Leksyon 159
Ang Pamilya: Usa ka Pamahayag ngadto sa Kalibutan
Pasiuna
Niadtong Septyembre 23, 1995, sa usa ka kinatibuk-ang miting sa Relief Society, si Presidente Gordon B. Hingkley mipaila sa “Ang Pamilya: Usa ka Pamahayag ngadto sa Kalibutan.” Kini nga pamahayag gikan sa Unang Kapangulohan ug sa Korum sa Napulog Duha ka mga Apostoles nagdeklarar ngadto sa kalibutan sa mga sumbanan ug mga doktrina sa Ginoo kalabut sa pamilya. Ang pamahayag naghatag usab og tambag alang sa pagpalig-on sa mga pamilya ug usa ka pasidaan bahin sa mga sangputanan sa pagkaguba sa mga pamilya.
Pahinumdom Siguroa nga ang matag estudyante adunay kopya sa “Ang Pamilya: Usa ka Pamahayag ngadto sa Kalibutan.” Kini nga dokumento makita sa pahina 129 sa Nobyembre 2010 nga isyu sa Ensign o Liahona, sa Katungdanan ngadto sa Dios ug sa Personal nga Kauswagan nga mga booklet, sa Matinud-anon sa Tinuhoan ubos sa “Pamilya,” ug sa LDS.org. Makita usab nimo ang kopya sa pamahayag sa pamilya diha sa apendiks niini nga manwal.
Mga Sugyot alang sa Pagtudlo
Ang Unang Kapangulohan ug ang Korum sa Napulog Duha ka mga Apostoles miisyu og usa ka pamahayag ngadto sa kalibutan kalabut sa pamilya
Sa dili pa magklase, ilista ang mosunod nga mga pulong diha sa pisara:
Ang kaimportante sa kaminyoon ug sa pamilya
Diborsyo
Kaminyoon sa managsamang sekso
Gender
Pagbaton og mga anak
Sekswal nga mga relasyon sa gawas sa kaminyoon
Mga tahas sa mga inahan
Mga tahas sa mga amahan
Aborsyon
Sugdi ang klase pinaagi sa pagpangutana sa mosunod:
-
Pinaagi sa pagpataas sa mga kamot, pila kaninyo ang adunay mga pangutana o nakaila og tawo nga adunay mga pangutana kalabut sa usa o mas daghang isyu nga anaa sa pisara?
-
Asa man nato makita ang mga instruksyon sa Ginoo bahin niining mga hisgutanan?
Ipang-apud-apod ang mga kopya sa “Ang Pamilya: Usa ka Pamahayag ngadto sa Kalibutan” ngadto sa mga estudyante. (Mahimo nimong dapiton ang mga estudyante sa pag-ihap sa mga paragraph diha sa pamahayag aron sayon ra nilang masunod kon mag-refer ka ngadto sa lain-lain nga mga paragraph.) Ipasabut nga si Presidente Gordon B. Hinckley mipahibalo niining pamahayag niadtong Septyembre 23, 1995, diha sa usa ka kinatibuk-ang miting sa Relief Society. Sa wala pa kini basaha ni Presidente Hinckley, namulong siya og pipila ka mga rason nganong ang kalibutan nagkinahanglan sa mga kamatuoran nga anaa niini. Dapita ang usa ka estudyante sa pagbasa og kusog sa mosunod nga pamahayag ni Presidente Hinckley. Hangyoa ang klase sa pagpaminaw sa mga rason kon nganong ang kalibutan nagkinahanglan niining pamahayag.
“Uban sa daghang hiwi nga pangatarungan nga gipakatap nga maoy tinuod, uban sa daghang panglingla kabahin sa mga sumbanan ug mga hiyas, uban sa daghang pangdani ug tintasyon nga anam-anam nga nagmantsa sa kalibutan, among gibati nga mopasidaan ug mopahimangno. Sa pagpadayon niini, kami sa Unang Kapangulohan ug ang Konseho sa Napulog Duha ka mga Apostoles karon mopagawas niini nga pamahayag ngadto sa Simbahan ug sa kalibutan isip usa ka pamahayag ug pagpalanog pag-usab sa mga sumbanan, mga doktrina, ug mga buhat nga may kalabutan sa pamilya diin ang mga propeta, mga manalagna, ug mga tigpadayag niini nga simbahan mibalik-balik sa pagpahayag sa tibuok kasaysayan niini ” (“Stand Strong against the Wiles of the World,” Ensign, Nob. 1995, 100).
-
Nganong giisyu man kini nga pamahayag ngadto sa Simbahan ug sa kalibutan?
Ipasabut nga kon kita motuon sa “Ang Pamilya: Usa ka Pamahayag ngadto sa Kalibutan,” makadawat kita og mga tubag sa daghang mga pangutana mahitungod sa pamilya. Aron matabangan ang mga estudyante nga makahibalo sa mga doktrina nga makatabang kanila nga mas maklaro ang pagsabut sa mga hilisgutan diha sa pisara, dapita ang lima ka mga estudyante nga magpuli-puli sa pagbasa og kusog gikan sa mga paragraph 1–5 sa pamahayag. Hangyoa ang klase sa pagsunod ug sa pagpangita sa mga doktrina nga may kalabutan sa mga hisgutanan diha sa pisara. Hunong human sa matag paragraph aron mahatagan og higayon ang mga estudyante sa pagreport kon unsay ilang nakit-an. Dapita ang mga estudyante sa pagmarka sa mga doktrina nga ilang makit-an diha sa ilang mga kopya sa pamahayag sa pamilya.
Samtang magreport ang mga estudyante, dapita sila sa pagsulat diha sa pisara sa mga doktrina nga ilang nahibaloan. Mahimong mahibaloan ug masulat sa mga estudyante ang mosunod nga mga doktrina:
Ang kaminyoon tali sa usa ka lalaki ug usa ka babaye gi-orden sa Dios [paragraph 1].
Ang pamilya mao ang sentro sa plano sa Langitnong Amahan [paragraph 1].
Ang pagkalalaki ug pagkababaye [gender] usa ka mahinungdanon nga kinaiya sa tagsa-tagsa sa kinabuhi nga wala pa dinhi sa yuta, sa pagkamortal, ug sa walay katapusan nga pag-ila ug katuyoan [paragraph 2].
Ang balaan nga plano sa kalipay makahimo sa mga relasyon sa pamilya nga magpadayon human sa kamatayon. [paragraph 3].
Ang sugo sa Dios alang sa mga bana ug mga asawa sa pagbaton og mga anak nagpabilin nga gipatuman karon [paragraph 4].
Ang Dios misugo nga ang sagrado nga mga gahum sa paglalang pagagamiton lamang tali sa lalaki ug babaye, kinsa legal nga naminyo isip bana ug asawa. [paragraph 4].
Ang paglalang sa mortal nga kinabuhi sagrado ug importante nga bahin sa plano sa Langitnong Amahan mga paragraph 3 ug 5].
Samtang moreport ang mga estudyante sa matag doktrina nga ilang nahibaloan, gamita ang usa o daghan pa sa pang-follow-up nga mga pangutana sa ubos aron matabangan sila nga mas masabtan ang doktrina.
-
Sa unsang paagi nga kining doktrina may kalabutan sa mga hisgutanan nga nalista sa pisara?
-
Ngano kaha nga importante nga masabtan kining doktrina?
-
Sa unsa nga paagi nga ang pagsabut ug pagtuo niining doktrina makaimpluwensya sa mga desisyon nga inyong himoon?
Kon wala maghisgot ang mga estudyante og bisan unsang mga doktrina nga nalista sa ibabaw, tabangi ang mga estudyante nga matultulan ug mahisgutan kini.
Ang pamahayag sa pamilya makatabang kanato sa pag-establisar og malampuson nga mga pamilya
Dapita ang mga estudyante sa paghunahuna mahitungod sa unsay matang sa pamilya ang gusto nilang maangkon.
-
Unsa kaha nga matang sa mga kalihokan, mga kinaiya, pamatasan, ug mga tinuohan ang makahatag og kalipay ngadto sa inyong umaabut nga pamilya?
Bahina ang mga estudyante ngadto sa ginagmay nga mga grupo. Dapita ang matag grupo nga magdungan sa pagbasa og kusog sa mga paragraph 6–7 sa pamahayag sa pamilya. Dapita sila sa pagtan-aw sa mga butang nga makatabang kanila nga makakab-ot og kalipay diha sa ilang mga pamilya. Human sa igong panahon, ipangutana ang mosunod ngadto sa tibuok klase:
-
Sa unsang paagi nga makab-ot ang kalipay diha sa pamilya? (Kinahanglang mahibaloan sa mga estudyante ang mosunod nga baruganan: Ang kalipay sa kinabuhi sa pamilya ingon og makab-ot kon pinasikad diha sa mga pagtulun-an ni Ginoong Jesukristo. Mahimo nimong isugyot nga markahan sa mga estudyante kini nga baruganan diha sa ilang mga kopya sa pamahayag sa pamilya.)
-
Sumala sa paragraph 6 ug 7, unsa ang pipila ka mga baruganan nga makatabang sa mga pamilya nga makakaplag og kalipay? (Ikonsiderar ang pagdapit og usa ka estudyante sa pagsulat sa mga tubag sa mga estudyante diha sa pisara.)
Dapita ang mga estudyante sa paghisgot sa mosunod nga mga pangutana kauban sa ilang ginagmay nga mga grupo. Hatagi ang matag grupo og kopya sa mga pangutana, o isulat kini nga mga pangutana diha sa pisara.
Unsa nga mga ehemplo ang inyong nakita sa mga pamilya nga nagsunod sa mga pagtulun-an nga nalista diha sa pisara?
Ngano kaha nga ang mga pamilya nga mosunod niining mga pagtulun-an mas lagmit nga mahimong malipayon?
Pahinumdom: Tungod kay ang kinaiyahan sa relasyon sa pamilya sensitibo ug indibidwal, ayaw dapita ang mga estudyante sa paghisgot og kusog sa mosunod nga kalihokan. Awhaga hinoon ang mga estudyante nga hinuktukan sa kada usa kining mga pagtulun-an ug mamalandong kon unsaon nila sa paglambo.
Human ang grupo nakahigayon sa paghisgot sa mga pangutana, hangyoa ang mga estudyante sa pagpamalandong kon hain niining mga pagtulun-an nga ilang gisunod sa ilang pamilya ug kon sa unsang paagi nga ang pagbuhat sa ingon nakadugang og kalipay ngadto sa ilang mga pamilya. Dapita ang mga estudyante sa pagkonsiderar kon hain sa mga pagtulun-an diha sa pamahayag nga mas masunod nila og maayo sa pagpaningkamot nga makahatag og dugang kalipay sa ilang mga kaugalingon ug sa ilang mga pamilya. Mahimo nimong dapiton ang mga estudyante sa pagsulat og usa ka tumong kon unsaon nila pagplano aron mas masunod og maayo kining mga pagtulun-an diha sa ilang mga pamilya.
Kon aduna pay panahon, pagpili og duha o mas daghan pa sa mosunod nga mga pangutana aron hisgutan sa klase:
-
Sumala sa katapusang katunga sa paragraph 7, unsay nag-unang mga responsibilidad sa mga amahan? Sa unsa nga mga paagi nga inyong nakita ang inyong amahan o laing mga amahan nga nagtuman niining mga responsibilidad?
-
Sumala sa katapusang katunga sa paragraph 7, unsay nag-unang responsibilidad sa mga inahan? Sa unsa nga mga paagi nga inyong nakita ang inyong inahan o laing mga inahan nga nagtuman niining tahas?
-
Unsa ang gipasabut nga kining mga responsibilidad nahatag “pinaagi sa balaan nga plano”? (Giestablisar kini sa atong Langitnong Amahan.) Nganong importante kini nga masabtan?
-
Hain sa mga pulong sa paragraph 7 ang makatabang kanato nga masabtan kon sa unsang paagi nga ang mga amahan ug mga inahan motabang sa usag usa? (Kinahanglang mahibaloan sa mga estudyante ang mosunod nga baruganan: Ang mga amahan ug mga inahan obligado sa pagtabang sa usag usa isip magkatimbang nga magkauban sa ilang mga responsibilidad sa pamilya.)
-
Ngano kaha nga importante alang sa mga inahan ug mga amahan nga masabtan nga sila magkatimbang nga magkauban?
Dapita ang mga estudyante sa pagpakigbahin kon sa unsang paagi nga ilang nakita ang mga inahan ug mga amahan nga nagtinabangay isip magkatimbang nga magkauban.
Samtang maghisgot ang mga estudyante sa panginahanglan sa mga amahan ug mga inahan sa pag-abag sa usag usa, mahimo nimong idirekta ang ilang pagtagad ngadto sa mosunod nga sentence duol sa katapusan sa paragraph 7: “Kakulangan, kamatayon, o laing mga kahimtang mahimong manginahanglan sa pagsagop.” Ipasalig sa mga estudyante nga ang Ginoo nakahibalo niining mga kahimtang ug nagpanalangin Siya sa mga ginikanan ug mga pamilya samtang sila naningkamot sa pagtuman sa ilang mga obligasyon.
-
Sumala sa katapusan nga sentence sa paragraph 7, kinsa pay laing makatabang sa mga inahan ug mga amahan sa ilang mga responsibilidad? (Mga kaparyentihan nga mga sakop sa pamilya. Mahimo nimong ipasabut nga ang mga anak mahimo usab nga makatabang sa ilang mga ginikanan.)
Ipasabut nga kada pamilya adunay kaugalingong mga kalisdanan apan nga kada pamilya makasunod sa mga pagtulun-an ni Jesukristo ug makakaplag og kalipay.
Dapita ang usa ka estudyante sa pagbasa og kusog sa mga paragraph 8 ug 9 sa pamahayag sa pamilya. Hangyoa ang klase sa pagsunod, nga mangita kon unsay mahitabo kon dili kita motuman sa atong mga responsibilidad diha sa atong mga pamilya.
-
Unsay mahitabo kon atong isalikway ang atong mga responsibilidad sa atong pamilya? (Kinahanglang mopadayag ang mga estudyante nga manubag kita sa Ginoo kon kita dili motuman sa atong mga responsibilidad sa atong mga pamilya. Mahimo usab nilang ipasabut nga ang pagkaguba sa pamilya mosangput og mga kalamidad.)
-
Unsa kaha ang mga responsibilidad sa mga bata diha sa pamilya?
Dapita ang mga estudyante sa pagpamalandong kon unsaon nila sa pagtuman sa ilang mga responsibilidad diha sa ilang mga pamilya. Kon gidapit nimo sila sa pagrekord og usa ka tumong aron mas masunod og maayo ang usa ka pagtulun-an gikan sa pamahayag sa pamilya, awhaga sila sa pagtinguha sa tabang sa Ginoo samtang nagtinguha sila sa pagtuman sa ilang mga tumong.
Tapusa pinaagi sa paghangyo og pipila ka mga estudyante sa pagpakigbahin sa ilang mga pagpamatuod sa bisan unsang mga kamatuoran nga natudlo dinhi niining leksyon. Mahimo usab nimong ipakigbahin ang imong pagpamatuod bahin sa mga doktrina ug mga baruganan diha sa pamahayag sa pamilya.
Komentaryo ug Background nga Impormasyon
Kaminyoon tali sa usa ka lalaki ug usa ka babaye
Nagkutlo og duha ka tudling gikan sa “Ang Pamilya: Usa ka Pamahayag ngadto sa Kalibutan,” si Elder David A. Bednar sa Korum sa Napulog Duha ka mga Apostoles mipasabut kon nganong ang kaminyoon tali sa usa ka lalaki ug usa ka babaye mahinungdanon sa plano sa Langitnong Amahan:
“Ang matarung nga kaminyoon usa ka sugo ug usa ka mahinungdanong lakang sa paagi sa pagtukod og mahigugmaong relasyon sa pamilya nga mahimong palungtaron lapas sa lubnganan.
“Duha ka mahangturong doktrinal nga mga rason ang nagtabang kanato pagsabut ngano nga ang mahangturong kaminyoon importante sa plano sa Amahan.
“Rason 1: Ang mga kinaiya sa mga espiritu sa lalaki ug babaye nagkompleto ug naghingpit sa usag usa, ug busa ang mga lalaki ug babaye gituyo nga mouswag og dungan ngadto sa kahimayaan.
“Ang mahangturong kinaiyahan [nature] ug ang kamahinungdanon sa kaminyoon masabut sa hingpit sulod lamang sa kinatibuk-ang kahulugan sa plano sa Amahan alang sa Iyang mga anak. …
“‘Ang pagkatawo [gender] usa ka mahinungdanong kinaiya sa tagsa-tagsa ka kinabuhi sa wala pa dinhi sa yuta, sa pagkamortal, ug sa walay katapusang pag-ila ug katuyoan’ ug sa dakong bahin nagpaila kinsa kita, nganong ania kita sa kalibutan, ug unsay atong pagabuhaton ug unsay mahitabo nato. Alang sa balaanong mga katuyoan, ang lalaki ug babaye nga mga espiritu lahi, tataw, ug magtinabangay sa usag usa.
“Human malalang ang yuta, si Adan gibutang sa Tanaman sa Eden. Mahinungdanon, hinoon,ang Dios miingon nga kini ‘dili maayo nga ang lalaki mag-inusara’ (Genesis 2:18; Moises 3:18), ug si Eva nahimong kauban ug katabang ni Adan. Ang talagsaong kombinasyon sa espirituhanon, pisikal, mental, ug emosyonal nga mga kapasidad sa mga lalaki ug mga babaye gikinahanglan aron pagpatuman sa plano sa kalipay. Mag-inusara, ang lalaki o babaye dili makatuman sa mga katuyoan sa iyang pagkalalang.
“Sa balaanong tuyo, lalaki ug babaye gituyo nga mouswag og dungan ngadto sa pagkahingpit ug kahingpitan sa himaya. Tungod sa ilang kalainan sa mga taras ug mga kapasidad ang mga lalaki ug babaye tagsa-tagsa nagdala ngadto sa relasyon sa kaminyoon og mga talagsaong panan-aw ug mga kasinatian. Ang lalaki ug ang babaye nagtampo og lahi apan parehas ngadto sa pagkausa ug panaghiusa nga dili mahimo sa laing paagi. Ang lalaki mokompleto ug mohingpit sa babaye ug ang babaye mokompleto ug mohingpit sa lalaki samtang sila nagkat-on ug naglig-on ug nagpanalangin sa usag usa. ‘Ni ang lalaki gawas sa babaye, ni ang babaye gawas sa lalaki diha sa Ginoo’ (1 Mga Taga-Corinto 11:11; italics gidugang).
“Rason 2: Sa balaang plano, ang lalaki ug ang babaye gikinahanglan sa pagdala sa mga bata nganhi sa mortalidad ug sa paghatag sa pinakamaayo nga kahimtang sa pagpadako ug pag-amuma sa mga bata.
“Ang sugo nga gihatag sa kaniadto ngadto ni Adan ug Eva sa pagpasanay ug pagpuno sa yuta nagpabilin nga gipatuman karon. ‘Ang Dios nagsugo nga ang sagrado nga mga gahum sa paglalang pagagamiton lamang tali sa lalaki ug babaye, kinsa legal nga naminyo isip bana ug asawa. … Ang paagi diin ang mortal nga kinabuhi gilalang [mga] balaang gimando.’ Mao nga, ang kaminyoon tali sa lalaki ug babaye mao ang agianan nga gihatagan og gahum diin ang mga espiritu sa kalibutan nga wala pa dinhi sa yuta mosulod sa pagkamortal. Hingpit nga pagdili sa pagkighilawas sa dili pa maminyo ug hingpit nga pag-unong sulod sa kaminyoon nanalipod sa kabalaan niining sagradong agianan.
“Ang usa ka panimalay nga adunay mahigugmaon ug maunungon nga bana ug asawa mao ang kinanindotan nga kahimtang nga ang mga bata mapadako diha sa gugma ug katarung ug diin ang espirituhanon ug pisikal nga mga panginahanglan sa mga bata mahatag. Ingon nga ang talagsaong mga kinaiya sa mga lalaki ug mga babaye nakadugang sa kahingpitan sa relasyon sa kaminyoon, mao usab kana nga mga kinaiya importante kaayo sa pagpatubo, pag-amuma, ug pagtudlo sa mga bata.” (“Ang Kaminyoon Mahinungdanon sa Iyang Mahangturong Plano,” Liahona, Hunyo 2006, 51–52).
Ang posisyon sa Simbahan bahin sa kaminyoon sa managsamang sekso
“Ang Simbahan mitino sa kalainan tali sa atraksyon sa managsama nga sekso ug kinaiya. Samtang ang pagmintinar niana nga mga pagbati ug mga kahilig ngadto sa sama nga sekso dili mismo makasasala, ang pag-apil sa homosekswal nga kinaiya nasukwahi sa ‘doktrinal nga baruganan, pinasikad sa sagrado nga kasulatan … nga ang kaminyoon tali sa usa ka lalaki ug usa ka babaye mahinungdanon sa plano sa Tiglalang alang sa walay katapusan nga destinasyon sa Iyang mga anak’ [“First Presidency Statement on Same-Gender Marriage”].
“Tungod kay ang Simbahan nagtuo nga ang sagradong mga gahum sa paglalang ‘magamit lang tali sa usa ka lalaki ug usa ka babaye nga naminyo pinasikad sa balaod isip bana ug asawa … ang bisan unsang sekswal nga mga relasyon, lakip niadtong tali sa mga tawo nga managsama ang gender, nagpahuyang sa balaanong gilalang nga institusyon sa pamilya.’ Sumala niana, ang Simbahan pabor sa pamaagi nga nagtino sa kahulugan sa kaminyoon isip mao ang panaghiusa sa lalaki ug babaye. Hinoon, ‘ang pagpanalipod sa kaminyoon tali sa usa ka lalaki ug usa ka babaye wala magtangtang sa Kristohanong mga obligasyon sa mga miyembro sa Simbahan sa paghigugma, kamabination ug pagkatawhanon ngadto sa tanang katawhan’ [“The Divine Institution of Marriage,” Ago. 13, 2008, mormonnewsroom.org]” (“Same-Sex Attraction,” LDS.org).