Leksiyon 78: Doktrina ug mga Pakigsaad 64–66

Doktrina ug mga Pakigsaad 64:20–43

“Ang Ginoo Nagkinahanglan sa Kasingkasing ug sa usa ka Andam nga Hunahuna”

Samtang ang unang mga Santos nagtinguha sa pagtukod sa Zion, si Jesukristo mihangyo kanila sa pagsakripisyo ug sa pagtampo sa nagkalainlaing mga paagi. Sa atong padayon nga paningkamot sa pagsunod ni Jesukristo, Siya mihangyo nga atong ihatag Kaniya ang atong mga kasingkasing ug masugtanon nga mga hunahuna. Kini nga leksiyon makatabang sa mga estudyante nga mobati og dugang nga tinguha sa paghatag sa ilahang kasingkasing ug masugtanon nga hunahuna ngadto sa Ginoo.

Mga Posibleng Kalihokan sa Pagkat-on

Personal nga mga kabtangan

Mahimo nimong sugdan ang klase pinaagi sa paghangyo sa mga estudyante sa paghunahuna og personal nga mga kabtangan nga ilang giisip nga bililhon. Ikonsiderar ang paghatag og mga pangutana nga makapadali sa pagpakigbahin sa klase o sa ginagmay nga mga grupo. Sama pananglitan:

• Unsa ang butang nga imong gipanag-iya nga imong gihagoan aron makuha?

• Unsa man ang usa ka butang nga imong gipanag-iya nga lisod alang kanimo sa paghatag ngadto sa laing tawo? Nganong lisod man kini?

Ang umahan ni Isaac Morley

Mahimo nimong ipakita ang hulagway sa sinugdanan niini nga leksiyon ug dapita ang usa ka estudyante sa pagbasa og kusog sa mosunod nga impormasyon.

Sila Isaac ug Lucy Morley nagtrabaho pag-ayo aron sa pagtukod og usa ka mauswagon nga 80 ka ektarya nga uma duol sa Kirtland, Ohio. Isip kabahin sa ilang relihiyosong mga tinuohan, midapit sila og mga tawo sa pagpuyo sa ilang mga kayutaan, nagpakigbahin sa ilang mga kabtangan, ug nagbaton sa tanang mga butang nga managsama sa usag usa. Sa dihang ang mga misyonaryo sa Santos sa Ulahing mga Adlaw mihunong sa Kirtland, ilang gisangyaw ang mensahe sa Pagpahiuli ngadto sa mga nagpuyo sa umahan sa Morley. Lakip sa mga nakabig mao sila si Isaac ug Lucy Morley. Wala madugay human sa ilang bunyag, giabiabi sa mga Morley si Joseph ug Emma Smith sa pagpuyo sa ilang umahan. (Tan-awa sa Susan Easton Black, Who’s Who in the Doctrine and Covenants [1997], 198.)

Basaha ang Doktrina ug mga Pakigsaad 64:20, ug pangitaa ang mga instruksiyon sa Ginoo ngadto ni Isaac Morley.

• Sa imong hunahuna unsa kaha ang imong reaksiyon kon anaa ka sa sitwasyon ni Isaac? Ngano man?

• Sa unsa nga paagi nga ang pagkahibalo nga ang hangyo gikan sa Manluluwas makatabang kanimo sa pagsunod?

Ipasabot nga si Isaac kaniadto gihangyo sa pagbaligya sa iyang umahan ug nagdumili. Apan sa pagkadawat niini nga pagpadayag, si Isaac masulundon nga mibaligya sa iyang umahan, mihatag sa salapi ngadto sa Simbahan, ug mibalhin sa iyang pamilya ngadto sa Missouri aron sa pagtabang sa pagtukod sa Zion. Mahimo usab nimong hisgotan nga ang ubang mga tawo gisultihan niini nga pagpadayag sa dili pagbaligya sa ilang mga propedad (tan-awa sa Doktrina ug mga Pakigsaad 64:21, 26). Kini nga mga tawo mipahinungod sa ilang mga kabtangan ngadto sa Ginoo pinaagi sa paggamit niini aron sa pagsuporta sa Simbahan ug sa mga Santos sa Kirtland. Kini mahimong usa ka maayong higayon sa pagpahinumdom sa mga estudyante sa mga kamatuoran nga ilang nakat-onan mahitungod sa Manluluwas ug sa balaod sa pagpahinungod diha sa Doktrina ug mga Pakigsaad 42:29–39.

Ang Ginoo nagkinahanglan sa atong mga kasingkasing ug andam nga mga hunahuna

Ipasabot nga bisan og dili kita hangyoon sa Ginoo sa pagbaligya sa atong mga kabtangan, adunay mga butang nga Iyang gipangayo kanato samtang kita maningkamot sa pagsunod Kaniya.

Basaha ang Doktrina ug mga Pakigsaad 64:22, 34. Pangitaa ang mga kinahanglanon nga gipangayo sa Ginoo kanato.

• Unsay imong nakaplagan?

Tabangi ang mga estudyante sa pag-ila nga ang Ginoo nagkinahanglan kanato sa paghatag Kaniya sa atong mga kasingkasing ug andam nga mga hunahuna.

Paghunahuna og mga paagi aron matabangan ang imong mga estudyante nga mas makasabot kon unsa ang gipasabot sa paghatag ngadto sa Ginoo sa atong mga kasingkasing ug andam nga mga hunahuna. Usa ka paagi mao ang pagdapit sa mga estudyante sa paghanduraw nga gihangyo sila sa pagtabang sa pagsulat og leksiyon sa Dali, Sunod Kanako alang sa Doktrina ug mga Pakigsaad 64. Sa ilang kaugalingon o diha sa gagmay nga mga grupo, ang mga estudyante mahimong magtuon sa mosunod nga mga kasulatan o mga kasulatan nga ilang makaplagan sa ilang kaugalingon, dayon magsulat og pagpasabot kon unsa ang gipasabot sa paghatag ngadto sa Ginoo sa atong mga kasingkasing ug andam nga mga hunahuna. Tugoti sila sa pagpakigbahin ug sa paghisgot sa unsay ilang gisulat.

Awhaga ang mga estudyante sa pagtinguha og personal nga pagpadayag aron masayod kon sa unsang paagi sila personal nga makahatag ngadto sa Ginoo sa ilang mga kasingkasing ug andam nga mga hunahuna.

Basaha ang mosunod nga mga tudling sa kasulatan ug pangitaa ang mga panabot nga makatabang kanimo nga makasabot kon unsay buot ipasabot sa paghatag sa Ginoo sa atong mga kasingkasing ug andam nga mga hunahuna. Mahimo nimong isulat ang usa ka pagpasabot diha sa imong journal sa pagtuon.

Mga Pagtulun-an diha sa mga Kasulatan

• Mga Panultihon 3:5–6

• Mateo 22:36–39

• Mosiah 3:19

• Doktrina ug mga Pakigsaad 20:77, 79

Mga Ehemplo gikan sa Kinabuhi sa Manluluwas

• Juan 6:38

• Lucas 22:42

• 3 Nephi 27:13–14

• Doktrina ug mga Pakigsaad 19:24

• Sa unsang paagi nga si Jesukristo usa ka maayong ehemplo sa paghatag sa Iyang kasingkasing ug andam nga hunahuna ngadto sa Langitnong Amahan?

• Sa imong mga paningkamot sa pagsunod ni Jesukristo, sa unsa nga paagi nga ang paghatag Kaniya sa imong kasingkasing ug andam nga hunahuna nakahimo og kalainan sa imong kinabuhi?

Mahimong mogahin ka og panahon sa pagtabang sa mga estudyante nga makasabot nga adunay kalainan tali sa pagbuhat lang sa unsay gipangayo sa Ginoo kanato ug sa pagsunod Kaniya uban sa atong mga kasingkasing ug andam nga mga hunahuna.

Mahimong dapiton ang mga estudyante sa paglista diha sa pisara og daghang mga sugo nga gihangyo sa Ginoo nga atong tumanon o mga sakripisyo nga mahimo Niyang ipabuhat kanato. Hangyoa ang mga estudyante sa paghisgot nga magkapares o sa gagmay nga mga grupo kon unsaon nato paghatag sa Ginoo sa atong mga kasingkasing ug andam nga mga hunahuna samtang nagbuhat kita niini nga mga butang. Sama pananglit, mahimo nilang hisgotan kon unsaon nato sa paghatag sa Ginoo sa atong mga kasingkasing ug andam nga mga hunahuna samtang naningkamot kita sa pagbalaan sa adlawng Igpapahulay.

Personal nga pagpamalandong

Kon gipili nimo ang pagsulat og mga sugo o mga sakripisyo diha sa pisara, dapita ang mga estudyante sa pagtan-aw sa lista ug sa pagpamalandong sa ilang kaandam sa pagbuhat niini nga mga butang. Ikonsiderar ang pagsugo sa mga estudyante sa pagdrowing og kasingkasing ug hunahuna diha sa ilang journal sa pagtuon. Mahimo nimong ipakita ang hulagway sa ubos isip usa ka sundoganan. Dapita sila sa pagpamalandong kon unsa ka dako sa ilang mga kasingkasing ug mga hunahuna ang ilang gihatag ngadto sa Manluluwas ug dayon koloran sa gidaghanon nga paminaw nila nga ilang gihatag Kaniya. Mahimo dayon nimo silang dapiton sa pagpamalandong ug sa pagsulat sa ilang mga tubag sa mosunod nga mga pangutana.

• Unsa ang imong nakat-onan karon nga makadugang sa imong tinguha sa paghatag ngadto sa Ginoo sa imong kasingkasing ug andam nga hunahuna?

• Sa unsang paagi sa imong hunahuna nga ang paghatag sa imong kasingkasing ug hunahuna ngadto sa Manluluwas makatabang kanimo nga mahimong mas sama Kaniya?

Ikonsiderar ang pagdapit sa mga estudyante sa pagpakigbahin sa unsay ilang gibati ug nakat-onan. Mahimo ka usab nga mopamatuod o mopakigbahin og kasinatian dihang nakamatikod ka ogusa ka tawo nga naghatag ngadto sa Ginoo sa iyang kasingkasing ug andam nga hunahuna.

Dugang nga mga Kapanguhaan

Doktrina ug mga Pakigsaad 64:23–25. Unsay buot ipasabot sa “maghago samtang kini gitawag og karong adlawa”?

Ang Ginoo migamit sa pulong nga karong adlawa sa pagtumong sa yugto sa panahon gikan sa dihang ang Doktrina ug mga Pakigsaad 64 nadawat hangtod ngadto sa Ikaduhang Pag-anhi (tan-awa sa Doktrina ug mga Pakigsaad 64:23). Gikan sa panglantaw sa Ginoo, ang karong adlawa nagtumong sa “niini nga kinabuhi,” ang panahon nga ang mga anak sa Dios “[mohimo] sa ilang mga buluhaton” ug “[mangandam] sa pagsugat sa Dios” (Alma 34:32; tan-awa usab sa Alma 34:31, 33–35). Diha sa Doktrina ug mga Pakigsaad 64:24, ang pulong nga ugma nagpasabot ngadto sa kalaglagan sa mga daotan sa Ikaduhang Pag-anhi ni Jesukristo.

Doktrina ug mga Pakigsaad 64:23. Unsa ang ikapulo nga gipasabot sa Ginoo?

Imbis nga porsyento sa kinitaan, ang pulong nga ikapulo diha sa Doktrina ug mga Pakigsaad 64:23 nagpasabot sa tanang tampo sa mga Santos ngadto sa Simbahan, ilabi na ubos sa balaod sa pagpahinungod. Ang Ginoo misaad nga kadtong kinsa misunod sa mga balaod sa sakripisyo ug pagpahinungod makaikyas sa pagsunog nga molaglag sa dili maghinulsol diha sa katapusang adlaw. Ang atong kasamtangan nga pagsabot sa balaod sa ikapulo dugang nga giklaro niadtong 1838, sa dihang ang Ginoo mihatag sa pagpadayag nga narekord diha sa Doktrina ug mga Pakigsaad 119.

Unsaon nako sa paghatag sa Ginoo ang akong kasingkasing ug andam nga hunahuna?

Si Elder Jörg Klebingat sa Seventy mitudlo:

Buhata ang husto nga mga butang alang sa husto nga mga rason. Ang Ginoo, kinsa “nagkinahanglan sa kasingkasing ug sa usa ka andam nga hunahuna” (D&P 64:34) ug kinsa “tigpaila sa mga hunahuna ug mga tinguha sa kasingkasing” (D&P 33:1), nasayod nganong kamo moadto sa simbahan—kon kamo anaa ba sa lawas lang o tinud-anayng nagsimba. … Hinumdomi nga ang pagsayon-sayon sa espirituhanon nga mga butang dili gayod makalipay. Himoa ang Simbahan ug ang gipahiuli nga ebanghelyo nga imong tibuok nga kinabuhi, dili lamang usa ka bahin sa inyong pangpubliko o sosyal nga kinabuhi. (Jörg Klebingat, “Masaligon nga Moduol sa Trono sa Dios,” Liahona, Nob. 2014, 36)

Si Elder Donald L. Hallstrom, kanhi sa Kapangulohan sa Seventy, mipakigbahin:

Ang kasingkasing usa ka simbolo sa gugma ug pasalig. Kita mosakripisyo ug mopas-an og mga palas-anon alang niadtong atong gimahal nga dili nato antoson sa bisan unsa nga rason. Kon ang gugma wala maglungtad, ang atong pasalig mahanaw.

Kon kita nahigugma sa Dios uban sa tibuok natong kasingkasing, andam kita sa paghatag Niya sa tanan nga atong gipanag-iya. …

Ang pagbaton og “andam nga hunahuna” nagpasabot sa paghatag sa atong pinakamaayo nga paningkamot ug pinakamaayo nga panghunahuna ug pagtinguha sa kaalam sa Dios. Kini nagsugyot nga ang atong labing mapahinunguron nga pagtuon sa tibuok kinabuhi kinahanglan nga mga butang nga mahangtoron sa kinaiyahan. Kini nagpasabot nga kinahanglan adunay usa ka dili mapalong nga relasyon tali sa pagpaminaw sa pulong sa Dios ug pagtuman niini. (Donald L. Hallstrom, “The Heart and a Willing Mind,” Ensign, Hunyo 2011, 31–32)

Aron mas masabtan kon unsaon nato sa paghatag ang atong mga kasingkasing ug mga hunahuna ngadto sa Ginoo, mahimo nimong tan-awon ang “Kinasingkasing ang Tanan” ni Elder Dieter F. Uchtdorf sa Korum sa Napulog Duha ka Apostoles gikan sa time code 12:25 hangtod sa 13:37.

Dugang nga mga Kalihokan sa Pagkat-on

Mga ehemplo gikan sa kasaysayan sa Simbahan

Ikonsiderar ang pagpares-pares sa mga estudyante. Hatagi ang matag estudyante sulod sa manag paresan og managlahi nga istorya gikan sa kasaysayan sa Simbahan, sama niadtong gilista sa ubos. Dapita ang mga estudyante sa pagbasa sa istorya ug dayon ipakigbahin kini ngadto sa ilang kapares uban sa pagpasabot kon sa unsang paagi kini nga mga tawo maayo nga mga ehemplo sa paghatag sa ilang mga kasingkasing ug mga hunahuna ngadto sa Ginoo. Mahimo dayong mopakigbahin ang mga estudyante og usa ka personal nga ehemplo gikan sa ilang kaugalingong kinabuhi o gikan sa usa ka tawo nga ilang nailhan.

Isaac ug Lucy Morley

Human sa pagbalhin ngadto sa Missouri, ang pamilya ni Isaac ug Lucy Morley nag-atubang og grabeng paglutos mahitungod sa ilang relihiyon. Sila nagpuyo sa kanunay nga kahadlok nga ang mga manggugubot mosunog sa ilang panimalay. Si Isaac nagtago sa kamaisan sulod sa usa ka bulan aron makalingkawas sa mga manggugubot. Sa tibuok panahon sa pagpanglutos, ang mga Morley nagpabilin nga matinud-anon sa ilang hugot nga pagtuo. Sa usa ka higayon, si Isaac usa sa unom ka mga kalalakin-an kinsa mitanyag sa ilang mga kinabuhi kon ang mga manggugubot motugot nga molugway sa kinabuhi sa ilang mga higala. Si Isaac ug Lucy mibalhin sa ilang pamilya sa makadaghang mga higayon, kanunay nga nag-atiman sa kaayohan sa uban nga naningkamot usab nga makalingkawas sa paglutos. Sa kataposan si Isaac ug si Lucy mibiyahe sa kasadpan uban sa mga Santos. Ubos sa direksiyon ni Brigham Young, sila mitabang nga mapahiluna ang Manti, Utah. (Tan-awa sa Susan Easton Black, Who ‘s Who in the Doctrine and Covenants [1997], 199–200.)

Edward ug Lydia Partridge

Samtang nagbiyahe uban ni Propeta Joseph, si Edward Partridge gihangyo nga magpabilin sa Independence, Missouri, ug motabang sa pagtukod sa Zion. Nabalaka si Edward nga dili siya angayan sa maong buluhaton. Sa usa ka sulat ngadto sa iyang asawa, si Lydia, siya misulat, “Nahadlok ko nga ang akong mga responsibilidad dako ra kay sa unsay akong mahimo, nga madawat sa akong Langitnong Amahan. I-ampo ko nga dili unta ko mapakyas” (Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 150). Nadawat ni Lydia ang sulat ug giandam ang iyang pamilya nga mobalhin sa Independence ug moapil sa iyang bana. Ang mga silingan dili makatuo nga ang mga Partridges mobiya sa ilang nindot nga balay ug malamboon nga negosyo. Si Lydia nahibalo nga ang pagbiya sa iyang balay usa ka pagsulay, apan siya nagtuo nga kini usa ka kadungganan sa pagpahimutang sa pundasyon sa siyudad sa Dios. (Tan-awa sa Mga Santos, 1:149–51–, 154.)

Sa laing paagi, mahimo nimong tan-awon ang “The Heart and a Willing Mind” (7:57) o “Your Day for a Mission” (3:31) isip usa ka klase. Dapita ang mga estudyante sa pagpangita og mga ehemplo kon sa unsang paagi ang mga indibidwal mihatag ngadto sa Ginoo sa ilang mga kasingkasing ug andam nga mga hunahuna.

Doktrina ug mga Pakigsaad 64:34. Ang kasingkasing, usa ka andam nga hunahuna, ug pagdawat og pagpadayag

Kon ang imong mga estudyante gusto nga mas makasabot kon unsaon sa pagdawat og pagpadayag gikan sa Langitnong Amahan, mahimo nimo silang tabangan nga makakita og mga koneksiyon tali sa unsay gikinahanglan sa Ginoo diha sa Doktrina ug mga Pakigsaad 64:34 ug kon sa unsang paagi ang Langitnong Amahan nakigsulti kanato, sama sa gitudlo diha sa Doktrina ug mga Pakigsaad 8:2–3. Human matun-an sa mga estudyante kon unsa ang gipasabot sa paghatag ngadto sa Ginoo sa ilang mga kasingkasing ug andam nga mga hunahuna diha sa seksiyon 64, mahimo nimong hisgotan kon sa unsang paagi kini makatabang kanila nga makadawat og pagpadayag. Isip kabahin niini nga panaghisgot, mahimo nimong dapiton ang mga estudyante sa pagrebyo sa mga parapo 1–3 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023), mangita sa sumbanan nga gitukod sa Ginoo aron kita makadawat og pagpadayag gikan Kaniya.

• Sa unsa nga paagi nga ang paghatag ngadto sa Ginoo sa imong kasingkasing ug andam nga hunahuna makatabang kanimo nga makadawat og pagpadayag gikan Kaniya diha sa imong hunahuna ug sa imong kasingkasing?

Doktrina ug mga Pakigsaad 64:33. “Gikan sa gagmay nga mga butang magagikan ang mga dagko”

Ikonsiderar ang pagpakita sa Flecks of Gold” (3:15). Dapita ang mga estudyante sa pagpangita sa mga kamatuoran gikan sa Doktrina ug mga Pakigsaad 64:33 nga makita niini nga bidyo. Mahimo dayon silang mopakigbahin og mga ehemplo sa “gagmay nga mga butang” nga atong mahimo nga makahimo og dako nga kalainan diha sa atong mga paningkamot sa pagsunod kang Jesukristo.

Mahimo usab nimong dapiton ang mga estudyante sa pagbasa sa Alma 37:6–7 o sa pagpakigbahin og mga istorya gikan sa ilang kaugalingong mga kinabuhi o sa mga kasulatan nga naghulagway niini nga kamatuoran.

Usa ka balikbalik nga pagdapit

Ikonsiderar ang pagdapit sa mga estudyante sa pagmarka sa susamang hugpong sa mga pulong nga gibalik-balik diha sa Doktrina ug mga Pakigsaad 64:22 ug sa Doktrina ug mga Pakigsaad 64:34. Mahimo dayon nimong ipasabot nga ang Manluluwas balik-balik nga nagdapit kanato sa paghatag ngadto Kaniya sa atong mga kasingkasing ug mga hunahuna sa tibuok nga mga kasulatan. Dapita ang mga estudyante sa pag-link sa Doktrina ug mga Pakigsaad 64:34 ngadto sa Doktrina ug mga Pakigsaad 4:2 ug sa Mateo 22:36–39. Hangyoa sila sa pagpakigbahin og dugang nga mga panabot gikan niini o sa ubang mga bersikulo nga makatabang o makadasig kanato sa paghatag ngadto sa Ginoo sa atong mga kasingkasing ug mga hunahuna.

Doktrina ug mga Pakigsaad 64:41–43. Usa ka bandila ngadto sa mga katawhan

Ikonsiderar ang pagdapit sa mga estudyante sa pagbasa sa Doktrina ug mga Pakigsaad 64:41–43 ug mangita og mga paagi nga ang Ginoo mihulagway sa Zion. Mahimo nimong ipasabot nga ang usa ka bandila mao ang “usa ka bandera o sumbanan diin ang mga katawhan magpundok sa usa ka hiniusa nga tuyo o ilhanan” (Giya ngadto sa mga Kasulatan, “Bandila,” scriptures.ChurchofJesusChrist.org). Mahimo nimong dapiton ang mga estudyante sa pagpangita sa “Global Histories [Tibuok Kalibotan nga Kasaysayan]” diha sa “Kasaysayan sa Simbahan” nga seksiyon sa Gospel Library aron makakita og mga asoy sa mga tawo gikan sa daghang kanasoran nga nagpundok ngadto sa Simbahan sa Manluluwas. Mahimo silang magbasa og usa ka istorya ug ipakigbahin kini ngadto sa kapares o diha sa ginagmay nga mga grupo.