“Pangserbisyo nga mga Misyonaryo: Pagtukod sa Gingharian pinaagi sa Serbisyo ug Gugma,” Liahona, Hulyo 2022.
Mga Young Adult
Pangserbisyo nga mga Misyonaryo: Pagtukod sa Gingharian pinaagi sa Serbisyo ug Gugma
Naghunahuna ko nga ang pagserbisyo og usa ka pangserbisyo nga misyon nagpasabot nga dili “igo ang akong pagkamaayo.”
Dihang ang akong presidente sa stake unang mihangyo nako kon andam ba ko nga moserbisyo og pangserbisyo nga misyon, ang akong unang hunahuna, “Oo!”
Misalig ko nga ang Ginoo adunay bulohaton nga akong buhaton, ug mituo ko nga bisan unsa ang Iyang gusto nga akong buhaton makahatag kanako og kalamboan ug kalipay kay Iya kong gihigugma ug ganahan unsay labing maayo para nako.
Ang akong ikaduhang hunahuna mao ang, “Unsa ang pangserbisyo nga misyon?”
Ang akong presidente sa stake mipasabot kon unsa ang pangserbisyo nga misyon samtang nagkita kami sa iyang opisina niadto nga Dominggo, apan wala gyod ko makasabot niadto o sa kaimportante niadto hangtod sa kadugayan. Niadtong panahona nakapangutana gani ko kon kini nga calling nagpasabot ba nga dunay problema nako, tungod kay wala pa nako makita ang mas dako nga katuyoan nga nagpaluyo sa pangserbisyo nga mga misyon.
Gikinahanglan ba Ko?
Akong nadawat ang tawag sa pagserbisyo mga usa ka bulan sa wala pa mismo magsugod ang akong misyon. Kini nagpasabot nga ako nakahimamat sa akong mga lider sa misyon, nakatambong og komperensiya sa pangserbisyo nga misyon sa akong area, ug gihangyo pa gani sa pagpangulo sa magkompanyon nga pagtuon alang sa laing duha ka mga sister sa akong area sa wala pa ako ma set apart.
Akong gigamit ang bulan tali sa pagkadawat sa akong tawag ug sa paghatag sa akong “panamilit” nga pakigpulong (bisan kon wala ko mipalayo) aron makat-on mahitungod sa pangserbisyo nga mga misyon ug sa mga pangserbisyo nga mga misyonaryo sa akong palibot.
Didto sa komperensiya sa pangserbisyo nga misyon nga akong gitambongan, nahibaloan nako nga daghang pangserbisyo nga mga misyonaryo, dihang una silang gitawag, mibati nga dili igo ang ilang pagkamaayo aron makaserbisyo og pagsangyaw [proselyting] nga misyon. Medyo naulaw ko sa paghinumdom sa akong unang reaksiyon sa akong tawag.
Sa kataposan, nakaamgo ko nga wala ko tawaga sa pangserbisyo nga misyon tungod kay dili ko sarang, apan tungod kay mao kadto ang direksiyon sa Langitnong Amahan para nako. Dili usab ako “mas ubos” kay sa tigsangyaw nga mga misyonaryo; hinuon, Siya nagkinahanglan nako nga motabang sa pagtukod sa Iyang gingharian pinaagi sa laing mga pamaagi sa serbisyo. Nakadawat ko og lig-on nga pagpamatuod nga ang tanang misyon importante ngadto sa Langitnong Amahan ug importante sa Iyang buhat, tungod kay ang tanang mga misyonaryo nagtinguha sa pagserbisyo Kaniya ug pagserbisyo sa Iyang mga anak.
Human makahibalo mahitungod sa ubang pangserbisyo nga mga misyonaryo sa akong area, nakigmiting nila, ug nakadungog sa ilang mga istorya, nakahibalo ko nga sila mga maayo kaayo, matarong nga mga sulugoon sa Ginoo. Nasayod ko nga bisan tuod ang uban kanamo mibati og gamay nga kaluoy sa among kaugalingon sa pagsugod sa among mga misyon, kaming tanan miabot sa sama nga konklusyon: ang Ginoo naghigugma sa pangserbisyo nga mga misyonaryo ug nga kami anaa gayod sa dapit nga gusto Niya nga anaa kami, nagkat-on ug naglambo samtang nagserbisyo Kaniya isip Iyang mga kamot dinhi sa kalibotan.
Unsaon sa Pangserbisyo nga mga Misyonaryo Pagtukod sa Zion
Ang mga misyonaryo importante kaayo sa matag kapasidad diin sila nagserbisyo. Nagkinahanglan kita og mga misyonaryo kinsa mobiya sa ilang mga pamilya ug sa ilang mga panimalay kutob sa duha ka tuig aron magtudlo ug magsangyaw sa ebanghelyo sa tibuok kalibotan. Apan kinahanglan usab kita nga motukod og Zion nga mga komunidad nga puno sa gugma alang sa uban ug usa ka tinguha sa pagserbisyo ug pagbayaw sa labing ubos taliwala kanila. Mao kini ang buhaton sa pangserbisyo nga mga misyonaryo. Magtukod kita og Zion pinaagi sa pagmugna og kultura sa gugma ug serbisyo. Kini makamugna og maabiabihon, matarong, ug makabayaw nga komunidad alang sa tanang mga miyembro sa Ang Simbahan ni Jesukristo sa mga Santos sa Ulahing mga Adlaw—tibuok kinabuhi nga mga miyembro, bag-ong mga kinabig, tanan.
Ang akong pangserbisyo nga misyon sa magasin sa Simbahan nakatabang nako nga makakita kon unsa ka tinuod nga ako bulahan. Akong nagamit ang akong nakat-onan kabahin sa akong mga pagsulay sa tibuok nakong kinabuhi aron makatabang sa pagdasig sa ubang nanglimbasog. Akong gisulayan sa pagpaambit ang akong mga kasinatian ngadto sa uban ug sa pagbuhat niana nakadasig sa uban sa pagpaambit sa ilang mga istorya. Ang tanang mga anak sa Dios importante. Ang akong pangserbisyo nga misyon nakatabang nako sa pagtabang nila nga makaangkon og mas daghang grasya ug nakahatag nako og katakos sa paghigugma nila kon si kinsa sila samtang kami naningkamot sa pagtinabangay sa pagduol ngadto kang Kristo.
Ang pangserbisyo nga mga misyonaryo naggahin sa ilang oras ug kusog sa pagmugna og Zion sa daghang lainlain apan mapuslanon nga mga paagi. Ang uban motabang sa pisikal nga serbisyo sa mga dapit sama sa Welfare Square o lokal nga mga pundohanan sa igtatabang nga mga pagkaon. Adunay ubang pangserbisyo nga mga misyonaryo kinsa tigpaanindot sa mga hawanan sa templo ug kinsa nagserbisyo isip mga mangalagad sa ordinansa sulod sa templo. Ang uban nagtabang sa pag-apod-apod og pagkaon sa mga bata nga walay pagkaon inig pamuhi sa eskwelahan ug nagserbisyo nila pinaagi sa pagdasig kanila. Ang uban nagtabang sa pagsangyaw sa ebanghelyo ug naglig-on sa mga miyembro kinsa aduna na niini. Duna gani mga misyonaryo kinsa nagtabang sa pagmintinar sa lainlaing matang sa sakyanan nga gigamit sa mga trabahante sa Simbahan.
Ang pangserbisyo nga mga misyonaryo nagserbisyo usab sa ubang mga paagi sama sa paghimo og karatola [signs] sa mga bishop sa mga gambalay sa Simbahan, nagtabang sa estudyo sa Simbahan sa paghimo og salida, ug naglimpyo sa daghan, daghang mga butang aron magpabiling luwas ang tanan taliwala sa COVID-19. Bisan unsa man ang among nagkalainlaing gisangon nga mga buluhaton, kami nagtabang sa pagtukod sa Zion pinaagi sa pag-ugmad og usa ka dapit nga adunay gugma ug dili hinakog nga serbisyo.
Kaming tanang mga misyonaryo nag-apil sa inadlaw nga pagtuon sa kasulatan, nagtudlo og mga leksiyon, nag-apil sa mga leksiyon ug mga konseho sa distrito, ug naglig-on ug nagbayaw sa usag usa ug sa tanan sa among palibot, bisan kon kini kabahin o dili kabahin sa among pormal nga gisangon nga mga buluhaton.
Usa sa labing importante nga mga butang nga akong gihimo gamay ra og kalabotan sa akong opisyal nga tahas uban sa team nga nagtrabaho sa mga sulod [content] sa mga magasin sa Simbahan alang sa young adult ug mas may kalabotan sa pagserbisyo sa ubang mga misyonaryo sa akong grupo sa Temple Square campus. Ako nagserbisyo pinaagi sa pagsiguro nga mobati sila nga nakita ug gipaminaw ug nga sila nasayod nga ako naghunahuna kanila ug nga sila nahisakop.
Dili ba mao man kana ang buhaton sa tanang misyonaryo? Dili ba ang tanang mga misyonaryo naghatag man og dugang kasigurohan sa tanang tawo sa tibuok kalibotan nga dinhi, sa gingharian sa Dios, adunay importante ug indibidwal nga lugar alang sa Iyang mga anak? Ang tigsangyaw nga mga misyonaryo nagtabang sa pagtudlo sa kalibotan nga ang gingharian sa Dios ania sa yuta, ug ang pangserbisyo nga mga misyonaryo nagtabang sa uban aron makakita kon unsa gayod ang hitsora niana nga gingharian samtang kita mangandam alang sa Ikaduhang Pag-anhi sa Manluluwas—usa ka dapit diin ang atong mga kasingkasing napaduol ngadto sa uban, diin kita nagserbisyo sa walay pagduhaduha, ug diin kita nagtabang sa uban nga masayod kon asa sila nahisakop.
Pagserbisyo sama sa Pamaagi sa Manluluwas—pinaagi sa Pagtabang sa Usa ka Tawo
Bisan sa unsang paagi kami nagserbisyo ug bisan asa kami nagserbisyo, adunay usa ka butang nga gibuhat sa tanang mga misyonaryo—nagserbisyo sama sa gibuhat ni Jesukristo, pinaagi sa pagpangalagad ngadto sa tawo.
Labaw pa kay sa pagtuman sa among indibidwal nga mga tahas, “ang a[m]ong katuyoan mao ang pagtabang sa uban nga moduol ngadto ni Kristo pinaagi sa pagserbisyo kanila nga sama sa gibuhat sa Manluluwas. Kami boluntaryo nga nagserbisyo diha sa matinabangon nga mga organisasyon, mga kalihokan sa Simbahan, ug sulod sa komunidad. Kami mangalagad sa Iyang ngalan ngadto sa tawo, sama sa Iyang gibuhat, nagpahayag sa Iyang mahigugmaong kamabination.”1
Kaming pangserbisyo nga mga misyonaryo naghatag og bili sa mga pulong diha sa among katuyoan tungod kay kami nasayod nga ang Manluluwas nangalagad kanato isip mga indibidwal ug kami mibati sa Iyang mahigugmaong kamabination. Nabati nako ang mahigugmaong kamabination sa Manluluwas sa akong misyon samtang mas nailhan nako Siya, samtang ang akong mga pagsulay nahimong magaan, samtang ang akong pagpamatuod nalig-on, ug samtang ang mga misyonaryo sa akong palibot naghigugma ug nagdasig nako.
Ang pangserbisyo nga mga misyonaryo nagtinguha sa pagpaambit sa mahigugmaong kamabination ni Kristo ngadto sa tanan nga anaa sa ilang palibot, ug among ihalad ang among mga kinabuhi sa pagbuhat mismo niana sa tibuok nga panahon sa among mga misyon—ug sa nahibiling panahon sa among kinabuhi.