Digital Lamang: Mga Young Adult
Ang Pagkat-on sa Pinulongan sa Akong mga Katigulangan Makatabang ba Kanako sa Pagpundok sa Israel?
Akong gibati ang pag-aghat nga magkat-on sa pinulongan sa akong mga katigulangan aron mas mamaayo ang pagkakonektar ngadto kanila. Apan ako wala makaamgo sa daghang mga oportunidad nga dad-on niini.
Litrato nga giposingan sa modelo
Ulohan
Ang akong apohan sa tuhod [great-grandfather] mao ang kataposang lumad sa akong pamilya nga nagsulti og te reo Māori. Naanad akong motan-aw og mga video kaniya ug maminaw kaniya nga nagsulti sa pinulongan sa among katawhan, nanghinaot nga ako makasabot kaniya. Bisan tuod og siya pipila lamang ka henerasyon ka magulang kay kanako, wala ako niana nga koneksyon ngadto sa among kabilin.
Miserbisyo ako og misyon sa Pilipinas, ug nagustohan ko kini. Nagustohan ko ang pinulongan, ang mga tawo––tanan. Ug tungod kay ako migahin og panahon sa pagpaninguha nga makakonektar ngadto sa mga tawo nga akong giserbisyohan ug gitudloan, ako nahimong natuhop sa ilang kultura.
Ingon kanindot kana nga oportunidad kaniadto, akong naamgohan nga ako wala gayod maninguha sa pagkonektar ngadto sa akong kaugalingong kultura ug katawhan sa samang paagi. Bisan tuod ako mitabang sa pagpundok sa Israel sa akong misyon, akong naamgohan nga dihay importanting mga paagi alang kanako sa pagtabang og pundok sa Israel sa panimalay usab, ilabi na sulod sa akong kaugalingong pamilya.
Usa ka Māori nako nga higala kinsa usab bag-ohay nga mipauli gikan sa pagserbisyo og misyon sa Pilipinas misulti kanako kabahin sa usa niya ka damgo mahitungod sa iyang apohan nga babaye. Mipakita siya sa iyang damgo ug nangutana kaniya kon nganong siya nagtuon og ubang mga kultura apan wala gayod sa iyang kaugalingon nga kultura.
Ang iyang damgo milanog ngari kanako. Akong gibati nga naaghat sa pagkat-on mahitungod sa akong mga katigulangan ug sa pagkonektar ngadto kanila sama nga wala pa gayod nako mabuhat sukad kaniadto.
Pagsabot sa Saad ni Elias [Elijah]
Mao pa lamang ang akong pagsulod sa medikal nga eskwelahan sa dihang mihukom ako sa pagkat-on sa pinulongan sa akong katawhan. Busa dugang sa akong nagkapuliki nga eskedyul, mikuha ako og panggabii nga klase sa pagkat-on og Māori.
Sa unang pagsugod sa klase, gibati ko ang pag-inusara ug sa walay kasigurohan mahitungod sa pagpadayon. Apan sa sige nako og pakig-istorya sa akong mga kauban sa klase, mas misamot ang akong pagkaamgo nga daghan usab ang mibati nga naaghat sa pagkonektar ngadto sa ilang kabilin pinaagi sa pagkat-on og Māori.
Sa wala madugay, ang pagkat-on og Māori sa tinuod mora og sama sa usa ka espirituhanong kasinatian. Misugod ako sa pagsabot sa saad ni Elias nga “pabalikon ang kasingkasing sa mga amahan ngadto sa mga bata, ug ang kasingkasing sa mga bata ngadto sa ilang mga amahan” (Malaquias 4:6). Ang akong mga katigulangan mas nahimong nagkatinuod ngari kanako.
Ang pagkat-on og pinulongan miabli usab og mga pultahan sa akong inadlaw nga kinabuhi. Akong nakita nga ang pagsulti og Māori mas mitabang kanako og maayo sa pagkonektar ngadto sa mga tawo alang kang kinsa ako naghatag og medikal nga pag-amuma. Mitabang ako sa pagtukod og mga klase sa Māori diha sa akong unibersidad ug nadiskobrehan nga daghang uban nga medikal nga mga estudyante interesado usab sa pagkat-on sa pagtabang kanila sa paghatag og mas maayong pag-amuma.
Bisan tuod og ang pinulongan nahimong nag-anam og ka dili komon, ang pagka-makasulti ngadto niadtong kinsa mga lumad nga nagsulti og Māori nakatabang kanako sa pagpangalagad ngadto sa piho nga mga lumulupyo. Akong nasaksihan kon giunsa sa akong lumad nga mga pasyente sa pagbati nga labing nadunggan ug nakit-an kon kami magkauban sa pagsulti sa ilang pinulongan. Kini nga mga kasinatian nagpakita gayod kanako kon unsa ang kahulogan sa pagpangalagad ngadto sa usa ka tawo.
Kita Makatabang sa Usag Usa sa Pagpundok sa Israel
Si Presidente Russell M. Nelson mitudlo: “Kon maghisgot kita sa pagpundok sa Israel sa duha ka habig sa tabil, naghisgot kita, siyempre, sa buhat sa misyonaryo, templo, ug family history. Naghisgot usab kita sa paglig-on sa pagtuo ug pagpamatuod diha sa mga kasingkasing niadtong kauban nato sa pagpuyo, pagtrabaho, ug pagserbisyo.”1 Ang pagkat-on og Māori sa siguro mitabang kanako sa pagkonektar ngadto sa akong kabilin ug mga katigulangan sa laing habig sa tabil, ug ako nagplano sa pagtrabaho alang kanila sa higayon nga ang Hamilton New Zealand Temple moabli pag-usab. Apan kini mitabang kanako sa pagserbisyo dinhi nga habig usab.
Ang pagkahimong kabahin sa simbahan nga nagtuo sa pagkonektar ngadto sa atong mga katigulangan nagdugang og ingong hingpit nga kalipay sa akong kinabuhi. Atong iprayoridad ang templo ug family history nga buhat tungod kay kita nagtuo nga ang matag miyembro sa atong pamilya, walay pagsapayan unsa ka dugay sila nabuhi, kinahanglan adunay oportunidad sa pagdawat sa ebanghelyo ni Jesukristo. Ug kita makatabang sa usag usa sa pagtuman nini nga buhat.
Ang pagkat-on og Māori usa ka paagi alang kanako sa pagtabang sa pagpundok sa Israel. Apan ang matag usa kanato makaapil niini nga buhat sa daghang uban nga paagi, ug kini dili kinahanglan nga mahimong komplikado. Ang pagtambong sa templo ug paghimo og pagpuli [proxy] nga buhat alang sa atong mga paryente, pagsiksik sa atong mga family tree, indeksing, ug gani ang pagkat-on mahitungod sa atong mga apohan ug mga apohan sa tuhod mahimong makalingaw nga mga oportunidad sa pagkonektar ngadto sa atong mga katigulangan.
Labaw sa tanan, ang kataposang tumong kanatong tanan mao ang pagbalik ngadto sa Langitnong Amahan ug pagpuyo uban Kaniya ug sa atong mga pamilya sa kahangtoran. Ug pinaagi sa atong mga paningkamot sa pagpalig-on sa atong mga koneksyon ngadto sa uban––ilabi na sa atong mga katigulangan––kita makalig-on sa atong pasalig ngadto ni Kristo ug makapabilin niana nga tumong nga makita.