“Ang Ginoo Mituman sa Iyang Saad,” Liahona, Hulyo 2022.
Mga Tingog sa mga Santos sa Ulahing mga Adlaw
Ang Ginoo Mituman sa Iyang Saad
Alang sa akong pamilya ug kanako, ang panalangin sa Ginoo miabot human sa akong pagkamasulundon.
Duha ka bulan human ko gitawag isip usa ka magtatambag sa among kapangulohan sa stake, nawad-an ko og trabaho. Nabalaka ko kon unsaon nako sa paghatag sa panginahanglan sa akong asawa ug ang among duha ka anak.
Samtang nangita og bag-ong trabaho, akong gigahin ang akong kaugalingon ngadto sa akong calling, nga naghatag kanako og daghang mga oportunidad sa pagserbisyo sa akong mga kaigsoonan. Sa pagkatinuod, nabisi ko og maayo sa akong calling nga ang akong asawa naghunahuna nga duna ba kahay laing tawo sa stake kinsa makalihok sa uban nakong mga gimbuhaton [assignments].
Usa ka maulan nga gabii sa wala pa lang gyod magsugod ang among family home evening, mibagting ang telepono. Usa ka masakiton kaayo nga brother sa stake nanginahanglan og panalangin, ug gihangyo ko nga moadto kaniya. Dihadiha dayon, nakigsabot ko aron adunay usa ka amigo nga makakuyog nako.
Sa among pag-abot, nakaila dayon ko sa masakiton nga brother ug mapasalamaton sa tawag sa telepono. Sa miaging pipila ka adlaw, giinterbiyo siya alang sa usa ka calling sa stake. Human sa among pagdihog ug pagpanalangin niya, amo siyang gisultihan nga mobalik mi sa sunod aron susihon siya.
Miabot ko sa balay nga atrasawo na ug basa, apan duna gihapon mi mubo nga panahon alang sa mubo nga leksiyon sa home evening. Nakahukom mi nga motan-aw og video kabahin ni Elias ug sa Biyuda sa Sarefat.
Samtang ang biyuda nangandam sa pagluto og gamay nga pagkaon alang kaniya ug sa iyang anak nga lalaki, si Elias miingon ngadto kaniya, “himoi una akog gagmayng torta ug dad-a nganhi kanako ug pagkahuman paghimo usab ug alang kanimo ug sa imong anak.” Alang sa iyang pagkamasulundon, “[wala] mahurot ang harina ingon man ang [iyang] lana hangtod nga [gipaulan] na sa Ginoo” (1 Mga Hari 17:13–14).
Ang mga pulong ni Elias nga “himoi una … ako” midulot sa akong kasingkasing. Uban sa luha sa akong mga mata, akong gisultihan ang akong asawa, “Mao kana! Una, kinahanglan buhaton nato ang tanan nga gisugo sa Ginoo, ug pagkahuman ang mga panalangin moabot.”
Sama sa katumanan sa saad ni Elias ngadto sa biyuda, ang among pagkaon ug lana wala “mahurot” samtang wala pa koy trabaho. Ang Ginoo nasayod sa among lisod nga pinansiyal nga kahimtang, ug Siya mipanalangin kanamo. Niana gayod nga pagkabuntag human sa among family home evening, gitanyagan ko og trabaho.
Nasayod ko nga ang Ginoo nagtuman sa Iyang mga saad. Tungod niini nga kasinatian, ang akong hugot nga pagtuo dako kaayo, ingon man usab ang akong pasalamat ngadto Kaniya.