Paghimo sa mga Ordinansa sa Templo nga Mas Dali nga Mapahigayon

Sa tibuok kasaysayan, ang Ginoo naghimo sa kinahanglanon nga mga ordinansa nga maanaa diha sa Iyang balaan nga mga templo. Pinaagi niini nga mga ordinansa sa pagkapari ug sa may kalabotan nga mga pakigsaad, Iya kitang gibugkos ngadto Kaniya ug gihimong posible ang kinatas-ang himaya.

Si Propeta Joseph Smith nakadawat og pagpadayag nga nagtilimad-on sa kaimportante sa mga ordinansa sa templo alang sa buhi ug sa patay sa wala pa gani mahimong opisyal ang pagkatukod sa Ang Simbahan ni Jesukristo sa mga Santos sa Ulang mga Adlaw niadtong 1830 (tan-awa sa Doktrina ug mga Pakigsaad 2).

Ang kamahinungdanon niining mga ordinansa sa unang mga adlaw sa Pagpahiuli gihatagan og dakong pagtagad pinaagi sa paningkamot sa pagtukod og mga templo bisan pa sa lisod nga mga sirkumstansiya. Sukad niadto, ang kamahinungdanon niini makita samtang ang mga templo gitukod nga nagkaduol sa mga miyembro sa Simbahan diha sa mga lokasyon sa tibuok kalibotan.

1831: Ang Ginoo mipadayag ngadto sa mga Santos nga usa ka templo ang gitakda na alang sa Independence, Missouri (tan-awa sa Doktrina ug mga Pakigsaad 57:1–3). Niadtong 1838, lain nga templo sa Far West, Missouri, gitakda usab (tan-awa sa Doktrina ug mga Pakigsaad 115:7–16). Tungod sa kagubot, kini nga mga templo wala matukod niana nga panahon. Kini wala maapil sa kasamtangan nga lista sa gianunsiyo nga mga templo ug walay gihimong aktibo nga pagplano.

Kirtland Temple

1836: Ang Kirtland Temple gipahinungod pagka Marso 1836, unom pa lamang ka tuig human ang gipahiuli nga Simbahan giorganisar niadtong 1830. Ang pagpanag-iya nausab human ang kadaghanan sa mga miyembro mibiya sa Kirtland niadtong 1838, ug ang gambalay [building] wala na maihap uban sa mga napahinungod nga mga templo.

Nauvoo Temple

Nauvoo Illinois Temple (giusab og tukod)

1846: Ang Nauvoo Temple una gayod nga gipahinungod niadtong Mayo 1846. Hapit kadto mahurot og kaguba pinaagi sa tinuyo nga pagsunog niadtong 1848. Ang Nauvoo Illinois Temple gitukod og usab sa original nga nahimutangan ug gipahinungod niadtong 2002.

Salt Lake Temple

1847: Si Brigham Young mipahibalo sa unsay nahimo nga Salt Lake Temple upat pa lamang ka adlaw human miabot sa walog. Milungtad hangtod sa 1893 aron ang templo mapahinungod.

St. George Utah Temple

1855: Tali sa tuig sa pag-abandonar sa Nauvoo Temple niadtong 1846 ug sa pagpahinungod sa St.George Utah Temple niadtong 1877, walay templo nga gipahinungod. Ang mga Santos sa Ulahing mga Adlaw makadawat sa ilang mga ordinansa sa templo didto sa Balay sa Pagtuga [Endowment House] hangtod nga kini giguba niadtong 1889.

Mesa Arizona Temple

1945: Ang Mesa Arizona Temple midalit og mga ordinansa sa Espanyol, ang unang templo diin ang mga ordinansa gipresentar sa pinulongan nga dili Ininglis.

1978: Uban sa pagpahinungod sa São Paulo Brazil Temple niadtong 1978, 17 ka mga templo ang nagamit na.

1985: Atol sa pagserbisyo ni Presidente Spencer W. Kimball isip Presidente sa Simbahan gikan niadtong 1973 hangtod pagka 1985, 31 ka templo ang gianunsiyo.

1997: Si Presidente Gordon B. Hinckley mipahibalo sa desinyo alang sa mas gagmay nga mga templo. Pagka 1998, siya mipahibalo sa iyang intensiyon sa pagkab-ot sa total nga 100 ka mga templo nga magamit na sa mga tuig 2000.

2000: Si Presidente Hinckley mipahinungod og upat ka templo sulod sa usa ka semana (Hunyo 11–18): ang Fukuoka Japan Temple, Adelaide Australia Temple, Melbourne Australia Temple, ug ang Suva Fiji Temple.

2008: Atol sa pagserbisyo ni Presidente Hinckley isip Presidente sa Simbahan gikan niadtong 1995 hangtod sa 2008, 78 ka templo ang gipahibalo nga itukod.

Arequipa Peru Temple

2018: Atol sa pagserbisyo ni Presidente Thomas S. Monson isip Presidente sa Simbahan gikan niadtong 2008 hangtod sa 2018, 45 ka templo ang gianunsiyo.

2021: Sa unang upat ka tuig sa pagserbisyo ni Presidente Russell M. Nelson isip Presidente sa Simbahan gikan niadtong 2018 hangtod sa kataposan sa 2021, 83 ka mga templo ang gianunsiyo.

2022: Pagka Enero 1, 2022, 265 ka mga templo ang gianunsiyo, kasamtangang gitukod, o gipahinungod.