Doktrina ug mga Pakigsaad 90–92

Pasiuna

Niadtong Marso 8, 1833, ang Ginoo mihatag sa pinadayag nga narekord diha sa Doktrina ug mga Pakigsaad 90. Kini nga pagpadayag naglangkob og mga instruksyon ngadto sa Kapangulohan sa Halangdon nga Pagkapari ug “usa ka nagpadayon nga lakang” sa pagpalambo sa Unang Kapangulohan (tan-awa ang pasiuna sa seksyon). Niadtong Marso 9, 1833, si Joseph Smith nangutana kon ilakip ba niya ang Apokripa sa iyang paghubad sa Biblia. Ang Ginoo mitubag sa pagpakisayud ni Joseph Smith pinaagi sa pinadayag nga narekord diha sa Doktrina ug mga Pakigsaad 91 ug giingnan siya nga wala kinahanglana nga hubaron kini. Paglabay sa pipila lamang ka adlaw, niadtong Marso 15, 1833, ang Propeta nakadawat sa pinadayag nga narekord diha sa Doktrina ug mga Pakigsaad 92, nga nagsugo kang Frederick G. Williams, usa sa mga magtatambag ni Joseph Smith, nga mahimong aktibo nga sakop sa United Firm, nga gi-establisar aron sa pagdumala sa welfare ug sa mga isyu sa negosyo sa Simbahan.

Mga Sugyot alang sa Pagtudlo

Doktrina ug mga Pakigsaad 90:1–18

Ang Ginoo mitudlo sa Kapangulohan sa Halangdon nga Pagkapari kalabut sa ilang mga responsibilidad

Sugdi ang leksyon pinaagi sa pagpangutana sa mosunod:

Unsa ang labing bililhon nga regalo nga inyong nadawat sukad? Nganong bililhon man kini?

Dapita ang usa ka estudyante sa pagbasa og kusog sa Doktrina ug mga Pakigsaad 90:1–3, ug hangyoa ang klase sa pagpangita sa importanting butang nga gihatag sa Ginoo kang Joseph Smith.

Unsa ang gihuptan ni Joseph Smith? (Ang mga yawe sa gingharian, nga nagpasabut sa mga katungod sa kapangulohan, o ang gahum sa Dios nga gihatag ngadto sa tawo sa pagdumala ug paggiya sa Iyang gingharian dinhi sa yuta. Nganong bililhon man kana?

Dapita ang usa ka estudyante sa pagbasa og kusog sa Doktrina ug mga Pakigsaad 90:4–5. Hangyoa ang klase sa pagsunod ug sa pagtino sa pasidaan nga gihatag sa Ginoo ngadto sa mga Santos. (Tingali kinahanglan nimong ipasabut nga sumala sa pagkagamit diha sa mga bersikulo 4–5, ang pulong nga orakulo nagpasabut sa mga pinadayag gikan sa Dios pinaagi sa Iyang mga propeta.)

Unsa nga pasidaan ang gihatag sa Ginoo ngadto sa mga Santos? Unsa nga baruganan ang atong makat-unan gikan niini nga pasidaan? (Ang mga tubag sa mga estudyante kinahanglang magpakita sa mosunod nga baruganan: Kon atong ibaliwala ang mga pinadayag nga gihatag sa Dios pinaagi sa Iyang mga propeta, kita masayop ug makasala. Mahimo nimong isulat sa pisara kini nga baruganan.)
Unsa kaha ang gipasabut nga motagad sa mga pinadayag nga gihatag sa Dios pinaagi sa Iyang mga propeta isip “usa ka butang nga walay bili”? Unsa ang pipila ka mga ehemplo sa mga pinadayag nga matintal ang mga tawo nga ibaliwala?

Dapita ang mga estudyante nga hilum nga mobasa sa Doktrina ug mga Pakigsaad 90:6, nga mangita kon si kinsa pa ang gisulti sa Ginoo nga maghupot sa mga yawe sa gingharian. Hangyoa ang mga estudyante sa pagreport sa ilang nakit-an.

Ipasabut nga niadtong Marso 18, 1833, napulo ka adlaw human gihatag ang seksyon 90, gi-set apart ni Joseph Smith si Sidney Rigdon ug Frederick G. Williams isip mga magtatambag sa Kapangulohan sa Halangdon nga Pagkapari, nga sa dili madugay pagatawgon og Unang Kapangulohan sa Simbahan.

Unsa nga doktrina ang atong makat-unan gikan sa bersikulo 6? (Ang mga tubag sa mga estudyante kinahanglang magpakita sa mosunod nga doktrina: Ang Unang Kapangulohan naghupot sa mga yawe sa gingharian. Siguroa nga makasabut ang mga estudyante nga bisan kon ang matag sakop sa Unang Kapangulohan naghupot sa mga yawe sa gingharian, ang Presidente sa Simbahan mao lang ang bugtong tawo kinsa makadawat og pagpadayag alang sa tibuok Simbahan.)

I-summarize ang Doktrina ug mga Pakigsaad 90:7–10 pinaagi sa pagpasabut nga ang Unang Kapangulohan gisugo sa pag-andam sa mga sakop sa Tulunghaan sa mga Propeta aron sa pagsangyaw sa ebanghelyo ngadto sa tibuok kalibutan. Dapita ang mga estudyante nga hilum nga mobasa sa Doktrina ug mga Pakigsaad 90:11 ug mokonsiderar kon sa unsang paagi gituman kini nga bersikulo karon. Hangyoa ang mga estudyante sa pagreport sa ilang nakat-unan.

Mahimo usab nimong i-summarize ang Doktrina ug mga Pakigsaad 90:12–18. Kini nga mga bersikulo nagtudlo nga si Propeta Joseph Smith ug ang iyang mga magtatambag gikinahanglan nga mohan-ay sa mga kalihokan sa Simbahan.

Mahimo ka nga mopamatuod nga ang Unang Kapangulohan naghupot sa mga yawe sa gingharian ug ipaambit ang imong mga pagbati mahitungod sa ka-importante sa pagpatalinghug sa ilang mga pulong.

Doktrina ug mga Pakigsaad 90:19–37

Ang Ginoo mitudlo sa mga Santos sa Zion

Ipasabut nga sa dihang nadawat ni Joseph Smith ang pinadayag diha sa Doktrina ug mga Pakigsaad 90, siya ug ang ubang mga lider sa Simbahan anaa sa lisud nga sitwasyon tungod sa kakulang sa pinansyal nga mga kapanguhaan sa Simbahan.

Unsay inyong buhaton kon ang mga sirkumstansya sa inyong kinabuhi nahimong lisud kaayo?

Ipasabut nga ang Doktrina ug mga Pakigsaad 90:19–37 naglangkob og mga instruksyon sa Ginoo ngadto sa unang mga lider sa Simbahan kon unsaon pagdala ang lisud nga mga sirkumstansya nga ilang giatubang. Dapita ang usa ka estudyante sa pagbasa og kusog sa Doktrina ug mga Pakigsaad 90:24. Hangyoa ang klase sa pagsunod ug sa pagtino sa tambag nga makahupay sa mga indibidwal nga nagsinati og lisud nga mga panahon.

Unsa nga tambag diha sa bersikulo 24 ang makapahupay sa mga indibidwal nga nagsinati og lisud nga mga panahon? Unsaon ninyo sa pagpahayag ang mensahe sa Ginoo niini nga bersikulo isip usa ka baruganan? (Ang mga tubag sa mga estudyante kinahanglang magpakita sa mosunod nga baruganan: Kon kita makugihon nga mangita, mag-ampo kanunay, motuo, ug motuman sa atong mga pakigsaad, ang tanan nga mga butang maghiusa sa paglihok alang sa atong kaayohan.)
Unsa kaha ang gipasabut nga ang tanang mga butang maghiusa sa paglihok alang sa atong kaayohan?
Kanus-a kamo nagtinguha nga magmatinud-anon atol sa malisud nga panahon ug mibati nga napanalanginan isip resulta?

Ipasabut nga usa ka miyembro sa Simbahan kinsa mipakita og hilabihan nga pagkamatinud-anon atol sa lisud nga mga panahon mao si Vienna Jaques. I-assign ang mga estudyante nga magpares sa pagtrabaho. Hatagi ang matag estudyante og kopya sa mosunod nga impormasyon mahitungod ni Vienna Jaques. Dapita ang mga pares nga mag-uban sa pagtuon sa Doktrina ug mga Pakigsaad 90:28–31 ug sa pagtino sa piho nga mga instruksyon nga gihatag sa Ginoo ngadto ni Vienna. Sunod, hangyoa sila sa pagtuon sa handout ug sa pagpangita sa mga paagi nga matinud-anon si Vienna.

Si Vienna Jaques usa ka ehemplo sa pagkamatinud-anon sa daghang una nga mga Santos sa Ulahing mga Adlaw. Natawo siya niadtong Hunyo 10, 1787. Human niya nahimamat ang mga misyonaryo sa Boston, Massachusetts, USA, mibiyahe siya ngadto sa Kirtland, Ohio, niadtong 1831. Mipuyo siya didto sulod sa unom ka semana ug nabunyagan. Sa iyang pagpauli ngadto sa Boston, mitabang si Vienna nga madala ang pipila ka mga sakop sa iyang pamilya ngadto sa Simbahan. Dayon iyang “gibaligya ang iyang mga kabtangan ug gihuman ang iyang mga obligasyon, ug mibalik sa Kirtland aron mahiusa ang iyang mga kalihokan sa kahangturan ngadto sa Simbahan” (“Home Affairs,” Woman’s Exponent, Hulyo 1, 1878, 21). Niadtong 1833 gipahinungod ni Vienna ang tanan niyang kabtangan, lakip ang $1,400, ngadto sa Simbahan sa panahon nga ang kwarta gikinahanglan pag-ayo. Dayon mibiyahe siya ngadto sa Missouri aron modawat sa iyang kabilin sa Zion. Hinoon, wala madugay sa iyang pag-abut miantus siya og pagpanggukod uban sa mga Santos. Human giabug gikan sa iyang panimalay sa Missouri, giatiman niya ang mga masakiton sa Kampo sa Zion. Si Heber C. Kimball misulat, “Nakadawat ko og dakong kaayo … gikan ni Sister Vienna Jaques, kinsa nangalagad sa akong mga panginahanglan ug usab ngadto sa akong mga kaigsoonan—hinaut gantihan [siya] sa Ginoo sa [iyang] kaayo” (“Kinuha gikan sa Journal ni H. C. Kimball,” Times and Seasons, Mar. 15, 1845, 839–40).

Samtang didto sa Missouri, naminyo si Vienna kang Daniel Shearer. Mibiyahe siya sa kasadpan padulong sa Utah niadtong 1847 ug, sa edad nga 60, mimaneho sa iyang kaugalingong karomata tabok sa kapatagan. Mipuyo siya sa Salt Lake City ug sa tibuok niyang kinabuhi naningkamot og maayo sa pagsuporta sa iyang kaugalingon ug makugihon nga nagtuon sa mga kasulatan. Si Vienna namatay niadtong Pebrero 7, 1988, sa edad nga 96. Ang iyang obituary mipahayag, “Matinud-anon siya sa iyang mga pakigsaad ug gimanggad ang pagpahiuli sa Ebanghelyo isip bililhon nga bahandi” (“In Memoriam,” Woman’s Exponent, Mar. 1, 1884, 152). (Tan-awa usab sa Susan Easton Black, “Happiness in Womanhood,” Ensign, Mar. 2002, 12–14.)

Kon ang mga parisan nahuman na og basa, hisguti ang mosunod nga mga pangutana diha sa klase:

Giunsa man pagtuman ni Vienna Jaques ang mga instruksyon nga gihatag sa Ginoo kaniya? Unsa ang madayeg ninyo mahitungod kang Vienna Jaques?
Unsay inyong nakat-unan gikan sa unsay inyong nabasahan mahitungod ni Vienna Jaques?

Doktrina ug mga Pakigsaad 91

Ang Manluluwas misugo ni Joseph Smith nga dili hubaron ang Apokripa

Kon mahimo, pagpakita og pipila ka nagkalain-laing mga tinubdan sa sinulat nga impormasyon sama sa usa ka libro, newspaper o magasin, o mobile device.

Unsaon ninyo pagkahibalo nga ang inyong nabasahan niini nga mga kapanguhaan tinuod?

Ipasabut nga ang pinadayag nga narekord diha sa Doktrina ug mga Pakigsaad 91 nagtudlo ni Joseph Smith kon unsaon sa pag-ila kon ang usa ka butang nga iyang gibasa tinuod. Dapita ang usa ka estudyante sa pagbasa og kusog sa pasiuna sa seksyon. Hangyoa ang klase sa pagsunod ug sa pagpangita kon unsay gibuhat ni Joseph sa panahon nga iyang nadawat kini nga pinadayag. Dapita sila sa pagreport sa ilang nakit-an.

Ipasabut nga ang Apokripa usa ka koleksyon sa sagradong mga libro sa katawhang Judeo nga orihinal nga wala malakip sa Hebreohanon nga Biblia (Daang Tugon) apan nalakip diha sa Gresyanhon nga hubad sa Biblia sa wala pa ang panahon ni Kristo. Ang pipila sa mga libro naglangkob og mga materyal kalabut sa mga panahon human sa Daang Tugon ug sa wala pa ang Bag-ong Tugon. Sa diha nga ang nag-unang mga Kristiyano mihugpong sa mga libro sa Biblia paglabay sa mga siglo, gilakip nila ang mga libro sa Apokripa, apan adunay mga pangutana kon parte ba kini sa mga kasulatan. Ang kopya sa Biblia nga gigamit ni Joseph Smith sa paghimo sa iyang dinasig nga hubad naglakip sa Apokripa. Hinoon, tungod kay ang kamatuoran sa Apokripa giduha-duhaan, nangutana si Joseph sa Ginoo kon ang iyang hubad sa Biblia kinahanglan ba nga maglakip niini nga mga libro.

Dapita ang usa ka estudyante sa pagbasa og kusog sa Doktrina ug mga Pakigsaad 91:1–3. Hangyoa ang klase sa pagpangita kon unsay nakat-unan ni Joseph Smith mahitungod sa Apokripa. (Tingali kinahanglan nimong ipasabut nga ang interpolation [pagdugang] mao ang materyal nga gisukip diha sa usa ka manuskrito, nga usahay moresulta sa pagkadaut sa orihinal nga teksto.)

Human makareport ang mga estudyante sa unsay ilang nakit-an, dapita ang usa ka estudyante sa pagbasa og kusog sa Doktrina ug mga Pakigsaad 91:4–6. Hangyoa ang mga estudyante sa pagtino kon sa unsang paagi mahibaloan ni Joseph Smith unsa ang tinuod diha sa Apokripa.

Sa unsang paagi mahibaloan ni Joseph unsa ang tinuod diha sa Apokripa?
Sa unsang paagi ang tambag diha sa mga bersikulo 4–6 makatabang kanato sa mga butang nga atong basahon? (Ang mga estudyante kinahanglang mahibalo sa mosunod nga baruganan: Ang Espiritu Santo makatabang nato nga masayud kon ang mga butang nga atong gibasa tinuod ba.)

Mahimo nimong dapiton ang mga estudyante sa pagpaambit sa ilang kasinatian sa diha nga gibati nila ang Espiritu Santo nga mikumpirma nga ang butang nga ilang gibasa tinuod.

Doktrina ug mga Pakigsaad 92

Si Frederick G. Williams pagadawaton ngadto sa United Firm

Ipasabut nga ang pinadayag nga nalakip diha sa Doktrina ug mga Pakigsaad 92 misugo sa mga lider sa Simbahan kinsa kabahin sa United Firm (gitawag usab og Nagkahiusa nga Kapunongan) sa pagdawat ni Frederick G. Williams ngadto sa kompaniya. Dapita ang usa ka estudyante sa pagbasa og kusog sa Doktrina ug mga Pakigsaad 92:1–2. Hangyoa ang klase sa pagsunod ug sa pagtino kon unsa ang gusto sa Ginoo nga maoy lihok ni Frederick G. Williams isip sakop sa kompaniya. Hangyoa ang mga estudyante sa pagreport kon unsay ilang nakit-an.

Unsa kaha ang gipasabut nga si Frederick G. Williams mamahimong “usa ka madasigon nga sakop”?
Unsa ang inyong mabuhat aron mahimong madasigon nga miyembro sa Simbahan karon?
Unsa nga baruganan ang atong makat-unan gikan sa bersikulo 2 mahitungod sa mga panalangin nga gisaad ngadto sa mga matinud-anon? (Ang mga tubag sa mga estudyante kinahanglang magpakita sa mosunod nga baruganan: Kon matinud-anon kita sa pagsunod sa mga sugo sa Ginoo, niana kita mapanalanginan sa kahangturan.)

Tapusa uban sa imong pagpamatuod bahin sa ka-importante sa mga doktrina ug baruganan nga gipaila niini nga leksyon.

Komentaryo ug Background nga Impormasyon

Doktrina ug mga Pakigsaad 90:24. “Pangita nga makugihon”

Mipahimangno ang Ginoo sa mga Santos nga, “pangita nga makugihon, pag-ampo sa kanunay, ug pagmatuohon, ug ang tanan nga mga butang maghiusa sa paglihok alang sa inyong kaayohan” (D&P 90:24). Si Presidente Harold B. Lee mipasabut nga kini nga tambag makahuluganon kaayo alang sa unang mga lider sa Simbahan kinsa “adunay gamay o walay kasinatian sa pagdumala sa Simbahan” ug kinsa nag-atubang og lisud nga mga hagit sa panahon nga gihatag kini nga pinadayag (Stand Ye in Holy Places: Selected Sermons and Writings of President Harold B. Lee [1974], 197). Dugang niyang gipasabut kon unsay kahulugan sa “pangita nga makugihon”:

“Ang pagkakugihan nagpasabut nga mapaningkamuton, ang kaatbang sa pagkatapulan o kawalay pagtagad o walay pagpakabana. Sa laing pagkasulti, kinahanglan silang magsiksik aron mahibalo sa mga doktrina sa Simbahan, ug kinahanglan silang magsiksik aron mahibalo sa mga instruksyon nga gihatag kalabut sa mga pamaagi sa Simbahan” (Stand Ye In Holy Places, 198).

Doktrina ug mga Pakigsaad 90:25–27. Kinahanglan ba nga “gagmay” ang mga pamilya sa mga Santos?

Sa Doktrina ug mga Pakigsaad 90:25–27, “ang Ginoo mipasidaan sa Iyang mga sulugoon, ilabi na sa amahan sa Propeta, nga himoong gagmay ang ilang mga pamilya aron ang mga butang nga ihatag kanila sa Simbahan dili magamit sa mga dili takus (bersikulo 25), nga malagmit mopahimulos sa sitwasyon. Sa dihang mitambag ang Ginoo kanila nga himoong gagmay ang ilang mga pamilya, wala kini magpasabut sa ila mismong mga anak; ang mga bisita ug ang mga nangipon og dugay nga malagmit mopahimulos sa bukas nga mga balay ug bukas nga mga kasingkasing sa mga kaigsoonan mao ang gipasabut. Ang mga kaigsoonan dili mapugngan sa pagtuman sa buhat sa Ginoo kon magmatngon sila niini nga butang” (Sidney B. Sperry, Doctrine and Covenants Compendium [1960], 462; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 214).

Doktrina ug mga Pakigsaad 91:4–6. Ang Espiritu Santo makatabang nato nga masayud kon ang mga butang nga atong gibasa tinuod ba

Si Presidente Dieter F. Uchtdorf sa Unang Kapangulohan mitudlo:

“Wala pa sukad sa kasaysayan sa kalibutan nga aduna kitay mas sayon nga access sa daghang impormasyon—ang uban niini tinuod, ang uban dili tinuod, ug ang kadaghanan tinuod sa ubang bahin.

“Agi og sangputanan, wala pa sukad sa kasaysayan sa kalibutan nga mas importante ang pagkat-on unsaon nga hustong makaila tali sa kamatuoran ug sayop. …

“Ang Espiritu Santo usa ka tigpadayag. Siya ang Maghuhupay, nga motudlo kanato sa ‘kamatuoran sa tanan nga mga butang; [kinsa] nasayud sa tanan nga mga butang, ug adunay gahum sumala sa kaalam, kalooy, kamatuoran, kaangayan, ug paghukom’ [Moises 6: 61]. …

“Ang Saksi sa kamatuoran gikan sa Espiritu Santo anaa alang sa tanan, bisan asa, sa tibuok kalibutan. Ang tanan nga nagtinguha nga masayud sa kamatuoran, kinsa nagtuon niini diha sa ilang mga hunahuna [tan-awa sa D&P 9:8], ug kinsa ‘mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, [masayud] sa kamatuoran … pinaagi sa gahum sa Espiritu Santo’ [Moroni 10:4].” (“What Is Truth?” [pakigpulong sa debosyonal sa Church Educational System, Ene. 13, 2013], 3, 6; speeches.byu.edu).