar talilwala sa Kirtland, Ohio, ug Chenango, New York, pipila niini gilangkuban sa dul-an 100 ka mga miyembro. Ang mga misyonaryo nagmalampuson usab sa pagproselyte sa habagatang kasadpang New York. Si Amasa Lyman mibiyahe ngadto sa duol nga Cattaraugus County, New York, niadtong 1833. Didto naghimo siya og 152 ka mga miting ug nakakita og 100 ka mga kalag ang nadugang sa Simbahan.

Doktrina ug mga Pakigsaad 100:5–8. Ang Ginoo mohatag nato unsay isulti

Si Elder D. Todd Christofferson sa Korum sa Napulog Duha ka mga Apostoles mipasabut sa tahas sa Espiritu Santo sa atong mga paningkamot sa pagsangyaw sa ebanghelyo:

“Ang Espiritu Santo mao ang mohatag og pagsaksi sa inyong mga pulong kon kamo motudlo ug mopamatuod. Kini mao ang Espiritu Santo nga, samtang kamo mamulong diha sa lisud nga mga kahimtang, mobutang diha sa inyong kasingkasing sa unsay kinahanglan ninyong isulti ug motuman sa saad sa Ginoo nga ‘kamo dili pagalibugon sa atubangan sa mga tawo’ (D&P 100:5“Ang Gahum sa mga Pakigsaad,” Liahona, Mayo 2009, 22).