Leksyon 108: Doktrina ug mga Pakigsaad 103

Leksyon 108

Doktrina ug mga Pakigsaad 103

Pasiuna

Sa usa ka miting sa halangdong konseho sa Kirtland niadtong Pebrero 24, 1834, sila si Parley P. Pratt ug Lyman Wight nagtinguha og direksyon kabahin kon unsaon sa mga Santos sa Missouri nga makakuha og temporal nga kahupayan ug makuha pagbalik ang ilang mga yuta sa Lalawigan sa Jackson. Sa samang adlaw, nakadawat si Joseph Smith og pagpadayag nga narekord sa Doktrina ug mga Pakigsaad 103, diin misaad ang Ginoo nga ang yuta sa Zion pagatubson. Ang Ginoo misugo sa mga lider sa Simbahan sa pagpundok sa mga kapanguhaan ug mga tawo sa pagtabang sa mga Santos sa Missouri. Kini nga grupo gitawag og Kampo sa Zion.

Mga Sugyot alang sa Pagtudlo

Doktrina ug mga Pakigsaad 103:1–20

Misaad ang Ginoo nga ang Zion pagatubson

Sugdi ang klase pinaagi sa pagpangutana sa mosunod nga pangutana:

Unsa ang mga kaaway sa mga matarung karon?

Hangyoa ang mga estudyante sa paghunahuna sa unsa nga paagi nga ang mga kaaway sa Ginoo naningkamot sa pagpugong sa ilang espirituhanong kauswagan.

Ngano sa inyong hunahuna nga ang mga kaaway sa Ginoo nakahimo sa pagpugong sa espirituhanong kauswagan sa pipila ka mga tawo sa Ginoo?

Samtang magsugod ang mga estudyante sa pagtuon ug paghisgot sa Doktrina ug mga Pakigsaad 103, awhaga sila sa pagpangita sa mga baruganan nga makatabang kanila sa pagbuntog sa mao nga mga kaaway.

Dapita ang mga estudyante sa pagbasa og kusog sa seksyon sa pasiuna sa Doktrina ug mga Pakigsaad 103. Hangyoa ang klase sa pagsunod, nga mangita ngano nga si Parley Pratt ug Lyman Wight miadto sa Kirtland, Ohio, gikan sa Missouri.

Ngano nga sila si Brother Pratt ug Brother Wight miadto sa Kirtland?

Ipasabut nga si Joseph Smith nakadawat sa pagpadayag nga narekord sa Doktrina ug mga Pakigsaad 103 sa samang adlaw nga kining duha ka mga lider nakigkita kaniya ug sa halangdong konseho didto sa Kirtland.

Dapita ang usa ka estudyante sa pagbasa og kusog sa Doktrina ug mga Pakigsaad 103:1–4. Hangyoa ang klase sa pagpangita og duha ka rason nga mitugot ang Ginoo sa Iyang mga kaaway sa paggukod sa mga Santos didto sa Missouri.

Sumala sa mga bersikulo 3–4, unsa ang duha ka rason nga gitugot sa Ginoo nga gukuron sa Iyang mga kaaway ang mga Santos? (Usa sa rason mao ang pagtugot sa mga tiggukod sa “pagpuno sa sukod sa ilang mga kadautan, aron ang ilang kopa mapuno”—sa laing pagkasulti, sa paghatag og katarungan sa Iyang mga paghukom sa dautan. Laing rason mao ang pagpanton sa masinupakon nga mga Santos.)
Sumala sa bersikulo 4, ngano ang mga Santos kinahanglang pantunon? Unsa sa inyong hunahuna ang kahulugan sa mga pulong “sila wala magpatalinghug”? (Dili sila hingpit nga masulundon sa Ginoo.)

Dapita ang usa ka estudyante sa pagbasa og kusog sa Doktrina ug mga Pakigsaad 103:5–7. Hangyoa ang klase sa pagpangita unsay gitudlo sa Ginoo sa mga Santos nga ilang buhaton aron makabuntog batok sa Iyang mga kaaway. (Mahimo nimong ipasabut nga ang pulong makabuntog nagpasabut nga magmalig-on kay sa kaaway o magmadaugon.)

Kon ang mga Santos mosunod sa tambag sa Ginoo “gikan gayud [niana] nga takna,” unsa nga panalangin ang ilang madawat? (Sila makabuntog batok sa mga kaaway sa Ginoo “gikan gayud [niana] nga takna,”)
Unsa man ang gitudlo niini nga mga bersikulo kon sa unsa nga paagi kita magmadaugon batok sa mga impluwensya sa kalibutan? (Ang mga estudyante mahimong mogamit og lain-laing mga pulong, apan kinahanglang ipadayag nila ang mosunod nga baruganan: Kon mosugod kita sa pagsunod sa tambag sa Ginoo, makadawat kita og kalig-on sa pagbuntog batok sa kalibutan.)

Dapita ang usa ka estudyante sa pagbasa og kusog sa Doktrina ug mga Pakigsaad 103:8–10. Hangyoa ang klase sa pagsunod ug sa pagpangita unsay gipasidaan sa Ginoo nga mahitabo kon mopili kita sa dili pagsunod sa Iyang mga pulong.

Unsa ang pipila ka mga resulta sa pagpili sa dili pagsunod sa tanang mga pulong sa Ginoo? (Ang mga estudyante mahimong moila og lain-laing mga baruganan, lakip sa mosunod: Kon supakon nato ang mga sugo sa Ginoo, ang kalibutan mobuntog kanato. Kon dili nato sundon ang tanang mga pulong sa Ginoo, mawad-an kita sa abilidad nga mahimong kahayag ngadto sa uban.)
Ngano kaha nga ang usa ka tawo nga masinupakon o dili kaayo masulundon ngadto sa Ginoo dili makahimo sa pagbuntog batok sa mga kaaway sa Ginoo?
Unsa ang pipila ka mga ehemplo kon sa unsa nga paagi nga ang mga tawo magmadaugon batok sa kaaway sa Ginoo pinaagi sa pagpaningkamot sa pagsunod sa mga pulong sa Ginoo? (Mga ehemplo mahimong maglakip sa mga tawo kinsa, pinaagi sa pagsunod, makadawat og kalig-on gikan sa Ginoo sa pagbuntog sa pagkaadik o pagsunod sa ebanghelyo human magkinabuhi subay sa paagi sa kalibutan.)

Mahimo nimong ipasabut nga samtang kita dili hingpit nga masulundon ngadto sa tanang mga pulong sa Ginoo, kon maningkamot kita sa pagsunod Kaniya ug sinsero nga maghinulsol kon kita makasala, ang Ginoo motabang kanato nga makabuntog sa Iyang mga kaaway.

Dapita ang mga estudyante sa pagsulat diha sa ilang mga class notebook o mga scripture study journal og usa ka baruganan nga masugdan nila sa pagsunod “gikan gayud niini nga takna” sa pagpaminaw pag-ayo sa tambag sa Ginoo.

I-summarize ang Doktrina ug mga Pakigsaad 103:11–20 pinaagi sa pagpasabut nga ang Ginoo misaad sa mga Santos nga human sa ilang mga kalisdanan, ang Zion tubson pinaagi sa Iyang gahum. Hinoon, kon ang mga Santos mohugaw-hugaw sa ilang mga kabilin, pagakuhaon kini gikan kanila.

Doktrina ug mga Pakigsaad 103:21–40

Ang Ginoo mipadayag kon sa unsa nga paagi tubson ang Zion

Sa dili pa ang klase, paghimo og poster nga mag-ingon MGA BOLUNTARYO GIKINAHANGLAN! I-display kini diin makita sa mga estudyante. Dugang pa, andama ang mosunod nga pahibalo sa usa ka piraso nga papel:

Mga boluntaryo gikinahanglan! Ang mga Santos sa Lalawigan sa Jackson, Missouri, gipugos sa pagbiya sa ilang mga yuta sa walay kalooy nga manggugubot nga panon. Apil sa pagdala og kahupayan ngadto niining mga Santos ug pagpanalipod kanila sa ilang pagkuha og balik ug pagmintenar sa ilang mga yuta sa Zion. Mibiya gikan sa Kirtland, Ohio, niadtong Mayo 1, 1834.

Dapita ang usa ka estudyante sa pagbasa og kusog sa Doktrina ug mga Pakigsaad 103:21–23. Hangyoa ang klase sa pagsunod, nga mangita kon unsay gisugo sa Ginoo nga buhaton sa mga lider sa Simbahan sa pagtubos sa Zion. Hangyoa ang mga estudyante sa pag-report kon unsay ilang makit-an.

Hangyoa ang usa ka estudyante sa pagbarug tupad sa poster nga mabasa MGA BOLUNTARYO GIKINAHANGLAN! Ihatag ang pahibalo nga imong giandam sa wala pa ang klase ngadto sa estudyante ug hangyoa siya sa pagbasa niini og kusog. Dayon ipangutana sa klase ang mosunod:

Sa inyong hunahuna andam kaha kamo sa pag-adto sa Lalawigan sa Jackson aron sa pagtabang sa mga Santos? Ngano o nganong dili man?

Ipasabut nga ang grupo sa mga lalaki nga gipangulohan si Joseph Smith ngadto sa Missouri nailhan nga Kampo sa Zion. (Kinahanglan nimong ipasabut nga ang kampo lain nga pulong sa kasundalohan [tan-awa sa Noah Webster, An American Dictionary of the English Language, facsimile of the first edition (1828; repr., 1967), “Camp”].) Ang mga sakop sa Kampo sa Zion adunay duha ka importante nga mga katuyoan. Una, dad-on nila ang mga kapanguhaan ngadto sa mga Santos sa Missouri aron sa paghatag og kahupayan ug makapahimo nila sa pagbalik ngadto sa ilang mga panimalay ug mopalit og dugang nga yuta. Ikaduha, sumala sa pagtugot ni Gobernador Daniel Dunklin sa Missouri, human ang Missouri state militia mikuyog sa mga Santos balik sa Lalawigan sa Jackson County, ang mga sakop sa Kampo sa Zion magpabilin aron sa pagtabang sa pagmintenar sa kahusay ug kalinaw didto.

Kon kamo namiyembro sa Simbahan niining higayuna, unsa kaha ang inyong mga kabalaka mahitungod sa pagboluntaryo sa pag-apil sa Kampo sa Zion?

Dapita ang mga estudyante sa pagbasa sa hilom sa Doktrina ug mga Pakigsaad 103:20.

Sa unsang paagi nga ang saad niini nga bersikulo makaapekto sa inyong desisyon sa pagboluntaryo?

Ipasabut nga ang pag-apil sa Kampo sa Zion magkinahanglan nga biyaan ang mga responsibilidad sa pamilya ug trabaho aron momarsta og mga 900 ka milya (1,450 ka kilometro) agi sa malisud nga mga kondisyon ngadto sa kaaway ug makuyaw nga dapit. Dapita ang usa ka estudyante sa pagbasa og kusog sa Doktrina ug mga Pakigsaad 103:27–28. Hangyoa ang klase sa pagsunod, nga mangita kon unsay gisulti sa Ginoo niadtong moapil sa Kampo sa Zion. Hangyoa ang mga estudyante sa pag-report kon unsay ilang makit-an.

Unsa kaha ang gipasabut sa mga pulong nga “motugyan sa iyang kinabuhi alang sa akong katuyoan”?
Sumala niini nga mga bersikulo, unsay gitawag sa Ginoo sa usa ka tawo nga andam nga motugyan sa iyang kinabuhi alang sa katuyoan sa Ginoo? (Human makatubag ang mga estudyante, isulat ang mosunod diha pisara: Ang mga disipulo ni Jesukristo andam nga motugyan sa ilang mga kinabuhi alang sa Iyang katuyoan.

Itudlo nga alang sa mga Santos sa Kampo sa Zion, nga ang posibilidad nga mawala ang ilang kinabuhi dako kaayo. Bisan og kita wala mag-atubang og sama nga kakuyaw, kini nga kamatuoran ato gihapon nga magamit. Dapita ang usa ka estudyante sa pagbasa og kusog sa mosunod nga pamahayag ni Presidente James E. Faust sa Unang Kapangulohan. Hangyoa ang klase sa pagpaminaw sa usa ka paagi nga kitang tanan makahatag sa atong kinabuhi alang sa katuyoan sa Ginoo.

“Sa kasagaran kanato … unsay gikinahanglan mao ang dili magpakamatay alang sa Simbahan kondili magpakabuhi alang niini. Alang sa kadaghanan, ang pagpuyo og Kristohanong kinabuhi matag adlaw mas lisud pa kaysa pagtugyan sa kinabuhi sa usa ka tawo” (“Pagkadisipulo,” Liahona, Nob. 2006, 22).

Ngano kaha nga mas lisud man ang pagpakabuhi alang sa Ginoo kaysa pagpakamatay alang Kaniya?

Dapita ang mga estudyante sa pagbasa sa hilom sa Doktrina ug mga Pakigsaad 103:30–34, mangita kon pila ka mga boluntaryo ang gitinguha sa Ginoo alang sa Kampo sa Zion.

Pila ka mga boluntaryo ang gitinguha sa Ginoo? (500.) Unsa ang minimum nga gidaghanon ang gikinahanglan sa Ginoo? (100.)

Ipasabut nga sa katapusan sa miting sa halangdong konseho diin ang mga lider sa Simbahan naghisgot sa sitwasyon sa mga Santos sa Missouri, miingon si Joseph Smith nga mobiyahe siya padulong sa Zion ug motabang sa pagtubos niini. Mga 30 o 40 ka mga lalaki nga nanambong miboluntaryo usab. Dayon ang Ginoo mi-assign og 8 ka mga lalaki sa paglibut sa tibuok kongregasyon sa Simbahan sa pag-recruit og mga boluntaryo alang sa Kampo sa Zion ug sa pagpangayo og mga kontribusyon nga mga probisyon ug kwarta alang sa mga Santos sa Missouri (tan-awa sa D&P 103:37–40). Mga 200 ka tawo ang miuban sa Kampo sa Zion, lakip sa pipila ka mga babaye ug mga bata.

Dapita ang usa ka estudyante sa pagbasa og kusog sa Doktrina ug mga Pakigsaad 103:35–36. Hangyoa ang klase sa pag-ila unsay kinahanglan nga buhaton sa mga Santos aron magmalampuson sa ilang mga paningkamot sa pagtubos sa Zion.

Base sa gisaad sa Ginoo niini nga mga bersikulo, unsa nga mga baruganan ang atong makat-unan mahitungod kon sa unsa nga paagi kita makaangkon og kadaugan ug himaya? (Ang mga esudyante kinahanglang moila sa mosunod nga baruganan: Ang tanang kadaugan ug himaya atong maangkon pinaagi sa atong kakugi, kamatinud-anon, ug mga pag-ampo sa hugot nga pagtuo.)

Ipamatuod nga makaangkon kita og kadaugan batok sa mga kaaway sa Ginoo kon kita magmakugihon ug magmatinud-anon sa pagsunod sa tanang mga pulong sa Ginoo. Dapita ang mga estudyante nga buhaton ng ilang nasulat sa ilang mga class notebook o mga scripture study journal.“gikan gayud niining taknaa.”

Komentaryo ug Background nga Impormasyon

Doktrina ug mga Pakigsaad 103. Gobernador sa Missouri nga si Daniel Dunklin

Samtang ang mga Santos nag-antus sa kabangis sa mga anti-Mormon sa Missouri niadtong 1833 ug 1834, ang mga lider sa Simbahan balik-balik nga nangayog tabang sa mga lider sa gobyerno sa estado ug sa federal, lakip sa gobernador sa Missouri nga si Daniel Dunklin. Si Gobernador Dunklin mitanyag og gamay nga tabang agig tubag sa hangyo sa mga Santos. Niadtong Oktubre 1833 gitambagan niya ang mga lider sa Simbahan sa pagpangayo og husay ug panalipod pinaagi sa mga korte sa Lalawigan sa Jackson. Misaad siya nga kon mapakyas kini, mogamit siya og laing pamaagi sa pagpatuman sa balaod. Ang tambag ni Gobernador Dunklin dili epektibo ug impraktikal, kay daghan sa mga opisyales sa korte sa Lalawigan sa Jackson apil niadtong kinsa naningkamot nga palayason ang mga Mormon. (Tan-awa sa Church History in the Fulness of Times Student Manual, 2nd ed. [manwal sa Church Educational System, 2003], 134–35.)

Sa ulahing bahin sa tinglarag niadtong 1833, ang mga Santos gipugos sa pagpalayas gikan sa Lalawigan sa Jackson. Kadaghanan nila nakakita og temporaryong kapahulayan sa Lalawigan sa Clay, samtang ang uban nakakita og kaistaran sa laing duol nga mga lalawigan. Pagkasunod tingpamulak, sa dihang naorganisar ang Kampo sa Zion ug nagsugod sa ilang pagpanglakaw paingon sa Missouri, ang mga lider sa Simbahan nagpadayon sa paghangyo ni Gobernador Dunklin sa kasiguroan nga mosuporta siya sa mga Santos nga makuha pag-usab ang ilang mga panimalay ug kabtangan ug magpuyo nga malinawon sa Lalawigan sa Jackson County. Ang gobernador miangkon nga ang mga Santos gibuhatan og sayop, ug siya nagtuo nga ang ipadala nga armadong kusog nga ipadala sa estado gikinahanglan sa pagpabalik sa mga Mormon ngadto sa ilang mga yuta ug pagpanalipod kanila samtang ang mga korte mohukom sa legal nga mga isyu kabahin niini. (Tan-awa sa Church History in the Fulness of Times, 135–37, 146.)

Apan, niadtong Hunyo 1834, si Gobernador Dunklin miusab sa iyang hunahuna. Miingon siya ang pagpadala og kasundalohan basin maoy hinungdan nga magsugod ang gubat sa estado. Imbis mohatag og suporta, gitambagan niya ang mga Santos nga aron malikayan ang dugoon nga panghitabo kinahanglan nga ila na lang ihatag ang ilang mga katungod, ibaligya ang ilang mga yuta, ug manimuyo sa laing dapit. Mitambag siya kanila pag-usab nga mohangyo sa mga korte. Kini nga mga sugyot dili madawat sa mga lider sa Simbahan, ug ang ilang paglaum nga ang mga Santos matugutan nga makabalik sa ilang mga panimalay sa malinawon nga paagi naguba. (Tan-awa sa Church History in the Fulness of Times, 146–47.)

Doktrina ug mga Pakigsaad 103:1, 13. Ang katubsanan sa Zion

Sa katapusan, ang pagtubos sa Zion dili lang bahin sa pagpanag-iya pag-usab sa yuta. Ang Zion mao ang pisikal nga dapit ug usa ka katilingban nga naglangkob sa matang sa katawhan. Sa dili pa mabawi ang Zion ug matukod ang siyudad sa Zion, ang katawhan sa Ginoo kinahanglang mabalaan.

Si Elder D. Todd Christofferson sa Korum sa Napulog Duha ka mga Apostoles mipasabut:

“Ang Zion usa ka Zion tungod sa pamatasan, hiyas, ug pagkamatinud-anon sa iyang mga pagkanasudnon. Hinumdumi, ‘ang Ginoo mitawag sa iyang katawhan nga Zion, tungod kay sila usa sa kasingkasing ug usa sa hunahuna, ug nagpuyo diha sa pagkamatarung; ug walay kabus taliwala kanila’. (Moises 7:18). Kon atong itukod ang Zion diha sa atong mga panimalay, mga branch, mga ward ug mga stake, kinahanglan atong labanan kini nga sumbanan. Gikinahanglan nga (1) mahimong maghiusa sa usa ka kasingkasing ug usa ka hunahuna, (2) aron mamahimo, sa tinagsa ug sa dinaghan, nga usa ka balaan nga katawhan, ug (3) moatiman alang sa mga timawa ug nagkinahanglan uban sa ingon ka epektibo nga atong wad-on ang kakabus taliwala kanato. Dili kita makahulat nga ang Zion moabut nga kining mga butanga mahitabo—ang Zion moabut lamang kon kini mahitabo” (“Dali na Diri sa Zion,” Liahona, Nob. 2008, 38).

Doktrina ug mga Pakigsaad 103:15–18. “Tan-awa, Ako moingon nganha kaninyo, ang katubsanan sa Zion kinahanglan gayud nga mahitabo pinaagi sa gahum”

Ang katuyoan sa Kampo sa Zion dili ang pagbawi sa yuta nga gipanag-iya sa mga Santos sa Lalawigan sa Jackson pinaagi sa gahum militar, bisan og ang ubang mga miyembro sa kampo nagtuo nga mao kadto ang tuyo. Kini nga mga lalaki andam nga makig-away kon ang ilang mga kinabuhi mahulga, apan ang Ginoo wala magkinahanglan sa gahum sa tawo sa pagtubos sa Zion.

Si Presidente Joseph Fielding Smith misulat bahin sa gahum diin ang Zion matubos:

“Ang katubsanan sa Zion kinahanglan nga moabut pinaagi sa gahum. Dili sa gahum sa armas ug sa pagpaagas sa dugo, apan sa gahum sa Ginoo” (Church History and Modern Revelation [1953], 1:484).

Ang Ginoo naghisgot sa tahas sa Iyang gahum sa katubsanan sa Zion sa dihang miingon Siya nga ang mga Santos “pagahaw-ason gikan sa pagkaulipon pinaagi sa gahum, ug uban sa bukas nga mga bukton” (D&P 103:17). “Bukas nga mga bukton” usa ka simbolo nga termino nga nagpasabut sa Dios nga migamit sa Iyang gahum (nagsimbolo sa Iyang gahum) alang sa Iyang katawhan. Ang mga Santos makaangkon og kadaugan sa pagtubos sa Zion dili lamang pinaagi sa gahum sa Dios, ug maangkon nila kini nga gahum pinaagi sa pagsunod sa tanan Niyang mga pulong.

Doktrina ug mga Pakigsaad 103:27. “Kay kinsa kadto nga motugyan sa iyang kinabuhi alang kanako makakaplag niini pag-usab”

Mipasabut si Elder Franklin D. Richards sa Seventy unsay mahitabo kon atong itugyan ang atong kinabuhi alang sa Manluluwas:

“Naklaro nga daghang mga panalangin ang gipasikad sa pagkamasulundon sa mahangturong balaod sa sakripisyo.

“Ang Manluluwas miingon, ‘Himoa nga walay tawo nga mahadlok nga motugyan sa iyang kinabuhi alang sa akong katuyoan; kay kinsa kadto nga motugyan sa iyang kinabuhi alang kanako makakaplag niini pag-usab.’ (D&P 103:27.)

“Sa ingon ang labing dako nga sakripisyo sa kinabuhi sa usa ka tawo gantihan niana nga tawo nga nakakita pag-usab sa iyang kinabuhi, ‘gani sa kinabuhi nga dayon’ (D&P 98:13.)” (sa Conference Report, Okt. 1967, 75).