Doktrina ug mga Pakigsaad 64–66

Doktrina ug mga Pakigsaad 64–66

Kinatibuk-ang Pagpasabot

Si Joseph Smith ug ang ubang mga elder mibalik ngadto sa Ohio gikan sa Missouri. Atol sa panaw, adunay mga elder nga wala magkasinabot apan kadaghanan kanila nagkauli sa ilang panaglalis. Samtang nangandam sa pag-adto sa Hiram, Ohio, ug nagtabang sa uban nga maandam sa pagbiyahe ngadto sa Missouri, nadawat ni Joseph Smith ang pagpadayag diha sa Doktrina ug mga Pakigsaad 64. Ang Ginoo diha sa pagpadayag misugo sa mga miyembro sa Simbahan sa pagpinasayloay sa usag usa ug mitudlo kanila sa mga sakripisyo nga Iyang gikinahanglan. Diha sa Doktrina ug mga Pakigsaad 65, Iyang gipadayag nga ang ebanghelyo moadto sa matag nasod agi og pagpangandam alang sa Ikaduhang Pag-anhi ug nga ang mga Santos mag-ampo alang sa pagtubo sa gingharian sa Dios.

Dasiga ang pagpangandam alang sa mga kasinatian sa pagkat-on: Adunay daghang mga paagi nga ang mga estudyante makaandam sa ilang mga hunahuna ug mga kasingkasing sa pagkat-on sa ebanghelyo. Pipila niini nga mga paagi naglakip sa pag-ampo alang sa pagpadayag, pagpalambo og tinguha nga makat-on, paghinulsol, pagtuon, pagtubag og mga pangutana, pagkaandam nga motampo, ug pagtambong nga andam sa pagtudlo sa uban. Alang sa dugang pa kon sa unsang paagi kini gibuhat sa Manluluwas, tan-awa ang seksiyon nga “Gidapit sa Manluluwas ang Uban sa Pagpangandam sa Pagkat-on,” diha sa Pagtudlo Sumala sa Pamaagi sa Manluluwas. Makita usab nimo ang usa ka ehemplo kon unsaon sa pagbuhat niini ubos sa leksiyon nga giulohan og “Doktrina ug mga Pakigsaad 64:20–43”.

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Doktrina ug mga Pakigsaad 64:1–17

Katuyoan sa leksiyon: Aron matabangan ang mga estudyante sa pagsunod sa ehemplo ni Jesukristo ug mahimong mas mapasayloon.

• Pagpangandam sa estudyante: Dapita ang mga estudyante sa pagpamalandong sa usa ka tawo sa ilang kinabuhi nga tingali nagkinahanglan sa ilang pagpasaylo.

• Mga bidyo: “Forgiveness: My Burden Was Made Light” (8:24); “Malipayon ug Hangtod sa Hangtod” (13:09; tan-awa gikan sa time code 9:47 hangtod sa 10:39); “Ang Pangalagad sa Pagpasig-uli (Reconciliation)” (16:12; tan-awa gikan sa time code 10:11 hangtod sa 11:23)

• Hulagway nga ipakita: Ang Manluluwas

Doktrina ug mga Pakigsaad 64:20–43

Katuyoan sa leksiyon: Aron matabangan ang mga estudyante nga mobati og dugang nga tinguha sa paghatag sa ilang mga kasing-kasing ug masugtanon nga hunahuna ngadto sa Ginoo.

• Pagpangandam sa estudyante: Sa wala pa kini nga leksiyon, hatagi ang mga estudyante sa hugpong sa mga pulong nga “Ang Ginoo nagkinahanglan sa kasingkasing ug sa usa ka andam nga hunahuna” (Doktrina ug mga Pakigsaad 64:34). Dapita sila sa paghunahuna mahitungod sa kahulogan niini nga hugpong sa mga pulong o sa unsa nga paagi kita makahatag ngadto sa Ginoo sa atong mga kasingkasing ug andam nga mga hunahuna.

• Dasiga ang pagpangandam alang sa mga kasinatian sa pagkat-on: Ang miaging ideya sa pagpangandam sa estudyante mao ang usa ka pananglitan kon unsaon sa pagdasig sa pagpangandam alang sa mga kasinatian sa pagkat-on. Alang sa dugang nga pagpraktis niini, tan-awa ang pagbansay nga giulohan nga “Paghimo og mga pagdapit nga makatabang sa mga tigkat-on nga mangandam alang sa sunod nga kasinatian sa pagkat-on” nga makita sa Pagpalambo sa mga Kahanas sa Magtutudlo: Pagdapit og Makugihon nga Pagkat-on.

• Mga hulagway nga ipakita: Ang uma sa Isaac Morley; usa ka kasingkasing ug hunahuna nga dali madrowing

Doktrina ug mga Pakigsaad 65

Katuyoan sa leksiyon: Aron matabangan ang mga estudyante nga makasabot sa tahas sa Simbahan sa pag-andam sa kalibotan alang sa Ikaduhang Pag-anhi ni Jesukristo.

• Pagpangandam sa estudyante: Dapita ang mga estudyante sa pagpangita og ebidensiya sa pagtubo sa Simbahan. Mahimo nilang hisgotan uban sa usa ka ginikanan o sa usa ka miyembro sa ilang ward kon sa unsang paagi nila nakita ang pagkatap sa Simbahan sa tibuok kalibotan.

• Bidyo: “Paglaom sa Israel” (1:01:34; tan-awa gikan sa time code 51:42 hangtod sa 52:04)