Leksiyon 74: Doktrina ug mga Pakigsaad 60–62

Doktrina ug mga Pakigsaad 60–62

“Patalinghog ngadto sa Tingog Kaniya Kinsa Aduna sa Tanan nga Gahom”

Niadtong Agosto 1831, ang Manluluwas mahigugmaong nagtudlo sa usa ka grupo sa mga elder atol sa ilang lisod nga biyahe gikan sa Missouri paingon ngadto sa Ohio. Ang Iyang tambag nakatabang sa mga elder nga makasabot sa Iyang mga gilaoman ug mga tinguha alang kanila samtang sila mibiyahe pauli. Kini nga leksiyon gituyo aron matabangan ang mga estudyante nga makasabot og dugang mahitungod sa mga gilaoman ug mga tinguha sa Manluluwas alang kanila.

Mga Posibleng Kalihokan sa Pagkat-on

Mga Desisyon

Sa pagsugod sa klase, ikonsiderar ang pagpakita sa mosunod nga mga sitwasyon:

Handurawa nga ang duha sa imong suod nga mga higala naglisod sa nagkalainlaing paagi sa paghimo og mga desisyon. Ang usa ka higala panagsa ra mangayo og tabang o giya gikan sa Dios ug maningkamot sa paghimo sa kadaghanan nga mga desisyon nga siya ra. Ang laing higala nag-ampo alang sa giya ug nagduha-duha sa paghimo og bisan unsang desisyon hangtod nga siya mobati nga ang Ginoo mitubag kaniya.

• Unsa kaha ang pipila ka mga rason nga ang matag higala mobati og sama sa iyang gibati?

• Unsa ang pipila ka sayop nga pagsabot nga imong namatikdan sa duha ka sitwasyon?

Dapita ang mga estudyante sa paghunahuna mahitungod sa mga desisyon nga kinahanglan nilang himoon sa ilang mga kinabuhi ug sa pagkonsiderar kon sila makakita ba sa ilang kaugalingon sa bisan hain niini nga mga sitwasyon. Dasiga sila sa pagpangita sa mga kamatuoran diha sa leksiyon karon nga makatabang kanila sa ilang mga desisyon.

“Ako mamulong nganha kaninyo mahitungod sa inyong panaw” (Doktrina ug mga Pakigsaad 60:5)

Aron matabangan ang mga estudyante sa pagsabot sa konteksto sa mga pagtulun-an nga ilang tun-an karon, basaha o i-summarize ang impormasyon sa mosunod nga parapo.

Niadtong Agosto 1831, si Joseph Smith ug pipila ka mga elder nagsugod sa usa ka panaw nga kapin sa 800 ka milya (1,287 km) paingon ngadto sa ilang mga panimalay sa Kirtland, Ohio. Sila migahin sa miaging pipila ka mga semana diha sa Missouri, diin ang Ginoo misugo kanila sa pagpaningkamot sa pagtukod og usa ka dakbayan sa Zion. Samtang nagbiyahe pauli, ang grupo adunay mga pangutana bahin sa ilang pamaagi ug direksiyon sa pagbiyahe. Alang sa pipila ka mga desisyon, ang Ginoo miawhag kanila sa paggamit sa ilang labing maayo nga paghukom ug sa pagpili alang sa ilang mga kaugalingon. Alang sa ubang mga desisyon, Siya mihatag og piho nga mga instruksiyon ug mga sugo aron sa paggiya kanila.

Ang mga estudyante mahimong mogamit sa mosunod nga tsart aron sa pagtuon sa mga bersikulo nga gilista. Dapita ang mga estudyante sa pagkopya sa tsart ngadto sa ilang mga journal sa pagtuon. Ikonsiderar usab ang pagkopya niini diha sa pisara ug dapita ang lain-laing mga estudyante sa pagsulat sa mga tubag human nila tun-i ang mga bersikulo. Mahimo nimong ibutang ang mga estudyante sa mga grupo ug tahasan sila sa pagtuon sa usa o sa tanan nga mga tudling nga magkauban.

	Unsa ang importante ngadto sa Ginoo	Unsa ang wala igsapayan sa Ginoo
Doktrina ug mga Pakigsaad 60:5–8
Doktrina ug mga Pakigsaad 61:21–22
Doktrina ug mga Pakigsaad 62:5–7

• Unsa nga mga kalainan ang imong namatikdan niini nga mga bersikulo tali sa unsay importante ngadto sa Ginoo ug unsa ang wala?

• Unsa ang pipila ka mga paagi nga imong magamit ang mga pagtulun-an sa Ginoo niini nga mga bersikulo ngadto sa mga sitwasyon nga imong giatubang sa imong kinabuhi?

Basaha ang Doktrina ug mga Pakigsaad 62:8, mangita sa tambag sa Ginoo nga makatabang kanato kon kinahanglan kitang mohimo og mga desisyon nga walay piho nga direksiyon.

Dapita ang mga estudyante sa pagpakigbahin og usa ka kamatuoran nga ilang nakat-onan gikan sa tambag sa Ginoo niini nga bersikulo. Sila mahimong mopahayag og baroganan susama sa mosunod: Ang Ginoo naglaom nga kita mohimo og daghang mga desisyon base sa mga direksiyon sa Espiritu ug sa atong kaugalingong paghukom.

Mahimo nimong dapiton ang mga estudyante sa pagbasa sa Doktrina ug mga Pakigsaad 58:26–29, mangita sa mga pagtulun-an nga makatabang kanila nga mas makasabot kon sa unsang paagi ang Ginoo naglaom kanato sa paghimo og mga desisyon. Mahimong dapiton ang mga estudyante sa pagtandi sa kapakisayran o pagkonektar niini nga mga bersikulo ngadto sa Doktrina ug mga Pakigsaad 62:8.

Paghatag og gibug-aton sa makakabig nga mga baroganan: Alang sa dugang nga pagpraktis kon unsaon pagbuhat niini, tan-awa ang pagbansay nga giulohan nga “Paghatag og gibug-aton sa mga kamatuoran nga modala ngadto sa pagkakabig ug paglig-on sa hugot nga pagtuo diha ni Jesukristo” sa Pagpalambo sa mga Kahanas sa Magtutudlo: Itudlo ang Doktrina. Ikonsiderar ang pagpraktis sa kahanas ug ang pagpangutana nga makatabang sa mga estudyante sa pag-ila ug sa pagpahayag sa makapakabig nga mga baroganan.

• Ngano kaha nga importante man nga mosalig sa atong paghukom ingon man sa mga direksiyon sa Espiritu kon mohimo kita og mga desisyon?

• Sa unsang paagi kini nga kamatuoran makatabang kanato sa mga desisyon nga may kalabotan sa atong mga sumbanan o mga mithi?

Ikonsiderar ang pagdapit sa mga estudyante sa pagpakigbahin sa mga kasinatian diin sila mihimo og mga desisyon base sa ilang kaugalingong paghukom ug sa mga direksiyon sa Espiritu. Dapita sila sa pagkonsiderar kon sa unsang paagi ang Ginoo mipanalangin kanila niini nga mga sitwasyon. Mahimo usab nimong ikonsiderar ang pagpakigbahin sa imong kaugalingong mga kasinatian.

Ang Manluluwas nagtudlo mahitungod sa Iyang Kaugalingon

Panahon sa pagbiyahe paingon ngadto sa Ohio, ang mga elder nakasinati og kawalay kasegurohan, kakapoy, ug pipila ka makahahadlok nga mga sitwasyon. Aduna usab silay mga panaglalis ug mga panagbingkil. Aron matabangan sila, ang Manluluwas mipakigbahin og daghang importante nga mga pagtulun-an mahitungod sa Iyang Kaugalingon. Kini nga mga pagtulun-an makatabang kanato nga mas makasabot kon si kinsa Siya ug kon unsay Iyang mabuhat alang kanato.

Aron matabangan ang mga estudyante nga maandam sa pagtuon sa mosunod nga mga bersikulo, ikonsiderar ang paghangyo kanila sa pagsulat og Jesukristo sa taliwala sa usa ka panid diha sa ilang mga study journal. Mahimo usab nimo kining isulat diha sa pisara. Samtang magtuon ang mga estudyante sa mosunod nga mga tudling sa kasulatan, mahimo silang mosulat og mga pulong o hugpong sa mga pulong nga naghulagway sa Manluluwas libot sa Iyang ngalan.

Basaha ang Doktrina ug mga Pakigsaad 60:1–4; 61:1–2, 36–39; 62:1–3, 9. Hatagi og pagtagad ang unsay imong nakat-onan mahitungod kang Jesukristo gikan niini nga mga bersikulo. Irekord ang imong mga nakaplagan diha sa imong journal sa pagtuon.

Hatagi ang mga estudyante og kahigayonan nga ipakigbahin ang ilang nakat-onan ug gibati mahitungod kang Jesukristo gikan niini nga kalihokan sa pagtuon. Mahimo nilang hisgotan ang mga pangutana sama sa mosunod nga magkauban isip usa ka klase, sa mga paresan, o diha sa ginagmay nga mga grupo.

• Unsa ang imong nakaplagan nga lagmit makatabang niini nga mga elder sa ilang biyahe?

• Unsa ang imong nakat-onan mahitungod sa Manluluwas nga makatabang kanimo o sa uban diha sa kinabuhi?

Taposa ang leksiyon pinaagi sa pagdapit sa mga estudyante sa paghunahuna mahitungod sa bisan unsang mga pag-aghat nga ilang nadawat gikan sa Espiritu Santo base sa unsay ilang gitun-an ug gihisgotan karon. Awhaga sila sa pagrekord sa ilang mga hunahuna ug mga impresyon diha sa ilang mga journal sa pagtuon.

Dugang nga mga Kapanguhaan

Unsaon nako sa pagkahibalo kon husto ba ang akong mga desisyon?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Kon ang [Dios] mopugong sa tubag, kini aron kita motubo pinaagi sa hugot nga pagtuo Kaniya, pagsunod sa Iyang mga sugo, ug pagkaandam sa paglihok sa kamatuoran. Gipaabot nga kita may tulubagon pinaagi sa paghimo sa usa ka desisyon nga nagsubay sa Iyang mga pagtulun-an nga wala pay kompirmasyon. Dili kita maglingkod lang nga maghulat o magbagulbol tungod kay ang Ginoo wala mamulong. Kinahanglan kitang molihok.

Sa kasagaran unsay atong gipili nga buhaton sakto. Mokompirma Siya sa pagkasakto sa atong mga pagpili sa Iyang pamaagi. Kana nga kompirmasyon sa kasagaran moabot pinaagi sa daghang mga tabang nga moabot. Makaplagan nato kini kon kita sensitibo sa espirituhanong paagi. Sama kini sa mga sulat gikan sa mahigugmaong Amahan isip ebidensiya sa Iyang pag-aprobar. Kon, pinaagi sa pagsalig, magsugod kita og butang nga dili sakto, Siya mopahibalo nato sa dili pa kita kaayo malayo. Makamatikod kita niana nga tabang pinaagi sa pag-ila sa nabalaka o dili mahimutang nga mga pagbati. (Richard G. Scott, “Kabubut-on ug mga Tubag: Pag-ila sa Pagpadayag,” Liahona, Hunyo 2014, 50)

Doktrina ug mga Pakigsaad 60:2–3. Unsaon nako sa pagpakigbahin sa akong hugot nga pagtuo ug pagpamatuod ngadto sa uban?

Si Elder Gary E. Stevenson sa Korum sa Napulog Duha ka Apostoles mitudlo:

Isip usa ka miyembro sa Simbahan, ang mga oportunidad sa paghatag sa inyong gipamulong nga pagpamatuod moabot diha sa pormal nga mga miting sa Simbahan o sa dili kaayo pormal, sa tinagsa nga pakig-istorya sa pamilya, mga higala, ug sa uban.

Laing paagi sa inyong pagpakigbahin sa inyong pagpamatuod mao ang pinaagi sa matarong nga kinaiya. Ang inyong pagpamatuod ni Jesukristo dili lang unsay inyong isulti—kon dili kinsa kamo.

Matag higayon nga kamo motingog sa pagsaksi o mopakita pinaagi sa inyong mga aksiyon sa inyong pasalig sa pagsunod ni Jesukristo, kamo nagdapit sa uban sa “pagduol ngadto ni Kristo.” [Moroni 10:32]. (Gary E. Stevenson, “Pag-alima ug Paghatag sa Inyong Pagpamatuod,” Liahona, Nob. 2022, 112)

Doktrina ug mga Pakigsaad 61:5–19. Kinahanglan ba nga ang tanan nga mga tawo maglikay sa pagbiyahe diha sa tubig?

Ang mga pulong sa Ginoo diha sa Doktrina ug mga Pakigsaad 61:5–19 wala magdumili sa mga Santos sa Ulahing mga Adlaw sa pagbiyahe o paglangoy diha sa tubig. Sa paghulagway sa tunglo sa katubigan sa kataposang mga adlaw, ang Ginoo tingali naghisgot sa mga tudling diha sa basahon sa Pinadayag diin si Apostol Juan naghulagway sa kalaglagan nga mahitabo sa katubigan sa wala pa ang Ikaduhang Pag-anhi ni Jesukristo (tan-awa sa Pinadayag 8:8–11;16:1–6). Sa Doktrina ug mga Pakigsaad 61, ang Ginoo piho nga naghisgot sa kakuyaw sa “niini nga mga tubig,” nga nagpasabot sa Suba sa Missouri (tan-awa sa Doktrina ug mga Pakigsaad 61:5, 18).

Doktrina ug mga Pakigsaad 62:1. Unsaon sa Manluluwas sa pagtabang kanato diha sa atong mga kahuyang?

Si Presidente Dallin H. Oaks sa Unang Kapangulohan mipahayag:

Ang atong Manluluwas nakasinati ug nag-antos sa tanang hagit sa kinabuhi “sumala sa unod” sa ingon Siya nasayod “sumala sa unod” kon unsaon “pagtabang [nga nangahulogan og paghatag og kahupayan o abag] ang iyang mga katawhan sumala sa ilang mga kahuyang”[Alma 7:12]. Busa Siya nasayod sa atong mga panlimbasog, mga kasubo, mga pagtintal, ug sa atong pag-antos, kay Siya andam nga misinati niining tanan isip mahinungdanong bahin sa Iyang Pag-ula. Ug tungod niini, ang Iyang Pag-ula nakahatag Kaniya og gahom sa pagtabang kanato—sa paghatag nato sa kalig-on aron makalahutay niining tanan. (Dallin H. Oaks, “Nalig-on pinaagi sa Pag-ula ni Jesukristo,” Liahona, Nob. 2015, 61–62)

Dugang nga mga Kalihokan sa Pagkat-on

Doktrina ug mga Pakigsaad 60:1–3. Ibuka ang imong ba-ba sa pagpadayag sa ebanghelyo

Ipasabot nga sa dihang ang mga elder sa Simbahan unang gisugo sa pagbiya sa ilang mga panimalay sa Ohio ug mobiyahe ngadto sa Missouri, sila gisugo sa pagsangyaw sa ebanghelyo samtang gabiyahe (tan-awa sa Doktrina ug mga Pakigsaad 52:9–10, 21–23, 25–27).

Dapita ang mga estudyante sa pagbasa sa Doktrina ug mga Pakigsaad 60:1–3, mangita sa mga pulong sa Manluluwas ngadto sa pipila niini nga mga kalalakin-an.

Aron matabangan ang mga estudyante nga makasabot kon sa unsang paagi kini nga mga pagtulun-an mahimong magamit sa ilang kinabuhi, ikonsiderar ang pagpangutana og sama niini:

• Unsa ang makapalisod kanato sa pag-abli sa atong mga ba-ba aron sa pagpaambit sa ebanghelyo sa Manluluwas?

• Sa unsang paagi nga ang Manluluwas makatabang kanato nga mabuntog ang mga babag nga atong giatubang?

• Unsa ang pipila ka mga pananglitan sa mga paagi nga atong mabuka ang atong mga ba-ba sa pagpaambit sa ebanghelyo karon?

Doktrina ug mga Pakigsaad 60:13. Paglikay sa pagkausikan

Mahimong makabenepisyo ang mga estudyante gikan sa usa ka panaghisgot sa sugo sa Ginoo nga “ayaw pag-usik sa inyong panahon,” (Doktrina ug mga Pakigsaad 60:13).

Ipasabot nga usa ka bahin sa tambag sa Ginoo nga narekord sa Doktrina ug mga Pakigsaad 60 alang niadtong moadto sa Missouri aron motabang sa pagtukod sa siyudad sa Zion.

Dapita ang mga estudyante sa pagbasa sa Doktrina ug mga Pakigsaad 60:13, mangita sa unsay Iyang gisugo sa pipila niini nga mga Santos. Mahimong makatabang ang pagpasabot nga ang pulong nga pag-usik nagpasabot sa paglikay sa trabaho o pag-apil sa mga butang nga walay bili.

• Ngano sa imong hunahuna nga ang Ginoo dili gusto nga ang Iyang mga Santos mahimong mag-usik sa ilang panahon samtang sila nagbiyahe?

• Sa unsang paagi nga kini nga tambag magamit nato sa atong mortal nga mga panaw?

Ikonsiderar ang pagdapit sa mga estudyante sa pagtuon og pipila sa ubang mga kasulatan nga makatabang kanila nga mas makasabot kon sa unsang paagi gusto sa Ginoo nga atong gamiton ang atong panahon. Mga pananglitan naglakip sa Alma 34:32–33; Doktrina ug mga Pakigsaad 58:27; 75:3–4; 88:124.

• Sa unsa nga paagi nga ang pagkausikan sa panahon makaapekto sa imong relasyon ngadto sa Langitnong Amahan ug ni Jesukristo?

Dapita ang mga estudyante sa paghunahuna og pipila ka mga paagi nga tingali ilang giusikan ang ilang panahon ug sa paghimo og tumong alang sa kalamboan.

Doktrina ug mga Pakigsaad 62:1. Pagdawat og tabang gikan ni Jesukristo

Mahimong makabenepisyo ang mga estudyante gikan sa pagsusi sa unsay gitudlo sa Manluluwas diha sa Doktrina ug mga Pakigsaad 62:1 mahitungod sa Iyang Kaugalingon ug sa Iyang abilidad sa pagtabang kanato. Ikonsiderar ang pagdapit sa mga estudyante sa pagbasa niini nga bersikulo ug sa pagtandi sa pakisayran niini ngadto sa Alma 7:11–13. Mahimo nimong hatagan sila og pipila ka gutlo sa hilom nga pagpamalandong kon sa unsang paagi ang Manluluwas mitabang kanila o sa ilang mga minahal. Awhaga sila sa pagrekord og mga kasinatian ug mga pagbati diha sa ilang mga journal, ug ipakigbahin kanila ang pamahayag ni Presidente Dallin H. Oaks diha sa “Dugang nga mga Kapanguhaan.” Dapita ang pipila ka andam nga mga estudyante sa pagpakigbahin og mga paagi nga ang Manluluwas naglig-on ug nagsuporta kanila latas sa ilang mga kahuyang ug mga pagsulay.