Leksyon 110
Doktrina ug mga Pakigsaad 105
Pasiuna
Agig pagsunod sa mga instruksyon sa Ginoo, si Propeta Joseph Smith ug mga 200 ka ubang mga boluntaryo ug mga rekrut nakaporma og unsay nailhan nga Kampo sa Zion aron motabang sa mga Santos kinsa gipalayas gikan sa Lalawigan sa Jackson, Missouri. Niadtong Hunyo 22, 1834, samtang nagkampo duol sa Fishing River sa Missouri, nakadawat si Joseph Smith og pagpadayag nga narekord sa Doktrina ug mga Pakigsaad 105. Niini nga pagpadayag, ang Ginoo mipahibalo sa mga Santos nga ang yuta sa Zion dili tubson nianang higayuna. Ang Ginoo mihatag usab og mga instruksyon mahitungod sa unsay mahitabo aron matubos ang Zion sa umaabut nga panahon.
Mga Sugyot alang sa Pagtudlo
Doktrina ug mga Pakigsaad 105:1–19
Ang Ginoo misugo sa mga Santos sa paghulat sa katubsanan sa Zion
Sa dili pa ang klase, pagkuha og usa ka paper cup, lastiko, ug tulo ka piraso sa lambo. Ang gilinginon sa lastiko kinahanglang mas gamay kay sa gilinginon sa paper cup. Ihigut ang mga hilo ngadto sa lastiko sa parehas og gintang.
Sugdi ang leksyon pinaagi sa paghangyo og tulo ka mga boluntaryo. Ibutang ang kopa sa patag nga lugar, ug sultihi ang mga boluntaryo sa pagkuha sa kopa nga gamit lamang ang lastiko ug mga hilo. Sultihi sila nga dili sila mahimong mohikap sa lastiko; kinahanglang gunitan nila ang mga hilo. (Aron mahimo kini nga buluhaton, ang mga estudyante kinahanglang magtambayayong ug magdungan og bira sa matag lambo nga pareha ang gikusgon sa pagbira aron moinat ang lastiko nga igo nga mohaum sa baso ug dayon maalsa kini.)
Human makompleto sa mga estudyante kini nga kalihokan ipangutana ang mosunod nga pangutana:
-
Unsa ang tahas sa panaghiusa nga dula sa pagtuman niini nga buluhaton?
Pahinumdumi ang mga estudyante nga niadtong Pebrero 1834, ang Ginoo misugo ni Propeta Joseph Smith ug sa uban sa pagkolekta og temporal nga mga kapanguhaan ug pagrekrut og mga boluntaryo aron sa pagtabang sa mga Santos nga giabug gikan sa Lalawigan sa Jackson, Missouri, sa pagkuha og ballik sa ilang yuta. Samtang sugdan sa mga estudyante ang panaghisgutan karon sa Doktrina ug mga Pakigsaad 105, awhaga sila sa pagpangita kon unsay tahas sa panaghiusa nga dula sa paningkamot sa mga Santos sa pagbawi sa yuta sa Zion.
Hangyoa ang mga estudyante sa paghinumdom gikan sa ilang pagtuon sa Doktrina ug mga Pakigsaad 103 sa gidaghanon sa mga boluntaryo nga gitinguha sa Ginoo nga moapil sa Kampo sa Zion (500) ug ang minimum nga gidaghanon nga Iyang gikinahanglan (100). Dapita ang usa ka estudyante sa pagbasa og kusog sa mosunod nga paragraph. Hangyoa ang klase sa pagpaminaw sa gidaghanon sa mga tawo nga aktwal nga miboluntaryo alang sa Kampo sa Zion sa dihang unang mibiya ang grupo.
Ang tubag sa paningkamot ni Propeta Joseph Smith ug sa uban sa pagrekrut og mga boluntaryo ug sa mga kapanguhaan alang sa Kampo sa Zion wala magmalampuson sumala sa gilauman. Sa higayon nga ang kampo, o ang kasundalohan, nagsugod na sa pagmartsa sa pagsugod sa Mayo 1834, 122 lamang ka mga tawo ang miboluntaryo nga moadto. Ang Kampo sa Zion nangrekrut og dugang nga mga boluntaryo sa ilang pagpaingon sa Missouri. Sa dihang ang grupo nga girekrut nila ni Hyrum Smith ug Lyman Wight gikan sa Michigan Territory nagkasugat sa grupo ni Joseph Smith sa sayo sa Hunyo 1834, ang Kampo sa Zion naglangkob lamang sa labaw sa 200 ka lalaki, 12 ka babaye, ug 9 ka mga bata (tan-awa sa Alexander L. Baugh, Joseph Smith and Zion’s Camp,” Ensign, Hunyo 2005, 45).
Dapita ang usa ka estudyante sa pagbasa og kusog sa Doktrina ug mga Pakigsaad 105:7–8. Hangyoa ang klase sa pagsunod, nga mangita sa mga rason ngano ang ubang mga miyembro sa Simbahan mopili nga dili motabang sa ilang isig ka Santos didto sa Missouri. Dayon hangyoa ang mga estudyante sa pag-report unsay ilang nakit-an.
Dapita ang mga estudyante nga magpuli-puli sa pagbasa og kusog sa Doktrina ug mga Pakigsaad 105:1–6. Hangyoa ang klase sa pagsunod, nga mangita kon sa unsang paagi nga ang pagkamasinupakon ug kakulang sa panaghiusa nakaapekto sa mga miyembro sa Simbahan. (Aron matabangan ang mga estudyante nga mas makasabut sa kahulugan sa bersikulo 5, tingali makatabang sa pagpasabut nga “sa balaod sa celestial nga gingharian” naglakip sa tanang mga balaod ug mga baruganan nga kinahanglan natong sundon, sa mga ordinansa nga kinahanglan natong madawat, ug sa mga pakigsaad nga kinahanglan natong tumanon aron makapanunod sa celestial nga gingharian.)
-
Sa unsang mga paagi nga ang mga miyembro sa Simbahan napakyas sa pagkahiusa ug pagkamasulundon?
-
Sumala niini nga mga bersikulo, unsay atong kinahanglan nga buhaton aron makatabang sa pagtukod sa Zion? (Samtang ang mga estudyante motubag, tabangi sila sa pag-ila sa mosunod nga baruganan: Aron sa pagtabang sa pagtukod sa Zion, kinahanglan nga kita magkahiusa ug magmasulundon sa tanan nga gisugo sa Dios.)
-
Ngano kaha nga ang panaghiusa ug pagkamasulundon gikinahanglan aron matukod ang Zion?
-
Unsa nga mga kasinatian ang nakatabang kaninyo nga makasabut sa kaimportante sa mga miyembro sa Simbahan nga magkahiusa?
Ipasabut nga kadtong kinsa miboluntaryo sa Kampo sa Zion nakasinati og daghang mga hagit ug mga milagro sa tibuok nilang pagbiyahe. Dapita ang usa ka estudyante sa pagbasa og kusog sa mosunod nga paragraph. Hangyoa ang klase sa pagpamalandong kon giunsa kaha nila pagtubag ang pipila sa mga hagit.
Ang Kampo sa Zion nagmartsa og mga 900 ka milya (1,450 ka kilometro) agi sa 4 ka mga estado, nagbiyahe og mga 20 ug 40 ka mga milya (mga 30–60 ka kilometro) sa usa ka adlaw sulod sa 45 ka adlaw. Ang mga miyembro sa kampo nakasinati og mga paslot sa tiil, kainit ug kaigang nga mga kondisyon, kakulang sa pagkaon, ug dili masustansya nga pagkaon. Dihay okasyon, nga grabing kauhaw maoy nakaingon sa mga miyembro sa kampo nga miinom sa tubig sa kalapukan diin gisala ang mga itlog sa lamok (usahay gamit ang ilang mga ngipon nga salaan) o sa pag-inom og tubig sa agi sa tunob sa kabayo human sa unos. Sa tibuok biyahe, ang Kampo sa Zion sa kanunay gihulga nga pasipad-an sa uban. (Tan-awa sa Church History in the Fulness of Times Student Manual, 2nd ed. [manwal sa Church Educational System, 2003], 143–45.)
-
Sa inyong hunahuna sa unsa nga paagi kaha kamo mitubag niini nga mga hagit?
Ipasabut nga human makaabut ang mga miyembro sa Kampo sa Zion didto sa Missouri, nahibaloan nila nga si Daniel Dunklin, ang gobernador sa Missouri, dili motuman sa iyang saad sa pagtabang sa mga Santos nga makabalik ngadto sa ilang mga yuta sa Lalawigan sa Jackson. Bisan niining makapawala sa paglaum nga mga balita, ang Kampo sa Zion nagpadayon paingon sa Lalawigan sa Jackson, naghulat og dugang nga direksyon sa Ginoo.
Pahibaloa ang mga estudyante nga ang gikinahanglan nga direksyon miabut pinaagi sa usa ka pagpadayag gikan sa Ginoo niadtong Hunyo 22, 1834, human makabiyahe ang Kampo sa Zion og dul-an pito ka semana ug mga 10–20 ka milya (mga 15–30 ka kilometro) gikan sa Lalawigan sa Jackson. Dapita ang usa ka estudyante sa pagbasa og kusog sa Doktrina ug mga Pakigsaad 105:9–14. Hangyoa ang klase sa pagsunod, nga mangita kon unsay gisulti sa Ginoo nga buhaton kabahin sa pagtubos sa Zion.
-
Unsa ang gisugo sa Ginoo nga buhaton sa kampo kabahin sa katubsanan sa Zion?
-
Kon kamo nahimong miyembro sa Kampo sa Zion, unsa kahay inyong bation pagkadungog niini nga pagpadayag sa dihang hapit na kamo moabut sa inyong destinasyon?
-
Unsa nga mga rason ang gihatag sa Ginoo ngano nga ang Zion dili matubos nianang higayuna?
Dapita ang usa ka estudyante sa pagbasa og kusog sa Doktrina ug mga Pakigsaad 105:18–19. Pangutan-a ang klase ngano nga ang Ginoo misugo sa Kampo sa Zion nga mobiyahe hangtud sa Missouri ug dayon mopadayag nga dili nila ipahiuli ang mga Santos ngadto sa ilang mga yuta sa Zion nianang higayuna.
-
Sumala niini nga mga bersikulo, ngano nga ang Ginoo misugo sa Kampo sa Zion sa pagbiyahe hangtud sa Missouri ug dayon mopadayag nga ang Zion dili pa pagatubson? (Kini mao ang pagsulay sa hugot nga pagtuo. Tingali makatabang sa pagpasabut nga ang pagsulay sa hugot nga pagtuo nagpasabut sa pagtesting kon kita mopili ba sa pagsalig ug pagsunod sa Ginoo bisan unsa pa ang mga sirkumstansya.)
-
Sa unsa nga mga paagi nga ang hugot nga pagtuo sa mga miyembro sa Kampo sa Zion nasulayan panahon sa ilang kasinatian?
-
Unsay atong makat-unan gikan niini nga mga bersikulo? (Usa ka baruganan nga mailhan sa mga estudyante mao nga ang Dios nag-andam og daghang mga panalangin alang niadtong kinsa matinud-anon taliwala sa ilang mga pagsulay.)
-
Kanus-a kamo o usa ka tawo nga inyong nailhan nga nakasinati og pagsulay sa hugot nga pagtuo? Sa unsa nga paagi nga ang mga pagsulay sa inyong hugot nga pagtuo nakapaandam ninyo sa mas daghang mga panalangin?
Pahibaloa ang mga estudyante nga daghang mga lalaki kinsa nagserbisyo sa Kampo sa Zion gipanalanginan og mga oportunidad sa pagserbisyo sa gingharian sa Ginoo. Niadtong Pebrero 1835, ang Korum sa Napulog Duha ka mga Apostoles ug ang Unang Korum sa Seventy naorganisar. Siyam sa orihinal nga mga Apostoles ug ang tanang mga sakop sa Korum sa Seventy nakaserbisyo sa Kampo sa Zion. (Tan-awa sa Church History in the Fulness of Times, 151.)
Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith. Hangyoa ang klase nga maminaw sa tahas sa Kampo sa Zion sa pag-andam sa mga lalaki alang sa mga katungdanan sa pagpangulo:
“Ang Dios dili gusto nga kamo makig-away. Dili Niya maorganisar ang Iyang gingharian uban sa dose ka mga lalaki sa pag-abli sa pultahan sa Ebanghelyo ngadto sa mga nasud sa yuta, ug uban sa kapitoan ka mga lalaki ubos sa ilang direksyon sa pagsunod sa ilang mga agianan, gawas kon kuhaon Niya sila gikan sa pundok sa mga lalaki nga mihalad sa ilang mga kinabuhi, ug kinsa nakahimo og dakong sakripisyo sama ni Abraham” (sa History of the Church, 2:182; tan-awa usab sa Church History in the Fulness of Times, 151).
Ipakigbahin ang imong pagpamatuod bahin sa kaimportante sa pagsalig ug pagsunod sa Ginoo sa panahon nga ang atong hugot nga pagtuo pagasulayan.
Doktrina ug mga Pakigsaad 105:20–41
Ang Ginoo mitudlo sa mga Santos unsay ilang buhaton sa dili pa tubson ang Zion
I-summarize ang Doktrina ug mga Pakigsaad 105:20–37 pinaagi sa pagpasabut nga ang Ginoo misulti sa mga Santos sa Missouri kon unsaon nila sa pagtubag ang pagpanggukod nga ilang nasinati samtang maghulat sa umaabut nga katubsanan sa Zion. Gitambagan Niya sila nga magmapainubsanon ug maglikay og panagbingkil. Mipasabut Siya nga kinahanglan silang mabalaan agig pagpangandam alang sa katubsanan sa Zion sa umaabut. Sama sa Iyang gisulti sa sayo pa sa samang pagpadayag, sila kinahanglan nga “matudloan unta sa labaw nga hingpit, ug makabaton og kasinatian, ug masayud sa labaw nga hingpit mahitungod sa ilang katungdanan, ug sa mga butang diin [Iyang] gikinahanglan diha sa ilang mga kamot” (D&P 105:10).
-
Unsa ang pipila ka paagi nga matubag nato ang pagpanggukod?
Dapita ang mga estudyante sa pagbasa sa hilum sa Doktrina ug mga Pakigsaad 105:38–41 ug mopili og mga pulong gikan sa mga bersikulo nga nag-summarize unsay gisugo sa Ginoo nga buhaton sa mga Santos agig tubag sa ilang mga tigdaug-daog.
-
Sumala sa bersikulo 40, unsa nga panalangin ang moabut ngadto sa mga Santos sa Missouri kon magtinguha sila sa pag-establisar sa kalinaw ngadto sa uban? (Ang mga tubag sa mga estudyante kinahanglang makapakita sa mosunod nga baruganan: Kon kita magtinguha sa pag-establisar og kalinaw ngadto sa uban, ang tanang mga butang molihok alang sa inyong kaayohan.)
-
Unsay atong mahimo sa pagtabang sa pag-establisar sa kalinaw ngadto sa uban?
-
Sa unsa nga paagi kamo napanalanginan sa inyong pagpaningkamot sa pag-establisar og kalinaw, lakip na niadtong migukod kaninyo?
Dapita ang mga estudyante sa pagpamalandong og usa ka butang nga ilang mabuhat sa pagpaningkamot sa pag-establisar og kalinaw ngadto sa uban sa ilang kinabuhi, ilabi na kon sila nahimoan og sayop, ug sa pagsulat og tumong diha sa ilang mga class notebook o scripture study journal sa pagsunod niini nga baruganan.
Komentaryo ug Background nga Impormasyon
Doktrina ug mga Pakigsaad 105. Pagbiya sa Kampo sa Zion
Sa wala pa mobiya sa Kirtland, Ohio, si Joseph Smith “misaad sa kaigsoonan nga kon silang tanan magpuyo nga matarung, sa atubangan sa Ginoo, magsunod sa iyang mga sugo, … luwas silang tanan nga makapauli” (sa Church History in the Fulness of Times Student Manual, 2nd ed. [manwal sa Church Educational System, 2003], 143). Kon dili, mipasidaan ang Propeta, mag-antus sila sa kasuko sa Dios.
Uban sa mao nga kasiguroan ang mga miyembro sa Kampo sa Zion mibiya, nasayud nga ilang gibutang ang ilang mga kinabuhi sa kakuyaw pinaagi sa pag-apil niini nga biyahe. Gipadayag ni Heber C. Kimball ang mga pagbati sa kadaghanan nianang higayuna:
“Nagsugod kami sa ika-5 sa Mayo (1834),ug sa tinuod kini usa ka mahinuklugon nga kabuntagon alang nako. Mibiya ko sa akong asawa ug mga anak ug mga higala, wala masayud kon makita ko pa sila pag-usab, kay ang akong kaugalingon ug ang kaigsoonan gihulga sa mga kaaway niana nga lugar ug sa Missouri, nga ila kaming laglagon ug pamatyon” (sa Orson F. Whitney, The Life of Heber C. Kimball [1945], 40).
Kadaghanan sa mga lalaki sa Kampo sa Zion mibiya sa mga pamilya nga gamay ra o walay kwarta ug walay tinubdan sa kinitaan. Aron malikayan ang dili angay nga kalisud, ang mga miyembro sa Simbahan nananom og mga tanaman aron ang mga babaye ug mga bata dunay maani nga mais ug ubang mga lagutmon panahon nga wala ang kasundalohan. Ang kasagaran nga edad sa mga lalaki sa kampo 29 anyos. Ang ig-agaw sa Propeta nga si George Albert Smith 16 anyos, ug si Addison Greene 14 anyos. Ang kinamagulangan 79. Si Joseph Smith, kinsa napili nga “commander-in-chief sa mga kasundalohan sa Israel,” 28 anyos pa lang. (Tan-awa sa Church History in the Fulness of Times, 142–52.)
Doktrina ug mga Pakigsaad 105. Ang pagpanalipod sa Ginoo sa Kampo sa Zion
Sa tibuok biyahe, ang Kampo sa Zion sa kasagaran gihulga sa uban. Hinoon, ang Ginoo mituman sa saad nga anaa sa Doktrina ug mga Pakigsaad 103:20. Si Joseph Smith miingon, “Bisan tuod og ang among mga kaaway padayong nanganti og pagpanghulga sa kasamok, kami wala mahadlok, wala gayud magpanuko sa pagpadayon sa among panaw, kay ang Dios nagauban kanamo, ug ang Iyang mga anghel nag-una kanamo, ug ang hugot nga pagtuo sa among gamay’ng grupo walay pagkatandog. Kami nahibalo nga ang mga anghel among kauban, kay kami nakakita kanila.” (Mga Pagtulun-an sa mga Presidente sa Simbahan: Joseph Smith [2007], 349).
Doktrina ug mga Pakigsaad 105:5. Ang balaod sa celestial nga gingharian
Si Elder D. Todd Christofferson sa Korum sa Napulog Duha ka mga Apostoles mitudlo:
“Ang balaod sa celestial nga gingharian mao … ang balaod sa ebanghelyo ug mga pakigsaad, diin naglakip sa atong makanunayon nga paghinumdom sa Manluluwas ug sa atong pasalig sa pagkamasulundon, pagsakripisyo, pagpahinungod, ug pagkaligdong” (“Dali na diri sa Zion,” Liahona, Nob. 2008, 39).
Si Presidente Ezra Taft Benson miingon:
“Ang balaod sa ebanghelyo naglakip sa tanang mga balaod, mga baruganan, ug mga ordinansa nga gikinahanglan alang sa atong kahimayaan” (The Teachings of Ezra Taft Benson [1988], 337).
Doktrina ug mga Pakigsaad 105:19. “Usa ka pagsulay sa ilang hugot nga pagtuo”
Ang sugo sa pagbalik ngadto sa Kirtland nga dili makig-away alang sa mga Santos sa Missouri usa ka pagsulay alang sa daghang mga sakop sa Kampo sa Zion. Ang uban dayag nga mirebelde ug unya mibiya. Sayo sa ilang biyahe, ang Propeta mipasidaan sa mga sakop sa Kampo sa Zion nga ang ilang wala pagkahiusa, panagbingkil, ug pagkamasinupakon makahatag og kagul-anan (grabe nga kasakit o balatian) diha kanila. Isip resulta sa kasuko ug dili matarung nga pagbagulbol wala magtagad sa mga instruksyon sa Ginoo nga dili makig-away, ang Propeta misubli niini nga pasidaan. Niadtong Hunyo 24, 1834, daghang mga sakop sa Kampo sa Zion nasakit og kolera. Ang epedemya mikatag, nga nakaingon sa grabe nga pagkalibang, pagsuka, ug pagbikog sa tiil. Sa wala pa kini mahuman, mga 68 ka tawo, lakip ni Joseph Smith, nataptan sa sakit, ug 13 ka sakop sa kampo ug 2 ka lokal nga mga miyembro nangamatay. Miingon si Joseph Smith nga niadtong Hulyo 2, siya “misulti kanila nga kon sila magpaubos sa ilang kaugalingon sa atubangan sa Ginoo ug makigsaad sa pagsunod sa Iyang mga sugo ug mosunod sa akong tambag, ang sakit mawala gikan nianang orasa, ug wala nay laing kaso sa kolera diha kanila. Ang kaigsoonan misaad niana uban sa gipataas nga mga kamot, ug ang sakit nawala” (sa History of the Church, 2:120).
Gidawat sa Ginoo ang mga sakripisyo sa mga sakop sa kampo ug gipanalanginan sila sa unsay ilang andam nga buhaton. Niadtong Hulyo 1834 gibungkag ni Propeta Joseph Smith ang Kampo sa Zion. Samtang ang uban wala makapasar sa pagsulay sa ilang hugot nga pagtuo ug mibiya sa Simbahan, kadtong matinud-anon nalig-on sa kasinatian.
Si Elder Franklin D. Richards sa Kapangulohan sa Seventy mipasabut:
“Ang ‘panaw sa Kampo sa Zion’ giisip sa kadaghanan nga walay bili ug wala magmalampuson. Usa ka brother didto sa Kirtland nga wala mokuyog sa kampo nakigsulti ni Brigham Young sa iyang pagpauli, miingon ngadto kaniya, ‘Nan, unsa man ang inyong naangkon niining walay kapuslanan nga panaw ngadto sa Missouri uban ni Joseph Smith?’ ‘Ang tanan namong giadto,’ tubag ni Brigham Young. ‘Dili nako ikabaylo ang kasinatian nga akong naangkon niana nga panaw sa tanang bahandi sa Lalawigan sa Geauga,’” ang lalawigan diin nahisakop ang Kirtland. (B. H. Roberts, “Brigham Young, A Character Sketch,” Improvement Era, vol. 6 [Hunyo 1903], p. 567.)” (“The Purpose of Life: To Be Proved,” Ensign, Dis. 1971, 50).
Ang Kampo sa Zion usa ka oportunidad sa iyang mga sakop sa pagpakita sa Ginoo ug sa ilang mga kaugalingon sa giladmon sa ilang pagkamatinud-anon ug pagpahinungod ngadto sa buhat sa Ginoo. Sama ni Abraham, kadaghanan sa unang mga lider sa Simbahan miagi og pagsulay nga gihimo aron matuman ang balaan nga mga katuyoan. Si Elder Neal A. Maxwell sa Korum sa Napulog Duha ka mga Apostoles miingon, “Kadtong kinsa nagmartsa sa Kampo sa Zion wala magsuhid sa lugar sa Missouri apan sa ilang kaugalingong nga posibilidad” (“Notwithstanding My Weakness,” Ensign, Nob. 1976, 14).