Doktrina ug mga Pakigsaad 63:1–21

Pasiuna

Sa ting-init sa 1831, nagdumala si Joseph Smith sa pagpahinungod sa yuta diin pagatukuron sa mga Santos ang Zion sa Independence, Missouri. Sa panahon nga ang Propeta wala diha, pipila sa mga miyembro sa Simbahan sa Ohio misupak sa mga sugo sa Ginoo ug mibuhat og seryosong mga sala. Mibalik si Propeta Joseph Smith ngadto sa Kirtland sa Agosto 27, ug sa Agosto 30, nadawat niya ang pagpadayag nga gi-rekord diha sa Doktrina ug mga Pakigsaad 63. Kini nga leksyon naglakip og bahin niana nga pagpadayag, diin ang Ginoo mipahimatngon sa mga Santos mahitungod sa mga sangputanan sa pagkadautan ug pagkamasinupakon.

Mga Sugyot alang sa Pagtudlo

Doktrina ug mga Pakigsaad 63:1–6

Gipahimangnoan sa Ginoo ang mga Santos mahitungod sa mga sangputanan sa pagkadautan ug sa pagsukol

Dapita ang mga estudyante sa paghanduraw nga usa ka higala nangutana sa mosunod. Hangyoa ang mga estudyante sa pagpakigbahin kon unsaon nila pagtubag.

Nganong nagsunod kamo sa mga pagtulun-an sa inyong Simbahan kay sa maglingaw-lingaw?

Human makatubag ang mga estudyante, ipangutana ang mosunod:

Isip miyembro sa Simbahan ni Jesukristo, ngano kaha nga importante nga kita magpuyo sumala sa atong mga tinuohan?

Ipasabut nga sa ting-init sa 1831, samtang si Joseph Smith ug ang ubang mga lider sa Simbahan didto sa Missouri aron sa pagpahinungod sa yuta ug sa mahimutangan sa templo sa Zion, pipila sa mga miyembro sa Simbahan naghimo sa tago og seryosong mga sala. Human mipauli ang Propeta ngadto sa Ohio, nadawat niya ang pagpadayag nga gi-rekord diha sa Doktrina ug mga Pakigsaad 63. Dapita ang usa ka estudyante sa pagbasa og kusog sa Doktrina ug mga Pakigsaad 63:1 ug hangyoa ang klase sa pag-ila kon unsay tawag sa Ginoo sa mga miyembro sa Simbahan niini nga bersikulo. Dapita ang mga estudyante sa pag-report kon unsay ilang makit-an.

Sa unsa nga paagi nga ang pagtawag sa atong mga kaugalingon nga katawhan sa Ginoolahi kay sa pagkahimong mga katawhan sa Ginoo?

Hangyoa ang mga estudyante sa pag-scan og usab sa bersikulo 1 ug sa pagpangita sa sugo sa Ginoo ngadto niadtong kinsa nagtawag sa ilang mga kaugalingon og Iyang katawhan.

Unsay gusto sa Ginoo nga atong buhaton isip Iyang mga katawhan? (I-summarize ang mga tubag sa mga estudyante pinaagi sa pagsulat sa mosunod nga baruganan diha sa pisara: Isip mga katawhan sa Ginoo, angay natong buksan ang atong mga kasingkasing ug maminaw sa Iyang pulong ug sa Iyang kabubut-on kalabut kanato.)
Unsa kaha ang gipasabut sa buksan ang atong mga kasingkasing?
Sa unsang paagi nga ang pagbukas sa atong mga kasingkasing makaandam kanato sa pagpaminaw sa tingog sa Ginoo?
Unsa ang inyong buhaton nga makatabang kaninyo sa pag-abli sa inyong mga kasingkasing?

Dapita ang mga estudyante sa pag-abli sa ilang mga kasingkasing ngadto sa impluwensya sa Espiritu Santo atol niini nga leksyon. Mahimo nimong isugyot nga ilang isulat ang bisan unsa nga mga panghunahuna o mga pag-aghat nga ilang madawat gikan sa Espiritu.

Dapita ang usa ka estudyante sa pagbasa og kusog sa Doktrina ug mga Pakigsaad 63:2, 6. Sa dili pa basahon sa estudyante, mahimo nimong ipasabut nga diha sa bersikulo 6, ang mga pulong “ang adlaw sa kasuko” nagpasabut ngadto sa Ikaduhang Pag-anhi ni Jesukristo, usa ka panahon nga kadtong wala makahinulsol sa ilang mga sala moantus sa mga sangputanan sa ilang mga pagpili. Hangyoa ang klase sa pagsunod, nga mangita kon unsay gisulti sa Ginoo sa mga dautan ug sa masinupakon. Dapita ang mga estudyante sa pag-report unsay ilang nadiskubrihan.

Doktrina ug mga Pakigsaad 63:7–21

Nagpahimangno ang Ginoo batok sa pagpangita og timailhan ug sa pagkadautan

Sa Doktrina ug mga Pakigsaad 63:6, ipasabut ang sugo nga “himoa nga ang dili matuohon motak-um sa ilang mga ba-ba.” Ipasabut nga niini nga panahon, pipila sa mga miyembro sa Simbahan mihunong sa pagtuo sa pagkatinuod sa Simbahan ug dayag nga nagsulti batok ni Joseph Smith ug sa ubang mga lider sa Simbahan (tan-awa sa History of the Church, 1:216–17). Usa sa labing tataw nga mga kritiko sa Simbahan mao ang usa ka lalaki nga ginganlan og Ezra Booth. Dapita ang usa ka estudyante sa pagbasa og kusog sa mosunod nga duha ka paragraph kalabut sa mga kasinatian nga migiya ni Ezra Booth sa pagpasakop sa Simbahan.

Si Ezra Booth usa ka tigwali sa Methodist sa Ohio. Nahimo siyang interesado sa Pagpahiuli sayo sa 1831 human makabasa gikan sa Basahon ni Mormon. Mibiyahe siya ngadto sa Kirtland uban ni Alice Johnson aron sa pagpakigkita sa Propeta. Giantus ni Mrs. Johnson ang rayuma, nga maoy hinungdan sa sakit, panghupong, ug panggahi sa iyang bukton. Sa iyang unang pakighimamat ni Joseph Smith, dili siya makaisa sa iyang kamot ngadto sa iyang ulo sulod sa mga duha ka tuig.

“Sa panahon sa interbyu ang panagsultihanay nabalhin ngadto sa hilisgutan sa langitnong [supernatural] mga gasa, sama niadtong gitugyan sa mga panahon sa mga apostoles. May usa ka tawo nga miingon, ‘Ania si Mrs. Johnson nga dili magamit ang bukton; ang Dios naghatag ba og bisan unsa nga gahum ngadto sa tawo karon dinhi sa yuta sa pag-ayo kaniya?’ Wala madugay, sa dihang ang panagsinultihay mibalhin og laing hilisgutan, si [Joseph] Smith mibarug, ug mitadlas sa kwarto, migunit sa kamot ni Mrs. Johnson, miingon sa labing ligdong ug makadani nga paagi: ‘Babaye, sa pangalan ni Ginoong Jesukristo nagmando ako kanimo nga maayo ka,’ ug diha-diha dayon mibiya sa kwarto. … Dayon gialsa ni Mrs. Johnson ang [iyang bukton] nga may kasayon, ug sa iyang pagpauli sa panimalay sa sunod adlaw nahimo niya ang pagpanglaba nga walay kalisud o sakit” (sa History of the Church, 1:215–16).

Unsa kahay inyong bation kon kamo nakasaksi og milagro sama niini?

Ipasabut nga human dayon nasaksihan ni Ezra Booth kini nga milagro, siya gibunyagan.

Isulat ang mosunod nga mga pulong diha sa pisara: Mga Timailhan ug Hugot nga Pagtuo.

Dapita ang usa ka estudyante sa pagbasa og kusog sa Doktrina ug mga Pakigsaad 63:7–9. Hangyoa ang klase sa pagsunod ug sa pag-ila unsay gitudlo sa Ginoo mahitungod sa mga timailhan ug hugot nga pagtuo.

Unsa ang atong makat-unan gikan niini nga mga bersikulo mahitungod sa mga timailhan ug hugot nga pagtuo? (Ang mga estudyante mahimong moila og lain-laing mga baruganan, apan siguroa sa paghatag og gibug-aton ang mosunod nga kamatuoran: Ang hugot nga pagtuo dili moabut pinaagi sa mga timailhan. Isulat kini nga kamatuoran diha sa pisara ubos sa Mga Timailhan ug Hugot nga Pagtuo.)
Unsa ang pipila ka mga ehemplo diha sa mga kasulatan sa mga tawo kinsa nakasaksi og dagkong mga timailhan o mga milagro apan wala magpakita og mahangturong hugot nga pagtuo ug pagkamatarung? (Ang mga ehemplo mahimong mag-apil sa mga anak sa Israel [tan-awa sa Numeros 14:22–23] ug Laman ug Lemuel [tan-awa sa 1 Nephi 17:43–45].)

Ipasabut nga si Ezra Booth usa ka ehemplo sa usa ka tawo nga nagsalig sa mga timailhan kay sa hugot nga pagtuo. Human siya gibunyagan, nadawat niya ang priesthood ug gipadala og misyon ngadto sa Missouri. Si Booth dayag nga misugod niini nga misyon uban ang pagdahum nga dunay talagsaong mga butang nga mahitabo, nagtuo nga makahimo siya sa pagkabig og daghan pinaagi sa pagpakita og mga timailhan ug sa paghimo og mga milagro. Apan, human magsangyaw sulod sa mubo nga panahon ug wala makita ang mga resulta nga iyang gipaabut, si Booth “mipahilayo” ug mibiya sa kamatuoran (tan-awa sa History of the Church, 1:216). Gihimo ni Propeta Joseph Smith ang mosunod nga komentaryo mahitungod ni Ezra Booth:

“Sa dihang aktwal niyang nakat-unan nga ang hugot nga pagtuo, pagpaubos, pagpailub, ug kalisdanan gikinahanglan sa dili pa ang panalangin, ug nga ipaubos sa Dios sa dili pa Niya ibayaw; nga kaysa hatagan siya sa ‘Manluluwas og gahum sa pagbunal sa mga tawo ug himoon silang motuo’ … hinoon siya nahigawad” (sa History of the Church, 1:216).

Dapita ang usa ka estudyante sa pagbasa og kusog sa Doktrina ug mga Pakigsaad 63:10–12. Hangyoa ang klase sa pagsunod, nga mangita sa dugang nga mga kamatuoran mahitungod sa mga timailhan ug hugot nga pagtuo.

Sumala sa bersikulo 10, sa unsa nga paagi ang mga timailhan moabut? (Tabangi ang mga estudyante sa pag-ila sa mosunod nga kamatuoran: Ang mga timailhan moabut pinaagi sa hugot nga pagtuo, sumala sa kabubut-on sa Dios. Idugang kini nga kamatuoran ngadto sa pisara ubos sa Mga Timailhan ug Hugot nga Pagtuo.)
Ngano kaha nga atong madawat ang mga timailhan human sa atong paggamit og hugot nga pagtuo?
Sumala sa bersikulo 12, unsa ang husto nga rason sa pagpangita og mga timailhan? (“Alang sa kaayohan sa mga tawo ngadto sa … himaya [sa Dios] ”—nagpasabut sa pagtabang sa ubang mga tawo ug sa pagpauswag sa buhat sa Ginoo.)

Itudlo nga ang mga timailhan ug mga kahibulongan dili sa kanunay makita nga hilabihan kanindot. Kasagaran mahimong madawat nato ang usa ka timailhan o usa ka saksi sa kamatuoran sa ebanghelyo sa hilum, personal nga paagi samtang naggamit kita sa atong hugot nga pagtuo.

Sa unsa nga paagi kita makagamit og hugot nga pagtuo aron makadawat og pag-saksi sa ebanghelyo? (Mahimo nimong ilista ang mga tubag sa mga estudyante diha sa pisara. Ang mga tubag mahimong mag-apil og mga kalihokan sama sa pag-ampo, pagtuon sa kasulatan, pagpuasa, pagserbisyo, ug pagsunod sa mga baruganan sa ebanghelyo.)

Dapita ang mga estudyante sa pagpakigbahin sa ilang mga kasinatian sa pagdawat og saksi sa kamatuoran sa ebanghelyo pinaagi sa paggamit og hugot nga pagtuo sa usa niini ka mga paagi.

Pahinumdumi ang mga estudyante nga agig dugang sa pagpangita og mga timailhan, ang pipila sa mga miyembro sa Simbahan sa Ohio usab “wala mosunod sa… mga sugo” (D&P 63:13) ug nagbuhat og seryosong mga sala. Hangyoa ang mga estudyante sa pagbasa og hilum sa Doktrina ug mga Pakigsaad 63:14–19 ug ipaila ang pipila sa mga sala nga gibuhat sa mga miyembro sa Simbahan. Dapita ang mga estudyante sa pag-report kon unsay ilang makit-an. (Mahimo nimong ipasabut nga ang usa ka nagbaligya sa iyang kadungganan maoy usa ka tawo kinsa apil og sekswal nga sala. Ang usa ka barangan maoy usa ka tawo kinsa apil sa mga kalihokan nga nagdapit sa impluwensya sa dautang mga espiritu.)

Timan-i ang pahimangno sa Ginoo mahitungod sa kahigal diha sa bersikulo 16. Unsay buot ipasabut sa pagtan-aw sa uban nga may kahigal? (Ang kahigal nagpasabut og “ang pagbaton og dili angay nga hugot nga tinguha alang sa usa ka butang” o sa usa ka tawo [Ang Giya ngadto sa mga Kasulatan, “Kahigal,” scriptures. lds. org]. Ang pagtan-aw sa uban nga may kahigal nagpasabut sa pagtan-aw sa lawas sa usa ka tawo sa dili angay nga paagi o sa paagi nga nagpukaw og sekswal nga mga pagbati. Kini naglakip sa pagtan-aw og pornograpiya.)
Unsa nga baruganan ang inyong makita sa pahimangno sa Ginoo diha sa bersikulo 16? (Ang mga estudyante kinahanglang moila sa mosunod nga baruganan: Kon kita motan-aw diha sa uban nga may kahigal, dili nato maangkon ang Espiritu ug kita naglimud sa pagtuo. Mahimo nimong isugyot nga markahan sa mga estudyante ang mga pulong nga nagtudlo niini nga baruganan diha sa ilang mga kasulatan.)
Ngano kaha ang pagkahigal ngadto sa lain naghimo sa usa ka tawo nga mawad-an sa Espiritu?
Unsa ang atong buhaton sa pagbuntog sa mga tintasyon sa kahigal ngadto sa lain?

Isip kabahin sa panaghisgutan sa paglikay sa kahigal, mahimo nimong dapiton ang usa ka estudyante sa pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Labaw sa tanan, sugdi pinaagi sa pagpalayo sa inyong kaugalingon gikan sa mga tawo, mga materyal, ug mga sitwasyon nga makapasakit kaninyo. …

“… Kon ang salida sa TV dili maayo, palonga kini. Kon ang salida malaw-ay, palayo. Kon ang dili husto nga pakigrelasyon naglambo, putla kini. Daghan niini nga mga impluwensya, sa sinugdanan, mahimong dili gyud ingon nga dautan, apan makahugaw kini sa atong paghukom, makaluya sa espiritwalidad, ug modala kanato ngadto sa butang nga dautan. …

Pulihi ang hugawng huna-huna og puno sa paglaum nga mga hulagway ug malipayong mga handumanan; hunahunaa ang mga nawong sa mga tawo nga nahigugma kaninyo ug mawala ra kini kon inyong pasagdan. … Bisan unsa man ang naa sa inyong hunahuna, siguroha nga madawat kini sa inyong kasingkasing kon imbitahon lamang.

“Pag-ugmad ug kon asa ang Espiritu sa Ginoo. Siguroha nga naglakip kana sa inyong panimalay o apartment, nagpiho gayud sa matang sa art, musika, ug literatura nga inyong gikolekta” (Walay Luna alang sa Kaaway sa Akong Kalag,” Liahona, Mayo 2010, 45, 46).

Ipasabut ang unang baruganan nga imong gisulat sa pisara sa sinugdanan sa klase: Isip mga katawhan sa Ginoo, angay natong buksan ang atong mga kasingkasing ug maminaw sa Iyang pulong ug sa Iyang kabubut-on kalabut kanato. Dapita ang mga estudyante sa paghunahuna kon ang ila bang mga kasingkasing nahimong bukas ngadto sa mga pag-aghat o mga impresyon atol sa ilang pagtuon sa mga kasulatan karon. Awhaga sila sa paglihok diha sa mga pag-aghat ug mga panghunahuna nga ilang nadawat gikan sa Ginoo, ug ipamatuod nga samtang sila nagbuhat niini sila mahimo nga mga katawhan sa Ginoo.

Komentaryo ug Background nga Impormasyon

Doktrina ug mga Pakigsaad 63:16. Ang kahigal naghimo nga mobiya ang Espiritu

Sa atong panahon, ang pagkaylap sa pornograpiya nagbantang sa daghan ngadto sa tintasyon sa kahigal alang sa uban. Si Elder Richard G. Scott sa Korum sa Napulog Duha ka mga Apostoles nanghimatuod nga ang paggamit sa pornograpiya usa ka kalihokan sa kahigal nga nagpugong sa abilidad sa usa ka tawo sa pagpahimulos sa mga panalangin sa Espiritu sa Ginoo:

“Makigbahin ako og pasidaan. Si Satanas hilabihan ka maayo sa pagbabag sa espirituhanong komunikasyon pinaagi sa paghaylo sa mga indibidwal, pinaagi sa tintasyon, sa pagsupak sa mga balaod diin ang espirituhanong komunikasyon gipasikad. Sa uban, siya makahimo sa pagkumbinser kanila nga sila dili makahimo sa pagdawat sa ingon nga paggiya gikan sa Ginoo.

“Si Satanas nahimong usa ka hanas sa paggamit sa makapaadik nga gahum sa pornograpiya sa pagpugong sa kapasidad sa indibidwal nga magiyahan pinaagi sa Espiritu. Ang pagdagsang sa pornograpiya sa tanan niining makadaut, makakankan, makapalaglag nga mga panagway maoy hinungdan sa hilabihang kagul-anan, pag-antus, kasakit sa dughan, ug pagkaguba sa mga kaminyoon. Usa kini sa hilabihan ka makadaut nga mga impluwensya dinhi sa yuta. Pinaagi man kini sa giimprinta nga mga pahina, mga salida, telebisyon, law-ay nga mga pulong sa kanta, mga binastos diha sa telepono, o sa nagdan-ag nga screen sa personal computer, ang pornograpiya hilabihan gayud ka makapaadik ug grabe kaayong makadaot. Kining gamhanan nga gamit ni Lucifer mopaut-ut sa hunahuna ug sa kasingkasing ug sa kalag ni bisan kinsa nga mogamit niini. Ang tanan kinsa masakpan sa makapadani, makatintal nga lit-ag ug magpabilin nga mao mahimong maadik ngadto sa imoral, makadaut nga impluwensya niini. Alang sa kadaghanan, kana nga pagkaadik dili mabuntog kon walay panabang. Ang makalilisang nga sumbanan pamilyar kaayo. Kini nagsugod sa pagkakuryoso nga gisugnoran pinaagi sa pagpagana niini ug gihatagan og pangatarungan pinaagi sa sayop nga ideya nga kon buhaton sa pribado, dili kini makadaot sa uban. Alang niadtong nalukmay pinaagi niini nga bakak, ang pag-ekspiremento mas magkalawom, uban sa mas grabe nga pagpagana, hangtud nga ang lit-ag mosira ug usa ka hilabihan ka imoral, makapaadik nga pagkanaanad gamiton sa dautang pagpugong niini. …

“Kon nalit-ag kamo sa pornograpiya, paghimo og hingpit nga pasalig sa pagbuntog niini karon. Pangita og hilum nga dapit; pag-ampo og dayon alang sa panabang ug suporta. Magmapailubon ug magmasulundon. Ayaw og hunong” (Aron Makabaton og Espirituhanong Giya,” Liahona, Nob. 2009, 8–9).