Pagkakita sa Dugay nang Gipaabot nga mga Panalangin sa Templo
Hulyo 2022
“Pagkakita sa Dugay nang Gipaabot nga mga Panalangin sa Templo,” Liahona, Hulyo 2022.
Pagkakita sa Dugay nang Gipaabot nga mga Panalangin sa Templo
Nagpaambit ang mga miyembro sa tibuok kalibotan sa mga panalangin nga ilang nakita sa dihang ang mga templo anaa na sa ilang mga dapit.
Litrato sa Brigham City Utah Temple
Ang mga templo mao ang labing sagrado nga mga dapit sa pagsimba dinhi sa kalibotan. Didto, ang mga miyembro sa Simbahan mas magpaduol ngadto sa Dios samtang sila moapil sa gikinahanglan nga mga ordinansa ug mohimo og mga pakigsaad alang sa ilang mga kaugalingon ug alang sa ilang kaliwatan nga namatay. Kini mao ang balay sa Ginoo, ug ang kalinaw, kahupayan, ug pagpadayag mahimong moabot niadtong kinsa mosulod didto.
Apan, samtang ang gipahiuli nga Simbahan ni Jesukristo mikaylap ngadto sa kinalay-an nga mga suok sa yuta, ang pag-adto sa templo nahimong usa ka hagit alang sa kadaghanan. Ug sa bag-ohay lang mga katuigan, ang pagsulod ngadto sa mga templo nahimong limitado alang sa kadaghanan tungod sa COVID-19 nga pandemya.
Sa samang kinatibuk-ang komperensiya diin gipaluyohan siya isip Presidente sa Simbahan, si Presidente Russell M. Nelson miingon, “Gusto namong dad-on ang mga templo paduol ngadto sa nagkadaghan nga mga miyembro sa Simbahan” (“Magpadayon Tang Tanan,” Liahona, Mayo 2018, 119).
Sukad niadto, sa matag kinatibuk-ang komperensiya, ang mga miyembro sa Simbahan nagpaabot sa pagpahibalo sa bag-o nga mga templo sa tibuok kalibotan, natingala niining timailhan sa nagkakusog nga paglambo ug naglaom nga ipahibalo ang usa ka templo nga mas duol sa ilang mga panimalay.
Brussels Belgium Temple
Gipahibalo Abril 2021
Sorpresa gayod kaayo kadto sa dihang nadungog namo si Presidente Nelson nga mipahibalo nga aduna na unyay templo sa Brussels, Belgium. Ang akong asawa ug ako midumala sa Belgium/Netherlands Mission, ug kasagaran kaming motrabaho sa The Hague Netherlands Temple, nga duha ka oras gikan sa among panimalay sa Belgium. Karon kinahanglan lang namong mobiyahe og usa ka oras o gani menos pa aron moadto sa templo sa Brussels.
Sa pagkadungog sa pahibalo, mitulo ang mga luha gikan sa among mga mata tungod sa dako kaayo nga pasalamat nga among nabati. Ang among pamilya ug ang among mga miyembro sa stake nakapalambo og nagtubo nga pagbati sa pagpahinungod ug gugma ngadto sa templo gumikan lang gayod sa pahibalo. Kini nga pagpahibalo sa templo nagpamatuod kanamo nga ang Ginoo nakaila sa among gamay nga nasod ug nasayod sa buhat ug mga sakripisyo sa nag-una ug kasamtangan nga mga pioneer niini nga dapit.
Johan Buysse ug Linda Buysse-Vergauwen, St Niklaas Ward, Antwerp Belgium Stake
Antofagasta Chile Temple
Seremonya sa pagsugod sa pagtukod sa templo Nobyembre 2020
Makapahinam nga makakita kon sa unsang paagi gipadali sa Manluluwas ang Iyang buhat diha sa mga kasingkasing ug mga hunahuna sa mga Santos sa Ulahing mga Adlaw. Gusto kami nga mahimong andam sa tanang aspeto aron mabuhat namo unsay kinahanglanon sa Ginoo kanamo sa panahon nga ang Antofagasta Chile Temple ipahinungod ug magamit na.
Ang among kabataan ug kabatan-onan nagdasig kanamo sa ilang kaikag ug kalipay nga moserbisyo diha sa templo. Ila nang gihunahuna ang ilang mga kaugalingon nga nag-adto. Nagkat-on sila kon unsay buot ipasabot sa pagpundok sa Israel, nga sila mahinungdanon nga bahin niini nga pagpundok, ug unsa ka importante nga aduna nay balay sa Ginoo nga duol kaayo sa ilang kaugalingon nga mga panimalay.
Paghulagway sa Antofagasta Chile Temple
Daghan sa mga Santos sa amihanang Chile ang naghan-ay sa ilang mga kinabuhi, nga nakasabot nga ang Manluluwas mainitong nagpaabot nga moabiabi kanila diha sa Iyang balaan nga balay. Gusto sila nga mahimong kabahin sa mahinungdanon nga panalangin nga aduna nay templo sa Antofagasta. Uban sa akong asawa, si Patyta, nag-andam usab kami aron ang Ginoo makasalig kanamo nga moserbisyo niining kawsa sa pagpundok nga gihigugma gayod namo og maayo.
Niadtong Disyembre 2018 mao ang kataposang higayon nga nakabisita kami sa Taipei Taiwan Temple isip usa ka pamilya sa wala pa ang COVID-19 nga pandemya mibutang og restriksiyon sa pagbiyahe ug misangpot sa pagpasira sa mga templo. Naglantaw kami uban sa dakong paglaom nga makabalik sa dili madugay sa pagsimba diha sa balay sa Ginoo.
Sa dihang gipahibalo ang usa ka templo sa Singapore, mahinamon kaayo kaming tanan. Ang Langitnong Amahan nasayod sa mga Santos sa Malaysia. Sulod sa daghang katuigan, ang mga Santos sa Kuala Lumpur District naningkamot nga mahimong usa ka stake. Sa daghang higayon, kini nga tumong ingon og layo kaayo, apan wala gayod kami mihunong sa paghisgot mahitungod sa pagkahimong usa ka stake. Ang pagpahibalo sa usa ka templo sa Singapore nagpakita kanamo nga giila sa Ginoo ang mga paningkamot sa Malaysian nga mga Santos.
Richard Kok Leong Ho ug Chan Min Lian, Petaling Jaya Branch, Kuala Lumpur Malaysia District
Durban South Africa Temple
Gipahinungod Pebrero 2020
Kami adunay matahom nga bag-ong templo sa Durban, South Africa, nga naghatag kanamo sa oportunidad nga “magbar[o]g sa balaan nga mga dapit, ug dili mabalhin” (Doktrina ug mga Pakigsaad 45:32). Didto, makagahin kami og panahon nga layo gikan sa mga panglimbasog ug kasaba sa kalibotan aron maminaw ug mamati sa ligdong, hinagawhaw nga tingog sa Espiritu Santo.
Durban South Africa Temple
Ang templo usa ka dapit diin makanunayon kitang makadugang og mga tulo sa lana ngadto sa atong mga lampara nga kini mas mohayag pa, nga magtugot kanato nga mahimong mas andam alang sa adlaw sa Ginoo.
Mandy Swinburne (gilitratohan uban sa iyang anak nga babaye), Hillcrest Ward, Hillcrest South Africa Stake
Port Vila Vanuatu Temple
Gipahibalo Oktubre 2020
Isip usa ka presidente sa stake, hingpit akong nahingangha sa dihang gipahibalo ni Presidente Russell M. Nelson ang templo. Gibati nako ang kalinaw, kalipay, ug paglaom alang sa akong pamilya, mga higala, ug kauban nga mga miyembro sa stake, ingon man sa daghang uban nga mga tawo kinsa makadawat usab og mga panalangin tungod kay aduna nay balay sa Ginoo sa among isla nga rehiyon.
Uban sa balita sa templo nga mahimutang sa usa sa mga isla sa among nasod, nakasinati kami og mga kausaban sa kasingkasing. Naningkamot ang mga miyembro sa pagsunod sa mga sugo ug makanunayong nakigtagbo sa mga lider sa Simbahan aron sa pag-andam sa ilang kaugalingon alang sa mga ordinansa ug mga panalangin sa templo. Dugang nga mga miyembro ang mipasalig sa ilang mga kaugalingon sa buhat sa family history.
Kini usa gayod ka panalangin dili lamang sa mga miyembro sa Simbahan apan alang sa tibuok nasod.
Yvon Basil, Port Vila 2nd Ward, Port Vila Vanuatu Stake
Mesa Arizona Temple
Gipahinungod pag-usab Disyembre 2021
Ang pagsulod usab ngadto sa Mesa Arizona Temple human sa gilugwayan nga mga pagpang-ayo mao ang usa ka higayon nga dili dayon nako makalimtan. Ang open house nagpahinumdom kanako nga ang pagkaanaa diha sa sulod sa templo usa ka kalipay. Ang kinabuhi mas klaro nga masabtan; ang kaugtas ug ang mga kabug-at nga akong gibati nahupay sa makadiyot. Nagtugot kini kanako nga makagahin og panahon nga mahimong hilom ug mahunahunaon aron mabati ang kalinaw ug panglantaw nga gitanyag sa atong Amahan sa Langit.
Uban sa lima ka anak nga babaye, mibati ako og kadinalian sa pagtudlo kanila mahitungod sa kapahulayan nga makaplagan pinaagi sa matinud-anon nga pagserbisyo sa templo. Ang pagdala kanila ngadto niining sagrado nga dapit atol sa open house mihatag kanila og oportunidad nga makakita sa makadiyot kon unsay ikatanyag sa templo alang kanila. Kini mipasiugda og daghang makahuloganon nga mga pag-istoryahanay mahitungod sa pagpangandam sa pagsulod sa templo, mga rekomend sa templo, mga sumbanan, hugot nga pagtuo, buhat sa family history, mga pakigsaad, mga ordinansa, pagkamabination, pagpadayag, ug uban pa.
Ang among mga kinabuhi napanalanginan ug ang among mga pagpamatuod napalig-on gikan sa oportunidad nga makasulod sa balay sa Ginoo. Sa dihang anaa na ang mga oras nga makasulod sa templo, mahinamon akong mi-log in aron sa pagtakda sa akong unang appointment human sa pagpahinungod. Uban sa mga ngalan sa akong mga katigulangan, andam na ako!
Anaclea Whiting, Lindsay Ward, Mesa Arizona Hermosa Vista Stake
Campinas Brazil Temple
Gipahinungod Mayo 2002
Malipayon kaayo mi sa pagpangabli og usab sa templo sa Campinas, nga nasirado tungod sa COVID-19 nga pandemya. Bag-o lang gayod nga giablihan pag-usab ang templo nga sakto lang aron kami makasaulog sa among ika-20 nga anibersaryo. Gihigugma namo kining espesyal nga gasa gikan sa Ginoo.
Campinas Brazil Temple
Ako magpamatuod nga ang templo mao ang balay sa Ginoo—usa ka dapit nga napuno sa gugma, mga milagro, kalinaw, ug pagkaayo. Ang Dios mao gayod ang atong Langitnong Amahan ug nagpaabot kanato uban ang kalipay diha sa Iyang balaan nga balay aron makabati kita sa Iyang presensiya ug makaangkon og kalig-on sa pagbuntog sa kalibotan.
Isabel Bueno de Almeida, Sumaré Ward, Sumaré Brazil Stake