Doktrina ug mga Pakigsaad 41

Pasiuna

Niadtong Disyembre 1830, gisugo sa Ginoo ang mga Santos nga mobalhin ngadto sa Ohio, diin ilang madawat ang Iyang balaod (tan-awa sa D&P 37:3; 38:32). Si Leman Copley, usa ka miyembro sa Simbahan didto sa Ohio, mitanyag nga mohatag nila ni Joseph Smith ug Sidney Rigdon ug sa ilang mga pamilya og “mga balay ug mga kasangkapan” (pasiuna sa seksyon, D&P 41). Nadawat ni Joseph Smith ang pagpadayag nga narekord diha sa Doktrina ug mga Pakigsaad 41 niadtong Pebrero 4, 1831, sa wala madugay human siya miabut sa Ohio. Niini nga pagpadayag, ang Ginoo mimando sa Propeta ug sa ubang mga lider sa Simbahan nga mag-ampo aron makadawat sa Iyang balaod. Agig dugang, Iyang giklaro kon asa mopuyo sila si Joseph Smith ug Sidney Rigdon ug mitawag ni Edward Partridge nga mahimong unang bishop sa Simbahan.

Mga Sugyot alang sa Pagtudlo

Doktrina ug mga Pakigsaad 41:1–6

Ang Ginoo nagtudlo nga ang tinuod nga mga disipulo motuman sa Iyang balaod

Dapita ang mga estudyante sa pagkonsiderar kon unsay buot ipasabut sa mahimuot, mangita og hingpit nga kalipay, diha sa pagbuhat og butang.

Unsay inyong buhaton nga makapahimuot o makapalipay ninyo?
Unsa kaha ang buhaton sa Ginoo nga makapahimuot Kaniya?

Dapita ang usa ka estudyante sa pagbasa og kusog sa Doktrina ug mga Pakigsaad 41:1. Hangyoa ang klase sa pagsunod ug tinuon kon unsay buhaton sa Ginoo nga makapahimuot Kaniya.

Unsay gisulti sa Ginoo nga Iyang buhaton nga makapahimuot Kaniya? (Pagpanalangin sa Iyang katawhan “uban sa labing mahinungdanon sa tanan nga mga panalangin.”)

Samtang motubag ang mga estudyante, isulat sa pisara ang mosunod nga dili kompleto nga pamahayag: Ang Ginoo mahimuot sa pagpanalangin kanato kon …

Sumala sa bersikulo 1, unsay kinahanglan gayud natong buhaton aron makadawat sa mga panalangin nga gitinguha sa Ginoo nga ihatag kanato? (Mahimong kinahanglan nimong ipasabut nga ang mopatalinghug nagpasabut nga maminaw og maayo ug motuman. Gamit ang mga tubag sa mga estudyante, kompletuha ang baruganan diha sa pisara: Ang Ginoo mahimuot sa pagpanalangin kanato kon kita maminaw ug motuman Kaniya. Mahimo nimong awhagon ang mga estudyante sa pagmarka sa mga pulong nga nagtudlo niining baruganan diha sa ilang mga kasulatan.)

Hangyoa ang mga estudyante sa pagpamalandong kon nakasinati na ba sila og hingpit nga kalipay isip resulta sa pagbuhat og butang alang sa usa ka tawo. Dapita ang usa o duha ka estudyante nga ipakigbahin ang ilang mga kasinatian.

Unsay kahulugan niini diha kaninyo nga mahibalo nga ang Ginoo nahimuot sa pagpanalangin kaninyo tungod sa pagpatalinghug ngadto Kaniya?

Pahinumdumi ang mga estudyante nga ang Ginoo misugo sa mga Santos nga magpundok didto sa Ohio. Ang ubang mga Santos nga namalhin ngadto sa Ohio mibuhat niini sa hilabihan nga pagsakripisyo. Ilang gibaligya ang ilang kabtangan nga alkanse o gibiyaan na lang ang wala mahalin nilang mga balay ug kabtangan ug miadto sa Ohio agig pagsunod sa sugo sa Ginoo nga gihatag pinaagi sa Iyang Propeta.

Dapita ang usa ka estudyante sa pagbasa og kusog sa mosunod nga istorya bahin ni Lucy Mack Smith (ang inahan ni Propeta Joseph Smith) ug usa ka grupo sa mga miyembro sa Simbahan nga iyang gipangulohan ngadto sa Ohio. Hangyoa ang klase nga maminaw sa usa ka ehemplo kon giunsa pagpanalangin sa Ginoo ang mga Santos samtang mipatalinghug sila sa Iyang mando nga mamalhin ngadto sa Ohio:

Si Lucy Mack Smith nangulo og usa ka grupo sa 80 ka mga miyembro sa Simbahan gikan sa Fayette, New York, ngadto sa Ohio. Samtang nagbiyahe sila pinaagi sa barko diha sa Cayuga ug Seneca Canal ngadto sa Buffalo, New York, gipahinumduman ni Lucy ang mga Santos nga nagbiyahe sila pinaagi sa sugo sa Ginoo, sama ni Lehi sa karaan sa dihang mibiya siya sa Jerusalem. Iyang gitambagan ang mga Santos nga kon sila magmatinud-anon, sila “aduna sa susamang mga rason nga makapaabut sa mga panalangin sa Dios” (tan-awa sa History of Joseph Smith by His Mother, ed. Preston Nibley [1958], 195–96; Church History in the Fulness of Times Student Manual, 2nd ed. [manwal sa Church Educational System, 2003], 91).

Sa dihang miabut sila sa Buffalo, ilang nabantayan nga ang dungguanan napuno sa ice, nga nakapugong sa mga barko sa pagdunggo ug paglarga. “Human sa pipila ka semana sa kahingawa didto sa Buffalo, igong gidaghanon sa mga bata ang nangasakit, ug daghan sa grupo ang gipanggutom ug nawad-an og kadasig. Mibayad sila aron makasulod sa usa ka barko, mibutang sa ilang mga gamit sa barko, ug nakabaton og temporaryong kapasilungan alang sa mga babaye ug mga bata hangtud pagkasunod buntag. Sa dihang nakabalik na sila og sakay, giagni ni Lucy ang nagbagulbul gihapon nga grupo nga hangyoon ang Ginoo sa pagtunga sa baynte ka pye nga nakabara nga ice nga mipuno sa dungguanan” (Church History in the Fulness of Times Student Manual, 92).

Giawhag ni Lucy ang iyang grupo nga magbaton og hugot nga pagtuo diha sa Dios ug misaad nga kon maghiusa sila sa pag-ampo ug mangayo sa Dios sa pagtunga sa ice nga mipuno sa dungguanan, mahitabo kini. Gihulagway ni Lucy kon unsay sunod nga nahitabo: “Niana gayung higayuna sa kalit usa ka dahunog ang nadungog, sama sa kusog kaayo nga dalugdog. Ang kapitan misinggit, ‘Tanang tripulante sa iyang posisyon.’ Ang ice natunga, nga naghatag og igo lang gyung kaagian sa barko, ug ingon ka pig-ot nga samtang ang barko miagi ang timba sa waterwheel natangtang tungod sa bangga. … Hapit kami wala makaagi sa pig-ot nga agianan sa dihang ang ice misira pagbalik” (tan-awa sa History of Joseph Smith by His Mother, 197–205).

Giunsa sa pagpakita niining mga Santos ang hugot nga pagtuo diha sa Ginoo niining lisud nga sitwasyon? Sa unsang paagi nga kini nga sitwasyon nagpakita nga ang Ginoo nagpakabana kanato ug motabang kanato aron mabuntog ang mga hagit?

Dapita ang usa ka estudyante sa pagbasa og kusog sa Doktrina ug mga Pakigsaad 41:2–4. Hangyoa ang klase sa pagsunod, nga mangita sa mga instruksyon nga gihatag sa Ginoo ngadto sa mga elder sa Simbahan.

Unsa ang gisugo sa Ginoo nga buhaton sa mga elder sa Simbahan? (Iya silang gisugo nga magpundok aron magkasinabut sa pulong, mag-ampo uban sa hugot nga pagtuo, modawat sa Iyang balaod, ug mosiguro nga ang Iyang balaod gituman sa mga miyembro sa Simbahan.)
Sumala sa bersikulo 3, unsa man ang katuyoan sa balaod nga pagadawaton sa mga elder?
Sa unsang paagi nga ang pagdawat sa balaod sa Ginoo nahimong usa ka panalangin ngadto sa mga Santos sa Ohio?

Ipasabut nga ang “balaod” nga gipasabut sa Ginoo mao ang balaod nga narekord diha sa Doktrina ug mga Pakigsaad 42, ang balod sa Ginoo ngadto sa Simbahan. Ipasabut ngadto sa mga estudyante nga magtuon sila niini nga balaod nga detalyado sa mosunod nga pipila ka leksyon.

Aron maandam ang mga estudyante nga mahibalo sa usa ka importante nga kamatuoran diha sa Doktrina ug mga Pakigsaad 41:5, isulat ang mosunod nga mga pulong diha sa pisara: Tumutuo ug Disipulo.

Sa unsang mga paagi nga kining duha ka konsepto pareha? Sa unsang mga paagi nga kini lahi?

Hangyoa ang usa ka estudyante sa pagbasa og kusog sa Doktrina ug mga Pakigsaad 41:5. Dapita ang klase sa pagsunod, nga mangita kon unsay gisulti sa Manluluwas bahin sa Iyang mga disipulo.

Sumala niining bersikulo, unsa ang usa ka kinaiya sa mga disipulo sa Manluluwas? (Mahimo nimong isugyot nga markahan sa mga estudyante ang mga pulong nga nagtudlo sa mosunod nga baruganan: Ang mga disipulo ni Jesukristo modawat sa Iyang mga balaod ug motuman niini.)
Nganong importante nga ang mga disipulo ni Jesukristo motuman gayud sa mga sugo ug dili kay mahibalo lang bahin niini?

Aron matabangan ang mga estudyante nga magamit kini nga baruganan, dapita sila sa pagribyu sa mga sumbanan diha sa booklet nga Alang sa Kalig-on sa mga Kabatan-onan nga ila ra. Hangyoa sila sa pagpili og usa ka sumbanan ug isulat diha sa ilang mga class notebook o mga scripture study journal kon unsay gusto nilang himoon aron masunod kana nga sumbanan sa mas maayong paagi. (Pasaligi ang mga estudyante nga personal kini nga kalihokan ug dili sila hangyuon nga mopakigbahin sa ilang mga tubag ngadto sa uban.)

Tabangi ang mga estudyante nga makagamit sa mga doktrina ug mga baruganan

Ang paggamit mahitabo kon ang mga estudyante maghunahuna, mosulti, ug magpakabuhi sumala sa baruganan nga ilang nakat-unan. Si Presidente Thomas S. Monson miingon: “Ang katuyoan sa pagtudlo sa ebanghelyo … dili ang ‘pagbu-bu og impormasyon’ ngadto sa hunahuna sa mga sakop sa klase. … Ang tumong mao ang pagdasig sa indibidwal sa paghunahuna, pagbati, ug dayon mobuhat sa butang nga may kalabutan sa pagsunod sa mga baruganan sa ebanghelyo” (sa Conference Report, Okt. 1970, 107). Samtang nagsulat ang mga estudyante bahin sa ilang mga gibati ug nagkonsiderar og piho nga mga aksyon nga kinahanglan nilang himoon, ang Espiritu Santo makadasig kanila kalabut sa piho nga mga paagi sa paggamit sa mga kamatuoran nga ilang nakat-unan.

Doktrina ug mga Pakigsaad 41:7–8

Gisugo sa Ginoo ang mga Santos nga magtukod og balay kon asa ang Propeta makapuyo ug makahubad

I-summarize ang Doktrina ug mga Pakigsaad 41:7–8 pinaagi sa pagpasabut nga gisugo sa Ginoo ang mga Santos sa pagsangkap og panimalay diin ang Propeta ug ang pamilya makapuyo ug si Joseph makapadayon sa iyang buhat sa paghubad sa Biblia. Ang Ginoo mihatag usab og mubo nga instruksyon alang ni Sidney Rigdon.

Doktrina ug mga Pakigsaad 41:9–12

Gitawag sa Ginoo si Edward Partridge nga mahimong unang bishop sa Simbahan

Dapita ang mga estudyante sa paghunahuna nga ang ilang ward nagkinahanglan og bag-ong bishop. Hangyoa ang mga estudyante sa pagbasa sa Doktrina ug mga Pakigsaad 41:9–10 nga sila ra, nga mangita kon unsay nalangkob sa pagtawag og usa ka bishop.

Sumala niini nga bersikulo, unsay nalangkob sa pagtawag og usa ka bag-ong bishop? (Ang mga bishop gitawag sa Dios, gipaluyohan pinaagi sa tingog sa mga miyembro, ug naordinahan pinaagi sa tukma nga awtoridad. Mahimo nimong isulat kini nga doktrina diha sa pisara. Mahimong kinahanglan nimong ipasabut nga karon ang mga bishop sa mga ward wala sugoa nga mogahin sa tanan nilang panahon “diha sa mga paghago sa simbahan,” sama sa gipabuhat sa Ginoo sa pagtawag kang Edward Partridge.)
Unsa ang buot ipasabut sa “matudlo pinaagi sa tingog sa simbahan”? (Nagpasabut kini nga ang mga miyembro sa Simbahan mipasalig sa ilang suporta, o mipaluyo, sa tawo nga gitawag sa Dios.)

Dapita ang usa ka estudyante sa pagbasa og kusog sa Doktrina ug mga Pakigsaad 41:11. Hangyoa ang klase sa pagsunod, nga mangita sa mga hiyas ni Edward Partridge nga makatabang kaniya sa iyang calling.

Unsa nga mga hiyas ni Edward Partridge nga mahimong nakatabang kaniya sa iyang calling? (Samtang motubag ang mga estudyante, mahimong kinahanglan nimong ipasabut nga ang pulong nga dunay pagpanglimbong mao ang pagkahimong malinglahon o magpakaaron-ingnon. Busa, ang “walay pagpanglimbong” nagpasabut nga mahimong matinuoron ug sinsero.)

Dapita ang usa ka estudyante sa pagbasa og kusog sa Doktrina ug mga Pakigsaad 41:12. Hangyoa ang klase sa pagsunod, nga mangita sa pasidaan nga gihatag sa Ginoo atol sa pagtapos niini nga pagpadayag.

Unsa kaha ang gipasabut sa pagbantay unsaon nato paggamit ang mga pulong sa Ginoo? (Mahimo nimong ipasabut nga alang kang Joseph Smith ug sa uban, usa kini ka sugo sa pagpreserbar sa mga kasulatan.) Sa unsang paagi nga kini dunay kalabutan sa unsay atong nakat-unan bahin sa mga disipulo ni Jesukristo?

Dapita ang usa ka estudyante sa pagbasa og kusog sa mosunod nga pamahayag ni Elder Neal A. Maxwell sa Korum sa Napulog Duha ka mga Apostoles: “Kada adlaw modesisyon kita sa matang sa atong pagkadisipulo” (“My Servant Joseph,” Ensign, Mayo 1992, 39).

Dapita ang mga estudyante sa pagpakigbahin kon sa unsang paagi nga ang mga kamatuoran nga ilang nakat-unan niini nga leksyon makatabang kanila nga mahimong mas maayong mga disipulo ni Jesukristo.

Komentaryo ug Background nga Impormasyon

Si Joseph Smith miabut sa Kirtland

Sa hinapus sa Enero 1831, sila si Joseph ug Emma Smith mibiya sa New York aron mobiyahe og dul-an sa 300 ka milya pinaagi sa karwahe paingon sa Kirtland, Ohio. Sa dihang miabut sila si Joseph ug Emma didto sa Kirtland, mihunong sila sa atubangan sa Gilbert & Whitney Store:

“[Si Joseph] dali nga mitikang sa mga ang-ang, misulod sa tindahan ug miduol diin nagtindog ang kasusyo. ‘Newel K. Whitney! Ikaw ang tawo nga among tuyo!’ siya misinggit, matinahuron nga mitunol sa iyang kamot, nga ingon og daan na nga kaila. ‘Nakabintaha ka kanako,’ mitubag [si Newel K. Whitney], samtang dali ra kaayo siya nga midawat sa gitunol nga kamot, ‘Dili ako makatawag sa imong ngalan sama sa imong pagtawag kanako.’ ‘Ako si Joseph, ang Propeta,’ miingon ang estranghero, nga nagpahiyum. ‘Ania ako tungod sa inyong mga pag-ampo, karon unsay inyong tuyo kanako?’” (History of the Church, 1:145–46).

Si Joseph mipasabut nga siya sa sayo pa nakadawat og usa ka panan-awon diin si Newel nag-ampo aron moadto siya sa Kirtland. Ang mga Whitney midawat nila ni Joseph ug Emma Smith uban sa kamabination, ug sila si Joseph ug Emma mipuyo uban nila sulod sa usa ka panahon. (Tan-awa sa History of the Church, 1:146; tan-awa usab sa Church History in the Fulness of Times Student Manual, 2nd ed. [manwal sa Church Educational System, 2003], 90–91.)

Doktrina ug mga Pakigsaad 41:11. “Ang iyang kasingkasing putli”

Ang kaandam ni Edward Partridge nga “mobiya sa iyang igbabaligya” (D&P 41:9) ug mogahin sa iyang panahon sa pagtukod sa Simbahan gipamatud-an sa mosunod nga istorya:

“Ang anak nga babaye ni Partridge sa wala madugay nahinumdom nga human madiktar kini nga pagpadayag, gibaligya sa iyang amahan ang iyang kabtangan ug ‘nakakuha og gamay ra’ gikan sa mga transaksyon. Midugang siya, ‘Ang desisyon sa akong amahan nga moapil sa mormon nga relihiyon ug pagsakripisyo sa iyang kabtangan nakapahimo sa iyang mga higala sa kalibutan sa paghunahuna kaniya nga nabuang. Wala nila makita kon unsay anaa sa relihiyon nga makapahimo sa usa ka tawo sa pagtugyan sa tanang kalibutanong mga konsiderasyon alang niini’” (Documents, Volume 1: July 1828–June 1831, vol. 1 sa Documents series sa The Joseph Smith Papers [2013], 244).

Sila si Edward Partridge ug Sidney Rigdon mibiyahe ngadto sa New York aron makighimamat kang Propeta Joseph Smith. “Sumala ni Philo Dibble, si Partridge miadto usab alang sa uban. Si [Philo Dibble] giingnan sa usa ka silingan, ‘Gipadala namo ang usa ka tawo ngadto sa York State aron mahibaloan ang kamatuoran bahin niini nga buhat, ug usa siya ka tawo nga dili mamakak.’ [Dibble, “Philo Dibble’s Narrative,” p. 77.]” (Church History in the Fulness of Times Student Manual, 2nd ed. [manwal sa Church Educational System, 2003], 82). Gihulagway ni Joseph si Edward isip “usa ka sumbanan sa pagtahud, ug usa sa halangdon nga mga tawo sa Ginoo” (sa History of the Church, 1:128).