Dali, Sunod Kanako

2 Mga Hari 21–23

Ang mga Kasulatan Makapaduol sa Atong mga Kasingkasing ngadto sa Dios

Si Presidente Spencer W. Kimball miingon nga ang sugilanon ni Hari Josias, nga makita diha sa 2 Mga Hari 21–23, “usa sa pinakanindot nga sugilanon diha sa tanang kasulatan” (diha sa Dali, Sunod Kanako—Alang sa mga Indibidwal ug mga Pamilya: Daang Tugon 2022, 129).

Giunsa ni Hari Josias Pagkaplag sa mga Kasulatan

King Josiah Cleansing the Land of Idols [Hari Josias Naglimpyo sa Yuta sa mga Dios-dios], © Look and Learn / Bridgeman Images

Si Josias nahimong hari sa Juda sa dihang nag-edad pa lamang siya og otso anyos. Napanunod niya ang usa ka gingharian sa katawhan kinsa mituo og mini nga mga dios, apan gusto siya nga mosunod sa Ginoo. Sa ikawalo nga tuig sa iyang pagmando, iyang gimando nga ang mga altar ug mga imahe sa mini nga mga dios tumpagon sa tibuok Juda.

Josiah, King of Judah, Restores the Worship of God in His Kingdom [Josias, Hari sa Juda, Mipahiuli sa Pagsimba sa Dios sa Iyang Gingharian], ginama sa wala mailhi nga artist, litrato pinaagi ni Stefano Bianchetti / Bridgeman Images

Paglabay sa napulo ka tuig, mihangyo siya sa iyang katawhan sa pagpahiuli sa templo didto sa Jerusalem, diin ang halangdong pari nga si Hilkias nakakaplag sa mga kasulatan. Dihang si Hari Josias mibasa sa basahon, nadasig siya sa pagsunod sa mga pagtulun-an niini. Iya dayon nga gipundok ang iyang katawhan ug gibasahan sila sa basahon.

Sa taas nga panahon, ang katawhan nagmagahi sa ilang mga kasingkasing batok sa Dios. Apan ang mga kasulatan nakatabang sa pagpaduol sa mga kasingkasing sa katawhan balik ngadto sa Dios. Si Hari Josias misaad sa katawhan nga maglakaw siya sumala sa pamaagi sa Ginoo ug mosunod sa mga sugo.

Panaghisgotan

Unsa nga mga kasulatan ang nakaimpluwensiya sa imong kinabuhi? Unsa nga mga bersikulo ang puwede nimong basahon karong adlawa aron makadasig nimo?

Daang Tugon nga mga Kasulatan alang sa Piho nga mga Okasyon

Kon ikaw:

• Mobati nga nag-inusara:

  2 Mga Hari 6:16

• Nagkinahanglan og kalig-on:

  Isaias 40:31

• Mibati nga wala higugmaa:

  Mga Salmo 130; Isaias 54:10

• Mibati og kahadlok:

  Mga Salmo 27:1; Isaias 41:10

• Makalimot kon si kinsa ka:

  Genesis 1:26–27

• Ganahan nga mobati nga mas duol sa Manluluwas:

  Isaias 53:3–5

Mga Sugyot alang sa Pagtuon sa Kasulatan

• I-apil ang pag-ampo isip kabahin sa imong pagbasa sa kasulatan. Hangyoa ang Langitnong Amahan sa pagpanalangin kanimo sa Espiritu Santo aron mobati og kalinaw ug inspirasyon.

• Magbasa nga ang tuyo mao ang pagpalig-on sa imong hugot nga pagtuo kang Jesukristo.

• Magbasa nga ang tuyo mao ang paggamit sa mga kasulatan sa imong kaugalingon nga kinabuhi. Pangutan-a ang imong kaugalingon, unsa ang gisulay sa Ginoo pagtudlo kanako niini nga mga kasulatan?

• Paglakip og panahon sa pagpamalandong. Sulayi nga dili dalidalion ang imong pagbasa.

• Pangayo og tabang. Ang pagbasa uban sa kapikas, higala, o kauban sa kwarto mosangpot sa maayo nga paghisgotanay ug makatabang kanimo sa paghinumdom nga magbasa matag adlaw.

Mahimo kang motan-aw og usa ka pasundayag sa kinabuhi ni Hari Josias diha sa usa ka video nga, “Josiah and the Book of the Law [Josias ug ang Basahon sa Balaod],” sa ChurchofJesusChrist.org.