“Mga Ordinansa sa Templo: Pagpangandam sa Pagbalik ngadto sa Presensiya sa Dios,” Liahona, Hulyo 2022.
Mga Ordinansa sa Templo Pagpangandam sa Pagbalik ngadto sa Presensiya sa Dios
Dapiton ko kamo nga magmakugihon sa pagkat-on ug paghatag og bili sa mahangtoron nga kamahinungdanon sa mga pakigsaad sa templo, mga ordinansa sa templo, ug pagsimba sa templo samtang kamo maningkamot sa pagduol ngadto sa Manluluwas.
Litrato sa open house sa Mesa Arizona Temple ni Leslie Nilsson
Ang buhat sa Dios ug Iyang himaya mao ang “pagpahinabo sa pagka-imortal ug sa kinabuhi nga dayon sa tawo” (Moises 1:39)—sa pag-andam kanato sa pagpuyo “diha sa mas taas ug mas balaan nga paagi”1 aron kita makabalik ngadto sa Iyang presensiya.
Diha sa Iyang walay kinutoban ug mahangtoron nga kaluoy, ang Ginoo, pinaagi sa Iyang mga propeta ug apostoles, nagpadayon sa pagdapit sa Iyang mga anak nga lalaki ug sa Iyang mga anak nga babaye aron maandam alang sa Iyang pag-anhi ug mamahimong usa ka mga tawo sa Zion—andam nga ibayaw aron sa pagsugat Kaniya (tan-awa sa Alma 12:24; 34:32; Doktrina ug mga Pakigsaad 45:45; 65:5; 88:96–97). Ug sa kanunay ang sentro niana nga pagpangandam nahimong pagtulun-an sa doktrina ni Jesukristo, sa pagpakita og hugot nga pagtuo diha Kaniya, sa paghinulsol, sa pagdawat og sagrado nga mga pakigsaad ug mga ordinansa.
Mga ehemplo diha sa Daang Tugon bahin sa imbitasyon sa Dios ngadto sa Iyang mga anak aron maandam sa pagpuyo sa mas taas nga balaod ug sa pagdawat sa mga pakigsaad ug mga ordinansa sa kaluwasan mao ang mga panudlo alang kanato karon.
Diha sa Exodo, ang Dios miawhag sa Israel sa pagkahimong “usa ka lahi nga bahandi” ug sa pagbalaan sa ilang kaugalingon agig pagpangandam sa pagsugat Kaniya (tan-awa sa Exodo 19:4–6, 10–11, 17). Si Jehova mihatag sa Israel sa “papan nga bato, ug ang kasugoan, ug ang tulomanon” (Exodo 24:12), ug sila nakigsaad sa Dios, nga nag-ingon, “Ang tanan nga giingon [sa Ginoo] among pagabuhaton” (Exodo 19:8; tan-awa usab sa 24:3). Ang Ginoo misaad nga kon sila magmasulundon ngadto sa iyang mga pakigsaad, Siya mopuyo uban kanila (tan-awa sa Exodo 29:45–46). Hinoon, sa dihang ang Israel nakasaksi “sa himaya [sa Ginoo]” (Exodo 24:16) diha sa Bukid sa Sinai, sila nahadlok, mipalayo, ug sa kadugayan misupak batok sa Dios (tan-awa sa Exodo 20:18–21; 32:1–6).
Ang ikaduha nga ehemplo diha sa Daang Tugon ang kabahin ni Hari Solomon sa pagtukod og usa ka balay sa Ginoo (tan-awa sa 1 Mga Hari 6:11–13). Ang arca sa tugon [sa Ginoo] ngadto sa dapit niana ngadto sa labing sulod nga bahin sa balay “sa labing balaang dapit” (1 Mga Hari 8:6), ug “ang balay sa Ginoo … napuno sa himaya [sa Ginoo]” (1 Mga Hari 8:11). Si Solomon mitanyag og usa ka pahinungod nga pag-ampo ug mihangyo alang sa temporal ug espirituwal nga mga panalangin nga mahatag ngadto sa mahinulsolon ug mainampoon nga Israel. Ang Ginoo nakadungog sa ilang mga pag-ampo sa pangaliya ug misaad sa Israel og talagsaong mga panalangin kon sila magmasulundon. Bisan pa man, ang Israel mibiya sa Ginoo ug misimba sa mini nga mga dios. (Tan-awa sa 1 Mga Hari 9–11.)
Ang uban nga mga propeta diha sa Daang Tugon makugihon nga nagtinguha sa pagtudlo ug pagbalaan sa Israel aron nga “unta sila makakita sa nawong sa Dios; apan sila nagpatig-a sa ilang mga kasingkasing ug dili makalahutay sa iyang atubangan” (Doktrina ug mga Pakigsaad 84:23–24).
Gibalik-balik, ang mga anak sa Israel dili matuohon, nahadlok, ug dili andam nga mag-usab; nagtinguha sa mas sayon nga dalan; ug ang ilang mga kasingkasing anaa sa kalibotanon nga mga butang; o andam sa pagsupak batok sa Ginoo ug sa Iyang mga propeta. Matag higayon ang Israel mopahilayo gikan sa Dios ug mobiya sa ilang mga pakigsaad ug mga ordinansa, ang “kasuko [sa Ginoo] nagdilaab batok kanila” (Doktrina ug mga Pakigsaad 84:24), ug sila dili makadawat sa kahingpitan sa Iyang himaya.
Ang Balaan nga Katuyoan sa Pagpundok
Ang mga paningkamot sa Ginoo sa pagpundok sa Iyang katawhan ug sa pagpanalangin kanila pinaagi sa mga pakigsaad sa templo ug sa mga ordinansa usab subli nga gisaysay diha sa Bag-ong Tugon ug sa Basahon ni Mormon. Ang Manluluwas nagbangotan, “Pagkadaghang higayon nga buot nakong tigumon ang tanan mong mga anak sama sa usa ka himungaan nga nagtigom sa iyang mga piso ilalom sa iyang mga pako apan nagdumili ka” (Mateo 23:37; tan-awa usab sa 3 Nephi 10:4–6).
Si Propeta Joseph Smith mipasabot: “Unsa ang katuyoan sa pagpundok sa … katawhan sa Dios sa bisan unsa nga panahon sa kalib[o]tan? … Ang unang katuyoan mao ang pagtukod ngadto sa Ginoo og usa ka balay diin Siya mopadayag ngadto sa Iyang katawhan sa mga ordinansa sa Iyang balay ug sa himaya sa Iyang gingharian, ug sa pagtudlo sa katawhan sa paagi sa kaluwasan … nga sila unta motambong sa mga ordinansa sa bunyag alang sa patay ingon man sa ubang mga ordinansa sa priesthood [pagkapari], ug makadawat og mga pagpadayag gikan sa langit, ug mahingpit sa mga butang sa gingharian sa Dios—apan sila nagadumili.”2
Ang Ginoo nagtinguha sa pagpundok sa Iyang mga anak niining dispensasyon ug mipadayag sa “mga butang nga gitago gikan sa wala pa ang katukuran sa kalib[o]tan, … sa tanan nga mga butang kalab[o]t niini nga balay, ug sa pagkapari niini” (Doktrina ug mga Pakigsaad 124:41–42). Siya nag-awhag kanatong tanan sa pagpangandam sa pagbalik ngadto sa Iyang presensiya—nga nahimong posible gumikan sa Iyang sakripisyo sa pag-ula: “Tan-awa, kini ang akong kabubut-on, nga silang tanan kinsa motawag sa akong ngalan, ug mosimba kanako sumala sa akong walay katap[o]san nga ebanghelyo, kinahanglan nga magpundok, ug mobar[o]g diha sa balaan nga mga dapit” (Doktrina ug mga Pakigsaad 101:22).
Ngano nga ang mga Ordinansa sa Tempo Hilabihan Kaimportante?
Ang mga templo mao ang pinakabalaan sa tanang dapit sa pagsimba. Ang tanang butang nga nakat-onan ug ang tanan nga nabuhat diha sa mga templo sa ulahing mga adlaw naghatag og gibug-aton sa dakong plano sa Langitnong Amahan bahin sa kalipay, sa kabalaan ni Jesukristo, ug sa Iyang papil isip atong Manluluwas. Ang mga pakigsaad nga nadawat ug ang mga ordinansa nga gipahigayon diha sa mga templo mahinungdanon sa pagbalaan sa atong mga kasingkasing ug alang sa kinatas-ang paghimaya sa mga anak sa Dios.
“Ug kining labaw nga pagkapari nangalagad sa ebanghelyo ug naghupot sa yawe sa mga misteryo sa gingharian, gani ang yawe sa kahibalo sa Dios.
“Busa, diha sa mga ordinansa niana, ang gah[o]m sa pagka-diosnon gipakita.
“Ug kon walay mga ordinansa niana, ang pagtugot sa pagkapari, ang gah[o]m sa pagka-diosnon dili mapakita ngadto sa mga tawo diha sa unod” (Doktrina ug mga Pakigsaad 84:19–21).
Ang sagradong mga ordinansa nga takos nga gidawat ug kanunayng gihinumduman moabli sa langitnong mga agianan diin ang gahom sa pagkadiosnon modagayday sa atong kinabuhi. Pinaagi sa pagdawat og mga ordinansa sa pagkapari ug sa paghimo ug pagtuman sa sagradong mga pakigsaad, kita giyugohan ug uban sa Manluluwas (tan-awa sa Mateo 11:28–30)3 ug mahimong mapanalanginan uban sa kalig-on nga labaw pa sa atong kaugalingon sa pagbuntog sa mga tintasyon ug mga hagit sa mortalidad samtang kita mangandam sa pagbalik ngadto sa presensiya sa Dios.
Ang mga Panalangin sa mga Pakigsaad sa Templo ug mga Ordinansa
Detalye gikan sa Christ and the Young Child [Kristo ug ang Bata], ni Carl Heinrich Bloch
Duha sa importanting panalangin nga nadawat gikan sa mga pakigsaad ug mga ordinansa sa templo mao ang nagkadakong kalipay ug gahom.
Ang Manunubos mao ang kataposan ug bugtong tinubdan sa malungtaron nga kalipay. Ang tinuod nga kalipay nagagikan sa pagpakita og hugot nga pagtuo diha ni Ginoong Jesukristo, sa takos sa pagdawat ug sa matinud-anong pagtahod sa sagradong mga ordinansa ug mga pakigsaad, ug maningkamot aron makabig pag-ayo ngadto sa Manluluwas ug sa Iyang mga katuyoan.
Si Alma nagtudlo sa iyang anak nga lalaki nga ang mas dakong kabalaan ug kalipay sa atong mga kinabuhi nahimong posible samtang kita gilimpyohan ug gibalaan pinaagi sa Pag-ula ni Jesukristo. Pinaagi lamang sa pagbaton og hugot nga pagtuo sa atong Manunubos, sa paghinulsol, ug pagtuman sa mga pakigsaad nga kita makadawat sa malungtaron nga kalipay nga gitinguha natong tanan nga masinati ug mapabilin.4
Palihog timan-i ang saad sa kalipay gikan ni Presidente Russell M Nelson, “Among gidapit ang tanang anak sa Dios sa duha ka habig sa tabil sa pagduol ngadto sa ilang Manluluwas, dawata ang mga panalangin sa balaan nga templo, pagbaton og molahutay nga kalipay, ug mahimong angayan sa kinabuhing dayon.”5
Sa atong panahon samtang ang mga gahom sa kangitngit mopatigbabaw “ug mohulga sa kalinaw,”6 ang mopanalipod nga gahom magamit sa matag usa kanato diha ug pinaagi sa mga pakigsaad ug mga ordinansa sa templo (tan-awa sa Doktrina ug mga Pakigsaad 38:32; 43:16; 76:39–42; 105:11–12, 33; 138:12–15). Nakita ni Nephi diha sa panan-awon ug “nakakita sa gah[o]m sa Kordero sa Dios, nga kini mikunsad … diha sa mga katawhan sa pakigsaad sa Ginoo, … ug sila gisangkapan sa katar[o]ng ug uban sa gah[o]m sa Dios sa dako nga himaya” (1 Nephi 14:14).
Diha sa pagpahinungod nga pag-ampo sa Templo, ang Propeta Joseph Smith nangayo sa Amahan “nga ang imong mga sulugoon makasulod unta niini nga balay sinangkapan uban sa imong gah[o]m” ug “walay pundok sa mga da[o]tan nga adunay gahom nga mabant[o]gan … mobuntog sa imong mga katawhan ngadto kang kinsa ang imong ngalan maila dinhi niini nga balay” (Doktrina ug mga Pakigsaad 109:22, 26).
Usa ka Mahimayaong Kahayag—Kirtland Temple, ni Glen S. Hopkinson, dili mahimong kopyahan
Ang matag usa kanato kinahanglan maningkamot sa pagkat-on ug mas masabtan ang makapanalipod nga gahom sa mga pakigsaad ug mga ordinansa nga anaa diha sa balay sa Ginoo—aron nga kita isip mga disipulo mahimong “mobarog diha sa balaan nga mga dapit, ug … dili mabalhin” (Doktina ug mga Pakigsaad 45:32) ug “ makasukol kamo sa inyong kaaway sa walay pagsibog o pag-undang hangtod sa kataposan” (Mga Taga-Efeso 6:13).
Imbitasyon ug Pagpamatuod
Ako modapit kaninyo nga magmakugihon sa pagkat-on ug mohatag og bili sa mahangtoron nga kamahinungdanon sa mga pakigsaad sa templo, mga ordinansa sa templo, ug sa pagsimba sa templo samtang kamo maningkamot sa pagduol ngadto sa Manluluwas ug modawat sa mga panalangin nga gihimong posible pinaagi sa Iyang Pag-ula. Ug ako malipayon nga mopamatuod nga ang Dios nga Amahan ug ang Iyang Anak, si Jesukristo, buhi ug ang Ilang kinadak-ang tinguha mao nga kita makabalik ngadto sa Ilang presensiya ug moambit sa Ilang himaya (tan-awa sa Doktrina ug mga Pakigsaad 97:16; 101:38).