“Nag-agak Ako Kanimo,” Liahona, Hulyo 2022.
Mga Tingog sa mga Santos sa Ulahing mga Adlaw
Nag-agak Ako Kanimo
Ang gamhanan nga pagbati nga miabot kanako kusog kaayo nga kini nakapaluhod kanako.
Tres anyos palang ko ug dili ganahan mobiya sa ospital, diin ang akong mga ginikanan nagpaalim human sa aksidente sa sakyanan.
Litrato sa maayong kabubut-on sa tagsulat; mga ngilit sa hulagway gikan sa Getty Images
Nanglimbasog ko sulod sa daghang katuigan uban sa kasakit [trauma] ug kabalaka kalabot sa usa ka aksidente sa sakyanan nga ang akong mga ginikanan ug ako naapil sa dihang tres anyos pa ko. Ang akong wala pa matawo nga igsoong lalaki wala mabuhi.
Sa ika-25 nga anibersaryo sa aksidente, klaro kaayo nako kining nahinumdoman [flashback]. Pipila ka bulan ang milabay, nanglimbasog pa gihapon ko sa dihang misugyot ang usa ka higala nga modangop ko ngadto sa akong Langitnong Amahan. Mikatawa ko ug dayon nangutana, “Unsa may mabuhat Niya alang kanako?”
Nagpadayon ang akong mga panglimbasog. Human sa laing usa o duha ka tuig, gikapoy na ko nga masakitan ug ang akong kasakit nahimong kasuko. Gibuhat nako ang tambag sa akong higala ug misugod sa pagdangop ngadto sa Dios.
“Kon Ikaw anaa gayod dinha, pagpadala og usa ka tawo—bisan kinsa,” ako miampo. “Nagkinahanglan ko og usa ka tawo!”
Milabay ang adlaw samtang nagbarog ko diha sa akong pultahan, naghulat sa kawang.
“Tan-awa, Dios, walay nagpakabana!” Miingon ko. “Walay miabot!”
Samtang mitulo ang mga luha sa akong nawong, hinay akong misulod sa balay ug gisirad-an ang pultahan. Misaka ako sa hagdanan nga mibati nga napildi. Apan sa dihang miabot ako sa kinatas-an sa hagdanan, usa ka gamhanan nga pagbati ang miabot kanako. Kusog kaayo kini nga kini nakapaluhod kanako.
Dayon misantop kini nga hunahuna kanako: “ReNae, nag-agak ako kanimo.”
Ang Langitnong Amahan mipadala niana nga gamhanan nga hunahuna kanako sa malumo nga paagi sa dihang gikinahanglan nako kini og maayo. Nakaamgo ako nga Siya naghigugma gayod kanako ug nga Siya nakaila gayod kanako. Siya naghigugma gayod kanako nga Siya mihatag kanako og moral nga kabubut-on. Siya dili mopugos kanako o ni bisan kinsa sa pagsunod Kaniya, apan Siya ug ang Iyang Anak nagdapit kanato nga moduol ngadto Kanila (tan-awa sa Mateo 11:28–30).
Sukad niana nga adlaw, nasayod ako nga ako makasalig Kaniya. Mas maayo na akong kinabuhi karon tungod kay ako naningkamot sa pagsunod Kaniya ug sa pagpaminaw Kaniya kada adlaw. Samtang ang Langitnong Amahan ug si Jesukristo motugot kanako nga mobati og kasakit, naghatag usab Sila kanako og kalinaw, kahupayan, kalig-on, ug kaisog aron makakat-on ako gikan sa pagbuhat og lisod nga mga butang. Ang pagbati og kasakit nagtabang kanako nga makasabot ug mosuporta sa uban kinsa nanglimbasog.
Tingali dili gayod kita hingpit nga mahibalo kon unsay giagian sa uban, apan makapakita kita og gugma niadtong naglibot kanato. Mapasalamaton ako nga ang akong Langitnong Amahan naghigugma kanako ug maminaw kanako kon ako motawag Kaniya.