79-р хичээл: Сургаал ба Гэрээ 64–66

Сургаал ба Гэрээ 65

“Тэнгэрийн хаант улс ирж болохын тулд … Их Эзэний замыг бэлтгэгтүн та нар”

Есүс Христийн Хожмын Үеийн Гэгээнтнүүдийн Сүм болон Сүмийн гишүүдийн нэг чухал үүрэг бол Аврагчийг эргэн ирэхэд дэлхийг бэлтгэхэд туслах явдал юм. Сургаал ба Гэрээ 65-д Их Эзэн өөрийн бошиглогч Иосеф Смит ба гэгээнтнүүдэд энэ чухал үүргийг илчилсэн. Энэ хичээл нь Есүс Христийн Хоёр дахь ирэлтэд дэлхийг бэлтгэх Сүмийн үүргийг ойлгоход суралцагчдад тусалж чадна.

Боломжит суралцах үйл ажиллагаа

Үйл ажиллагааны бэлтгэл

Энэ хичээлийг эхлүүлэх нэг арга зам бол бэлтгэлтэй байх нь амин чухал нөхцөл байдлын талаар бодоход суралцагчдад туслах явдал юм. Дараах асуултууд тусалж болох юм.

• Та нарын дуртай, бэлтгэл нэлээн шаарддаг үйл ажиллагаа юу вэ?

• Хэрэв та нар ийм үйл ажиллагаанд бэлдэхэд хэн нэгэнд туслах байсан бол тэднийг юуг мэдээсэй гэж хүсэх вэ? Та нар тэдэнд хэрхэн тусалж, ямар эх сурвалжийг өгөх вэ?

Суралцагчдад хариултаа бусадтай хуваалцах боломжийг олго.

Суралцагчдад Есүс Христийн Хожмын Үеийн Гэгээнтнүүдийн Сүм бидэнд юунд бэлтгэхэд тусалдаг талаар бодоход тусал.

Та нарын үйл ажиллагаа маш их бэлтгэл шаарддагийн адил бидний бэлдэх шаардлагатай үйл явдлууд удахгүй тохиох гэж байна. Их Эзэн биднийг бэлтгэхэд туслахын тулд Сүмээ байгуулсан.

• Түүний Сүм биднийг юунд бэлтгэдэг вэ?

Суралцагчдад Түүний Сүм биднийг олон зүйлд бэлтгэдэг гэдгийг тайлбарлаж, тэднийг бодлоо хуваалцахад урамшуул. Тэдгээрийн аль нэгийг Сургаал ба Гэрээ 65-аас олохыг тэднээс хүс.

“Эзэний замыг бэлтгэгтүн та нар”

1831 оны 9-р сарын 12-нд Иосеф Смит гэр бүлийн хамт Огайогийн Көртландаас зүүн урагш 30 милийн зайд орших Хайрам дахь Жон Жонсон, Алис Жонсон нарын гэр лүү нүүжээ. 1831 оны 10-р сарын 30-ны ням гарагт Жонсоны гэрт Сүмийн цуглаан болов. Тэр өдрөө бошиглогч Сургаал ба Гэрээ 65-д цэдэглэгдсэн илчлэлтийг хүлээн авсан байна.

Суралцагчид дараах шүлгийг унших явцдаа давтагдсан үг, хэллэг хайх замаар судар судлах чадвараараа дадлага хийж болно. Та тэднийг эдгээр шүлэг дэх “бэлтгэ” гэсэн үг бүрийг онцлон тэмдэглэхэд урамшуулж болно. Тэд мөн 3-р шүлэг дэх “бэлтгэгтүн” гэсэн үгийг тэмдэглэж болно.

Сургаал ба Гэрээ 65:1, 3-ыг уншаад, Их Эзэний урилгыг олж мэд.

• Та нар юу олж мэдсэн бэ?

Сургаал ба Гэрээ 65:2-ыг уншаад, Түүний Хоёр дахь ирэлтэд бэлтгэхэд туслахын тулд Аврагч бидэнд юу өгснийг олж мэд.

• Та аль үг, хэллэгийн талаар асуумаар байгаа вэ?

  2–3-р шүлэг дэх үг хэллэгүүдэд дүн шинжилгээ хийж, ойлгоход нь суралцагчдад туслахын тулд тэдгээр үг хэллэгийн утгыг тэднээс асуу. Та шаардлагатай бол дараах агуулгын заримыг хуваалцаж эсвэл үзүүлж болно.

  1. “Хаант улсын түлхүүрүүд” эсвэл “санваарын түлхүүрүүд” нь “Бурханы санваарыг дэлхий дээр удирдан чиглүүлж, хяналт тавихад Бурханаас хүнд өгсөн ерөнхийлөгчийн зөвлөлийн эрхүүд буюу хүч юм” (Судруудын удирдамж, “Санваарын түлхүүрүүд,” scriptures.ChurchofJesusChrist.org). Мөн Матай 16:18–19-ийг үзнэ үү.

  2. “Гар хүрэлгүйгээр уулнаас цавчигдсан чулуу” бол “Их Эзэний Сүм бөгөөд ‘хэзээ ч уста[х]гүй … мөнхөд бай[ж]’ [Даниел 2: 44] бүх дэлхийг дүүргэх хүртлээ асар их [өсөн нэмэгдэж байгаа]” (Роналд А.Расбанд, “Бошиглолын биелэл,” 2020 оны 4-р сарын Ерөнхий чуулган). Мөн Даниел 2:31–35, 44–45-ыг үзнэ үү.

  3. “Хүргэн Хүүгийн тулд бэлэн болгогтун” гэдэг нь “сударт Есүс Христийг Хүргэн Хүү болгон бэлгэддэгтэй холбоотой. Сүм бол түүний бэлгэдлийн сүйт бүсгүй юм” (Судруудын удирдамж, “Хүргэн Хүү,” scriptures.ChurchofJesusChrist.org). Мөн Илчлэл 19:7-9-ийг үзнэ үү.

  Сүмийн өсөлт хөгжлийг судлахад суралцагчдад хэрхэн туслах талаар нэмэлт санаа авахыг хүсвэл энэ хичээлийн “Нэмэлт суралцах үйл ажиллагаа” хэсгийг үзнэ үү.

• Үнэний мэдэгдэл болох эдгээр шүлгээс бид юу сурч болох талаар та нар хэрхэн дүгнэх вэ?

Суралцагчид Есүс Христ Өөрийнхөө Хоёр дахь ирэлтэд биднийг болон бусдыг бэлтгэхэд туслахын тулд Сүмээ сэргээсэн гэх мэт зүйлийг хуваалцаж болно. Тэднээс 1–3-р шүлгийн хажууд энэ үнэнийг бичихийг хүсэж болох юм.

Арван хоёр төлөөлөгчийн чуулгын ахлагч Д.Тодд Кристоффэрсон ийн тунхагласан.

Есүс Христийн Хожмын Үеийн Гэгээнтнүүдийн Сүм нь Их Эзэний Хоёр дахь ирэлтэд шаардлагатай бэлтгэл ажлыг хангах онцгой хүч, үүргийг авсан бөгөөд энэ зорилгын тулд сэргээгдсэн. Есүс Христийн Сүм дэлхийг уг өдөрт бэлтгэх үүрэгтэй мөн бэлтгэж ч байна. (Д.Тодд Кристоффэрсон “Их Эзэнийг эргэн ирэхэд бэлтгэх нь,” 2019 оны 4-р сарын Ерөнхий чуулган, 99, 101.)

• Та нар энэ мэдэгдлийн талаар юу бодож эсвэл мэдэрч байна вэ?

• Сүм дэлхийг Аврагчийн эргэн ирэхэд бэлтгэх хэр онцгой чадвартай вэ?

• Тэр өдөр ямар бэлтгэл хэрэгтэй гэж та нар бодож байна вэ?

Сүм хүмүүсийг Хоёр дахь ирэлтэд бэлтгэхэд тусалдаг арга замуудыг самбарт жагсааж болно. Хэрэв суралцагчид санаа хэлэхгүй бол та Сүмийн тэнгэрлэгээр томилогдсон дөрвөн үүргийг тэдэнтэй хуваалцаж болох юм. Эдгээр нь (1) Есүс Христийн сайн мэдээний дагуу амьдрах, (2) тусламж хэрэгтэй хүмүүсийг халамжлах, (3) бүх хүнийг сайн мэдээг хүлээн авахад урих, (4) гэр бүлүүдийг мөнхөд нэгтгэх замаар Бурханы ажилд туслах юм (Ерөнхий гарын авлага: Есүс Христийн Хожмын Үеийн Гэгээнтнүүдийн Сүмд үйлчлэх нь, 1.2, ChurchofJesusChrist.org). Та дээрхийг самбарт жагсаан бичээд, Их Эзэний Хоёр дахь ирэлтэд хүмүүсийг бэлтгэхэд туслах эдгээр үүрэг бүрийн гарчгийн доор тэдгээрт хамаарах илүү тодорхой арга замуудыг хуваалцахыг суралцагчдаас хүс.

“Түүний хаант улс урагш одож болохын тулд, Их Эзэнийг дуудагтун”

Сургаал ба Гэрээ 65:4–6-г уншаад, Аврагч Өөрийнх нь Хоёр дахь ирэлтэд дэлхийг бэлтгэхийн тулд хүн бүрийг хувьдаа юу хийж чадна гэж заасныг олж мэд.

• Та нар юу олж мэдсэн бэ?

• Аврагчийн Сүмээрээ дамжуулан гүйцэлдүүлсэн “гайхамшигт ажлууд”-ын жишээ юу вэ? (Ерөнхий гарын авлага: Есүс Христийн Хожмын Үеийн Гэгээнтнүүдийн Сүмд үйлчлэх нь, 1.2, 1.3, ChurchofJesusChrist.org-ийг үзнэ үү.)

• Эдгээр ажил биднийг болон бусдыг Аврагчийн Хоёр дахь ирэлтэд бэлтгэхэд хэрхэн тусалдаг вэ?

Та суралцагчдад “түүний гайхамшигт ажлуудыг мэдүүлэх” (Сургаал ба Гэрээ 65:4) боломжийг хичээл дээр эсвэл хичээлээс гадуур олгож болох юм. Тэд гэр бүл, найз нөхөд эсвэл бусадтай хуваалцах арга замуудыг ярилцаж болно.

Ерөнхийлөгч Рассэлл М.Нэлсон бидний хийж чадах нэг зүйл бол “Түүний хаант улс дэлхий дээгүүр урагш одож болохын тулд, Их Эзэнийг дуудах” (Сургаал ба Гэрээ 65:5) юм гэж заасан.

Та нарт … өгөх дөрөв дэх урилга бол Бурханы бүх хүүхэд Есүс Христийн сайн мэдээний адислалуудыг хүлээн авч болохын төлөө өдөр бүр залбирах явдал юм. Та бид Израилыг агуу хүч чадлаар цугларахыг харахаар амьдарч байгаа бөгөөд үргэлжлүүлэн харсаар байх болно. Та нар тэр цугларалтын цаана байх хүч чадлын нэгээхэн хэсэг байх болно. (Рассэлл М.Нэлсон, Вэнди В.Нэлсон, “Израилын найдвар” [өсвөр үеийнхэнд зориулсан дэлхий даяарх онцгой цугларалт, 2018 оны 6-р сарын 3], ChurchofJesusChrist.org)

Суралцагчдаас ерөнхийлөгч Нэлсоны урилгыг тунгаан бодохыг хүс. Тэдэнд тунгаан бодох боломж өгсний дараа түүний урилгыг дагаснаар олж авсан туршлагаа хуваалцахад урь.

Та Сүм буюу “Бурханы хаант улс” нь Аврагчийн Хоёр дахь ирэлтэд зориулж “тэнгэрийн хаант улс”-ын ирэх замыг бэлтгэж байгаа гэсэн гэрчлэлээр хичээлээ дуусгаж болно (Сургаал ба Гэрээ 65:6-г үзнэ үү).

Нэмэлт эх сурвалж

Би хэрхэн Аврагчийн Хоёр дахь ирэлтэд дэлхийг бэлтгэхэд туслах вэ?

Тэргүүн зөвлөл ийнхүү заасан.

Бид Бурхан амьдыг мэднэ. Тэнгэр дэх Эцэгт тань буцаан аваачих гэрээний зам дээр та нарыг гуйвшгүй үлдээсэй хэмээн бид залбирч байна. Ингэснээр та нар сайн нөлөө үзүүлж, сайн мэдээг баяр баясгалантайгаар хуваалцаж, дэлхийг Аврагчийн Хоёр дахь ирэлтэд бэлтгэх болно. (Өсвөр үеийнхний бат бөх байдлын төлөө: Сонголт хийхэд туслах хөтөч (2022), 2)

Иосеф Смит бүх дэлхийд сайн мэдээ түгэх талаар юу заасан бэ?

Огайогийн Көртландад 1834 оны 4-р сард болсон санваарын хурал дээр Иосеф Смитийн заасан зүйлийг Вилфорд Вүдрафф ийн дурсжээ.

Бошиглогч санваар эзэмшдэг бүх хүнийг тэндхийн сургуулийн жижигхэн дүнзэн байшинд цуглуулав. Энэ бол хааш хаашаагаа 4.25 метрийн хэмжээтэй жижигхэн байшин байлаа. Гэвч тэр үед Көртланд хотод байсан Есүс Христийн Хожмын Үеийн Гэгээнтнүүдийн Сүмийн бүх санваартан энэ байшинд багтаж байлаа. … Биднийг цуглахад бошиглогч Израилын ахлагчдыг өөртэйгөө хамт энэ ажлын тухай гэрчлэлээ хэлэхийг уриаллаа. … Тэднийг дуусахад бошиглогч: “Ах нар аа, би өнөө орой та нарын гэрчлэлээс ихэд сэнхэрч, заавар хүлээн авлаа. Гэвч та нар энэ Сүм болон хаант улсын ирээдүйн талаар эхийнхээ өвөр дээр буй нялх хүүхэд лүгээ адил мэдэхгүй байгааг тань би Их Эзэний өмнө хэлэхийг хүсэж байна. Та нар үүнийг ойлгохгүй байна” гэж хэлжээ. Би нэлээд их гайхав. “Өнөө орой энд хуруу дарам цөөхөн санваартан байгааг та нар харж байна. Гэвч энэ Сүм Хойд, Өмнөд Америкийг дүүргэнэ—энэ нь дэлхийг дүүргэнэ” хэмээн тэр хэлсэн юм. (Сүмийн ерөнхийлөгчдийн сургаалаас: Иосеф Смит [2007], 156–157)

Сургаал ба Гэрээ 65:6. “Бурханы хаант улс” ба “тэнгэрийн хаант улс” хоёрын ялгаа юу вэ?

Дэлхий дээрх Бурханы хаант улс бол Есүс Христийн Хожмын Үеийн Гэгээнтнүүдийн Сүм (С ба Г 65) юм. Сүмийн зорилго нь гишүүдээ селестиел хаант улс буюу тэнгэрийн хаант улсад мөнх амьдрахад бэлтгэх явдал билээ. (Судруудын удирдамж дахь “Бурханы хаант улс буюу тэнгэрийн хаант улс”-ыг “scriptures.ChurchofJesusChrist.org” руу орж үзнэ үү)

Нэмэлт суралцах үйл ажиллагаа

Есүс Христийн Сүмийн өсөлт хөгжил

Та суралцагчдад Даниелын бошиглол хэрхэн биелж байгааг харуулахын тулд Сүмийн өсөлтийг нэлээн хэдэн жилээр авч үзэн судлахад тусалж болно (Даниел 2:44–45-ыг үзнэ үү). Та үүнийг Лиахонагийн 5-р сарын хэвлэлд гарсан статистик тайлангаас харуулж болно.

Мөн тэд newsroom.ChurchofJesusChrist.org дахь“Facts and Statistics”-аас өөрсдийн улс орны Сүмийн статистик мэдээллийг олж харах боломжтой.

Сүмийн өсөлт хөгжлийг харах нэг арга бол ариун сүмийн барилгын ажлын өсөлтийг харах явдал юм. Танай ангийн хамгийн ахмад суралцагчийн төрсөн онд хэдэн ариун сүмтэй байсан тоог одоогийн ариун сүмийн тоотой харьцуулах талаар бодож үз. Мөн та дараах мэдээллийг ашиглаж болно.

• Зарлагдсан болон барилгын ажил явагдаж буй ариун сүмүүдийн тоо (ChurchofJesusChrist.org/temples/list).

• “Making Temple Ordinances More Available” (Liahona, July 2022, 13).

• “The Gospel Shall Roll Forth” (2:47).

Израилын цугларалт

“A Witness of God” видеог цагийн код 3:30-аас 5:14 хүртэл үзэхийг бод. Суралцагчид ахлагч Нийл Л.Андэрсэны ярьсан эвлүүлдэг зургийн харьцуулалтаас Израилын цугларалт дэлхийг Хоёр дахь ирэлтэд хэрхэн бэлтгэж байгааг ойлгож авах боломжтой. Тэд эвлүүлдэг зургийн “бусад чухал хэсгийг байрлуулах” арга замуудыг хуваалцаж болно.

Дараа нь та ахлагч Андэрсэны өсвөр үеийнхэнд зориулсан тусгай урилгыг цагийн код 13:24-өөс15:33 хүртэл үзүүлж болох юм. Тэд Израилыг цуглуулахад технологийг хэрхэн ашиглаж буй талаар хуваалцаад, өөрсдөө ямар арга замуудыг ашиглаж болох тухай тунгаан бодож эсвэл ярилцаж болно.

Сургаал ба Гэрээ 66. Бурхан та нарыг болон та нарын хэрэгцээг мэддэг

Та энэ хичээлийн нэг хэсэгт Сургаал ба Гэрээ 66-г заахаар сонгож болно. Үүний тулд та дараах асуултуудыг самбарт бичээд, суралцагчдыг хариултаа хуваалцахад урь.

• Бидэнд зориулсан Бурханы хүслийг ойлгох нь яагаад адислал вэ?

• Надад зориулсан Бурханы хүслийг би яаж мэдэж авах вэ?

Суралцагчдад энэ хэсгийн түүхэн нөхцөл байдлыг ойлгоход туслахын тулд Виллям Э.Маклеллин баптисм хүртсэнийхээ дараахан бошиглогч Иосеф Смиттэй уулзаж, түүний өмнөөс Их Эзэнээс лавлахыг хүссэн гэдгийг тайлбарла. Суралцагчид уг хэсгийн гарчгийг уншаад, Виллям Иосефоос гуйхаас өмнө юу хийснийг олж мэдэх боломжтой.

Тэд Сургаал ба Гэрээ 66:4–10-ыг уншаад, Их Эзэн Виллямаас юу хийхийг хүссэнийг олж мэд. Тэднийг олж мэдсэн зүйлээ бусадтайгаа хуваалцахад урь. Дараа нь бидэнд зориулсан Их Эзэний хүслийг дагаснаар хүлээн авах адислалуудын талаар ярилцаж болно. Суралцагчдыг өдөр тутмын залбирлаар дамжуулан Их Эзэний хүслийг эрэлхийлэхэд урамшуул.