“Usa ka Instrumento diha sa mga Kamot sa Ginoo,” Liahona, Hulyo 2022.
Dali, Sunod Kanako
Ester
Usa ka Instrumento diha sa mga Kamot sa Ginoo
Kon kita mosunod sa Espiritu ug adunay andam nga kasingkasing, ang Ginoo mogiya kanato sa pagbuhat unsa ang Iyang gikinahanglan nga atong buhaton.
Paghulagway pinaagi ni Dilleen Marsh
Aron mamahimong usa ka instrumento diha sa mga kamot sa Ginoo sayon ra gyod. Kita kinahanglan lang gayod nga andam nga motugot sa Espiritu nga mogiya kanato ug magbaton og kaisog sa pagsunod sa Iyang mga pag-aghat. Ang ingon mao ang kahimtang sa dihang ang ginikanan sa akong asawa mipasakop sa Simbahan niadtong 1968. Usa ka batan-ong misyonaryo kinsa gustong mahimong usa ka instrumento diha sa mga kamot sa Ginoo mitabang sa pagdala sa ilang pamilya ngadto sa Simbahan.
Ang akong mga ugangan nakahimamat sa mga misyonaryo makausa, apan human niana, ang akong ugangan nga lalaki dili na gusto nga mopadayon. Dayon ang usa ka bag-ong misyonaryo, si Elder Fetzer, nabalhin ngadto sa area, ug kini nga batan-ong misyonaryo ug ang iyang kompanyon naaghat sa pagbisita ug pagpangalagad ngadto sa pamilya. Si Elder Fetzer nakatandog sa mga kasingkasing sa mga sakop sa pamilya sa paagi nga wala nahimo sa uban nga mga misyonaryo.
Sulod sa misunod nga unom ka bulan ang mga misyonaryo nangalagad ngadto sa panginahanglan sa pamilya. Sa kataposan, ang mga ginikanan sa akong asawa natandog sa Espiritu ug mipasakop sa Simbahan. Sila nakadawat sa mga panalangin nga moabot samtang kita mohimo ug motuman sa mga pakigsaad. Pinaagi kanila, dugang mga pamilya ang mipasakop sa Simbahan ug midawat sa mga panalangin sa ebanghelyo.
Kini nahitabo, agig kabahin, tungod sa usa ka batan-ong lalaki gikan sa Utah nga andam sa “pagpatigbabaw sa Dios” diha sa iyang kinabuhi. Siya nagbaton og kaisog sa pagbiya sa komportabling balay, nagkat-on og usa ka bag-ong pinulongan, ug nagserbisyo sa Ginoo didto sa Brazil.
Usa ka Yano nga Panag-istoryahanay
Mga usa ka tuig ang milabay ang akong asawa, si Alessandra, nakadawat og usa ka mensahe sa text diha sa iyang phone gikan sa usa ka sister sa among ward sa Brazil. Kapin na sa duha ka tuig gikan sa kataposan nilang panagkita. Kini nga sister misulat: “Sa usa sa labing ngil-ad nga adlaw sa akong kinabuhi, wala ko kahibalo kon giunsa nga ako naadto sa simbahan. Sa dihang akong gibuhat, imoha akong nakit-an. Imong gigunitan ang akong mga bukton ug misulti kanako nga motupad sa paglingkod nimo. Ako nakig-istorya kanimo. Ikaw naminaw ug mitambag kanako.”
Kini ingon og yano lang nga panag-istoryahanay niadtong panahona. Apan nahimo kini nga usa ka oportunidad alang sa akong asawa nga mahimong usa ka instrumento diha sa mga kamot sa Ginoo. Siya nangalagad ngadto sa minahal nga sister kinsa adunay mahatigon nga panahon. Si Alessandra wala gayod naghunahuna mahitungod niini. Yano lang siyang mibati nga naaghat sa pagpaminaw ug sa pagtanyag og kahupayan, ug iyang gisunod ang pag-aghat. Karon, kapin na sa duha ka tuig ang milabay nga siya nakadawat niining mensahe sa text gikan niana nga sister, nagpahayag sa iyang pagpasalamat.
Pinaagi niini nga mga panghitabo akong nakat-onan nga kita wala nagkinahanglan og usa ka calling aron mahimong usa ka instrumento diha sa mga kamot sa Ginoo. Nagkinahanglan lang kita nga magbaton og tinguha. “Busa, kon kamo adunay tinguha sa pag-alagad sa Ginoo kamo gitawag ngadto sa buhat” (Doktrina ug mga Pakigsaad 4:3).
“Alang sa Panahon nga sama Niini”
Diha sa Daang Tugon atong mabasa ang mahitungod sa laing tawo kinsa miserbisyo isip usa ka instrumento diha sa mga kamot sa Dios. Si Ester usa ka batan-ong babaye kinsa nawad-an sa iyang mga ginikanan sa sayo nga pangidaron. Siya gipadako sa iyang ig-agaw nga si Mordoqueo.
Human si Hari Ahasuero mideborsiyo sa Rayna nga si Vashti, siya mipili ni Ester nga mamahimo niyang bag-o nga rayna. “Gihigugma sa hari si Ester labaw sa tanang babaye ug gikahimut-an siya sa hari labaw sa tanang mga dalaga” (Ester 2:17). Si Ester usa ka Judio, apan ang hari wala masayod niini.
Si Haman, usa sa mga tigtambag sa hari, gipatas-an ang katungdanan ug gihimong labaw sa tanang kadagkoan sa prinsipe (tan-awa sa Esther 3:1). Ug siya miplano “sa paglaglag, sa pagpatay, ug sa pagpoo, sa tanang mga Judio, batan-on ug tigulang” (Ester 3:13).
Sa dihang nahibaloan ni Ester ang mahitungod sa plano ni Haman, si Mordoqueo miaghat kang Ester sa pagpakigsulti ngadto sa hari. Ang pagbuhat sa ingon nagpakita og dakong personal nga risgo ngadto kaniya, apan nagbaton siya og kaisog gikan sa mga pulong ni Mordoqueo. Siya namahayag, “Kinsay nasayod nga nahimo kang rayna tungod ug alang sa panahon nga sama niini?” (Ester 4:14).
“Kon ako mamatay, mamatay ako,” miingon siya (Ester 4:16) ug miadto sa hari nga wala gipatawag. Kini nga sala silotan og kamatayon. Tungod sa iyang kamaisogon, si Ester nakaimpluwensiya sa hari. Agig resulta, siya [ang hari] miisyu og usa ka balaod sa pagluwas sa mga Judio. Niini, siya [Hari]“[mitugot sa] mga Judio sa matag siyudad sa pagpanalipod sa ilang kaugalingon” (Ester 8:11).
Ang Matag Katungdanan Importante
Si Ester andam nga mahimong usa ka instrumento diha sa mga kamot sa Ginoo. Ang iyang kinabuhi sa kamasulundon ug kamapahinunguron miandam kaniya. Kon maghunahuna ko kabahin niya nga miadto sa hawanan sa palasyo atubangan sa hari nga walay imbitasyon, nahingangha ako sa iyang kaisog. Nakapahinumdom kini nako sa imbitasyon ni Presidente Russell M. Nelson natong tanan nga ipatigbabaw ang Dios sa atong mga kinabuhi.1 Si Ester andam nga mopatigbabaw sa Dios.
Ang ig-agaw ni Ester si Mordoqueo nahimo usab nga usa ka instrumento diha sa mga kamot sa Ginoo. Siya mipadako ni Ester sa maayo. Siya mihatag kaniya og suporta, kaisog, ug kadasig. Kitang tanan adunay papel nga dulaon, ug ang matag papel managsamang importante ug kritikal.
Ang Ginoo mibutang kang Ester diha sa balay sa hari tungod sa usa ka katuyoan—aron sa pagluwas sa mga Judio. Sama lang gayod sa Iyang gihimo kang Ester, ang Ginoo nagbutang kanato kon asa kita makatabang aron matuman ang Iyang mga katuyoan. Tungod niini nga rason, kita kinahanglan gayod nga mahimong andam ug takos kon mag-atubang og mga oportunidad nga Iyang ipakita.
Mga Oportunidad nga Nagpalibot
Ang mga oportunidad nga mamahimong mga instrumento diha sa mga kamot sa Ginoo nagpalibot ra kanato. Atong responsibilidad mao ang mahimong andam sa paglihok. Sa kasagaran wala kita masayod kon kanus-a o sa unsang paagi nga kadtong mga oportunidad mopakita sa ilang kaugalingon. Kita kinahanglan nga magpakabuhi nga takos sa pakig-uban sa Espiritu Santo ug magbaton og andam nga kasingkasing. Ang Ginoo mogiya dayon kanato sa pagbuhat sa unsa ang Iyang gikinahanglan nga atong buhaton.
Sa Doktrina ug mga Pakigsaad 35:3, ang Ginoo nagsulti ni Sidney Rigdon, “Ako nagtan-aw diha kanimo ug sa imong mga buhat. Ako nakadungog sa imong mga pag-ampo, ug nag-andam kanimo alang sa mahinungdanon nga buhat.”
Ang Ginoo nakaila kanato ug adunay ipabuhat sa matag usa kanato. Usahay mao kini usa ka buhat nga kita lang ang makabuhat. Kini nga buhat mahimong diha sa panimalay isip mga ginikanan nga magtabang sa usa ka nanglimbasog nga anak nga lalaki ug anak nga babaye. O kini mahimong anaa sa mga responsibilidad sa Simbahan. Sa pagkatinuod, kini mahimong sa bisan unsang orasa, bisan asa, ug bisan kinsa.
Si Presidente Dieter F. Uchtdorf, kanhi Ikaduhang Magtatambag sa Unang Kapangulohan, miingon: “Ang Ginoo naghatag ninyo niini nga mga responsibilidad nga may hinungdan. Tingali may mga tawo ug mga kasingkasing nga kamo ang bugtong makakab-[o]t ug makatandog. Tingali wala nay lain nga makahimo niini sa ingon nga paagi.”2
Si Presidente Uchtdorf miingon usab, “Samtang kita mosunod sa hingpit nga ehemplo [sa Manluluwas], ang atong mga kamot mamahimong Iyang mga kamot; ang atong mga mata, Iyang mga mata; ang atong kasingkasing, Iyang kasingkasing.”3
Sama ni Ester, ni Mordoqueo, ni Elder Fetzer, sa akong asawa, ug daghan pang uban, kitang tanan mamahimong mga instrumento diha sa mga kamot sa Ginoo.