Digital Lamang
Unsa Kaha Kon ang Akong mga Pag-ampo Ingon og Wala Tubaga?
Hunahunaa kining pito ka ideya sa pagkat-on pa og dugang mahitungod kon unsaon sa Langitnong Amahan pagtubag sa matag matarong nga pag-ampo.
Paghulagway ni Paul Mann
Balik-balik sa tibuok kasulatan, atong mabasa ang saad, “Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan” (Hubad ni Joseph Smith, Mateo 7:12 [sa Mateo 7:7, ]). Gihatagan niana nga saad, unsaon nato sa pagpadayon kon atong bation nga ang atong mga pag-ampo, mga pangamuyo, ug mga tinguha wala tubaga?
Usa ka natural nga tubag mahimong usahay ang pagkatingala kon ang Dios sa tinuod naminaw o nagtubag sa atong mga pag-ampo, o kaha kita mahimong maghunahuna, “Siya nagtubag sa tanang pag-ampo gawas sa akoa.” Apan adunay laing mga tubag nga makatabang kanato sa pagpangita sa kalig-on o paglaom sa pagpadayon sa unahan diha sa hugot nga pagtuo o sa pag-ila sa daghang mga paagi ang Langitnong Amahan mahimong nagtubag na sa atong mga pag-ampo.
Ang matag tubag makasugod uban sa pagbaton og hugot nga pagtuo diha sa Dios, kinsa “ang Dios sa kamatuoran, ug dili magbakak” (Ether 3:12; tan-awa usab sa Tito 1:2). Kon atong hinumdoman kana nga doktrina, dili kita kinahanglang matingala kon ang Dios motubag ba sa atong mga pag-ampo ug hinoon makatutok sa atong enerhiya sa pagpangita alang sa Iyang kamot ug paggiya sa atong mga kinabuhi, nasayod nga Siya nagtubag sa matag pag-ampo. Kining pito ka paagi nakigbahin og pipila sa daghang baroganan nga makatabang kanato nga mahibalo kon unsaon nato pagdawat ug pag-ila sa mga panalangin ug mga tubag gikan sa Langitnong Amahan diha sa atong mga kinabuhi.
1. Salig nga ang Dios gusto sa unsay labing maayo alang kanimo.
Ang atong abilidad sa pagpadayon sa unahan diha sa hugot nga pagtuo makapalambo og dako kon kita maghinumdom nga ang Langitnong Amahan kanunay aduna sa atong labing maayo nga kaayohan sa hunahuna. Ingon sa gitudlo ni Elder Richard G. Scott (1928–2015) sa Korum sa Napulog Duha ka Apostoles, kay sa nagtubag sa tanang pag-ampo sa paagi nga atong gusto, Siya mohimo, diha sa Iyang kalooy, “kanunay nga motubag sa inyong pag-ampo sa paagi ug sa panahon nga angay sa inyong mahangtorong kaayohan.”1
Samtang nagkat-on kita sa pagsalig nga ang Langitnong Amahan sa tinuod motubag sa labing maayong paagi alang kanato, makakaplag kita og kalinaw ug pasalamat imbis kapakyasan kon ang mga pag-ampo wala matubag sa paagi nga atong gilaoman. Kita makahimo nga “magmalipayon sa pagbuhat sa tanang mga butang nga ubos sa atong gahom,” uban ang pagpaabot alang sa “iyang bukton nga ipadayag” (Doktrina ug mga Pakigsaad 123:17) diha sa mas daghan pang malipayon nga mga panalangin nga moabot.
2.Tun-i kini sa imong hunahuna ug pangayo og piho nga direksyon.
Si Presidente Russell M. Nelson mitudlo nga “ang Ginoo ganahan og paningkamot.”2 Dili kita makapaabot og mga tubag kon kita dili andam sa paghatag og paningkamot. Sa dihang si Oliver Cowdery wala makadawat og panalangin nga iyang gipaabot, ang Ginoo mipahinumdom kaniya (ug kanato):
“Tan-awa, ikaw wala makasabot; ikaw nagdahom nga Ako mohatag niini nganha kanimo, samtang ikaw wala maghunahuna gawas sa pagpangutana kanako.
“Apan, tan-awa, Ako moingon nganha kanimo, nga ikaw kinahanglan gayod nga magtuon niini diha sa imong hunahuna, unya ikaw kinahanglan nga mangutana kanako kon kini husto, ug kon kini husto Ako mohimo sa imong dughan nga moinit diha sulod kanimo; busa, imong mabati nga kini husto” (Doktrina ug mga Pakigsaad 9:7–8).
Kon kita nagpaabot alang sa usa ka piho nga tubag ngadto sa usa ka kinatibuk-ang pangutana, niana kita mahimong gusto hinoon nga usbon ngadto sa usa ka gitun-an sa hunahuna, piho nga pangutana ug dayon mangita og panghimatuod. Sama pananglitan, kon kita nag-ampo nga mahibalo “Unsay akong buhaton sunod?” nga walay daghan pang gibuhat kay sa pag-ampo alang sa direksyon, niana kita hinoon mahimong nanginahanglan nga masiguro nga atong gisusi ang atong mga posibilidad, gitimbang kini pag-ayo, ug gisunod ang mga baroganan sa ebanghelyo sa pagpili sa labing maayo nga mga kapilian, ug dayon ipresentar kana nga kapilian ngadto sa Ginoo alang sa panghimatuod nga kini mao ang hustong pagpili.
3. Mahimo nga bukas ngadto sa daghang posibilidad.
Naghinumdom nga ang “mga dalan sa [Dios] labi pang hataas kay sa [atong] mga dalan” (Isaias 55:9; tan-awa usab ang bersikulo 8) makatabang kanato nga mahimong bukas ngadto sa lainlaing mga paagi nga ang Langitnong Amahan mahimong magtubag sa atong mga pag-ampo. Sama pananglitan, mitudlo si Elder Scott kon unsaon sa mga pag-ampo nga mamaayo matubag sa daghang mga paagi: “Importante ang pagsabot niini nga ang Iyang pagpang-ayo nagkahulogan nga naayo, o nagpagaan sa inyong mga palas-anon, o gani modangat sa pagkaamgo nga kini takos ang paglahutay nga mapailobon hangtod sa kataposan, kay ang Dios nagkinahanglan og maisog nga mga anak nga lalaki ug mga babaye kinsa andam nga mahashasan kon diha sa Iyang kaalam kana mao ang Iyang kabubut-on”.3
Ang pagtuon sa mga kasulatan ug propetikanhong mga pagtulon-an kauban sa hilisgotan nga kita nag-ampo makatabang kanato sa pag-ila sa mga tubag––sa daghang mga porma––nga mahimong ipadala sa Langitnong Amahan kanato. Ang pagbuhat sa mao nagtabang kanato sa paglikay nga mahimong halap og mata4 ug hinoon bukas ngadto sa kabubut-on ug kaalam sa Dios.
4. Mapainubsanong dawaton ang “dili.”
Usahay unsa ang “alang sa [atong] labing maayong mahangtoron nga kaayohan” mao ang pagdawat og tubag nga “dili.” Kon kana mahitabo, makakaplag kita og kalig-on dinhi niini nga tambag gikan ni Presidente Nelson, nga makatabang kanato sa pag-ila sa gugma ug kalooy sa Dios:
“Dili tanan natong mga pag-ampo tubagon ingon sa atong gitinguha. Usahay ang tubag mahimong dili. Dili kita kinahanglan nga mahibulong. Ang mahigugmaong yutan-ong mga ginikanan dili mosulti og oo ngadto sa tanan nga hangyo sa ilang mga anak. …
“Kinahanglan kitang mag-ampo pinasubay sa kabubut-on sa atong Langitnong Amahan. Siya gustong mosulay kanato, sa paglig-on kanato, ug sa pagtabang kanato sa pagkab-ot sa atong hingpit nga potensyal. Sa dihang si Propeta Joseph Smith nabilanggo sa Liberty Jail, siya nangamuyo alang sa kahupayan. Ang iyang mga pag-ampo gitubag uban sa usa ka pagpasabot: ‘Kining tanan nga mga butang makahatag kanimo og kasinatian, ug alang sa imong kaayohan’ [Doktrina ug mga Pakigsaad 122:7].”5
Kon kita makadawat og “dili,” kita makakaplag og lahi nga kalig-on sa pagpangita alang sa tanang pagtubo, mga kasinatian, ug kaayohan nga nagagikan sa atong mga kahimtang.
5.Hinumdomi nga ang Dios nagtahod sa kabubut-on.
Ang pipila sa tubag nga atong giampo mahimong nagkinahanglan kanato sa paggamit og una sa atong kabubut-on ug sa paglihok diha sa hugot nga pagtuo sa dili pa madawat ang tubag. Si Elder David A. Bednar sa Korum sa Napulog Duha ka Apostoles mitudlo nga kon ang mga kabataan sa Israel gikinahanglan nga motabok sa suba Jordan, wala nila makita ang tubig nga nabahin hangtod human sila mitunob ngadto niini (tan-awa sa Josue 3:15–16). Sumala sa iyang gitudlo, “Ang tinuod nga hugot nga pagtuo gitumong diha ug kang Ginoong Jesukristo ug kanunay mosangpot ngadto sa paglihok.”6
Kita andam ba sa paglihok diha sa hugot nga pagtuo nga walay tubag ug mosalig diha sa mga saad ug mga pagtulon-an sa Dios? Kon mao, mahimong makaplagan nato nga ang Langitnong Amahan naghulat sa paghatag kanato og usa ka tubag hangtod “human sa pagsulay sa [atong] hugot nga pagtuo ”(Ether 12:6). Usahay ang lihok nga atong gikinahanglang himoon mahimong dili direkta nga kalabot ngadto sa tinguha nga atong gipaningkamotan apan hinoon ngadto sa usa ka kausaban sa kasingkasing sa pag-andam kanato sa pagdawat sa tubag.
Sama pananglitan, tan-awa ang tahas sa pagpaubos kalabot ngadto sa mga panalangin nga gisaad diha sa Doktrina ug mga Pakigsaad 112:10: “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo.” Kita makahunahuna kon unsaon sa pagpaubos pagtabang kanato sa paggamit sa atong kabubut-on sa pagpangita ug pagdawat sa mga panalangin nga gusto sa Langitnong Amahan nga ihatag kanato.7 Kita makatuon usab sa pulong sa Dios sa pagpangita og ubang mga hiyas nga kita makapalambo sa pagsarang kanato sa pagdawat og pipila ka mga panalangin nga atong gitinguha.
Sa laing paagi, ang pipila sa mga tubag nga atong giampo mahimong nagkinahanglan sa uban sa paggamit sa ilang kabubut-on sa paglihok. Sama pananglitan, mahimo kitang mag-ampo nga usa ka tawo mobalik ngadto sa hingpit nga kalihokan sa Simbahan, mag-usab sa kinaiya, o maghatag kanato og oportunidad nga atong gusto. Diha sa matag sitwasyon, ang kabubut-on sa laing tawo nalakip. Ug tungod kay ang kabubut-on hilabihan sa ka importante ngadto sa Langitnong Amahan––“ang Gubat sa Langit nahitabo tungod sa atong moral nga kabubut-on”8––importante kini nga hinumdoman nga dili Siya mokuha sa kabubut-on sa uban bisan sa pagtubag sa atong mga pag-ampo.
Kon kita ingon og dili makakaplag og mga tubag ngadto sa usa ka pag-ampo nga nag-agad diha sa mga lihok sa uban, kay sa mag-ampo lamang alang sa laing tawo nga mausab, makaampo usab kita aron mahibalo kon unsa ang atong mahimo sa pagdugang og gugma o pailob sa atong mga relasyon, pagbuntog sa atong kaugalingong mga kahuyang (tan-awa sa Mateo 7:3–5), o magpalambo og kahanas sa pagtabang kanato nga makasarang alang sa bag-ong oportunidad.
6. Mahimo nga “takos sa pagdawat og pagpadayag.”9
Kon kita adunay kalisod sa pagdawat og mga tubag sa pag-ampo, kita makasiguro nga kita takos sa kanunay nga pakig-uban sa Espiritu Santo. Si Presidente Nelson mitudlo: “Kon adunay makapahunong kanato gikan sa pag-abli sa pultahan ngadto sa langitnong direksyon, kita kinahanglang maghinulsol. Ang paghinulsol nagtugot kanato nga maablihan ang pultahan aron kita makadungog sa tingog sa Ginoo nga mas kanunay ug sa klaro nga paagi.”10
Kini naglakip sa pagdumala sa atong mga pagbati. Si Elder Scott mitudlo: “Ang makapadasig nga impluwensya sa Balaang Espiritu mabuntog o matabonan sa kusog nga mga emosyon, sama sa kasuko, kasilag, gana, kahadlok, o garbo. Kon kana nga mga impluwensya anaa, sama ra kini sa pagtagamtan sa talandogon nga lami sa usa ka ubas samtang nagkaon og sili nga jalapeño. Ang duha ka lami anaa, apan ang usa hingpit nga mosapaw sa usa. Sa samang paagi, ang kusog nga mga emosyon mosapaw sa talandogon nga mga aghat sa Balaang Espiritu.”11
Pagbasa mahitungod kon sa unsang paagi kita mas hingpit nga makaputli sa atong mga kinabuhi sa pagdawat og direksyon gikan sa Langitnong Amahan diha sa “Molambo ngadto sa Baroganan sa Pagpadayag,” ni Presidente Nelson, ug “Aron Makabaton sa Espirituhanong Giya,” ni Elder Scott.
7. Padayon sa pag-ampo ug hupot ngadto sa hugot nga pagtuo.
Bisan unsay inyong buhaton, ayaw paghunong sa pag-ampo. “Pag-ampo bisan kon wala kamoy tinguha sa pag-ampo,” mitudlo si Elder Scott.12 Gamita kini nga higayon sa pagsiguro, labaw pa kay sa kaniadto, sa inyong espirituhanong pundasyon.
Si Elder Neil L. Andersen sa Korum sa Napulog Duha ka Apostoles mitudlo kon nganong kini importante kaayo: “Kon mag-atubang og pagsulay sa hugot nga pagtuo––bisan unsay inyong buhaton, ayaw pagpalayo sa Simbahan! Ang pagpalayo sa inyong kaugalingon gikan sa gingharian sa Dios kon may pagsulay sa hugot nga pagtuo sama ra sa pagbiya sa luwas nga lawak tagoanan dihang nagkaduol na ang buhawi.”13
Ingon nga gipahinumdom kanato ni Elder James B. Martino sa Kapitoan: “Kon kamo ‘mibati sa pagkanta sa awit sa matubsanon nga gugma, ako mangutana, kamo mibati ba karon sa mao?’ [Alma 5:26]. Kon wala ninyo kini batia karon, inyo kining mabati pag-usab, apan hunahunaa ang tambag ni Nephi [sa 1 Nephi 15:10–11]. Magmasulundon, hinumdomi ang mga panahon sa dihang gibati ninyo ang Espiritu kaniadto, ug pangayo pinaagi sa hugot nga pagtuo. Ang inyong tubag moabot, ug kamo mobati sa gugma ug kalinaw sa Manluluwas. Mahimong dili dayon kini moabot o sa pamaagi nga gitinguha ninyo, apan ang tubag moabot. Ayaw og paghunong! Ayaw gayod paghunong!”14
Si Elder Jeffrey R. Holland sa Korum sa Napulog Duha ka Apostoles mitudlo nga kon ang “mga pag-ampo … maingon og wala matubag ug wala matubag ug wala matubag, … kamo nagkinahanglan og hugot nga pagtuo.” Kana nga hugot nga pagtuo, miingon siya, nagkinahanglan nga mahimong “gamhanang hugot nga pagtuo, hugot nga pagtuo nga nagsuporta kanato dinhi ug karon, dili lamang sa adlaw sa paghukom o sa laing dapit sa celestial nga gingharian.”15