“Usa ka Malumo nga Kaluoy gikan sa Ginoo,” Liahona, Hulyo 2022.
Mga Tingog sa mga Santos sa Ulahing mga Adlaw
Usa ka Malumo nga Kaluoy gikan sa Ginoo
Sulod sa mga katuigan, ako naghunahuna kon ang akong misyonaryo nga mga paghago sa French Riviera nahimo ba nga kawang.
Litrato ni M. Gary Hadfield ug ang iyang asawa sa maayong kabubut-on sa tagsulat
Isip usa ka batan-ong lalaki, miserbisyo ako og 30 ka bulan nga misyon didto sa France gikan sa 1955 hangtod sa 1958. Atol sa kataposan nga walo ka bulan sa akong misyon, gitawag ko sa pagserbisyo isip presidente sa branch didto sa Cannes. Ang Cannes Branch gamay, nga adunay mas diyutay pa sa 10 ka aktibong mga miyembro.
Ang among presidente sa misyon mipahibalo kanamo nga siya nagplano sa pagsira sa branch sa dili madugay kon kami walay mga bunyag. Milagro kaayo nga, tulo ka tigulang nga mga babaye ang mihangyo nga magpabunyag. Human sa ilang bunyag, usa kanila mibalhin ngadto sa Dijon, diin walay branch sa Simbahan, ug ang laing duha nanglimbasog sa pagpabilin nga aktibo sa Simbahan. Bisan pa man, kining bag-ong mga miyembro sa Simbahan mitabang kanamo nga magpabilin nga bukas ang branch.
Hunahunaa ang akong kasurprisa sa dihang mibalik ko ngadto sa Cannes niadtong mga tuig 1990 uban sa akong asawa, si Kathleen, sa pagkakita og usa ka bag-ong chapel didto sa Le Cannet, usa ka pinili nga kasilinganan nga nag-umbaw diin malantaw ra ang Cannes. Daghan kaayo ang nanambong nga sa dili madugay bahinon na kini nga ward. Sa dihang ang kongregasyon nakadungog sa mapaubsanong istorya sa akong panahon didto sa Cannes, gialirongan kami sa tulo ka apohan nga mga babaye kinsa mipasakop sa Simbahan niadtong mga 1960.
“Kon ang Cannes Branch wala pa nagpabilin nga abli,” sila misulti kanamo, “dili unta gayod kami makahibalo mahitungod sa Pagpahiuli sa Simbahan ni Kristo! Karon kaming tanan aduna nay mga apo nga mga lalaki nga nagserbisyo sa natad sa misyon.”
Samtang kami nag-uban nga naglipay sa malipayong resulta sa pagpabilin sa branch nga bukas, usa ka inila nga lalaki miapil kanamo kinsa nakadungog sa among panag-istoryahanay.
“Ako si Brother Paya, ug ako usab mipasakop sa Simbahan sa Cannes niadtong mga 1960,” miingon siya. “Ako usa ka kanhi bishop dinhi, presidente sa Nice Stake, ug usa ka presidente sa misyon sa Spain.”
Unya, si Brother Paya nahimong presidente sa Madrid Spain Temple ug usa ka Area Seventy. Kaming tanan naghilak sa kalipay sa pagkadungog sa ilang mga istorya.
Pagkalumo sa kaluoy sa Ginoo alang kanako nga makahibalo nga ang among misyonaryo nga buhat didto sa French Riviera wala nakawang, sama sa akong gituohan sa daghang katuigan. Ang Ginoo maampingon nga nagdumala sa among mga paghago ug mipanalangin kanila sa kalamposan, bisan og kami wala makakita sa umaabot nga sangpotanan sama sa Iyang nakita.