Mga Sukaranan sa Ebanghelyo

Mga Kasulatan: Ang Pulong sa Dios

Old Testament Prophet [Propeta sa Daang Tugon], ni Judith A. Mehr

Ang mga kasulatan mao ang balaan nga mga basahon nga sinulat kasagaran sa mga propeta. Ang mga kasulatan nagpamatuod ni Jesukristo ug nagtudlo sa Iyang ebanghelyo. Ang opisyal nga mga kasulatan sa Simbahan mao ang Biblia (nga naglakip sa Daang Tugon ug Bag-ong Tugon), ang Basahon ni Mormon, ang Doktrina ug mga Pakigsaad, ug ang Perlas nga Labing Bililhon.

Daang Tugon

Ang Daang Tugon maoy usa ka rekord sa mga pakigsabot sa Dios ngadto sa Iyang katawhan sa pakigsaad sa karaang mga panahon. Naglakip kini sa mga pagtulun-an sa mga propeta sama ni Moses, Josue, Isaias, Jeremias, ug Daniel. Bisan tuod kini gisulat mga gatosan ka tuig sa wala pa ang pagkatawo ni Jesukristo, daghang mga propeta sa Daang Tugon nagsulat mahitungod Kaniya.

Bag-ongTugon

Ang Bag-ong Tugon nagrekord sa pagkatawo, mortal nga kinabuhi, mga pagtulu-an, ug Pag-ula ni Jesukristo. Naglakip kini sa mga pagtulun-an sa Apostoles ni Kristo ug sa ubang mga disipulo. Ang Bag-ong Tugon makatabang kanato nga makasabot kon unsaon sa pagsunod sa ebanghelyo ni Jesukristo karon.

Ang Basahon ni Mormon: Lain nga Tugon ni Jesukristo

Ang Basahon ni Mormon usa ka rekord sa ubang mga katawhan kinsa nagpuyo sa karaang Amerika. Naglakip kini sa mga pagtulun-an gikan sa mga propeta, ug ang labing mahinungdanong katuyoan niini mao ang pagkumbinsir sa tanang mga tawo nga si Jesus mao ang Kristo. Si Propeta Joseph Smith mihubad niini gikan sa palid nga mga bulawan pinaagi sa gasa ug gahom sa Dios.

Ang Doktrina ug mga Pakigsaad

Ang Doktrina ug mga Pakigsaad naglangkob sa mga pagpadayag nga gihatag ngadto ni Joseph Smith ug sa ubang mga propeta sa ulahing mga adlaw. Ang mga pagpadayag naghulagway kon giunsa sa pag-organisar ang Simbahan ni Jesukristo. Kini usab naglangkob sa mahinungdanong mga pagtulun-an sa ebanghelyo mahitungod sa pagkapari, sa mga ordinansa sa ebanghelyo, ug kon unsa ang mahitabo human niini nga kinabuhi.

Perlas nga Labing Bililhon

Ang Perlas nga Labing Bililhon naglakip sa basahon ni Moises, sa basahon ni Abraham, sa pagpamatuod ni Joseph Smith, ug sa mga Artikulo sa Hugot nga Pagtuo sa Simbahan. Naglakip usab kini sa Joseph Smith—Matthew, kabahin sa hubad ni Joseph Smith sa Bag-ong Tugon.

Pagtuon sa mga Kasulatan

Ang mga propeta nagtudlo kanato sa pagtuon sa mga kasulatan matag adlaw . Ang paghimo sa ingon makatabang sa pagdugang sa atong hugot nga pagtuo ug pagpaduol ngadto sa Langitnong Amahan ug ni Jesukristo. Samtang kita magtuon sa mga kasulatan nga mainampoon, ang Espiritu Santo motabang kanato sa pagkaplag og mga tubag sa atong mga pangutana.

Bag-ong mga Propeta

Sa higayon nga ang mga propeta ug apostoles karon mamulong pinaagi sa gahom sa Espiritu Santo, ang ilang mga pulong sama sa kasulatan. Usa ka pananglitan niini mao ang kinatibuk-ang komperensiya. Kita makatuon sa mga pagtulun-an gikan sa komperensiya diha sa Mayo ug Nobyembre nga mga isyu sa Liahona.

Nganong Magbasa man Kita sa mga Kasulatan?

Ang mga kasulatan nagpamautod kang Jesukristo (tan-awa sa Jacob 7:10–11).

Ang mga kasulatan gihatag pinaagi sa inspirasyon sa Dios (tan-awa sa 2 Timoteo 3:15–16).

Kita makagamit sa mga kasulatan sa atong kinabuhi (tan-awa sa 1 Nephi 19:23).

Dugang mga Detalye mahitungod sa Perlas nga Labing Bililhon

Basahon ni Moises: Ang dinasig nga hubad ni Propeta Joseph Smith sa unang pipila ka mga kapitulo sa Genesis. Ang Moises kapitulo 1 talagsaon; ang ubang sunod nga mga kapitulo gibasi sa Genesis 1:1–6:13.

Basahon ni Abraham: Ang dinasig nga hubad ni Propeta Joseph Smith sa mga sulat ni Abraham gikan sa papyrus nga mga rolyo nga nakaplagan didto sa Ehipto.

Ang Mga Artikulo sa Hugot nga Pagtuo: Trese ka pamahayag nga gisulat ni Joseph Smith nga naglista sa atong labing importante nga mga tinuhoan isip mga miyembro sa Simbahan sa Ginoo.