Leksiyon 79: Doktrina ug mga Pakigsaad 64–66

Doktrina ug mga Pakigsaad 65

“Pag-andam Kamo sa Agianan sa Ginoo … Nga ang Gingharian sa Langit Moabot”

Usa ka importante nga responsibilidad sa Ang Simbahan ni Jesukristo sa mga Santos sa Ulahing mga Adlaw ug sa mga miyembro niini mao ang pagtabang sa pag-andam sa kalibotan alang sa pagbalik sa Manluluwas. Diha sa Doktrina ug mga Pakigsaad 65, ang Ginoo mipadayag niining importante nga tahas ngadto sa Iyang Propeta nga si Joseph Smith ug sa mga Santos. Kini nga leksiyon makatabang sa mga estudyante nga makasabot sa tahas sa Simbahan sa pag-andam sa kalibotan alang sa Ikaduhang Pag-anhi ni Jesukristo.

Mga Posibleng Kalihokan sa Pagkat-on

Pagpangandam alang sa kalihokan

Usa ka paagi sa pagsugod niini nga leksiyon mao ang pagtabang sa mga estudyante sa paghunahuna mahitungod sa mga kahimtang diin ang pagpangandam mahinungdanon. Ang mosunod nga mga pangutana tingali makatabang.

• Unsa ang usa ka kalihokan diin ikaw nalingaw nga nagkinahanglan og tumang pagpangandam?

• Kon ikaw nagtabang og usa ka tawo nga nangandam alang niini nga kalihokan, unsa ang gusto nimong mahibaloan niya? Unsa nga tabang o mga kapanguhaan ang imong ihatag kaniya?

Hatagi ang mga estudyante og oportunidad sa pagpakigbahin sa ilang mga tubag ngadto sa ubang mga estudyante.

Tabangi ang mga estudyante sa pagbalhin ngadto sa paghunahuna mahitungod sa unsay gitabangan sa Ang Simbahan ni Jesukristo sa mga Santos sa Ulahing mga Adlaw nga atong maandam.

Sama nga ang imong kalihokan nanginahanglan og dakong pagpangandam, adunay nagsingabot nga mga hitabo nga kinahanglan nato nga pangandaman. Ang Ginoo nagtukod sa Iyang Simbahan aron sa pagtabang kanato sa pagpangandam.

• Alang sa unsa kita giandam sa Iyang Simbahan?

Pasabta ang mga estudyante nga ang Iyang Simbahan nag-andam kanato alang sa daghang mga butang, ug dasiga sila sa pagpakigbahin kutob sa ilang mahunahunaan. Hangyoa sila sa pagpangita sa usa niini diha sa Doktrina ug mga Pakigsaad 65.

“Pag-andam kamo sa agianan sa Ginoo”

Niadtong Septiyembre 12, 1831, si Joseph Smith ug ang iyang pamilya mibalhin og 30 ka milya sa habagatan-sidlakan sa Kirtland, Ohio, ngadto sa balay ni John ug Alice Johnson sa Hiram, Ohio. Usa ka panagtigom alang sa Pagsimba ang gihimo sa balay ni Johnson niadtong Dominggo, Oktubre 30, 1831. Niadtong sama nga adlaw, nadawat sa Propeta ang pagpadayag nga narekord diha sa Doktrina ug mga Pakigsaad 65.

Mahimong magpraktis ang mga estudyante sa kahanas sa pagtuon sa kasulatan sa pagpangita sa gibalik-balik nga mga pulong ug mga hugpong sa mga pulong samtang nagbasa sila sa mosunod nga mga bersikulo. Mahimo nimong dasigon sila sa pagbutang og timailhan sa matag higayon nga ang “pagpangandam” makita niini nga mga bersikulo. Mahimo usab nilang butangan ug gagmay nga sulat ang mga pulong nga “pag-andam” diha sa bersikulo 3.

Basaha ang Doktrina ug mga Pakigsaad 65:1, 3 ug pangitaa ang pagdapit sa Manluluwas.

• Unsay imong nakaplagan?

Basaha ang Doktrina ug mga Pakigsaad 65:2, mangita sa unsay gihatag sa Manluluwas kanato aron makatabang kanato sa pagpangandam alang sa Iyang Ikaduhang Pag-anhi.

• Unsa nga mga pulong o mga hugpong sa mga pulong ang aduna kay mga pangutana?

  Aron matabangan ang mga estudyante nga maanalisar ug masabtan ang mga hugpong sa mga pulong diha sa mga bersikulo 2–3, pangutan-a sila kon unsa sa ilang hunahuna ang gipasabot sa mga hugpong sa mga pulong. Mahimo nimong ipakigbahin o ipakita ang pipila sa mosunod nga sulod kon gikinahanglan:

  1. Ang “mga yawe sa gingharian,” o “mga yawe sa pagkapari,” mao “ang mga katungod sa kapangulohan, o ang gahom nga gihatag sa tawo pinaagi sa Dios aron magdumala, magpugong, ug magmando sa pagkapari sa Dios dinhi sa yuta” (Giya ngadto sa mga Kasulatan, “Mga Yawe sa Pagkapari,” scriptures.ChurchofJesusChrist.org). Tan-awa usab sa Mateo 16:18–19.

  2. “[Ang] bato nga gipikas gikan sa bukid nga walay gigamit nga mga kamot” mao “ang Simbahan sa Ginoo modako hangtod nga mopuno kini sa tibuok yuta, nga ‘dili gayod malumpag … [apan] molungtad sa walay kataposan’ [Daniel 2:44]” (Ronald A. Rasband, “Katumanan sa Panagna,” Liahona, Mayo 2020, 75). Tan-awa usab sa Daniel 2:31–35, 44–45.

  3. “Pangandam alang sa Pamanhonon,” nagpasabot sa paagi nga “Si Jesukristo mao ang simbolo diha sa mga kasulatan isip ang Pamanhonon. Ang Simbahan mao ang iyang larawanon nga pangasaw-onon” (Giya ngadto sa mga Kasulatan, “Pamanhonon,” scriptures.ChurchofJesusChrist.org). Tan-awa usab sa Pinadayag 19:7–9.

  Alang sa dugang nga mga ideya kon unsaon sa pagtabang ang mga estudyante sa pagsuhid sa pagtubo sa Simbahan, tan-awa ang “Dugang nga mga Kalihokan sa Pagkat-on” nga bahin niini nga leksiyon.

• Unsaon nimo sa pagpamubo ang unsay atong makat-onan gikan niini nga mga bersikulo isip usa ka pamahayag sa kamatuoran?

Ang mga estudyante mahimong mopakigbahin og sama sa si Jesukristo mipahiuli sa Iyang Simbahan aron sa pagtabang kanato sa pagpangandam sa atong kaugalingon ug sa uban alang sa Iyang Ikaduhang Pag-anhi. Ikonsiderar ang pagpasulat kanila niini nga kamatuoran tupad sa mga bersikulo 1–3.

Si Elder D. Todd Christofferson sa Korum sa Napulog Duha ka Apostoles miingon:

Ang Simbahan ni Jesukristo sa mga Santos sa Ulahing mga Adlaw talagsaong gitugotan ug gisugo sa pagtuman sa mga gikinahanglang andamon alang sa Ikaduhang Pag-anhi sa Ginoo; sa pagkatinuod, gipahiuli kini alang niana nga tuyo. … Ang Simbahan ni Jesukristo gisugo sa pag-andam—ug nag-andam—sa kalibotan alang nianang panahona. (D. Todd Christofferson, “Pagpangandam alang sa Pagbalik sa Ginoo,” Liahona, Mayo 2019, 82, 84)

• Unsa ang imong hunahuna o gibati mahitungod niini nga pamahayag?

• Sa unsang paagi nga ang Simbahan talagsaon nga makaandam sa kalibotan alang sa pagbalik sa Manluluwas?

• Unsa nga mga pagpangandam ang imong gibati nga gikinahanglan alang niana nga adlaw?

Mahimo nimong ilista diha sa pisara ang mga paagi nga ang Simbahan nagtabang sa pag-andam sa mga tawo alang sa Ikaduhang Pag-anhi. Kon ang mga estudyante maglisod sa pagpangita og mga ideya, mahimo nimong ipakigbahin kanila ang upat ka balaanong gitudlo nga mga responsibilidad sa Simbahan. Naglakip kini sa pagtabang sa buhat sa Dios pinaagi sa (1) pagsunod sa ebanghelyo ni Jesukristo., (2) pag-atiman niadtong nanginahanglan, (3) pagdapit sa tanan nga modawat sa ebanghelyo, ug (4) paghiusa sa mga pamilya alang sa kahangtoran (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 1.2, ChurchofJesusChrist.org). Mahimo nimong ilista kini diha sa pisara ug hangyoa ang mga estudyante sa pagpakigbahin og mas piho nga mga paagi nga nahisubay ubos sa matag usa niini nga mga ulohan nga makatabang sa pag-andam sa mga tawo alang sa Ikaduhang Pag-anhi sa Ginoo.

“Pagtawag diha sa Ginoo, nga ang Iyang gingharian masangyaw”

Basaha ang Doktrina ug mga Pakigsaad 65:4–6, mangita sa unsay gitudlo sa Manluluwas nga atong mahimo sa tinagsa-tagsa aron sa pagtabang sa pag-andam sa kalibotan alang sa Iyang Ikaduhang Pag-anhi.

• Unsay imong nadiskobrehan?

• Unsa ang pipila ka “kahibulongan nga mga buhat” sa Manluluwas nga nahimo pinaagi sa Iyang Simbahan? (Tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 1.2, 1.3, ChurchofJesusChrist.org.)

• Sa unsang paagi nga kini nga mga buhat nagtabang sa pag-andam kanato ug sa uban alang sa Ikaduhang Pag-anhi sa Manluluwas?

Mahimo nimong hatagan ang mga estudyante og oportunidad sa sulod ug sa gawas sa klase sa “[pagpahibalo sa] iyang kahibulongan nga mga buhat” (Doktrina ug mga Pakigsaad 65:4). Mahimo silang maghisgot og mga paagi sa pagpakigbahin ngadto sa ilang mga pamilya ug mga higala o sa uban.

Si Presidente Russell M. Nelson mitudlo nga usa ka butang nga atong mahimo mao ang “pagtawag diha sa Ginoo, nga ang iyang gingharian masangyaw diha sa yuta” (Doktrina ug mga Pakigsaad 65:5).

2018 Tibuok Kalibutan nga Debosyonal alang sa mga Kabatan-onan

Si Presidente Russell M. Nelson ug si Sister Wendy Nelson mamulong sa Tibuok Kalibutan nga Debosyonal alang sa mga Kabatan-onan karong Hunyo 3, 2018

Ang akong … pagdapit mao nga mag-ampo kamo matag adlaw nga ang tanang anak sa Dios makadawat sa mga panalangin sa ebanghelyo ni Jesukristo. Kamo ug ako nagpuyo nga makita, ug padayon nga makakita, sa Israel nga gipundok uban sa dakong gahom. Ug mahimo kamong parte sa gahom sa luyo niana nga pagpundok! (Russell M. Nelson ug Wendy W. Nelson, “Paglaom sa Israel” [tibuok kalibotan nga debosyonal alang sa mga kabatan-onan, Hunyo 3, 2018], ChurchofJesusChrist.org)

Ipahunahuna sa mga estudyante ang pagdapit ni Presidente Nelson. Human sila adunay kahigayonan sa pagpamalandong, dapita sila sa pagpakigbahin sa ilang mga kasinatian kabahin sa pagsunod sa iyang pagdapit.

Mahimo nimong taposon uban sa usa ka pagpamatuod nga ang Simbahan, o “gingharian sa Dios,” nag-andam sa dalan alang sa “gingharian sa langit” nga moabot sa higayon nga ang Manluluwas mobalik (tan-awa sa Doktrina ug mga Pakigsaad 65:6).

Dugang nga mga Kapanguhaan

Unsaon nako sa pagtabang sa pag-andam ang kalibotan alang sa Ikaduhang Pag-anhi sa Manluluwas?

Ang Unang Kapangulohan mitudlo:

Kami nasayod nga ang Dios buhi. Kini among pag-ampo nga kamo magpabilin nga lig-on diha sa dalan sa pakigsaad nga mopadulong balik ngadto sa inyong Amahan sa Langit. Sa inyong pagbuhat, kamo mahimong usa ka impluwensiya alang sa kaayohan, malipayong mopakigbahin sa ebanghelyo ug mo-andam sa kalibotan alang sa ikaduhang Pag-anhi sa Manluluwas. (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 2)

Unsa ang gitudlo ni Joseph Smith mahitungod sa ebanghelyo nga nagpuno sa tibuok yuta?

Si Wilford Woodruff miasoy sa unsay gitudlo ni Joseph Smith sa usa ka panagpundok sa mga naghupot sa pagkapari ngadto sa Kirtland, Ohio, niadtong Abril 1834:

Ang Propeta nanawagan ngadto sa tanan kinsa naghupot sa Pagkapari sa pagpundok ngadto sa gamay’ng eskwelahan nga binuhat sa troso nga gihimo nila didto. Gamay kini nga balay, tingali mga 14 pye kwadrado. Apan nakapahiluna kini sa tibuok Priesthood sa Simbahan ni Jesukristo sa mga Santos sa Ulahing mga Adlaw sa dihang didto pa sa lungsod sa Kirtland. … Kon magkapundok na kami, ang Propeta manawagan sa mga Elder sa Israel uban kaniya sa paghatag og pagpamatuod niini nga buhat. … Dihang nahuman na sila, ang Propeta miingon, ‘Mga kaigsoonan, napalig-on kaayo ako ug natudloan sa inyong mga pagpamatuod dinhi karong gabhiona, apan gusto ko nga mosulti kaninyo sa atubangan sa Ginoo, nga wala kamoy mas labaw pa nga nahibaloan kabahin sa mga kapalaran niini nga Simbahan ug sa gingharian kaysa usa ka gamay nga bata diha sa sabakan sa inahan. Wala ninyo kini masabti.” Ingon og nakalitan ako. Miingon siya, “Diyotay ra kaayo nga priesthood ang inyong makita dinhi karong gabhiona, apan kini nga Simbahan mopuno sa Amihanan ug Habagatang Amerika—pun-on niini ang kalibotan.” (Mga Pagtulun-an sa mga Presidente sa Simbahan: Joseph Smith [2007], 161)

Doktrina ug mga Pakigsaad 65:6. Unsa ang kalainan tali sa “gingharian sa Dios” ug sa “gingharian sa langit”?

Ang gingharian sa Dios dinhi sa yuta mao ang Ang Simbahan ni Jesukristo sa mga Santos sa Ulahing mga Adlaw (D&P 65). Ang katuyoan sa Simbahan mao ang pag-andam sa mga sakop niini sa pagpuyo sa kahangtoran didto sa gingharian nga celestial o gingharian sa langit. (Giya ngadto sa mga Kasulatan, “Gingharian sa Dios o Gingharian sa Langit,” scriptures.ChurchofJesusChrist.org)

Dugang nga mga Kalihokan sa Pagkat-on

Ang Pagtubo sa Simbahan ni Jesukristo

Mahimo nimong tabangan ang mga estudyante sa pagsuhid sa pagtubo sa Simbahan sulod sa mga katuigan aron sa pagtabang kanila nga makakita kon sa unsang paagi ang panagna ni Daniel natuman (tan-awa sa Daniel 2:44–45). Mahimo nimong gamiton isip reperensya ang estatistikanhong report sa Mayo nga edisyon sa Liahona.

Mahimo usab nimong patan-awon ang mga estudyante ngadto sa “Facts and Statistics” sa newsroom.ChurchofJesusChrist.org, diin daghan ang makakaplag sa mga estatistika sa Simbahan alang sa ilang nasod nga natawhan.

Usa ka paagi sa pagtan-aw sa pagdako sa Simbahan mao ang pagtan-aw sa nagkadaghang pagtukod sa templo. Ikonsiderar ang pagtandi sa gidaghanon sa mga templo sa tuig nga natawo ang imong labing magulang nga estudyante ngadto sa kasamtangan nga gidaghanon sa mga templo. Mahimo usab nimo gamiton:

• Ang gidaghanon sa mga templo nga gipahibalo ug kasamtangan nga gitukod (ChurchofJesusChrist.org/temples/list).

• “Paghimo sa mga Ordinansa sa Templo nga Mas Dali nga Mapahigayon” (Liahona, Hulyo 2022, 12).

• “The Gospel Shall Roll Forth” (2:47).

  The Gospel Shall Roll Forth

  A visual depiction of Church growth by temples and stakes (D&C 65).

Ang pagpundok sa Israel

Ikonsiderar ang pagtan-aw sa “Usa ka Saksi sa Dios” gikan sa time code 3:30 hangtod sa 5:14. Ang mga estudyante mahimong mangita kon sa unsang paagi ang pagtandi sa puzzle ni Elder Neil L. Andersen makatabang kanato nga makasabot kon sa unsang paagi ang pagpundok sa Israel nag-andam sa kalibotan alang sa Ikaduhang Pag-anhi. Mahimo silang mopakigbahin og mga paagi nga makatabang sila nga “mapahimutang ang ubang importante nga piraso” sa puzzle.

Usa ka Saksi sa Dios

Gitudlo ni Elder Andersen nga kinahanglang mopaambit kita sa ebanghelyo ngadto sa uban pinaagi sa pagkahimong mga saksi sa Dios sa tanang panahon ug sa tanan nga mga dapit.

Mahimo dayon nimong tan-awon ang time code 13:24 hangtod 15:33, mangita sa espesyal nga pagdapit ni Elder Andersen sa kabatan-onan. Mahimong ipakigbahin sa mga estudyante kon sa unsang paagi nila nakita ang teknolohiya nga gigamit sa pagpundok sa Israel, dayon pamalandong o paghisgot sa mga paagi nga mahimo nilang gamiton ang teknolohiya sa pagtabang sa pagpundok sa Israel.

Usa ka Saksi sa Dios

Gitudlo ni Elder Andersen nga kinahanglang mopaambit kita sa ebanghelyo ngadto sa uban pinaagi sa pagkahimong mga saksi sa Dios sa tanang panahon ug sa tanan nga mga dapit.

Doktrina ug mga Pakigsaad 66. Ang Dios nakaila kanimo ug sa imong mga panginahanglan

Mahimo nimong pilion ang pagtudlo sa Doktrina ug mga Pakigsaad 66 isip kabahin niini nga leksiyon. Aron mahimo kini, isulat ang mosunod nga mga pangutana diha sa pisara, ug dapita ang mga estudyante sa pagpakigbahin kon unsaon nila kini sa pagtubag:

• Nganong panalangin kini nga mahibalo sa kabubut-on sa Dios alang kanato?

• Unsaon nako sa pagkat-on sa kabubut-on sa Dios alang kanako?

Aron matabangan ang mga estudyante nga makasabot sa kasaysayan nga konteksto niini nga seksiyon, ipasabot nga wala madugay human siya mabunyagan, si William E. McLellin nakigkita ni Propeta Joseph Smith ug mihangyo kaniya sa pagpakisayod sa Ginoo alang kaniya. Mahimong basahon sa mga estudyante ang ulohan sa seksiyon, mangita sa unsay gibuhat ni William sa wala pa ang iyang hangyo ni Joseph.

Mahimong tun-an sa mga estudyante ang Doktrina ug mga Pakigsaad 66:4–10, mangita sa unsay gusto sa Ginoo nga buhaton ni William. Hangyoa ang mga estudyante sa pagpakigbahin sa unsay ilang napalgan. Mahimo dayon nimong hisgotan ang mga panalangin nga atong madawat kon kita mosunod sa kabubut-on sa Ginoo alang kanato. Awhaga ang mga estudyante sa pagtinguha sa kabubut-on sa Ginoo alang sa ilang mga kinabuhi pinaagi sa inadlaw nga pag-ampo.