78-р хичээл: Сургаал ба Гэрээ 64–66

Сургаал ба Гэрээ 64:20–43

“Их Эзэн зүрх сэтгэл хийгээд эрмэлзэгч оюуныг шаарддаг”

Исаак Морлейн ферм

Есүс Христ Сионыг байгуулахыг эрэлхийлж байсан эрт үеийн гэгээнтнүүдээс өөр арга замаар золиослол гаргаж, хувь нэмэр оруулахыг хүссэн. Есүс Христийг дагахаар үргэлжлүүлэн хичээх үед маань Тэр биднээс Түүнд зүрх сэтгэл, эрмэлзэгч оюунаа өгөхийг хүсдэг. Энэ хичээл суралцагчдад Их Эзэнд зүрх сэтгэл, эрмэлзэгч оюуныг өгөх хүслээ нэмэгдүүлэхэд тусална.

Боломжит суралцах үйл ажиллагаа

Хувийн өмч

Та суралцагчдаас үнэ цэнтэй гэж үздэг хувийн эд зүйлсийнхээ талаар бодохыг хүссэнээр хичээлээ эхлүүлж болно. Ангиараа эсвэл жижиг бүлгүүдээрээ хуваалцахад тохирох асуултуудыг өгөх талаар бодож үз. Жишээлбэл:

• Та нарт олж авахын тулд шаргуу хөдөлмөрлөсөн ямар зүйл байдаг вэ?

• Та нарт өөр хэн нэгэнд өгөхөд хэцүү санагдаж болох ямар зүйл байдаг вэ? Яагаад хэцүү байх вэ?

Исаак Морлейн ферм

Та энэ хичээлийн эхэнд байгаа зургийг үзүүлээд, нэг суралцагчийг дараах мэдээллийг чанга уншихад урьж болно.

Исаак, Люси Морлей нар Огайогийн Көртландын ойролцоо 80 акр газарт үр ашигтай ферм байгуулахын тулд шаргуу ажиллажээ. Шашны итгэл үнэмшлийнхээ улмаас тэд хүмүүсийг өөрсдийн эзэмшил газарт ирж амьдарч, эд хөрөнгөө хуваалцан, бүх зүйлийг нийтээрээ эзэмшиж амьдрахад урьсан. Хожмын үеийн гэгээнтэн номлогчид Көртландад саатахдаа, Морлейн фермд аж төрдөг хүмүүст Сэргээлтийн захиасыг тунхаглажээ. Хөрвүүлэгдсэн хүмүүсийн дунд Исаак Морлей, Люси Морлей нар байв. Баптисм хүртсэнийхээ дараахан Морлейн гэр бүл Иосеф, Эмма Смит хоёрыг фермдээ амьдрахыг урьж, тэднийг угтан авсан байна. (See Susan Easton Black, Who’s Who in the Doctrine and Covenants [1997], 198.)

Сургаал ба Гэрээ 64:20-ийг уншаад, Их Эзэний Исаак Морлейд өгсөн зааврыг олж мэд.

• Та нар Исаакийн оронд байсан бол хэрхэн хариулах байсан гэж бодож байна вэ? Яагаад?

• Аврагчаас уг хүсэлт ирснийг мэдэх нь дуулгавартай байхад тань хэрхэн тусалж болох вэ?

Өмнө нь Исаакаас фермээ зарахыг хүсэхэд тэрээр татгалзаж байсан гэдгийг тайлбарла. Гэвч энэ илчлэлтийг хүлээн авмагцаа Исаак дуулгавартайгаар фермээ зарж, мөнгийг Сүмд өгч, Сионыг байгуулахад туслахаар гэр бүлээрээ Миссури руу нүүжээ. Мөн та энэ илчлэлтээр өмч хөрөнгөө зарахгүй байхыг бусад ахад хэлсэн гэдгийг онцолж болно (Сургаал ба Гэрээ 64:21, 26-г үзнэ үү). Энэ эрчүүд Көртланд дахь Сүм болон гэгээнтнүүдийг дэмжихийн тулд эд хөрөнгөө Их Эзэнд зориулсан. Энэ нь суралцагчдад Сургаал ба Гэрээ 42:29–39-ээс Аврагчийн талаар болон золиослолын хуулийн талаар сурсан үнэнийг сануулах сайхан боломж байж болох юм.

Их Эзэн биднээс зүрх сэтгэл, эрмэлзэгч оюуныг шаарддаг

Их Эзэн биднээс эд хөрөнгөө зарахыг шаардахгүй ч Өөрийг нь дагахаар хичээж буй биднээс хүсдэг хэдэн зүйл байдаг гэдгийг тайлбарла.

Сургаал ба Гэрээ 64:22, 34-ийг унш. Их Эзэний биднээс хүсдэг зүйлсийг олж мэд.

• Та нар юу олж мэдсэн бэ?

Их Эзэн биднээс Өөрт нь зүрх сэтгэл, эрмэлзэгч оюунаа өгөхийг шаарддаг гэдгийг олж тогтооход суралцагчдад тусал.

Их Эзэнд зүрх сэтгэл, эрмэлзэгч оюунаа өгөх гэдэг нь юу гэсэн үг болохыг суралцагчдадаа илүү сайн ойлгоход туслах арга замуудыг бод. Суралцагчдаас “Ирээд, Намайг дага” гарын авлагын Сургаал ба Гэрээ 64-тэй холбоотой хичээлийг бэлдэхэд туслахыг хүссэн гэж төсөөлөхөд урих нь нэг арга байж болно. Суралцагчид бие даан эсвэл жижиг бүлгээрээ дараах эсвэл өөрсдийн олсон судруудыг судалж, дараа нь Их Эзэнд зүрх сэтгэл, эрмэлзэгч оюунаа өгөх гэдэг нь ямар утгатай болохыг тайлбарлан бичиж болно. Тэдэнд бичсэн зүйлээ хуваалцаж, ярилцахыг зөвшөөр.

Суралцагчдыг Их Эзэнд хэрхэн зүрх сэтгэл, эрмэлзэгч оюунаа өгч чадахаа мэдэхийн тулд хувийн илчлэлт эрэлхийлэхэд урамшуул.

Дараах судрын хэсгүүдийг уншаад, Их Эзэнд зүрх сэтгэл, эрмэлзэгч оюунаа өгөх гэдэг нь юу гэсэн үг болохыг ойлгоход туслах ойлголтуудыг хайж ол. Та нар судлах тэмдэглэлдээ тайлбар бичиж болно.

Судрууд дахь сургаалууд

• Сургаалт үгс 3:5–6

• Maтай 22:36–39

• Moзая 3:19

• Сургаал ба Гэрээ 20:77, 79

Аврагчийн амьдралын жишээ

• Иохан 6:38

• Лук 22:42

• 3 Нифай 27:13–14

• Сургаал ба Гэрээ 19:24

• Тэнгэрлэг Эцэгт зүрх сэтгэл, эрмэлзэгч оюунаа өгөх сайн жишээг Есүс Христ хэрхэн харуулсан бэ?

• Есүс Христийг дагахаар хичээж буй та нарын хувьд Түүнд зүрх сэтгэл, эрмэлзэгч оюунаа өгснөөр амьдрал чинь хэрхэн өөрчлөгдсөн бэ?

Зөвхөн Их Эзэний биднээс гуйсан зүйлийг хийх, зүрх сэтгэл, эрмэлзэгч оюунаар Түүнд дуулгавартай байх хоёрын хооронд ялгаа бий гэдгийг ойлгоход суралцагчдад туслахын тулд та цаг гаргаж болно.

Суралцагчдыг Их Эзэний биднээс сахихыг хүссэн хэд хэдэн зарлиг эсвэл гаргахыг хүсэж магадгүй золиослолыг самбар дээр жагсаан бичихэд урих талаар бодож үз. Суралцагчдаас бид эдгээр зүйлийг хийхдээ хэрхэн Их Эзэнд зүрх сэтгэл, эрмэлзэгч оюунаа өгч болох талаар хоёр хоёроороо эсвэл жижиг бүлгээрээ ярилцахыг хүс. Жишээлбэл: Тэд Хүндэтгэлийн өдрийг ариунаар сахихын тулд хэрхэн Их Эзэнд зүрх сэтгэл, эрмэлзэгч оюунаа өгч болох талаар ярилцаж болно.

Хувийн эргэцүүлэл

Хэрэв та самбар дээр зарлиг эсвэл золиослол бичихээр сонгосон бол суралцагчдыг жагсаалтыг хараад эдгээрийг хийх хүсэлтэй байгаа эсэхээ эргэцүүлэн бодоход урь. Суралцагчдад судлах тэмдэглэлдээ зүрх сэтгэл, оюун ухааныг зурахыг зааварлах талаар бодож үз. Та доорх зургийг загвар болгон үзүүлж болно. Тэднийг Аврагчид хэр их сэтгэл, оюунаа өгч байгаагаа тунгаан бодоход уриад, үүнийгээ Түүнд өгч буй хэмжээгээр өнгөөр ялган будахад урь. Дараа нь тэднийг дараах асуултуудыг тунгаан бодож, хариулж бичихэд урьж болно.

оюун ухаан ба зүрх сэтгэл

• Та нар өнөөдөр Их Эзэнд зүрх сэтгэл, эрмэлзэгч оюунаа өгөх хүслийг нэмэгдүүлэх юуг сурсан бэ?

• Аврагчид зүрх сэтгэл, оюунаа өгөх нь Түүнтэй илүү адилхан болоход хэрхэн тусалж чадна гэж та нар бодож байна вэ?

Суралцагчдыг сурч, мэдэрсэн зүйлээ хуваалцахад урих талаар бодож үз. Та хэн нэгнийг Их Эзэнд зүрх сэтгэл, эрмэлзэгч оюунаа өгч байгааг харсан талаарх гэрчлэлээ эсвэл туршлагаа хуваалцаж болно.

Нэмэлт эх сурвалж

Сургаал ба Гэрээ 64:23–25. “Энэ нь өнөөдөр хэмээн нэрлэгдэж байхад та нар хөдөлмөрлөх болно” гэдэг нь юу гэсэн утгатай вэ?

Их Эзэн өнөөдөр гэдэг үгийг Сургаал ба Гэрээ 64-ийг хүлээн авсан цагаас Хоёр дахь ирэлт (Сургаал ба Гэрээ 64:23-ыг үзнэ үү) хүртэлх хугацааг хэлэхийн тулд ашигласан. Их Эзэний талаас авч үзвэл, өнөөдөр гэдэг нь “энэ амьдрал” буюу Бурханы хүүхдүүд “хөдөлмөрөө гүйцэтгэх” мөн “Бурхантай уулзахаар бэлтгэх” (Алма 34:32; мөн Алма 34:31, 33–35-ыг үзнэ үү) үеийг хэлдэг. Сургаал ба Гэрээ 64:24 дэх “маргааш” гэдэг үг нь Есүс Христийн Хоёр дахь ирэлтээр тохиох ёс бусчуудын устгалыг хэлж байгаа.

Сургаал ба Гэрээ 64:23. Их Эзэний дурдсан аравны нэг ямар утгатай вэ?

Сургаал ба Гэрээ 64:23 дахь аравны нэг гэдэг үг орлогын хувь гэхээсээ илүүтэй, гэгээнтнүүдийн Сүмд, ялангуяа золиослолын хуулийн дагуу оруулсан бүх хувь нэмрийг хэлж байгаа. Их Эзэн золиослол, бүхнээ зориулах хуулиудыг дагадаг хүмүүсийг эцсийн өдөр үл наманчлагчдыг устгадаг шатаалтаас хэлтрүүлэгдэх болно гэж амлажээ. 1838 онд Их Эзэн Сургаал ба Гэрээ 119-д цэдэглэгдсэн илчлэлтийг өгөх үед аравны нэгийн хуулийн талаарх одоогийн бидний ойлголт улам тодорхой болсон.

Би хэрхэн Их Эзэнд зүрх сэтгэл, эрмэлзэгч оюунаа өгөх вэ?

Далын ахлагч Жорг Клэбингат ийн заасан.

Ахлагч Жорг Клэбингат

Зөв зүйлс хийхдээ зөв учир шалтгаанаар хий. “Зүрх сэтгэл хийгээд эрмэлзэгч оюуныг шаарддаг” (С ба Г 64:34), мөн “бодлууд мөн санааг ялган танигч” (С ба Г 33:1) Их Эзэн таныг яагаад сүмд явж байгааг, мөн зүгээр л бие махбод тань тэнд байгаад байна уу, эсвэл та үнэнээсээ шүтэн биширч байна уу гэдгийг мэддэг. … Сүнслэг зүйлсийн хувьд нойрмог байх нь хэзээ ч аз жаргалтай байдаггүй гэдгийг санаарай. Сүмийг болон сэргээгдсэн сайн мэдээг зөвхөн гаднах буюу нийгмийн амьдралынхаа нэг хэсэг болгоод зогсохгүй, бүхий л амьдралаа болго. (Жорг Клэбингат, “Бурханы сэнтий рүү дөхөж очихдоо өөртөө итгэлтэй байх нь,” 2014 оны 10-р сарын Ерөнхий чуулган, 40)

Далын ерөнхийлөгчийн зөвлөлийн ахлагч Доналд Л.Холлстром ийн хуваалцсан.

Ахлагч Доналд Л.Холлстром

Зүрх сэтгэл нь хайр болон амлалтын бэлгэдэл юм. Бид өөр ямар ч шалтгаанаар биш, харин хайртай хүмүүсийнхээ төлөө золиос гаргаж, ачаа дарамт үүрдэг. Хэрвээ хайр үгүй бол бидний амлалт багасдаг.

Хэрэв бид Их Эзэнийг бүх зүрх сэтгэлээрээ хайрладаг бол Түүнд өөрт байгаа бүх зүйлээ өгөх хүсэлтэй байх болно. …

“Эрмэлзэгч оюунтай байх” гэдэг нь чадахаараа хичээж, сайн бодож мөн Бурханы мэргэн ухааныг эрэлхийлэхийг хэлдэг. Энэ нь амьдралын турш суралцах зүйл маань мөнхийн шинж чанартай зүйлс байх ёстойг илэрхийлдэг. Энэ нь Бурханы үгийг сонсох болон үүнийг дагах байдлын хооронд салшгүй холбоо харилцаа байх ёстой гэсэн үг юм. (Donald L. Hallstrom, “The Heart and a Willing Mind,” Ensign, June 2011, 31–32)

Нэмэлт суралцах үйл ажиллагаа

Сүмийн түүхэн дэх жишээнүүд

Суралцагчдыг хоёр хоёроор нь хуваарилах талаар бодож үз. Хос бүрд Сүмийн түүхээс өөр өөр түүхийг, тухайлбал доор жагсаасан түүхүүдийг өг. Түүхийг уншаад, хамтрагчдаа түүхээс гадна энэ хүмүүс хэрхэн Их Эзэнд зүрх сэтгэл, оюунаа өгөхийн сайн жишээ болсон тухай тайлбарыг хуваалцахад суралцагчдыг урь. Тэд дараа нь өөрсдийн амьдралаас эсвэл таньдаг хэн нэгнийхээ хувийн жишээг хуваалцаж болно.

Исаак ба Люси Морлей

Миссури руу нүүсний дараа Исаак, Люси Морлей нарын гэр бүл шашны ширүүн хавчлагад өртөв. Тэд танхайрагчид гэрийг нь шатаах вий гэсэн байнгын айдастай амьдарч байлаа. Исаак танхайрагчдаас зугтахын тулд эрдэнэ шишийн талбайд нэг сар нуугджээ. Хавчлагын туршид Морлейн гэр бүлийнхэн итгэлдээ үнэнч байсан. Хэрэв найз нөхдийг нь өршөөвөл амиа өгье гэж танхайрагчдад санал болгосон зургаан хүний дунд Исаак байсан юм. Исаак, Люси хоёрын гэр бүл хэд хэдэн удаа нүүсэн төдийгүй хавчлагаас зугтахыг оролдож байсан бусад хүний сайн сайхны төлөө үргэлж санаа тавьдаг байв. Эцэст нь Исаак, Люси хоёр гэгээнтнүүдийн хамт баруун зүгт нүүжээ. Бригам Янгийн удирдлаган доор тэд Юта мужийн Мантай хотод гэгээнтнүүдийг суурьшихад тусалсан юм. (See Susan Easton Black, Who’s Who in the Doctrine and Covenants [1997], 199–200.)

Эдвард ба Лидиа Партриж

Эдвард Партрижийг бошиглогч Иосефтой аялж байхад түүнээс Миссурийн Индепенденст үлдэж, Сионыг байгуулахад туслахыг хүсэв. Эдвард даалгавраа биелүүлж чадахгүй байх вий гэхээс санаа зовж байлаа. Тэрээр эхнэр Лидиадаа бичсэн захидалдаа “Надад өгсөн дуудлага Тэнгэрлэг Эцэгт хүлээн зөвшөөрөгдөхүйц зүйлсийг гүйцэтгэх хүч чадлаас минь даван гарсан хэмээн би айж байна. Намайг унахгүй байхын төлөө залбираарай” гэж бичжээ (Saints: The Story of the Church of Jesus Christ in the Latter Days, vol. 1, The Standard of Truth, 1815–1846 [2018], 131). Лидиа захидлыг хүлээн аваад, гэр бүлээрээ Индепенденс рүү нүүж, нөхөртэйгөө нэгдэхэд бэлтгэсэн. Хөршүүд нь Партрижийнхныг сайхан гэр орон, амжилттай яваа бизнесээ орхиж байгааг буруушааж байлаа. Лидиа гэр орноо орхин явах нь сорилт гэдгийг мэдэж байсан ч Бурханы хотын суурийг тавих нь нэр төрийн хэрэг гэж итгэжээ. (Гэгээнтнүүд, 1:130–131, 134–135-ыг үзнэ үү.)

Эсвэл та нар ангиараа “The Heart and a Willing Mind” (7:57) юм уу “Your Day for a Mission” (3:31) видеог үзэж болно. Хүмүүс Их Эзэнд хэрхэн зүрх сэтгэл, эрмэлзэгч оюунаа өгсөн жишээг олж мэдэхэд суралцагчдыг урь.

Сургаал ба Гэрээ 64:34. Зүрх сэтгэл, эрмэлзэгч оюун болон илчлэлтийг хүлээн авах

Хэрэв суралцагчид тань Тэнгэрлэг Эцэгээс илчлэлт хэрхэн хүлээн авахыг илүү сайн ойлгохыг хүсвэл Сургаал ба Гэрээ 64:34-т Их Эзэний шаардсан зүйлийг Сургаал ба Гэрээ 8:2–3-т заасан Тэнгэрлэг Эцэгийн бидэнтэй хэрхэн харилцдаг харилцаатай холбож, хоорондын уялдаа холбоог тогтооход тусалж болно. Суралцагчдыг 64-р хэсгээс зүрх сэтгэл, эрмэлзэгч оюуныг Их Эзэнд өгөх гэдэг нь юу гэсэн үг болохыг судалсны дараа, энэ нь тэдэнд илчлэлт хүлээн авахад хэрхэн тусалж болох талаар ярилцаж болно. Энэ ярилцлагын нэг хэсэг болгон та суралцагчдыг Төгс эзэмших сургаалыг судлах үндсэн материал (2023) “Сүнслэг мэдлэг олж авах” хэсгийн 1–3-р догол мөрийг уншаад, Их Эзэнээс илчлэлт хүлээн авахын тулд бидэнд бий болгосон Түүний загварыг олж мэдэхэд урьж болно.

• Их Эзэнд зүрх сэтгэл, эрмэлзэгч оюунаа өгөх нь та нарт Их Эзэнээс оюун болон зүрх сэтгэлдээ илчлэлт хүлээн авахад хэрхэн тусалдаг вэ?

Сургаал ба Гэрээ 64:33. “Агуу болох тэрхүү зүйл жижиг зүйлүүдээс гарч ирдэг”

Flecks of Gold” (3:15) видеог үзүүлэхийг бод. Суралцагчдыг Сургаал ба Гэрээ 64:33-аас энэ видеонд харуулсан үнэнүүдийг олж мэдэхэд урь. Дараа нь тэд Есүс Христийг дагах бидний хичээл зүтгэлд томоохон өөрчлөлт авчрах “жижиг зүйлс”-ийн жишээг хуваалцаж болно.

Та мөн суралцагчдыг Алма 37:6–7-г унших эсвэл өөрсдийн амьдралын түүхүүд эсвэл энэ үнэнийг харуулсан судруудыг хуваалцахад урьж болно.

Давтсан урилга

Суралцагчдыг Сургаал ба Гэрээ 64:22 болон Сургаал ба Гэрээ 64:34-т давтагдсан ижил төстэй хэллэгийг тэмдэглэхэд урих талаар бодож үз. Дараа нь та Аврагч биднийг уг судрын туршид зүрх сэтгэл, оюунаа Түүнд өгөхийг дахин дахин урьсан гэдгийг тайлбарлаж болно. Суралцагчдыг Сургаал ба Гэрээ 64:34-ийг Сургаал ба Гэрээ 4:2 болон Матай 22:36–39-тэй холбоход урь. Их Эзэнд зүрх сэтгэл, оюунаа өгөхөд бидэнд тусалж эсвэл сүнслэгээр өдөөж чадах эдгээр эсвэл бусад шүлгийн талаарх нэмэлт ойлголтыг хуваалцахыг тэднээс хүс.

Сургаал ба Гэрээ 64:41–43. Ард түмэнд зориулсан туг

Суралцагчдыг Сургаал ба Гэрээ 64:41–43-ыг уншиж, Их Эзэн хэрхэн Сионыг дүрсэлснийг олж мэдэхэд урих талаар бодож үз. Туг бол “зорилго буюу үзэл санаанд хүмүүс нэгдэн цугларч хүрээлдэг туг буюу далбаа” гэдгийг тайлбарлаж болох юм (Судруудын удирдамж, “Туг,” scriptures.ChurchofJesusChrist.org).