Leksyon 12
Doktrina ug mga Pakigsaad 10
Pasiuna
Human sa pagkawala sa 116 ka pahina sa manuskrito, ang Propeta nawad-an sa gahum sa paghubad. Human sa panahon sa mapainubsanong pag-ampo ug paghinulsol, ang mga palid ug ang Urim ug Thummim gibalik ngadto ni Joseph. Gimandoan sa Ginoo si Joseph nga dili hubaron pag-usab ang bahin sa mga palid nga takdo sa nawala nga 116 ka pahina, ug Iyang gipadayag ang plano ni Satanas sa pagguba sa buhat sa Dios. Dayon ang Ginoo mimando ni Joseph Smith sa paghubad sa gagmay nga mga palid ni Nephi. Gipasabut usab Niya ang katuyoan sa Basahon ni Mormon ug ang tahas niini sa pagtukod sa Iyang Simbahan.
Mga Sugyot alang sa Pagtudlo
Doktrina ug mga Pakigsaad 10:1–4
Gipahiuli sa Ginoo ang gasa ni Joseph sa paghubad
Hangyoa ang mga estudyante sa pagribyu og dali unsay ilang nakat-unan gikan sa miaging leksyon mahitungod sa nawalang 116 ka pahina sa manuskrito (tan-awa sa D&P 3). Pahinumdumi ang mga estudyante nga tungod sa pagbalik-balik og hangyo sa Propeta nga tugutan si Martin Harris sa pagdala sa mga pahina sa manuskrito ug ang misunod nga pagkawala niadto nga mga pahina, gikuha ni Moroni ang bulawang mga palid ug ang Urim ug Thummin gikan ni Joseph Smith.
Sa kadugayan giuli ni Moroni ang mga palid ug ang Urim ug Thummim. Sa panahon human kini mauli, nakadawat si Joseph Smith og pinadayag nga girekord diha sa Doktrina ug mga Pakigsaad 10. Niini nga pinadayag, gitudloan sa Ginoo si Joseph kalabut sa unsay buhaton sa bahin sa mga palid diin nagagikan ang nawalang manuskrito. (Tan-awa sa Lucy Mack Smith, History of Joseph Smith by His Mother, ed. Preston Nibley [1958], 133–36.)
I-summarize ang Doktrina ug mga Pakigsaad 10:1–2 pinaagi sa pagpasabut nga ang Ginoo nagpahinumdom ni Joseph ngano nga ang gahum sa paghubad gikuha gikan kaniya ug unsay nahitabo isip resulta sa iyang kasaypanan. Dapita ang usa ka estudyante sa pagbasa sa Doktrina ug mga Pakigsaad 10:3–4. Hangyoa ang klase sa pagsunod, nga mangita sa tambag nga gihatag sa Ginoo samtang si Joseph Smith misugod sa pagbalik og hubad. Hangyoa ang mga estudyante sa pag-report kon unsay ilang makit-an.
-
Ngano kaha nga si Joseph nagkinahanglan nga tambagan sa dili paghago o sa paghubad labaw kay sa iyang kusog?
-
Sa unsa nga paagi nga ang tambag diha sa Doktrina ug mga Pakigsaad 10:4 makagiya kanato samtang nag-alagad sa Ginoo?
Doktrina ug mga Pakigsaad 10:5–37
Ang Ginoo nagpasidaan sa mga plano ni Satanas sa pagdaot ni Joseph ug sa buhat sa Dios
Pag-display og lit-ag o laang (o pagdrowing og hulagway sa usa diha sa pisara).
-
Sa unsa nga paagi ang usa ka himan sama niini nagrepresentar sa mga tuyo ni Satanas ngari kanato?
Hangyoa ang usa ka estudyante sa pagbasa og kusog sa Doktrina ug mga Pakigsaad 10:5. Dapita ang klase sa pagpangita unsay gimando sa Ginoo ni Propeta Joseph Smith nga buhaton aron makalingkawas ni Satanas.
-
Unsa ang atong makat-unan gikan niini nga bersikulo? (Ang mga estudyante mahimong moila og lain-laing mga baruganan, apan siguroha ang paghatag og gibug-aton nga samtang kita nag-ampo kanunay, kita makabaton og gahum sa pagbuntog ni Satanas ug niadtong kinsa nag-alagad kaniya. Ikonsiderar ang pagsulat sa pisara niini nga baruganan.)
-
Sa unsa nga paagi ang pag-ampo nagtabang kanato nga “makabuntog ni Satanas, ug … makalingkawas [niadtong kinsa ] nagpatunhay sa iyang buhat”?
Dapita ang pipila ka mga estudyante sa pagpakigbahin og mga ehemplo kon sa unsa nga paagi ang pag-ampo nakatabang kanila sa pagbatok sa mga tintasyon ni Satanas. (Pahinumdumi ang mga estudyante nga kinahanglang dili sila mopakigbahin og mga kasinatian nga personal o pribado ra kaayo.)
Ipasabut nga ang Ginoo nagpasidaan ni Joseph sa usa ka laang nga gibutang ni Satanas aron sa pagpaninguha sa pagdaot sa Propeta ug sa buhat sa Dios. Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 10:8–19. Hangyoa ang klase sa pagsunod ug sa pag-ila sa plano sa dautang mga tawo kinsa mao ang naghupot sa manuskrito.
-
Unsa ang plano sa dautang mga tawo kinsa naghupot sa manuskrito? (Aron dili tuohan ang Propeta ug ang buhat sa Ginoo pinaagi sa pag-usab sa mga pulong sa manuskrito. Kon gihubad pa ni Joseph og balik ang samang materyal, moingon tingali sila nga dili siya makahimo niini sa samang paagi sa ikaduha ug busa walay gasa.)
Ipataas ang laang o lit-ag nga imong gipakita sa una (o dangup ngadto sa drowing diha sa pisara). Ipasabut nga diha sa Doktrina ug mga Pakigsaad 10:20–29 ang Ginoo namulong mahitungod sa impluwensya ni Satanas diha sa dautang mga tawo kinsa nakakuha sa 116 ka pahina sa manuskrito ug sa unsa nga paagi matuman ni Satanas ang iyang dautang mga katuyoan. Ipares-pares ang klase. Hangyoa ang usa ka estudyante sa kada paris sa pagbasa og hilum sa Doktrina ug mga Pakigsaad 10:20–29 nga mangita sa unsay gitudlo niini nga mga bersikulo mahitungod sa mga tumong ni Satanas. Hangyoa ang laing estudyante sa pagbasa sa samang mga bersikulo, nga mangita sa mga paagi nga gigamit ni Satanas sa pagtuman sa iyang mga tuyo. Human sa igong panahon, dapita ang mga estudyante sa pagpakigbahin unsay ilang nakit-an ngadto sa ilang mga paris.
-
Unsay atong makat-unan gikan niini nga mga bersikulo mahitungod sa mga katuyoan ni Satanas? (Mahimong madiskubrihan sa mga estudyante ang lain-laing mga baruganan, apan siguroha nga ilang ilhon ang mosunod nga kamatuoran: Nagtinguha si Satanas sa pagdaot sa buhat sa Ginoo ug sa atong mga kalag. Mahimo nimong isulat kini nga kamatuoran diha sa pisara. Mahimo usab nimong isugyot nga markahan sa mga estudyante ang mga pulong nga nagtudlo niini nga kamatuoran diha sa mga bersikulo 22–23 ug 27.)
-
Gikan sa unsay inyong nabasa dinhi niini nga mga bersikulo, sa unsa nga paagi naninguha si Satanas sa pagdaot sa buhat sa Ginoo ug sa atong mga kalag?
Aron matabangan ang mga estudyante nga makasabut ug mabati ang kaimportante niini nga kamatuoran, ipangutana ang mosunod. Dapita ang mga pares sa paghisgot sa ilang mga tubag.
-
Unsa nga ebidensya ang inyong nakita nga si Satanas naggamit og paglinlang, kasuko, ulog-ulog, ug pamakak sa pagdaot sa buhat sa Ginoo ug sa atong mga kalag?
-
Sa unsa nga paagi nga ang pagmatngon sa mga tuyo ug paagi ni Satanas nagtabang kanato sa paglikay ug paglingkawas sa iyang mga laang?
Dapita ang mga estudyante sa paggahin og pipila ka minuto sa pagsulat diha sa ilang mga class notebook o mga scripture study journal mahitungod sa mga paagi sa kaaway nga gilista diha sa Doktrina ug mga Pakigsaad 10:20–29 nga ilang gibati o nakita. Hangyoa usab sila sa pagsulat mahitungod sa unsay ilang mabuhat sa paglikay o paglingkawas sa mga laang ni Satanas.
Human ang mga estudyante may igong panahon sa pagsulat, i-summarize ang Doktrina ug mga Pakigsaad 10:30–37 pinaagi sa pagpasabut nga tungod sa mga plano sa dautang mga tawo sa pagdaot sa buhat sa Dios ug sa dungog ni Joseph Smith, gimandoan sa Ginoo si Joseph sa dili paghubad og usab sa bahin sa mga palid diin ang 116 ka pahina nahubad.
Doktrina ug mga Pakigsaad 1:38–45
Ang Ginoo nagmando ni Joseph Smith sa paghubad sa gagmay nga mga palid ni Nephi
Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 10:38–42. Hangyoa ang klase sa pagpangita sa unsay gimando sa Ginoo ni Joseph nga hubaron kay sa ipahubad niya ang bahin sa mga palid gikan diin ang nawala nga 116 ka mga pahina nga nahubad na.
-
Unsa ang gisugo sa Ginoo ni Joseph nga ipahubad? Ngano man?
Tabangi ang mga estudyante sa pagsabut kon giunsa sa Ginoo pagpangandam ang pagkawala sa 116 ka pahina sa manuskrito. Ipasabut nga ang nawala nga dokumento naglangkob sa hubad sa basahon ni Lehi, nga diha sa minubo ni Mormon sa dagkong mga palid ni Nephi. Nadasig si Mormon sa pagbutang sa gagmay nga mga palid ni Nephi ngadto sa iyang rekord alang sa “usa ka maalamong katuyoan,” nga niana nga panahon siya wala makasabut (tan-awa sa Mga Pulong ni Mormon 1:3–7). Ang gagmay nga mga palid ni Nephi mikabat og hapit samang gidugayon sa panahon sa basahon ni Lehi. Human sa pagkawala sa 116 ka pahina, gimandoan sa Ginoo ang Propeta Joseph Smith sa paghubad sa materyal gikan sa gagmay nga mga palid ni Nephi.
Dapita ang mga estudyante sa pagbasa og hilum sa Doktrina ug mga Pakigsaad 10:43 ug sa pagpangita sa importanting kamatuoran nga gusto sa Ginoo nga masabtan ni Joseph Smith. (Samtang ang mga estudyante nakigbahin sa ilang mga ideya, isulat ang mosunod nga kamatuoran diha sa pisara: Ang kaalam sa Dios mas labaw kay sa kaigmat sa yawa. Tingali kinahanglan nimong ipasabut nga ang kaigmat nagpasabut ngadto sa paggamit og mga limbong aron sa paglingla sa mga tawo.)
-
Sa unsa nga paagi nga ang plano sa Ginoo sa pag-ilis sa nawala nga manuskrito nagpakita niini nga kamatuoran?
Dapita ang mga estudyante sa pagbasa og hilum sa Doktrina ug mga Pakigsaad 10:44–45 nga mangita sa ebidensya sa kamatuoran diha sa bersikulo 43.
-
Sumala sa Doktrina ug mga Pakigsaad 10:44–45, ngano nga ang gagmay nga mga palid ni Nephi mas dako og bili kay sa unsay nawala diha sa 116 ka pahina sa manuskrito?
-
Sa unsang paagi nga ang pagkahibalo nga ang Dios nag-andam og paagi sa pag-ilis alang sa nawalang 116 ka pahina sa manuskrito magtabang kaninyo nga mas hingpit nga mosalig Kaniya?
Doktrina ug mga Pakigsaad 10:46–70
Ang Ginoo mipasabut sa katuyoan sa Basahon ni Mormon ug sa tahas niini sa pagtukod sa Iyang Simbahan
I-summarize ang Doktrina ug mga Pakigsaad 10:46–61 pinaagi sa pagpasabut nga niini nga mga bersikulo ang Ginoo mipamatuod nga Iyang gitubag ang mga pag-ampo sa Iyang mga disipulo nga mga Nephite pinaagi sa pagpatunhay ug sa pagpatungha sa Basahon ni Mormon sa atong panahon.
Dapita ang usa ka estudyante sa pagbasa og kusog sa Doktrina ug mga Pakigsaad 10:62–63. Hangyoa ang klase sa pagsunod, nga mangita sa unsay gisulti sa Ginoo nga dad-on sa Basahon ni Mormon ngadto sa kahayag.
-
Unsay dad-on sa Basahon ni Mormon ngadto sa kahayag? (Ang tinuod nga mga katuyoan sa doktrina ni Jesukristo.)
-
Sumala sa bersikulo 63, unsaon sa Ginoo paggamit ang tinuod nga mga katuyoan sa Iyang doktrina sa pagbuntog sa buhat ni Satanas?
Dapita ang usa ka estudyante sa pagbasa og kusog sa hinapos nga saad sa Ginoo diha sa Doktrina ug mga Pakigsaad 10:67, 69–70. Hangyoa ang mga estudyante sa pagsunod ug sa paghinumdom og mga pulong nga makahuluganon kanila sumala sa unsay ilang nakat-unan karon. Dapita ang mga estudyante sa pagpakigbahin hain nga mga pulong ang makahuluganon kanila ug ngano. Taposa pinaagi sa imong pagpamatuod.
Komentaryo ug Background nga Impormasyon
Doktrina ug mga Pakigsaad 10:45. “Dako nga katin-awan diha sa akong ebanghelyo”
Gitudlo ni Elder Jeffrey R. Holland sa Korum sa Napulog Duha ka mga Apostoles nga ang “maalamon nga katuyoan ” sa Ginoo (tan-awa sa 1 Nephi 9:5; Mga Pulong ni Mormon 1:7) alang sa pagmando sa pagsulat ug sa pagpatunhay sa gagmay nga mga palid ni Nephi labaw pa kay sa pag-ilis lang sa nawala nga 116 ka pahina sa manuskrito:
“Kini nakapahingangha kanako nga adunay mas maalamong katuyoan kay sa nianang [pag-ilis sa nawalang 116 ka pahina], o, sa mas tukma, usa ka mas maalamong katuyoan diha niana. Ang yawe sa ingon niana nga sugyot sa usa ka mas maalamong katuyoan anaa sa bersikulo 45 sa Doktrina ug mga Pakigsaad seksyon10. Samtang ang Ginoo nagtudlo ni Joseph sa pamaagi sa paghubad ug pagsukip sa materyal gikan sa gagmay nga mga palid ngadto sa unsay nasugdan isip ang hubad sa gimubo nga dagkong mga palid, miingon siya, ‘Tan-awa, adunay daghan nga mga butang nga nakulit diha sa [gagmay] nga mga palid ni Nephi nga naghatag og dako nga katin-awan diha sa akong ebanghelyo’ (emphasis gidugang).
“Busa, sa klaro, kini dili usa ka puli sa nabuhat diha sa pagpalambo sa katapusang resulta sa Basahon ni Mormon. Dili kini binayloay, kini alang niana—ihatag kanako ang 116 ka pahina sa manuskrito ug akong ihatag kanimo ang 142 ka pahina sa giimprinta nga basahon. Dili ingon niana. Nakuha nato og balik ang labaw pa kay sa atong nawala. Ug kini nahibaloan gikan sa sinugdan nga kini mahitabo. Kini mao ang alang sa usa ka maalamong katuyoan. Wala kita masayud sa eksakto unsay atong wala makuha diha sa 116 ka pahina, apan nahibalo kita nga unsay atong nadawat diha sa gagmay nga mga palid mao ang personal nga mga pamahayag sa tulo ka importanting mga saksi, tulo sa mahinungdanong mga tingog sa doktrina sa Basahon ni Mormon, nagpamatuod nga si Jesus mao ang Kristo. …
“Haay, hinaut unta aduna kita sa tanan niadtong yano ug bililhong mga pagpamatuod nga gilaksi gikan sa Biblikanhong rekord. Apan sa labing gamay isip mga tigbasa sa Basahon ni Mormon, kita adunay Nephi, Jacob, ug Isaias sa pagsulti kanato diha-diha isip personal nga mga saksi sa premortal nga Manluluwas. Sila mga tigdawat sa katingalahang mga pagpadayag kalabut sa iyang kinabuhi ug pangalagad ug sa pakigsaad nga relasyon sa Dios ngadto sa Balay ni Israel, sa karaan ug sa karon. …
“Naghunahuna ako nga kini makapaukyab kon ang 116 ka pahina sa manuskrito motungha usa ka adlaw niana, apan kon kini ihatud sa akong opisina ugma dili ko gyud ibaylo ang materyal sa gagmay nga mga palid ni Nephi niini, tungod sa mas dakong katin-awan nga gihatag pinaagi sa dakong propetikanhong mga magbalantay kinsa nagbarug sa ganghaan sa basahon. Busa sultihi ang inyong mga estudyante sa paghunong og bagulbol ug pagsugod og basa—lakip ang Isaias” (“A Standard unto My People” [pakigpulong ngadto sa mga CES religious educator, Ago. 9, 1994], 7–9, LDS.org).
Doktrina ug mga Pakigsaad 10:38–45. Ang basahon ni Lehi
Sa pasiuna sa unang edisyon sa Basahon ni Mormon, gihulagway ni Joseph Smith ang tinubdan gikan diin ang nawala nga 116 ka pahina sa manuskrito gihubad: “Akong [si Joseph Smith] gihubad, pinaagi sa gasa ug gahum sa Dios, ug gipaningkamutan nga masulat, ang usa ka gatus ug napulog unom ka mga pahina, nga akong gikuha gikan sa Basahon ni Lehi, nga ang mao nga asoy nga gimubo gikan sa mga palid ni Lehi, pinaagi sa kamot ni Mormon; nga ang mao nga asoy, gikawat sa tawo o sa mga tawo ug gitago gikan kanako, bisan pa sa akong pagpaningkamot pag-ayo sa pagkuha niini pag-usab” (Mga Pagtulun-an sa mga Presidente sa Simbahan: Joseph Smith [2007], 74).