Doktrina ug mga Pakigsaad 87

Pasiuna

Sa tibuok 1832, si Propeta Joseph Smith ug ang ubang mga miyembro sa Simbahan tingali nahibalo pinaagi sa mga balita sa pamantalaan sa mga kalisdanan nga milukop sa yuta. Sama pananglit, nasayud sila sa mga panaglantugi mahitungod sa pagkaulipon sulod sa Estados Unidos, ug nasayud usab sila mahitungod sa panlimbasug batok sa federal nga mga taripa diha sa estado sa South Carolina. Ang Propeta namahayag, “Mga panagway sa mga kagubot tali sa mga nasud misamot kadayag niini nga panahon kaysa kaniadto sukad ang Simbahan nagsugod sa iyang paglawig sa kamingawan” (Mga Pagtulun-an sa mga Presidente sa Simbahan: Joseph Smith [2007], 299). Niadtong Disyembre 25, 1832, nadawat ni Joseph Smith ang pinadayag nga karon narekord diha sa Doktrina ug mga Pakigsaad 87, nga naglakip sa mga propesiya mahitungod sa mga gubat ug mga paghukom nga ibu-bu diha sa tanang kanasuran sa katapusang mga adlaw.

Mga Sugyot alang sa Pagtudlo

Doktrina ug mga Pakigsaad 87:1–8

Pinaagi ni Joseph Smith, ang Ginoo mipropesiya nga ang gubat ibu-bu diha sa tanang kanasuran

Sugdi ang klase pinaagi sa pagpangutana sa mosunod:

Unsa ang kalainan tali sa usa ka panagna ug sa usa ka propesiya? (Ang panagna mao ang usa ka opinyon kon unsa ang mahitabo sa umaabut. Agig kalainan, ang propesiya mao ang usa ka pagpadayag sa usa ka umaabut nga timailhan o panghitabo sumala sa gipadayag sa Espiritu Santo.)

Isulat ang mosunod nga mga ngalan diha sa pisara: Noe, Jose sa Ehipto, Lehi, Samuel ang Lamanite. (Mahimo ka usab nga mopakita og mga hulagway niini nga mga propeta.) Dapita ang mga estudyante sa pagsulti og usa ka propesiya nga gipamulong sa matag usa niining karaang mga propeta. (Ang mga tubag mahimong maglakip sa mosunod: si Noe mipropesiya kabahin sa lunop; si Jose sa Ehipto mipropesiya nga adunay pito ka tuig nga dakong pagkadagaya nga pagasundan sa pito ka tuig nga kagutom; si Lehi mipropesiya nga ang Jerusalem pagalaglagon; ug si Samuel ang Lamanite mipropesiya sa mga timailhan ug mga panghitabo nga magauban sa pagkatawo ug pagkamatay ni Jesukristo.)

(Human makatubag ang mga estudyante, isulat ang Joseph Smith sa pisara: Dapita ang mga estudyante nga hilum nga mobasa sa Doktrina ug mga Pakigsaad 87:1–4 ug mangita og propesiya nga gipadayag ngadto ni Joseph Smith.

Unsa ang gisulti sa Ginoo nga “sa dili madugay mahinabo”? (Ang mga gubat sa dili madugay mahinabo, nga magsugod sa pagrebelde sa South Carolina, nga magdala og kamatayon ug pagkaalaot sa daghang mga kalag.)
Unsa ang atong makat-unan mahitungod sa Ginoo gikan sa mga bersikulo 1–4? (Human makatubag ang mga estudyante, isulat ang mosunod nga doktrina sa pisara: Ang Dios makapadayag kanato sa umaabut pinaagi sa Iyang mga propeta.)
Sa unsang paagi ang pagkahibalo nga ang Ginoo mopadayag sa umaabut pinaagi sa mga propeta mahimong usa ka panalangin ngadto sa Simbahan? Sa unsang paagi kini mahimong panalangin kaninyo ug sa inyong pamilya?

Hangyoa ang mga estudyante sa pagbasa sa pasiuna sa Doktrina ug mga Pakigsaad 87, nga mangita sa petsa nga gihatag kini nga pinadayag. Dayon i-summarize ang mosunod nga paragraph, o dapita ang usa ka estudyante sa pagbasa niini og kusog:

Si Joseph Smith nakahibalo sa politikanhong panagsumpaki tali sa estado sa South Carolina ug sa federal nga gobyerno sa Estados Unidos tungod sa mga taripa. (Ang taripa mao ang buhis sa mga butang nga gikan sa gawas sa nasud.) Tungod kay ang mga residente sa South Carolina mas nagsalig sa mga produkto nga ginama sa gawas sa nasud kay sa mga tawo sa amihanan nga mga estado, gibati nila nga dili makiangayon ang federal nga mga taripa ug nga tuyo kining gipahamtang aron sa pagdaot sa mga estado sa habagatan. Ang mga lider sa gobyerno sa South Carolina mipasar og balaod nga nag-imbalido, o nagpawalay bili, sa federal nga mga balaod, ug daghan nga taga-South Carolina ang misugod sa pagpangandam alang sa gubat batok sa federal nga gobyerno. Ang presidente sa Estados Unidos mipahayag nga iyang ipatuman ang mga balaod sa Estados Unidos pinaagi sa kusog. Niadtong Disyembre 1832, ang mga pamantalaan sa tibuok Estados Unidos mireport kabahin niini nga kasungian. Kini mao ang panahon nga nadawat ni Joseph Smith ang pinadayag diha sa Doktrina ug mga Pakigsaad 87 nga mipropesiya nga ang “mga gubat … sa dili madugay mahinabo, magsugod sa pagsukol sa Habagatan nga Carolina” (D&P 87:1). Sa sayo nga bahin sa 1833, wala madugay human mahatag kini nga propesiya, ang gobyerno sa Estados Unidos malinawong miresolbar sa problema uban sa estado sa South Carolina. Ang uban nagtuo nga nahuman na ang krisis, apan temporaryo lang kining nahunong ug ang South Carolina morebelde gihapon.

Unsaon ninyo pagresponde kon ang mga pulong sa propeta wala matuman sa paagi nga inyong gilauman?

Itudlo ang cross-reference diha sa Doktrina ug mga Pakigsaad 87:1, footnote c. Mahimo nimong isugyot nga markahan sa mga estudyante kini nga footnote. Dapita ang mga estudyante sa pagpakli ngadto sa Doktrina ug mga Pakigsaad 130:12–13, ug hangyoa ang usa ka estudyante sa pagbasa og kusog niini nga mga bersikulo.

Unsa ang gipanghimatuod pag-usab ni Joseph Smith niini nga propesiya? (Nga ang mga gubat magsugod sa South Carolina.)

Dapita ang mga estudyante nga mo-refer ngadto sa pasiuna sa seksyon sa Doktrina ug mga Pakigsaad 130 ug motino sa tuig nga gihatag ni Joseph Smith kini nga pagmatuod og usab sa propesiya diha sa seksyon 87.

Sa unsa nga tuig gipanghimatuod pag-usab ni Joseph Smith ang propesiya diha sa seksyon 87? (1843.)

Pahinumdumi ang mga estudyante nga ang krisis tali sa gobyerno sa Estados Unidos ug sa South Carolina naresolbar na mga 10 ka tuig ang milabay, niadtong 1833.

Unsa ang matudlo kaninyo sa panghimatuod pag-usab ni Joseph Smith sa propesiya nga iyang nadawat 10 ka tuig na ang milabay mahitungod sa iyang hugot nga pagtuo? (Bisan og ang ubang mga tawo nag-ingon nga si Joseph Smith usa ka mini nga propeta, mipadayon siya sa pagbaton og hugot nga pagtuo diha sa propesiya nga gipadayag sa Ginoo pinaagi kaniya.)

Basaha ang mosunod nga paragraph o hangyoa ang usa ka estudyante sa pagbasa niini og kusog. (Mahimo ka nga mohimo og mga kopya niini alang sa mga estudyante aron ibutang sa ilang mga kasulatan.)

Niadtong 1861, ang mga barkong iggugubat sa Habagatan mitira sa federal nga mga sundalo sa Estados Unidos nga nadestino sa Fort Sumter, sa Charleston Harbor, South Carolina. Ang ubang mga estado sa Habagatan miapil sa South Carolina sa usa ka gubat sibil batok sa mga estado sa amihanan. Sa wala madugay, ang mga estado sa Habagatan nangayo og tabang gikan sa Britanya. Dugang pa, daghan sa mga ulipon diha sa Habagatan miapil sa kasundalohan sa Amihanan ug nakig-away batok sa ilang kanhi nga mga agalon. Ang Gubat Sibil sa America milungtad hangtud 1865 ug miresulta sa kamatayon sa gibana-bana nga 620,000 ka mga sundalo (ang ubang mga historian mibana-bana sa gidaghanon nga 750,000).

Unsa ang matudlo kanato sa katumanan sa mga propesiya diha sa Doktrina ug mga Pakigsaad 87 mahitungod ni Joseph Smith? (Ang mga tubag mahimong maglakip nga ang mga propesiya ni Joseph Smith tinuod ug nga siya usa ka propeta sa Dios. Human makatubag ang mga estudyante, isulat sa pisara ang mosunod nga doktrina: Si Joseph Smith usa ka tinuod nga propeta sa Ginoo.)

Mahimo nimong ipamatuod nga si Joseph Smith tinuod nga propeta. Dayon ipasabut nga agig dugang sa mga panghitabo nga gipadayag diha sa Doktrina ug mga Pakigsaad 87:1–4, mipropesiya ang Ginoo pinaagi ni Joseph Smith sa ubang mga butang nga mahitabo.

Dapita ang mga estudyante sa pagbasa sa Doktrina ug mga Pakigsaad 87:6–7 sa ilang kaugalingon ug sa pagtino sa ubang mga panghitabo nga giingon sa Ginoo nga mahitabo sa katapusang mga adlaw.

Unsa nga mga panghitabo ang gisulti sa Ginoo nga mahitabo sa katapusang mga adlaw?
Sumala sa mga bersikulo 6 ug 7, unsa ang pipila ka rason nga kining mga butanga mahitabo?

Tabangi ang mga estudyante nga makasabut nga ang “pagpanton” sa Dios nagpasabut sa kamatuoran nga ang Ginoo mogamit sa Iyang mga paghukom sa pag-aghat sa Iyang mga anak sa paghinulsol sa ilang mga sala (tan-awa sa Helaman 12:3). Dugang pa, ang uban nga mga paghukom nga gihulagway niini nga mga bersikulo mahitabo samtang ang Ginoo mosilot sa mga dautan tungod sa ilang dili makiangayon nga pagtratar sa mga matarung.

Pamatud-i nga ang matag propesiya diha sa Doktrina ug mga Pakigsaad 87 natuman na o pagatumanon pa. Dapita ang mga estudyante sa pagbasa sa Doktrina ug mga Pakigsaad 87:8 aron makakat-on kon unsay gisugo sa Ginoo nga atong buhaton aron makapangandam kita sa mga gubat ug mga katalagman nga mahitabo sa yuta sa katapusang mga adlaw.

Unsa ang ipabuhat sa Ginoo kanato? (Ang mga estudyante kinahanglang mahibalo sa mosunod nga baruganan: Kinahanglan kitang mobarug sa balaang mga dapit ug dili mobalhin hangtud ang Ginoo moabut. Isulat sa pisara kini nga baruganan.)
Unsa ang pipila ka balaan nga mga dapit ang makahatag kanato og kalinaw ug kahilwasan? (Mahimo nimong dapiton ang mga estudyante sa paglista sa ilang mga tubag diha sa pisara. Ang mga tubag mahimong maglakip sa mga panimalay, mga simbahan, mga templo, ug mga klasehanan sa seminary.)

Ipasabut nga ang balaan nga mga dapit mao ang mga dapit diin atong bation ang presensya sa Espiritu Santo, nga nagtabang kanato nga mapaduol sa Langitnong Amahan ug ni Jesukristo ug magkat-on mahitungod Kanila.

Unsa kaha ang gipasabut nga mobarug sa balaan nga mga dapit ug “ayaw pagbalhin” (D&P 87:8)?
Sa unsang paagi ang usa ka tawo mabalhin gikan niining balaan nga mga dapit?
Sa unsang paagi kamo mibati nga napanalanginan og kalinaw o kahilwasan pinaagi sa pagbarug sa usa niining balaan nga mga dapit?

Ipasabut nga agig dugang sa pisikal nga balaan nga mga dapit, ang “balaan nga mga dapit” mas may kalabutan kon giunsa nato sa pagpuyo kay sa diin kita nagpuyo. Kon nagpuyo kita nga takus sa pagpakig-uban sa Espiritu Santo, niana nagbarug kita sa balaang mga dapit. Awhaga ang mga estudyante sa paghimo sa ilang mga kasingkasing nga balaan nga mga dapit nga puno sa Espiritu sa Ginoo. Samtang modapit sila sa Espiritu nganha sa ilang mga kinabuhi, makatugot sila Kaniya nga mo-impluwensya sa ilang mga panimalay ug makahimo niini nga balaan nga mga dapit.

Unsaon ninyo sa pagpaningkamot aron ang inyong kasingkasing mahimong balaan nga dapit?
Unsa ang pipila ka mga paagi nga makatabang kamo sa paghimo sa inyong panimalay nga usa ka balaan nga dapit? (Ang mga tubag mahimong maglakip sa pagsuporta sa pag-ampo sa pamilya ug pagtuon sa kasulatan ug sa pagkamabination ngadto sa mga sakop sa pamilya.)
Kon ang propeta motan-aw sa inyong kwarto, makita ba niya kini nga usa ka balaan nga dapit? Ikaw?

Dapita ang mga estudyante sa pagsulat sa ilang mga class notebook o mga scripture study journal og usa ka butang nga ilang buhaton aron mobarug nga mas matinud-anon sa balaan nga mga dapit ug dili mabalhin gikan niini. Human makasulat ang mga estudyante, mahimo nimong dapiton ang pipila kanila sa pagpaambit sa ilang mga tumong diha sa klase. Awhaga ang tanang estudyante sa pagbuhat sa mga tumong nga ilang gihimo. Mahimo nimong tapuson pinaagi sa pagpamatuod sa mga kamatuoran nga gihisgutan niini nga leksyon.

Komentaryo ug Background nga Impormasyon

Doktrina ug mga Pakigsaad 87:3. Ang mga estado sa Habagatan motawag sa Britanya

Si Elder James E. Talmage sa Korum sa Napulog Duha ka mga Apostoles misulat:

“Samtang walay gipahigayon nga dayag nga pakig-abin tali sa Habagatan nga mga Estado ug sa gobyerno sa England, ang impluwensya sa Britanya mihatag og dili direkta nga tabang ug dako nga pagdasig sa Habagatan, ug kini sa paagi nga nakamugna og seryoso nga internasyonal nga mga komplikasyon. Ang mga barko gihimo ug giandam sa mga puerto sa Britanya alang sa kaayohan sa Confederacy; ug ang mga resulta niini nga pagsupak sa mga balaod sa pagka-neutral nagkantidad og kinse ug tunga ka milyon nga dolyares nga bayranan sa Britanya, diin nga kantidad gihatag ngadto sa Estados Unidos sa komperensya nga gihimo sa Geneva aron sa paghusay sa reklamo sa Estados Unidos batok sa Britanya. Ang Confederacy mitudlo og mga commissioner ngadto sa Britanya ug France; kini nga mga tinudlo pinugos ngagikuha sa mga opisyales sa Estados Unidos gikan sa barko sa Britanya diin sila nanakay. Kini nga buhat, diin giangkon sa gobyerno sa Estados Unidos nga dayag kaayo, mihulga kadiyot nga mosangput ngadto sa usa ka gubat tali niini nga nasud ug sa Britanya” (The Articles of Faith, 49th ed. [1968], 25–26; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 194).

Doktrina ug mga Pakigsaad 87:3–4. Dugang katumanan sa propesiya

Ang mosunod nga tsart nagpakita sa dugang nga mga detalye sa propesiya diha sa Doktrina ug mga Pakigsaad 87 ug sa pipila ka mga paagi nga kini natuman:

	Propesiya	Pipila ka mga paagi nga kini nga propesiya natuman
D&P 87:3	“Ang uban nga mga nasud, gani ang nasud sa Britanya … motawag [usab] diha sa uban nga mga nasud, aron sa pagpanalipod sa ilang mga kaugalingon batok sa uban nga mga nasud; ug unya ang gubat ibu-bu diha sa tanan nga mga nasud”	Ang Unang Gubat sa Kalibutan ug Ikaduhang Gubat sa Kalibutan nahitabo samtang ang mga nasud mitawag sa ubang mga nasud sa pagtabang kanila sa pagpanalipod sa ilang mga kaugalingon. Niining duha ka mga gubat, ang Britanya gitawag sa uban nga mga nasud alang sa panabang.
D&P 87:4	“Human sa daghan nga mga adlaw, ang mga ulipon moalsa batok sa ilang mga agalon”	Sa dihang gihatag kini nga pinadayag, ang pagkaulipon anaa dili lamang sa Estados Unidos apan usab sa ubang mga bahin sa kalibutan. Ang mga ulipon, o kadtong anaa sa pagkaulipon, sa ika-19 ug ika-20 nga siglo mibarug batok sa ilang mga agalon ug nakig-away alang sa ilang kagawasan.

Doktrina ug mga Pakigsaad 87:8. “Barug kamo diha sa balaan nga mga dapit, ug ayaw pagbalhin”

Si Elder Dallin H. Oaks mitudlo mahitungod sa pipila ka mga paagi nga mahimo kitang mobarug diha sa balaang mga dapit:

“Nagsunod ba kita sa sugo sa Ginoo, ‘Barug kamo sa balaan nga mga dapit, ug ayaw pagbalhin, hangtud ang adlaw sa Ginoo moabut; kay tan-awa, kini moabut sa labing madali’? (D&P 87:8). Unsa man kining ‘balaan nga mga dapit’? Sigurado gayud nga naglakip kini sa templo ug matinud-anong paghupot sa mga saad niini. Sigurado gayud nga naglakip kini sa panimalay diin ang mga anak gimahal ug ang mga ginikanan gitahud. Sigurado gayud nga ang balaan nga mga dapit naglakip sa atong mga katungdanan nga gisangon sa atoa sa mga lider sa priesthood, lakip sa mga misyon ug mga balaang tawag nga matinud-anong gituman diha sa mga branch, mga ward, ug mga stake” (“Pagpangandam alang sa Ikaduhang Pag-anhi,” Liahona, Mayo 2004, 10).

Si Sister Sharon G. Larsen sa kinatibuk-ang kapangulohan sa Young Women mikomentaryo kon unsay gipasabut nga mobarug diha sa balaan nga mga dapit:

“Ang pagbarug diha sa balaan nga mga dapit mao ang pagkaanaay maayong kauban, nag-inusara man kamo o adunay kauban. Kini ang pagkaanaa sa dapit diin ang Espiritu Santo maoy atong kauban—nag-inusara man o anaa sa pundok. Kon atong ideterminar sa atong kaugalingon nga atong kontrolahon ang atong mga hunahuna ug mga lihok ug mamahimong labing maayo kutob sa atong mahimo, ang labing maayo sa kinabuhi moabut kanato. …

“… Dili igsapayan kon unsay nagpanghitabo sa inyong palibut, makapraktis kamo sa pagmugna og palibut nga inyong kaugalingon, nga puno sa Espiritu sa Ginoo. …

“Ang balaan nga mga dapit mahimo bisan asa kamo—nag-inusara, anaa sa pundok, uban sa mga langyaw, uban sa mga higala. … Adunay mga butang nga inyong mahimo aron madala ang pagkabalaan sa ordinaryo nga mga dapit” (“Standing in Holy Places,” Ensign, Mayo 2002, 91, 92).