Doktrina ug mga Pakigsaad 81

Pasiuna

Niadtong Marso 8, 1832, ang Ginoo mitawag kang Jesse Gause ug Sidney Rigdon sa pagserbisyo isip mga magtatambag ni Joseph Smith. Paglabay sa usa ka semana, niadtong Marso 15, 1832, ang Ginoo mihatag sa pinadayag nga narekord diha sa Doktrina ug mga Pakigsaad 81. Niini nga pagpadayag, gihulagway Niya ang tahas sa mga magtatambag sa Presidente sa Simbahan ug gilatid ang mga panalangin alang niadtong kinsa matinud-anon sa ilang pagpangalagad. Si Jesse Gause wala magpabilin nga matinud-anon, ug ang Ginoo mitawag ni Frederick G. Williams, kansang ngalan makita karon diha sa Doktrina ug mga Pakigsaad 81, aron mopuli sa pwesto ni Brother Gause diha sa Kapangulohan. Atol niini nga pagpadayag, ang Presidente sa Simbahan ug ang iyang mga magtatambag gitawag nga Kapangulohan sa Halangdon nga Pagkapari. Sugod niadtong 1834, ang mga pinadayag mitawag sa Presidente ug ang iyang mga magtatambag isip ang Unang Kapangulohan (tan-awa sa D&P 102:26–28).

Mga Sugyot alang sa Pagtudlo

Doktrina ug mga Pakigsaad 81:1–7

Ang Ginoo mihulagway sa tahas sa mga magtatambag sa Unang Kapangulohan

Sa dili pa magsugod ang klase, isulat ang mosunod nga mga pangutana diha sa pisara:

Nganong ang Ginoo mohatag man kanato og mga calling diha sa Iyang Simbahan?

Unsa man ang mga panalangin sa matinud-anon nga pagtuman og calling?

Unsa kaha kon ang usa ka tawo mopili nga dili magmatinud-anon sa pagtuman sa iyang calling?

Sugdi ang klase pinaagi sa pagdapit sa mga estudyante sa pagtubag sa mga pangutana diha sa pisara. Isip kabahin sa diskusyon, mahimo nimong ipasabut nga bisan kon ang usa ka lider sa Simbahan mahimong makadawat og inspirasyon sa pagtawag sa usa ka miyembro sa Simbahan ngadto sa usa ka piho nga katungdanan, anaa ra sa indibidwal kinsa midawat sa tawag nga magmatinud-anon sa pagdawat ug pagtuman niini.

Dapita ang usa ka estudyante sa pagbasa og kusog sa pasiuna nga seksyon sa Doktrina ug mga Pakigsaad 81. Hangyoa ang klase sa pagsunod, nga mangita og ehemplo sa usa ka tawo kinsa gitawag sa Ginoo apan wala magmatinud-anon sa iyang calling.

Kinsa man ang unang gitawag sa Ginoo nga moserbisyo isip magtatambag ni Joseph Smith sa Kapangulohan sa Halangdon nga Pagkapari?
Nganong nawad-an man si Jesse Gause sa iyang calling?

Ipasabut nga si Jesse Gause gitawag sa pagserbisyo isip magtatambag sa Kapangulohan sa Halangdon nga Pagkapari niadtong Marso 1832. Niadtong Agosto 1, 1832, misugod siya sa usa ka misyon uban ni Zebedee Coltrin. Samtang anaa niini nga misyon, si Brother Gause nakig-istorya sa iyang asawa ug naningkamot sa pagkumbinse kaniya sa kamatuoran, apan midumili siya sa pagpasakop sa Simbahan. Sa wala madugay, si Brother Coltrin nagkasakit ug mipauli ngadto sa Kirtland. Subo lang, si Brother Gause wala motiwas sa iyang misyon ug wala magpabilin nga matinud-anon diha sa Simbahan.

Sumala sa pasiuna sa seksyon, kinsa ang gitawag sa Ginoo aron mopuli ni Jesse Gause?

Mahimo nimong isugyot nga markahan sa mga estudyante ang mosunod nga mga pulong diha sa pasiuna sa seksyon: “Ang pagpadayag … kinahanglan pagailhon nga usa ka lakang paingon sa tukma nga katukuran sa Unang Kapangulohan.” Ipasabut nga ang Presidente sa Simbahan ug ang iyang mga magtatambag (ang Kapangulohan sa Halangdon nga Pagkapari) wala tawaga nga “ang Unang Kapangulohan” hangtud 1834 (tan-awa sa D&P 102:26–28). Ang Ginoo wala mopadayag sa kompleto nga organisasyon sa Iyang Simbahan ngadto sa Propeta sa usa ra ka higayon. Gipadayag Niya ang lain-laing mga bahin sa organisasyon sumala sa panginahanglan ug sa dihang andam na ang mga Santos sa pagdawat niini.

Dapita ang usa ka estudyante sa pagbasa og kusog sa Doktrina ug mga Pakigsaad 81:1–2. Hangyoa ang klase sa pagsunod, nga mangita kon unsay gitudlo sa Ginoo ngadto ni Frederick G. Williams mahitungod sa Kapangulohan sa Halangdon nga Pagkapari.

Sumala sa bersikulo 2, unsa ang gihuptan sa Kapangulohan? (Ang mga estudyante kinahanglang mahibalo sa mosunod nga kamatuoran: Ang Kapangulohan sa Halangdon nga Pagkapari naghupot sa mga yawe sa gingharian sa Dios dinhi sa yuta. Mahimo nimong isugyot nga markahan sa mga estudyante ang mga pulong nga nagtudlo niini nga kamatuoran.)

Aron matabangan ang mga estudyante nga makasabut niini nga doktrina, pahinumdumi sila nga ang “mga yawe sa priesthood mao ang awtoridad nga gihatag sa Dios ngadto sa mga lider sa priesthood sa pagdirekta, pagkontrolar, ug pagdumala sa paggamit sa Iyang priesthood dinhi sa yuta. Ang paggamit sa awtoridad sa priesthood gidumala pinaagi niadtong naghupot sa mga yawe niini (tan-awa sa D&P 65:2; 81:2; 124:123). Kadtong kinsa naghupot sa mga yawe sa priesthood adunay katungod sa pagdumala ug paggiya sa Simbahan nga sulod sa hurisdiksyon.

Gihuptan ni Jesukristo ang mga yawe sa priesthood nga may kalabutan sa Iyang Simbahan. Iyang gitugyan ngadto sa matag usa sa Iyang mga Apostoles ang tanang mga yawe nga may kalabutan sa gingharian sa Dios dinhi sa yuta. Ang senior nga buhing Apostol, ang Presidente sa Simbahan, maoy bugtong tawo dinhi sa yuta nga may awtoridad sa paggamit sa tanang mga yawe sa priesthood” (Handbook 2: Administering the Church [2010], 2.1.1).

Unsa ang gitugot sa mga yawe sa priesthood nga mabuhat sa Unang Kapangulohan? (Pagdumala sa buhat sa Ginoo dinhi sa yuta.)

Pag-display og litrato sa kasamtangang Unang Kapangulohan o tagsa-tagsa ka litrato sa mga miyembro niini. Hangyoa ang mga estudyante kon makahingalan ba sila sa mga sakop sa Unang Kapangulohan.

Isulat ang mosunod nga ulohan diha sa pisara: Usa ka Magtatambag sa Unang Kapangulohan.

Gikan sa inyong pagsabut, unsa ang mga katungdanan ug mga responsibilidad sa mga magtatambag sa Unang Kapangulohan?

Dapita ang usa ka estudyante sa pagbasa og kusog sa Doktrina ug mga Pakigsaad 81:3. Hangyoa ang klase sa pagsunod, nga mangita sa mga instruksyon nga gihatag sa Ginoo ngadto ni Frederick G. Williams kalabut sa iyang calling isip magtatambag sa Unang Kapangulohan.

Sumala sa bersikulo 3, unsa ang angay nga buhaton ni Frederick G. Williams isip magtatambag sa Unang Kapangulohan? (Dapita ang usa ka estudyante sa paglista sa mga tubag diha sa pisara ubos sa ulohan. Mahimo nimong ipasabut nga ang mga magtatambag sa kapangulohan nagsuporta ug naglig-on sa presidente.)
Unsa kaha ang gipasabut alang sa usa ka magtatambag nga mahimong “matinud-anon sa tambag” sa presidente?

Aron matabangan ang mga estudyante nga mas makasabut kon unsay kahulugan nga magmatinud-anon sa tambag, hangyoa ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley. Hangyoa ang klase sa pagpaminaw kon sa unsang paagi ang magtatambag sa kapangulohan makigtambag sa presidente.

“Ang [magtatambag] usa ka assistant ngadto sa iyang presidente. …

“Isip assistant, ang magtatambag dili mao ang presidente. Dili niya angkunon ang responsibilidad ug mag-una sa iyang presidente.

“Sa mga miting sa kapangulohan, ang matag magtatambag gawasnon nga mosulti sa iyang hunahuna sa tanang hilisgutan nga moabut diha sa kapangulohan. Hinoon, katungod sa president ang paghimo og desisyon, ug katungdanan sa mga magtatambag ang pagsuporta kaniya niana nga desisyon. Ang iyang desisyon dayon mahimong ilang desisyon, dili igsapayan kon unsa ang nangagi nila nga mga ideya” (“In … Counsellors There Is Safety,” Ensign, Nob. 1990, 49).

Sumala ni Presidente Hinckley, unsaon sa magtatambag sa kapangulohan sa pagpakigtambag sa presidente?
Sa unsang paagi ang pagsabut kon unsaon nga mahimong matinud-anon sa tambag makatabang sa tawo nga nagserbisyo isip magtatambag sa bisan unsa nga kapangulohan sa Simbahan?

Dapita ang mga estudyante sa paghunahuna sa mga panahon nga nakaserbisyo sila (o nakakita sa uban nga nagserbisyo) sa usa ka kapangulohan sa Simbahan. (Mahimo nimong ipasabut nga ang bishopric maoy nagsilbing kapangulohan sa usa ka ward.) Hangyoa sila sa pagkonsiderar kon unsa ang nabuhat nila o sa uban aron epektibong makahatag og suporta sa mga kapangulohan sa ilang mga korum sa priesthood o mga klase sa Young Women. Pagdapit og pipila ka mga estudyante sa pagpakigbahin sa ilang mga hunahuna diha sa klase.

Dapita ang mga estudyante nga hilum nga mobasa sa Doktrina ug mga Pakigsaad 81:4 , nga mangita sa gisaad sa Ginoo kang Frederick G. Williams kon magmatinud-anon siya sa iyang calling. Mahimo nimong ipasabut nga ang mga pulong nga “mopalambo sa himaya … [sa] imong Ginoo” niini nga konteksto nagpasabut nga pinaagi sa pagkamatinud-anon sa atong mga calling, makatabang kita sa paggiya sa mga tawo sa pagtahud ug pagsimba sa Ginoo.

Sumala sa bersikulo 4, unsay atong mabuhat kon matinud-anon kita sa atong mga calling? (Bisan og ang mga estudyante mogamit og lahi nga mga pulong, ang ilang mga tubag kinahanglang magpakita sa mosunod nga baruganan: Kon matinud-anon kita sa atong mga calling, makahimo kita og dako nga kaayohan alang sa uban ug makapalambo sa himaya sa Dios. Gamit ang mga pulong sa mga estudyante, isulat diha sa pisara kini nga baruganan.)

Sa unsang paagi ang matinud-anon nga pagserbisyo diha sa atong mga calling sa Simbahan makatabang kanato sa pagbuhat og dako nga kaayohan alang sa ubang mga tawo?
Sa unsang paagi ang matinud-anon nga pagserbisyo diha sa atong mga calling sa Simbahan makatabang sa pagpalambo sa himaya sa Dios?

Dapita ang mga estudyante sa paghunahuna og higayon nga nakakita sila og usa ka indibidwal nga nakahimo og dakong kaayohan alang sa uban pinaagi sa matinud-anon nga pagserbisyo diha sa iyang calling. Dapita ang pipila ka mga estudyante sa pagpaambit sa ilang mga obserbasyon ngadto sa klase.

Dapita ang usa ka estudyante sa pagbasa og kusog sa Doktrina ug mga Pakigsaad 81:5. Hangyoa ang klase sa pagsunod, nga mangita sa dugang nga tambag nga gihatag sa Ginoo ngadto ni Frederick G. Williams.

Base sa unsay gisulti sa Ginoo ngadto ni Frederick G. Williams diha sa bersikulo 5, unsay atong makat-unan mahitungod sa pagkamatinud-anon diha sa atong mga calling sa Simbahan o pagkamatinud-anon nga mga miyembro sa Simbahan?
Unsa kaha ang gipasabut sa “[pag]tabang sa maluyahon, ipataas ang mga kamot sa nawad-an og paglaum, ug lig-una ang mga tuhod nga mahuyang”?

Dapita ang usa ka estudyante sa pagbasa og kusog sa mosunod nga pamahayag ni Elder Marvin J. Ashton sa Korum sa Napulog Duha ka mga Apostoles. Hangyoa ang klase sa pagpaminaw alang sa mga panabut sa kahulugan niini nga mga pulong.

“Sa Doktrina ug mga Pakigsaad 81:5, ang bersikulo mahimong hubaron isip pag-awhag sa Ginoo kang Frederick G. Williams sa paglig-on sa mga maluyahon (‘[pag]tabang sa maluyahon’), pag-awhag sa mga gikapoy o nawad-an og kadasig (‘ipataas ang mga kamot sa nawad-an og paglaum’), ug sa paghatag og kaisug ug kalig-on ngadto sa huyang nga mga tuhod ug mahadlukon nga mga kasingkasing” (“Strengthen the Feeble Knees,” Ensign, Nob. 1991, 70).

Unsa ang pipila ka mga paagi nga kita “[maka]tabang sa maluyahon, [ma]pataas ang mga kamot sa nawad-an og paglaum, ug [mapalig-on] ang mga tuhod nga mahuyang”? (Isulat ang mga tubag sa mga estudyante diha sa pisara.)
Kanus-a kamo napataas o nalig-on pinaagi sa laing tawo?

Hagita ang mga estudyante sa pagpili og usa gikan sa lista sa mga tubag sa pisara ug sa pagpangita og mga oportunidad sa pagtabang niadtong naglibut kanila.

Dapita ang usa ka estudyante sa pagbasa og kusog sa Doktrina ug mga Pakigsaad 81:6–7. Hangyoa ang klase sa pagsunod, nga mangita sa mga panalangin nga gisaad sa Ginoo ngadto ni Frederick G. Williams kon magmatinud-anon siya hangtud sa katapusan. Hangyoa ang mga estudyante sa pag-report unsa ang ilang nakaplagan.

Pagpamatuod sa kaimportante sa pagkamatinud-anon sa atong mga calling ug sa pagtabang niadtong naglibut kanato aron sila, usab, mahimong takus sa kinabuhing dayon.

Komentaryo ug Background nga Impormasyon

Doktrina ug mga Pakigsaad 81:1. Mga magtatambag sa Unang Kapangulohan

Si Presidente Harold B. Lee mipasabut sa importante nga tahas sa mga magtatambag sa Unang Kapangulohan:

“Sa akong paghunahuna sa tahas ni Presidente Tanner ug sa akong kaugalingon isip mga magtatambag [ni Presidente Joseph Fielding Smith], naghunahuna ko og usa ka higayon sa kinabuhi ni Moises, sa dihang ang mga kaaway sa simbahan nianang panahona sama ra usab kanila niining panahona. Nanghulga sila sa pagbuntog ug paglaglag ug pagpahunong sa buhat sa simbahan. Samtang naglingkod si Moises didto sa bungtod ug giisa ang sungkod sa iyang awtoridad, o ang mga yawe sa iyang priesthood, ang Israel nagmadaugon batok sa ilang mga kaaway; apan sa dihang naghinapos na ang adlaw, namuypoy na ang iyang mga kamot ug nagsugod sa paghoyhoy sa iyang kilid.

Mao nga gikuptan [ni Aaron ug Hur] ang iyang mga kamot aron dili kini maluya ug ang sungkod dili moubos. Gitabangan siya aron ang mga kaaway sa simbahan dili magmadaugon batok sa mga Santos sa Labing Halangdong Dios. (Tan-awa sa Exod. 17:8–12.)

“Tingali mao kana ang tahas nga angay tumanon nako ug ni Presidente Tanner. Ang mga kamot ni Presidente Smith mahimong mamuypoy. May kalagmitan kining mohoyhoy sa kilid tungod sa bug-at niyang mga responsibilidad; apan kon atong suportahan ang iyang mga kamot, ug mangulo kita ubos sa iyang direksyon, diha sa iyang kiliran, ang mga ganghaan sa impyerno dili makabuntog kaninyo ug batok sa Israel” (sa Conference Report, Okt. 1970, 153).

Sa Abril 1994 nga kinatibuk-ang komperensya sa Simbahan, si Presidente Gordon B. Hinckley, kinsa nagserbisyo isip Unang Magtatambag sa Unang Kapangulohan, miangkon nga si Presidente Ezra Taft Benson, ang Presidente sa Simbahan nianang higayuna, “nag-antus pag-ayo sa mga epekto sa pangidaron ug sakit ug wala [na] makahimo sa pagtuman sa importanting mga buluhaton sa iyang sagrado nga katungdanan.” Dayon mipasabut si President Hinckley:

“Kon ang Presidente sa Simbahan masakit o dili makahimo sa pagbuhat sa hingpit sa tanan nga mga katungdanan sa iyang buhatan, ang iyang duha ka Magtatambag naglangkob sa Korum sa Unang Kapangulohan. Mopadayon sila sa inadlaw-adlaw nga buluhaton sa Kapangulohan. Sa mga kahimtang nga talagsaon, kon usa ra ang makalihok, mahimo siyang molihok pinaagi sa awtoridad sa buhatan sa Kapangulohan sigun sa nakasulat sa Doktrina ug mga Pakigsaad, seksyon 102, mga bersikulo 10–11” (“God Is at the Helm,” Ensign, Mayo 1994, 54).