Unsa ang Gitudlo sa Usa ka Liso sa Kalabasa Kanako mahitungod sa Gugma sa Dios

Ni Larry Laycock

Akong nakat-onan nga samtang kita nag-ugmad sa gugma sa Dios pinaagi sa kalooy, maayong pamatasan, kapuangod, ug paglakip, kini motubo sa mas daghan nga paagi.

Ang akong panimalay sa bata pa ko giliyokan og mga darohan sa kan-onon sa mga baka [alfalfa]. Sa dihang ako nuwebe anyos ang panuigon, akong gihawanan ang gamay nga luna sa daplin sa mga darohan sa paghimo og usa ka tanaman. Sa sayo sa tingpamulak, nagtanom ako og usa ka liso sa kalabasa, ug giamumahan kini kada adlaw, naghinamhinam nini nga moturok. Sulod sa mga adlaw, sa akong kalipay, usa ka gamay nga berdeng mga dahon migimaw sa yuta. Sa mga adlaw ug mga semana nga misunod, ako natingala sa kakusog nga pagtubo sa akong gamay, usa ka liso sa kalabasa. Uban sa balaang mga sangkap sa liso, yuta, hayag sa adlaw, ug tubig, ang akong gamay nga liso milagrosong nahimo ngadto sa daghang mga bagon nga naglugway ngadto sa tanang direksiyon.

Sa usa ka mubo nga panahon wala madugay, berde nga mga saha mitumaw diin kolor nga kahil ug dalag nga mga bulak mao pa lamang ang pagbukhad. Sa panahon sa ting-init, ang mga saha nahimo ngadto sa dako, kahil og kolor nga mga kalabasa. Sa dihang miabot ang ting-ani, akong gihiwa ang akong kalabasa. Nahingangha ako! Ang matag kalabasa adunay gatosan ug gatosan ka liso.

Mahimong maghunahuna ka sa imong kaugalingon, “Kana maayo kaayo, apan unsa ang mabuhat niining liso sa kalabasa kanako isip usa ka young adult?” Hinoon, ang pag-obserbar sa ingon og walay kataposang paghatag og mga liso gikan sa akong ani, kalit nakong nasabtan kon giunsa, uban sa tabang sa Dios, ang may kinutobang (usa ka liso) mahimong mausab ngadto sa walay kataposan ug mahangtoron. Akong nakita nga “kay sa Dios walay butang nga dili mahimo” (Lucas 1:37). Akong nasinati ang kamatuoran sa mga pulong sa kasulatan “pinaagi sa gagmay ug yano nga mga butang ang mga dagko nga butang ipahinabo” (Alma 37: 6).

Gilalang sa Dios ang akong gamay nga liso sa kalabasa sa paghatag og walay kinutoban, gani walay kataposang, mga henerasyon sa mga liso sa walay kataposang liyok sa panahon sa pagtubo ug sa paglambo. Ug sama ang katinuod alang sa daghang uban nga mga butang sa atong mga kinabuhi, lakip ang abilidad sa pagbati ug pagpakigbahin sa Iyang balaang gugma.

Pag-ugmad sa Gugma sa Dios

Sa paglabay sa panahon, ako miabot nga masabtan nga ang atong mahigugmaong Langitnong Amahan nagtanom sulod sa matag usa kanato sa liso sa Iyang mahangtorong gugma. Ang Dios nahigugma kanato igo sa pagtanom sa Iyang gugma diha sa atong mga kalag uban ang katuyoan nga atong ugmaron ug patuboon kini pinaagi sa serbisyo, hugot nga pagtuo, paghinulsol, ug pagsunod sa pakigsaad.

Busa unsa kadtong mahitungod sa mga panahon sa kinabuhi nga atong gibati ang kalayo gikan sa gugma sa Dios? Usahay atong bation nga nalayo gikan Kaniya tungod kay nakahimo kita og mga sayop o nakasala ug wala makakaplag og kalig-on o kaisog sa paghimo sa unang mga lakang ngadto sa paghinulsol. Usahay nahimo kita nga nagkapuliki ug nalinga pinaagi sa tanang uban nga mga butang nga kita aduna nga nagpadayon sa kinabuhi nga atong nakalimtan o gilangan ang pagbuhat sa gagmay nga mga butang sa matag adlaw nga nagtabang kanato nga mobati nga mas naduol ngadto sa atong Langitnong Amahan ug sa Iyang gugma. Kita mahimong mobati usab ingon og daghan kita og mga pag-ampo nga wala matubag o daghang mga tawo kinsa nakapasakit kanato o mga panahon nga ang Dios wala motabang kanato.

Kita mahimong mobati og hilabihan ka nahilayo sa gugma sa Dios sa atong kaugalingong mga kinabuhi nga dili gani kita makahunahuna kon unsaon nato nga makapakigbahin niana nga gugma ngadto sa uban.

Apan walay pagsapayan sa kahimtang o sitwasyon sa atong mga kinabuhi, walay pagsapayan unsa nga pag-antos o kawalay hustisya nga atong gilahutay, ang gugma sa atong Langitnong Amahan makatubo pinaagi sa mga kalisod sa atong mga kinabuhi. Kini makabuntog sa tanang sakit, kasuko, ug kapakyasan. Kon atong ugmaron ang gugma sa Dios pinaagi sa kalooy, maayong pamatasan, kapuangod, ug paglakip, kini motubo sa mas daghan nga paagi. Ang atong kapasidad sa paghigugma ug pagserbisyo sa uban mahimong walay kataposan, mahangtoron, ug mas maanindot kay sa atong sukad gidamgo nga posible.

Samtang kita nag-ugmad sa liso sa gugma sa Dios sulod kanato, kita makaani sa tiunay nga gugma ni Kristo––gugma nga putli (tan-awa sa Moroni 7:47). Kadtong kinsa nag-ugmad sa liso sa gugma sa Dios nag-ani usab og daghang mga higala, pakigdait, ug nagtubo nga hugot nga pagtuo––tulo ka mga butang nga tanang mga young adult makagamit! Samtang kita mabinantayong nag-ugmad sa liso sa gugma sa Dios, makasinati kita og walay kinutobang ani sa mahangtorong gugma diha sa atong mga relasyon sa pamilya, atong serbisyo sa Simbahan, ug sa atong personal nga mga kinabuhi.

Pakigbahin sa Gugma sa Dios

Ang mga kasulatan nagtudlo nga ang “Dios gugma man” (1 Juan 4:8). Si Presidente M. Russell Ballard, Kasamtangang Presidente sa Korum sa Napulog Duha ka Apostoles, mi-obserbar nga “ ang labing importanting hiyas sa Langitnong Amahan ug sa Iyang Pinalanggang Anak nga kinahanglan natong tinguhaon ug paningkamotang angkonon sa atong kinabuhi mao ang gasa sa gugmang putli, “ang tiunay nga gugma ni Kristo” (Moroni 7:47).”¹

KIning tiunay nga gugma ni Kristo naghimo kanato sa paghigugma ug sa pagserbisyo sa uban sama sa gibuhat sa Manluluwas. Samtang kita nagsunod sa panig-ingnan ni Kristo sa serbisyo, atong madiskobrehan ang gugma sa Dios sa sulod kanato ug makat-onan kon unsaon ang pagpakigbahin niana nga gugma.

Kadtong kinsa nakaila kanako og maayo nahibalo nga ako sa gihapon kasagarang nagsulod og liso sa kalabasa sa akong bulsa sa pagpahinumdom kanako sa importanting leksiyon sa kinabuhi nga nakat-onan: Ang Langitnong Amahan makakuha og usa ka butang ingon ka gamay sama sa liso sa gugma diha sa atong mga kinabuhi ug himoon kini ngadto sa usa ka gamhanan, walay kataposan, ug mahangtorong gugma ug serbisyo sa Dios, mga silingan ug sa kaugalingon.