Doktrina ug mga Pakigsaad 1

Pasiuna

Sa Nobyembre 1831, si Joseph Smith nakadawat og labaw sa 60 ka mga pagpadayag. Hinoon, kadaghanan sa mga miyembro sa Simbahan dili makakuha og mga kopya sa mga pagpadayag. Mitawag og komperensya ang Propeta didto sa Hiram, Ohio, aron hisgutan ang pagmantala niini isip usa ka basahon nga pagatawgon og ang Basahon sa mga Sugo. Usa ka komitiba sa mga elder mihimo sa pasiuna sa basahon. Wala matagbaw niining pasiuna nga kopya, kadtong mitambong sa komperensya mihangyo nga si Joseph Smith mangayo sa Ginoo og usa ka pasiuna. Human mangamuyo sa Ginoo diha sa pag-ampo, nadawat ni Joseph ang usa ka pasiuna pinaagi sa pagpadayag. Ang pasiuna sa Ginoo ngadto sa Basahon sa mga Sugo nahimong seksyon 1 sa Doktrina ug mga Pakigsaad.

Mga Sugyot alang sa Pagtudlo

Doktrina ug mga Pakigsaad 1:1–16

Ang Ginoo nagpahimangno sa mga paghukom nga moabut sa masukulon diha sa Ikaduhang Pag-anhi

Mahimo nimong sugdan kini nga leksyon pinaagi sa paghangyo sa klase sa pagpamalandong sa mosunod nga mga pangutana samtang basahon kini nimo og kusog. Human sa igong panahon, dapita ang usa o duha ka mga estudyante sa pagpakigbahin sa ilang mga tubag.

Kanus-a ang usa ka tawo naninguha sa pagkuha sa inyong atensyon ug nagpahimangno kaninyo mahitungod sa usa ka butang? Giunsa ninyo sa pagsanong?
Unsa ang inyong gibati mahitungod nianang mga paninguha sa tawo sa pagpahimangno kaninyo? Nganong mibati kamo niini nga paagi?

Ipakita ang imong kopya sa Doktrina ug mga Pakigsaad, ug ipasabut nga niini nga basahon ang Ginoo naghatag og mga pahimangno, mga sugo, ug mga panudlo nga labing importante sa atong kalipay ug kaluwasan. Sultihi ang mga estudyante nga ang Ginoo mipadayag sa seksyon 1 isip usa ka pasiuna ngadto sa ubang mga pagpadayag diha sa Doktrina ug mga Pakigsaad. Ang usa ka pasiuna nag-andam sa tigbasa alang sa mga sulod sa basahon pinaagi sa pag-summarize sa mensahe ug mga katuyoan sa tigsulat. Aron matabangan ang mga estudyante sa pagsabut sa makasaysayanong konteksto alang sa Doktrina ug mga Pakigsaad 1, mahimo nimong isaysay ang pipila ka impormasyon gikan sa pasiuna niini nga leksyon.

Dapita ang usa ka estudyante sa pagbasa og kusog sa Doktrina ug mga Pakigsaad 1:1–3 . Hangyoa ang klase sa pagsunod ug sa pag-ila sa mga pulong nga gigamit sa Ginoo sa pagkuha sa atensyon niadtong kinsa mobasa sa Iyang mga pulong. Dapita ang pipila ka mga estudyante sa pagpakigbahin kon unsay ilang nakit-an. (Samtang ang mga estudyante nagtubag, mahimo nimong ipasabut nga ang pagpamati nagpasabut nga maminaw og maayo. Kon kita sa tinuod mamati sa Ginoo, kita mosunod sa Iyang tambag ug mosunod sa Iyang mga sugo.)

Ngadto kang kinsa ang Ginoo nakigsulti niini nga mga bersikulo? (Ang Ginoo nagsulti ngadto sa tanang lumulupyo sa yuta, dili lamang ngadto sa mga miyembro sa Simbahan.)
Unsa kaha ang kahulugan sa mga pulong “kay ang ilang pagkadautan ipamulong diha sa atup sa mga balay, ug ang ilang tinago nga mga lihok ipadayag”? (D&P 1:3).

Dapita ang usa ka estudyante sa pagbasa og kusog sa Doktrina ug mga Pakigsaad 1:4–7, ug hangyoa ang klase sa pag-ila kon giunsa sa Ginoo pagsulti nga ihatag Niya ang Iyang mga pahimangno ngadto sa tanang katawhan.

Giunsa sa Ginoo pagsulti nga ihatag Niya ang Iyang mga pahimangno ngadto sa tanang katawhan? (Ang mga estudyante mahimong mogamit og lahi nga mga pulong, apan kinahanglan nga ilang ilhon ang mosunod nga doktrina: Namulong ang Ginoo sa iyang mga pahimangno ngadto sa tanang katawhan pinaagi sa Iyang pinili nga mga disipulo. Mahimo nimong isugyot nga markahan sa mga estudyante kini nga doktrina diha sa Doktrina ug mga Pakigsaad 1:4 o isulat kini sa margin sa ilang mga kasulatan.)
Kinsa ang mga disipulo pinaagi diin ang Ginoo namulong ug nagmantala sa Iyang mga pahimangno?

I-summarize ang Doktrina ug mga Pakigsaad 1:8–10 pinaagi sa pagpasabut nga ang Ginoo mipadayag nga Siya ang mohukom sa tanang katawhan sumala sa ilang mga lihok ug giunsa nila pagtagad ang uban. Hangyoa ang usa ka estudyante sa pagbasa og kusog sa Doktrina ug mga Pakigsaad 1:11–14, ug dapita ang klase sa pagsunod ug sa pag-ila og dugang nga mga pahimangno.

Sumala sa footnote 12b, unsa nga hitabo ang gipasabut sa Ginoo diha sa Doktrina ug mga Pakigsaad 1:12?
Sa Doktrina ug mga Pakigsaad 1:14, unsa kaha ang gipasabut sa Ginoo sa diha nga Siya mipahimangno nga kadtong kinsa dili mamati sa Iyang mga propeta ug mga apostoles ipahimulag? (Sila ibulag gikan sa mga matarung ug mawad-an sa mga panalangin nga anaa pinaagi sa mga ordinansa ug mga pakigsaad sa ebanghelyo )

Ipasabut nga kining mga pahimangno gikinahanglan tungod sa pagkadautan ug sa apostasiya sa tibuok kalibutan. Dapita ang usa ka estudyante sa pagbasa og kusog sa Doktrina ug mga Pakigsaad 1:15–16. Hangyoa ang klase sa pagsunod ug sa pag-ila sa mga pulong nga nagpakita og pagkadautan o apostasiya. Dapita ang pipila ka mga estudyante nga moreport sa unsay ilang nakit-an.

Sa unsa nga mga paagi ang katawhan sa atong panahon naglakaw “diha sa [ilang] kaugalingon nga paagi, ug sama sa hulagway sa [ilang] kaugalingon nga dios”? (D&P 1:16).

Doktrina ug mga Pakigsaad 1:17–33

Ang ebanghelyo gipahiuli pinaagi ni Joseph Smith aron sa pag-andam sa kalibutan alang sa kalamidad sa katapusang mga adlaw

Hangyoa ang klase sa pagbasa sa Doktrina ug mga Pakigsaad 1:17 ug sa pag-ila sa pulong nga gigamit sa Ginoo sa pagpasabut sa pagkadautan, apostasiya, ug pagkalumpag nga mahitabo sa ulahing mga adlaw. Kon mailhan sa mga estudyante ang pulong kalamidad, ipasabut nga diha sa Doktrina ug mga Pakigsaad 1:17–33, ang Ginoo naghatag og mga solusyon aron matabangan kita pagtadlas sa kalamidad sa ulahing mga adlaw. (Mahimo nimong ipasabut nga ang pulong kalamidad nagpasabut og makalolooy nga mga hitabo nga inubanan og dakong kapildihan, kasakit, ug pag-antus.)

Kopyaha ang mosunod nga tsart diha sa pisara, o ihatag kini ngadto sa mga estudyante isip usa ka handout:

	Unsa nga solusyon ang gihatag sa Ginoo alang sa kalamidad nga moabut nganhi sa yuta?	Sa unsa nga paagi kini nga solusyon nagtabang kanato sa pag-atubang sa kalamidad sa katapusang mga adlaw?
D&P 1:17
D&P 1:18–23
D&P 1:29
D&P 1:30

Mahimo nimong hangyoon ang mga estudyante sa tinagsa o may pares sa pagkompleto sa tsart. Hangyoa ang mga estudyante sa pagbasa sa mga scripture passage diha sa wala nga bahin sa tsart ug pag-ila sa mga solusyon nga gihatag sa Ginoo sa pagtabang kanato sa kalamidad sa ulahing mga adlaw. Hangyoa sila sa pagsulat og mga paghulagway o pagdrowing og mga hulagway sa unsay ilang nakit-an diha sa tunga sa kolum sa tsart. Diha sa mga kahon sa tuo, hangyoa sila sa pagsulat og mubo nga mga pagpasabut kon unsaon sa kada solusyon sa Ginoo pagtabang kanato sa kalamidad sa katapusang mga adlaw.

Human sa igo nga panahon, dapita ang mga estudyante sa pagreport kon unsay ilang narekord diha sa tsart. Ang mga tubag diha sa tunga nga kolum kinahanglan nga maglakip sa mosunod: ang Ginoo mitawag ni Joseph Smith ug mihatag kaniya og mga pagpadayag ug mga sugo (tan-awa sa D&P 1:17); ang Ginoo nagsugo sa Iyang mga sulugoon sa pagsangyaw ngadto sa tibuok kalibutan sa Iyang ebanghelyo ug sa pagtukod sa Iyang pakigsaad (tan-awa sa D&P 1:18–23); ang Ginoo mipadayag sa Basahon ni Mormon (tan-awa sa D&P 1:29); ug gipahiuli sa Ginoo ang Iyang Simbahan dinhi sa yuta (tan-awa sa D&P 1:30). Ang mga tubag sa tuo nga kolum mahimong magkalain-lain. Dapita ang pipila ka mga estudyante sa pagpakigbahin kon unsa ang ilang gisulat.

Aron matabangan ang mga estudyante sa paghunahuna pa mahitungod sa pamahayag sa Ginoo diha sa Doktrina ug mga Pakigsaad 1:30, mahimo nimong isugyot nga ilang markahan ang mga pulong niini nga bersikulo nga nagpahayag sa mosunod nga kamatuoran: Ang Simbahan ni Jesukristo sa mga Santos sa Ulahing mga Adlaw mao lamang ang tinuod ug buhing simbahan dinhi sa yuta.

Base sa unsay inyong nakat-unan sa miaging leksyon mahitungod sa Dakong Apostasiya, unsaon ninyo sa pagpasabut ngadto sa usa ka tawo kon nganong Ang Simbahan ni Jesukristo sa mga Santos sa Ulahing mga Adlaw mao lamang ang tinuod ug buhing simbahan dinhi sa yuta?
Unsa ang nakahimo niini nga simbahan nga “buhi”?

Ipasabut nga pinaagi sa gasa sa Espiritu Santo, ang Ginoo nakahimo sa paggiya sa Iyang Simbahan uban sa nagpadayong pagpadayag. Kining nagpadayong pagpadayag mao ang usa ka ehemplo kon sa unsa nga paagi ang Simbahan buhi.

Nganong importante kini nganha kaninyo nga kamo nasakop sa mao lamang nga tinuod ug buhi nga Simbahan dinhi sa yuta?
Unsa kaha ang gipasabut sa Ginoo sa dihang Siya mipahayag nga Siya nahimuot sa Iyang Simbahan “sa tanan ug dili sa tagsa-tagsa”? (D&P 1:30). (Bisan og ang Simbahan tinuod ug isip tibuok nakapahimuot ngadto sa Ginoo, pipila ka indibidwal nga mga miyembro sa Simbahan mahimong wala magpuyo sa paagi nga makapahimuot Kaniya.)

Dapita ang mga estudyante sa pagsiksik sa Doktrina ug mga Pakigsaad 1:31–33 ug sa pag-ila kon unsa ang gisulti sa Ginoo mahitungod sa sala ug sa paghinulsol.

Sa unsa nga paagi gitan-aw sa Ginoo ang sala? Sa unsa nga paagi kita mapasaylo?
Sumala sa Doktrina ug mga Pakigsaad 1:33, unsa ang mahitabo niadtong dili maghinulsol?
Unsay ipasabut nga ang “kahayag” pagakuhaon?

Doktrina ug mga Pakigsaad 1:34–39

Ang Ginoo naggiya kanato sa pagsiksik sa mga pagpadayag ug mga sugo nga gilangkob diha sa Doktrina ug mga Pakigsaad

I-summarize ang Doktrina ug mga Pakigsaad 1:34–36 pinaagi sa pagpasabut nga ang Ginoo mipahayag pag-usab sa Iyang tinguha sa pagpahimangno sa tanang katawhan sa pagpangandam alang sa Iyang Ikaduhang Pag-anhi. Dapita ang usa ka estudyante sa pagbasa og kusog sa Doktrina ug mga Pakigsaad 18:11–12. Hangyoa ang klase sa pagsunod ug sa pagpangita sa mga kamatuoran nga gihatagan og gibug-aton sa Ginoo diha sa katapusan sa Iyang pasiuna sa Doktrina ug mga Pakigsaad.

Unsa nga kamatuoran ang gihatagan og gibug-aton sa Ginoo diha sa Doktrina ug mga Pakigsaad 1:37–39? (Samtang ang mga estudyante nakigbahin sa mga kamatuoran nga ilang giila, siguroha nga ang mosunod klaro: Kinahanglan natong siksikon ang mga sugo nga gihatag sa Ginoo. Ang mga pulong sa Ginoo tanan matuman. Ang mga pulong sa Ginoo tinuod bisan kon kini gipahayag pinaagi Kaniya o sa Iyang mga sulugoon.)
Base sa unsay inyong nakat-unan karong adlawa, sa unsa nga paagi kamo mapanalanginan kon inyong siksikon ang mga sugo ug mga pagpadayag sa Ginoo nga gihatag diha sa Doktrina ug mga Pakigsaad?

Dapita ang pipila ka mga estudyante sa pagpakigbahin kon sa unsa nga paagi ang pagsiksik sa mga kasulatan nagpanalangin sa ilang mga kinabuhi. Mahimo usab nimong dapiton ang mga estudyante sa pagsulat diha sa ilang mga class notebook o mga scripture study journal og usa ka tumong sa pagtuon sa Doktrina ug mga Pakigsaad kada adlaw sulod sa tuig sa ting-eskwela. Hangyoa sila sa pagkonsiderar kanus-a, asa, ug unsa kadugayon sila magtuon kada adlaw. Pahibaloa sila nga ikaw matag karon og unya mo-follow up aron sa pagtabang kanila nga molampos sa ilang inadlaw nga pagtuon.

Komentaryo ug Background nga Impormasyon

Doktrina ug mga Pakigsaad 1:14. “Patalinghugi ang mga pulong sa mga propeta”

Si Elder M. Russell Ballard mitudlo:

“Dili kini basta-basta lamang nga butang, akong mga kaigsoonan, ang pagkaadunay propeta sa Dios sa atong taliwala. Katalagsaon ug katingalahan sa mga panalangin nga moabut sa atong mga kinabuhi samtang maminaw kita sa mga pulong sa Ginoo nga gihatag ngari kanato pinaagi kaniya. Sa samang panahon, ang pagkasayud nga [ang Presidente sa Simbahan] usa ka propeta sa Dios nagtuga usab kanato og responsibilidad. Kon kita makadungog sa tambag sa Ginoo nga gipahayag pinaagi sa mga pulong sa Presidente sa Simbahan, ang atong pagsanong kinahanglan nga positibo ug dali. Ang kasaysayan nagpakita nga adunay kasiguroan, kalinaw, kauswagan ug kalipay sa pagsanong sa propetikanhong mga tambag sama sa gibuhat ni Nephi sa karaan: ‘Ako moadto ug mobuhat sa mga butang nga ang Ginoo nagsugo’ (1 Ne. 3:7)” (“His Word Ye Shall Receive,” Ensign, Mayo 2001, 65).

Dugang nga Ideya sa Pagtudlo

Doktrina ug mga Pakigsaad 1:30–33. “Mao lamang ang tinuod ug buhi nga simbahan”

Mahimo nimong gamiton kini nga ideya sa pagtudlo human matabangan ang mga estudyante sa pag-ila sa mosunod nga kamatuoran diha sa Doktrina ug mga Pakigsaad 1:30: Ang Simbahan ni Jesukristo sa mga Santos sa Ulahing mga Adlaw mao lamang ang tinuod ug buhi nga simbahan dinhi sa ibabaw sa tibuok yuta.

Hangyoa ang mga estudyante sa pagkonsiderar kon unsaon nila sa pagsanong ngadto niining mosunod nga sitwasyon:

Usa ka higala kinsa dili miyembro sa Ang Simbahan ni Jesukristo sa mga Santos sa Ulahing mga Adlaw nangutana, “Nakadungog ako nga ang mga miyembro sa inyong simbahan nagtuo ni Jesukristo ug sa Biblia. Apan wala ba usab kamo nag-angkon nga sakop sa mao lamang nga tinuod nga simbahan? Kon ang akong simbahan nagtudlo usab mahitungod ni Jesukristo ug sa Biblia, unsaon nimo pagsulti niini nga dili tinuod?”

Dapita ang mga estudyante sa pagpakigbahin kon unsaon nila sa pagsanong kini nga sitwasyon. Aron sa pagtabang sa klase sa pagsabut nga daghang uban nga mga simbahan naghupot og pipila ka mga kamatuoran, mahimo kang mohangyo og usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:

“Karon wala gipasabut nga ang mga simbahan, tanan niini, walay pipila ka kamatuoran. Sila adunay pipila ka kamatuoran—ang pipila kanila daghan kaayo niini. Sila adunay hulagway sa pagkadiosnon. Sa kasagaran ang kaparian ug ang mga dumadapig dili maingon nga walay dedikasyon, ug daghan kanila nagpraktis og maayo kaayo sa mga hiyas sa pagka-Kristyanos. Sila, bisan pa niana, dili kompleto. Pinaagi sa iyang pahayag, ‘… sila nagtudlo og mga doktrina nga mga sugo sa mga tawo, nga may hulagway sa pagkadiosnon, apan sila nanghimakak sa gahum niana.’ (JS—H 1:19).

“Ang ebanghelyo tingali mahimong ipakigsama ngadto sa keyboard sa piano—usa ka kompletong keyboard nga may kapilian nga mga key diin ang usa ka tawo kinsa gibansay makatukar og lain-laing musika nga walay kinutuban; usa ka ballad sa pagpahayag og gugma, usa ka martsa sa pagrally, usa ka melodiya sa paghupay, ug usa ka himno sa pagdasig; usa ka walay katapusan nga lain-laing musika aron mapahiangay sa kada buot ug sa pagtagbaw sa tanang panginahanglan.

“Unsa ka mubo og panan-aw, niana, sa pagpili og usa ka key ug sa walay katapusang pagtapik sa sum-ol nga usa ka nota, o gani duha o tulo ka nota, nga ang kompletong keyboard sa walay kinutubang panagbagay sa tingog mahimo mang tukaron.

“Unsa ka makawala og kadasig kon ang kahingpitan sa ebanghelyo, ang kompletong keyboard, ania sa kalibutan, nga daghang mga simbahan nagtapik og usa ka buok nga key. Ang nota nga ilang gitataw mahimo nga importante aron sa pagkompleto sa panagbagay sa relihiyosong kasinatian, apan kini, bisan pa niana, dili mao ang tanan. Kini dili ang kahingpitan. …

Karon dili nato masulti nga sila sayop apan atong maingon nga sila dili kompleto. Ang kahingpitan sa ebanghelyo gipahiuli. Ang gahum ug ang awtoridad sa paglihok alang Kaniya anaa uban kanato. Ang gahum ug ang awtoridad sa priesthood anaa niini nga simbahan.

“… Ang Simbahan ni Jesukristo sa mga Santos sa Ulahing mga Adlaw mao lamang ang tinuod ug buhing simbahan dinhi niini nga yuta, diin ako mopamatuod” (“The Only True and Living Church,” Ensign, Dis. 1971, 40–42).

Sa unsa nga paagi nga ang pag-anggid-anggid nga gihatag ni Presidente Packer nagtabang sa usa ka tawo sa pagsabut sa kalainan tali sa mga simbahan nga adunay pipila ka kamatuoran ug sa Simbahan ni Jesukristo sa mga Santos sa Ulahing mga Adlaw?

Dapita ang usa ka estudyante sa pagbasa og kusog sa mosunod nga pamahayag ni Presidente Gordon°B. Hinckley:

“Pasalamatan nato ang Dios alang sa Iyang katingalahang pagtugyan sa pagpamatuod, katungod, ug doktrina nga nag-uban niini, ang gipahiuli nga Simbahan ni Jesukristo.

“Kinahanglan mao kini ang atong dako ug nag-inusara nga mensahe sa kalibutan. Wala nato kini gitanyag uban sa pagpanghambug. Kita nagpamatuod diha sa pagkamapainubsanon apan uban sa kaligdong ug tinuod nga kamatinud-anon. Kita nagdapit sa tanan, sa tibuok kalibutan, sa pagpaminaw niining saysay ug susiha ang katinuod niini. Ang Dios mopanalangin kanato ingon man kadtong motuo sa Iyang balaang mga pagpakita ug motabang kanato sa pagpalungtad sa kahibalo niining halangdon ug katingalahang mga panghitabo ngadto sa tanan kinsa maminaw. Ngadto niini kita moingon diha sa diwa sa gugma, dad-a ang tanan nga anaa ninyo nga maayo ug kamatuoran nga nadawat ninyo gikan sa bisan unsa nga tinubdan, ug ngari ug tan-awon nato kon unsay among mahimong idugang niini ” (“Ang Kahibulongang Tukuranan sa Atong Pagtuo,” Liahona, Nob. 2002, 81).

Unsaon nato pagsunod ang tambag ni Presidente Hinckley ug sa pagdapit sa uban sa pag-apil sa mao lamang nga tinuod nga Simbahan nga walay pagdaot ngadto sa ilang mga tinuohan?