Kahigayonan nga Molambo

Ni Deborah L. Dougal

Nasayod ang Ginoo nga ako mouswag ug mamulak pag-usab.

Pipila na ka tuig sukad mitaliwan ang akong bana, si Jerold. Ang kanser paspas nga miabot ug isog kaayo, ug namatay siya sulod sa tulo ka bulan. Karon naghunahuna ko niya samtang nagtrabaho ako sa akong nataran.

Samtang gibalhin nako og kaang ang usa ka tanom, aduna akoy nahunahunaan. Sa wala pa nako hilabti, OK ra ang tanom. Maayo ra ang kahimtang niini diha sa kaang nga nahimutangan na daan niini, apan wala kini maglambo. Nasayod ako nga kon wala nako kini gibalhin og kaang, lagmit nga mohunong kini sa pagpamulak ug tingali mohunong gani sa pagtubo. Segurado gayod nga dili kini makahimo sa labing maayo niini.

Busa, mihukom ko nga hatagan ang tanom og kahigayonan nga molambo pinaagi sa pagbalhin niini ngadto sa usa ka mas dako nga kaang. Dili dako kaayo nga kaang—kanang kaang lang nga mas dako og duha ka pulgada sa diyametro. Kon hatagan nako kini og sobra ra kaayo nga luna, mahimong masobrahan kini sa pagbisbis ug mamatay sa pagkadunot sa gamot.

Nagdahom ko nga maglisod ang tanom samtang maningkamot kini nga mopahiangay. Komportable ra gayod kini diha sa kaang nga naandan niini. Wala kini masayod nga ang kausaban makatabang niini sa pagpadayon sa pagtubo. Gikinahanglan nako kining atimanon, hatagan kini sa hustong kahayag, tubig, ug dugang nga mga sustansiya atol niining panahon sa pagpahiangay. Nasayod ako, sa kataposan, kini molambo ug mamulak pag-usab.

Samtang naghunahuna ko sa akong kinabuhi isip usa ka biyuda, nakaamgo ko nga ako sama sa usa ka tanom. Komportable ra ko. Maayo ra akong pagkabutang. Apan sa dihang mitaliwan ang akong bana, nadunggan nako ang Espiritu nga mihunghong nga misulod ako sa usa ka bag-o nga hugna sa paglambo. Aduna pa akoy mga butang nga gikinahanglan nga makat-onan ug buhaton niini nga kinabuhi.

Sulod sa misunod nga duha ka tuig, pito ka ubang mga lalaki pa sa among ward ang mitaliwan. Misugod ako sa paghangyo sa akong bag-o nga nabiyuda nga mga higala nga magtapok-tapok, mag-istorya, mobisita, moserbisyo sa uban—aron ang matag usa kanamo mobati nga wala kaayo mag-inusara. Walay usa kanamo ang mopili nga “ibalhin og kaang.” Apan samtang nagpahiangay ako sa mortal nga kinabuhi nga wala ang akong bana, akong nakaplagan nga ako makahatag og suporta ngadto sa uban nga nag-atubang og susama nga hagit. Nakaplagan usab nako nga adunay daghang oportunidad nga mogahin og panahon uban ang mga anak ug mga apo ug sa pagseguro kanila pag-usab nga pinaagi sa Pag-ula ni Jesukristo, ang among pamilya magkauban pag-usab sa sunod nga kinabuhi.

Wala gayod ako nagdahom sa paglambo nga moabot kanako tungod sa pagkawala sa akong kapikas. Apan nanginlabot ang Langitnong Amahan ug ako “gibalhin sa laing kaang,” naghatag kanako og kahigayonan nga molambo pinaagi sa pagbutang kanako diha sa mas dako-dako nga kaang—usa ka bag-o nga hagit nga naghatag og oportunidad sa paglambo.

Gimingaw gihapon ko ni Jerold kada adlaw. Pipila ka tuig ang milabay, nanglimbasog gihapon ko samtang naningkamot ko nga mopahiangay sa kausaban nga wala siya. Apan nasayod ko nga atimanon ko sa Ginoo latas niini. Uban sa panahon, ug uban sa pagsalig diha Kaniya, ako mouswag ug mamulak pag-usab.

Ang tagsulat nagpuyo sa Idaho, USA.