“Mga Templo: Usa ka Perlas nga Labing Bililhon,” Liahona, Hulyo 2022.
Welcome Niini nga Isyu
Mga Templo: Usa ka Perlas nga Labing Bililhon
Litrato sa Brigham City Utah Temple
Pagkaanindot nga panalangin nga makakita nga nagkadaghan ang gitukod nga mga templo sa tibuok kalibotan (tan-awa sa pahina 12). Nagmaya kami uban sa mga miyembro sa Simbahan samtang gipahinungod ang bag-o nga mga templo sa ilang mga dapit.
Nanghinaot kami nga mahalon sa tanang tawo ang templo ug dili maimpluwensiyahan sa sayop nga gihulagway ni Presidente Boyd K. Packer (1924–2015), Presidente sa Korum sa Napulog Duha ka Apostoles. Sa iyang sambingay sa perlas ug sa kahon, iyang gisugilon nga ang usa ka artesano [craftsman] mihimo og matahom nga kahon aron sa pagpakita sa usa ka perlas nga labing bililhon. Apan sa dihang miabot ang mga tawo aron motan-aw sa perlas, ang kahon hinuon ang ilang gidayeg. (Tan-awa sa “The Cloven Tongues of Fire,” Liahona, Hulyo 2000, 7.)
Siyempre, ang perlas nga labing bililhon sulod sa templo naglakip sa mga ordinansa, mga pakigsaad, ug sa gisaad nga mga panalangin nga atong madawat lamang diha sa templo. Si Elder David A. Bednar sa Korum sa Napulog Duha ka Apostoles nagtudlo dinhi niini nga isyu: “Ang tanang butang nga nakat-onan ug ang tanan nga nabuhat diha sa mga templo sa ulahing mga adlaw naghatag og gibug-aton sa dakong plano sa Langitnong Amahan bahin sa kalipay, sa kabalaan ni Jesukristo, ug sa Iyang papil isip atong Manluluwas. Ang mga pakigsaad nga nadawat ug ang mga ordinansa nga gipahigayon diha sa mga templo mahinungdanon sa pagbalaan sa atong mga kasingkasing ug alang sa kinatas-ang paghimaya sa mga anak sa Dios” (pahina 6).
Samtang inyong basahon ang artikulo ni Elder Bednar ug ang mga pagpamatuod sa mga miyembro nga nagsunod niini (pahina 8), kami modapit kaninyo sa paghinumdom sa mga pakigsaad nga inyong gihimo diha sa templo. Kon taodtaod na sukad mitambong kamo sa templo, kami modapit kaninyo sa pagbalik ug mobati pag-usab sa kalipay ug kalinaw nga makaplagan diha sa balay sa Ginoo. Kon kamo wala pa makaadto sa templo, kami modapit kaninyo sa pag-andam sa inyong kaugalingon nga “pagatugahan uban sa gah[o]m nga gikan sa kahitas-an” (Doktrina ug mga Pakigsaad 38:32).
Elder Kevin R. Duncan
Sa Seventy
Executive Director sa Temple Department