Lesson 78: Doktrina at mga Tipan 64–66

Doktrina at mga Tipan 64:20–43

“Hinihingi ng Panginoon ang Puso at may Pagkukusang Isipan”

Nang hangarin ng mga naunang Banal na itatag ang Sion, hiniling ni Jesucristo sa kanila na magsakripisyo at mag-ambag sa iba’t ibang paraan. Sa patuloy nating pagsisikap na sundin si Jesucristo, hinihiling Niya na ibigay natin sa Kanya ang ating puso at may pagkukusang isipan. Ang lesson na ito ay makatutulong sa mga estudyante na makadama ng mas matinding hangaring ibigay sa Panginoon ang kanilang puso at may pagkukusang isipan.

Mga Posibleng Aktibidad sa Pag-aaral

Mga personal na ari-arian

Maaari mong simulan ang klase sa pamamagitan ng pagsasabi sa mga estudyante na mag-isip ng mga personal na ari-arian na itinuturing nilang mahalaga. Maaari kang magbigay ng mga tanong na maaaring magbigay-daan sa pagbabahagi sa klase o sa maliliit na grupo. Halimbawa:

• Ano ang isang bagay na pag-aari mo na pinagsikapan mong matamo?

• Ano ang isang bagay na pag-aari mo na mahirap para sa iyo na ibigay sa iba? Bakit magiging mahirap ito?

Ang bukid ni Isaac Morley

Maaari mong ipakita ang larawan sa simula ng lesson na ito at ipabasa nang malakas sa isang estudyante ang sumusunod na impormasyon.

Nagsikap nang husto sina Isaac at Lucy Morley na magkaroon ng isang masaganang 80-acre na bukid malapit sa Kirtland, Ohio. Bilang bahagi ng kanilang mga paniniwala sa relihiyon, inanyayahan nila ang mga tao na manirahan sa kanilang lupain, nagbahagi ng kanilang mga ari-arian, at ginawang magkakatulad sa lahat ng bagay ang isa’t isa. Nang tumigil ang mga missionary na mga Banal sa mga Huling Araw sa Kirtland, ipinangaral nila ang mensahe ng Pagpapanumbalik sa mga naninirahan sa bukid ni Morley. Kabilang sa mga nagbalik-loob ay sina Isaac at Lucy Morley. Hindi nagtagal matapos silang mabinyagan, malugod na tinanggap ng mga Morley sina Joseph at Emma Smith na manirahan sa kanilang bukid. (Tingnan sa Susan Easton Black, Who’s Who in the Doctrine and Covenants [1997], 198.)

Basahin ang Doktrina at mga Tipan 64:20, at alamin ang mga tagubilin ng Panginoon kay Isaac Morley.

• Sa iyong palagay, paano ka tutugon kung ikaw ang nasa sitwasyon ni Isaac? Bakit?

• Paano makatutulong sa iyong pagsunod ang kaalamang nagmula sa Tagapagligtas ang tagubilin?

Ipaliwanag na iniutos noon pa kay Isaac na ipagbili ang kanyang bukid at tumanggi ito. Ngunit nang matanggap niya ang paghahayag na ito, masunuring ipinagbili ni Isaac ang kanyang bukid, ibinigay ang pera sa Simbahan, at inilipat ang kanyang pamilya sa Missouri upang tumulong sa pagtatayo ng Sion. Maaari mo ring ipaliwanag na sinabihan ang ibang kalalakihan sa paghahayag na ito na huwag ipagbili ang kanilang mga ari-arian (tingnan sa Doktrina at mga Tipan 64:21, 26). Inilaan ng mga kalalakihang ito ang kanilang mga ari-arian sa Panginoon sa pamamagitan ng paggamit sa mga ito upang suportahan ang Simbahan at mga Banal sa Kirtland. Maaaring magandang pagkakataon ito para ipaalala sa mga estudyante ang mga katotohanang natutuhan nila tungkol sa Tagapagligtas at sa batas ng paglalaan sa Doktrina at mga Tipan 42:29–39.

Hinihingi ng Panginoon ang ating puso at may pagkukusang isipan

Ipaliwanag na bagama’t maaaring hindi iniuutos sa atin ng Panginoon na ipagbili ang ating ari-arian, may mga bagay Siyang hinihiling sa atin habang nagsisikap tayong sumunod sa Kanya.

Basahin ang Doktrina at mga Tipan 64:22, 34. Alamin ang mga hinihingi ng Panginoon sa atin.

• Ano ang nalaman mo?

Tulungan ang mga estudyante na matukoy na hinihingi ng Panginoon na ibigay natin sa Kanya ang ating puso at may pagkukusang isipan.

Mag-isip ng mga paraan para matulungan ang iyong mga estudyante na mas maunawaan ang ibig sabihin ng ibigay sa Panginoon ang ating puso at may pagkukusang isipan. Ang isang paraan ay anyayahan ang mga estudyante na ipagpalagay na hiniling sa kanilang tumulong sa pagsusulat ng isang lesson sa Pumarito Ka, Sumunod Ka sa Akin para sa Doktrina at mga Tipan 64. Nang mag-isa o sa maliliit na grupo, maaaring pag-aralan ng mga estudyante ang mga sumusunod na banal na kasulatan o ang mga banal na kasulatang nahanap nila nang mag-isa, pagkatapos ay magsulat ng paliwanag kung ano ang ibig sabihin ng ibigay sa Panginoon ang ating puso at may pagkukusang isipan. Pahintulutan sila na ibahagi at talakayin ang isinulat nila.

Hikayatin ang mga estudyante na maghangad ng personal na paghahayag para malaman kung paano nila personal na maibibigay sa Panginoon ang kanilang puso at may pagkukusang isipan.

Basahin ang mga sumusunod na scripture passage at maghanap ng mga kabatirang makatutulong sa iyo na maunawaan ang ibig sabihin ng ibigay sa Panginoon ang ating puso at may pagkukusang isipan. Maaari kang magsulat ng paliwanag sa iyong study journal.

Mga Turo sa mga Banal na Kasulatan

• Mga Kawikaan 3:5–6

• Mateo 22:36–39

• Mosias 3:19

• Doktrina at mga Tipan 20:77, 79

Mga Halimbawa mula sa Buhay ng Tagapagligtas

• Juan 6:38

• Lucas 22:42

• 3 Nephi 27:13–14

• Doktrina at mga Tipan 19:24

• Paano naging mabuting halimbawa si Jesucristo ng pagbibigay ng Kanyang puso at may pagkukusang isipan sa Ama sa Langit?

• Sa mga pagsisikap mong sundin si Jesucristo, paano nakagawa ng kaibhan sa iyong buhay ang pagbibigay sa Kanya ng iyong puso at may pagkukusang isipan?

Maaari kang maglaan ng oras para tulungan ang mga estudyante na maunawaan na may pagkakaiba sa pagitan ng paggawa lamang ng iniuutos sa atin ng Panginoon at pagsunod sa Kanya nang may puso at may pagkukusang isipan.

Maaari mong anyayahan ang mga estudyante na ilista sa pisara ang maraming kautusan na iniuutos sa atin ng Panginoon na sundin o mga sakripisyo na maaari Niyang ipagawa sa atin. Sabihin sa mga estudyante na talakayin nang magkakapartner o sa maliliit na grupo kung paano natin maibibigay sa Panginoon ang ating puso at may pagkukusang isipan habang ginagawa natin ang mga bagay na ito. Halimbawa, maaari nilang talakayin kung paano natin maibibigay sa Panginoon ang ating puso at may pagkukusang isipan habang nagsisikap tayong panatilihing banal ang araw ng Sabbath.

Personal na pagninilay

Kung pinili mong isulat sa pisara ang mga kautusan o sakripisyo, sabihin sa mga estudyante na tingnan ang listahan at pagnilayan ang kanilang kahandaang gawin ang mga bagay na ito. Maaari mong tagubilinan ang mga estudyante na magdrowing ng puso at isipan sa kanilang study journal. Maaari mong i-display ang larawan sa ibaba bilang isang template. Sabihin sa kanila na pag-isipan kung gaano kalaking bahagi ng kanilang puso at isipan ang ibinibigay nila sa Tagapagligtas at pagkatapos ay kulayan ang larawan batay sa laki ng ibinibigay nila sa Kanya. Pagkatapos ay maaari mo silang anyayahang pag-isipan at isulat ang kanilang mga sagot sa mga sumusunod na tanong.

• Ano ang natutuhan mo ngayon na makadaragdag sa iyong hangaring ibigay sa Panginoon ang iyong puso at may pagkukusang isipan?

• Sa iyong palagay, paano makatutulong sa iyo ang pagbibigay ng iyong puso at isipan sa Tagapagligtas para maging higit na katulad Niya?

Maaari mong anyayahan ang mga estudyante na ibahagi ang nadama at natutuhan nila. Maaari ka ring magpatotoo o magbahagi ng isang karanasan kung saan nakita mong ibinigay ng isang tao sa Panginoon ang kanyang puso at may pagkukusang isipan.

Karagdagang Resources

Doktrina at mga Tipan 64:23–25. Ano ang ibig sabihin ng “gagawa habang ito ay tinatawag na ngayon”?

Ginamit ng Panginoon ang salitang ngayon upang tukuyin ang panahon mula nang matanggap ang Doktrina at mga Tipan 64 hanggang sa Ikalawang Pagparito (tingnan sa Doktrina at mga Tipan 64:23). Mula sa pananaw ng Panginoon, ang ngayon ay tumutukoy sa “buhay na ito,” ang panahon para sa mga anak ng Diyos na “gampanan ang mga gawain” at “maghanda sa pagharap sa Diyos” (Alma 34:32; tingnan din sa Alma 34:31, 33–35). Sa Doktrina at mga Tipan 64:24, ang salitang bukas ay tumutukoy sa pagkalipol ng masasama sa Ikalawang Pagparito ni Jesucristo.

Doktrina at mga Tipan 64:23. Ano ang ikapu na tinutukoy ng Panginoon?

Sa halip na porsyento ng mga kita, ang salitang ikapu sa Doktrina at mga Tipan 64:23 ay tumutukoy sa lahat ng kontribusyon ng mga Banal sa Simbahan, lalo na sa ilalim ng batas ng paglalaan. Ipinangako ng Panginoon sa mga sumusunod sa mga batas ng sakripisyo at paglalaan na maliligtas sila sa pagkasunog na lilipol sa mga hindi nagsisisi sa huling araw. Ang nauunawaan natin sa kasalukuyan tungkol sa batas ng ikapu ay lalo pang nilinaw noong 1838, nang ibigay ng Panginoon ang paghahayag na nakatala sa Doktrina at mga Tipan 119.

Paano ko maibibigay sa Panginoon ang aking puso at may pagkukusang isipan?

Itinuro ni Elder Jörg Klebingat ng Pitumpu:

Gawin ang mga tamang bagay para sa mga tamang dahilan. Ang Panginoon, na “hinihingi ang puso at may pagkukusang isipan” (D&T 64:34) at “taga-unawa ng mga saloobin at layunin ng puso” (D&T 33:1), ay batid kung bakit kayo nagsisimba—kung basta naroon lamang kayo o tunay kayong sumasamba. … Alalahanin na ang pagwawalang-bahala sa mga bagay na espirituwal ay hindi kailanman kaligayahan. Ituon ang buong buhay ninyo sa Simbahan at sa ipinanumbalik na ebanghelyo, hindi lamang bahagi ng inyong buhay sa labas o sa lipunan. (Jörg Klebingat, “Paglapit sa Luklukan ng Diyos nang may Tiwala,” Liahona, Nob. 2014, 36)

Ibinahagi ni Elder Donald L. Hallstrom, na dating miyembro ng Panguluhan ng Pitumpu:

Ang puso ay simbolo ng pagmamahal at katapatan. Nagsasakripisyo tayo at nagdadala ng mga pasanin para sa mga mahal natin sa buhay na hindi natin titiisin sa iba pang kadahilanan. Kung walang pagmamahal, nababawasan ang ating katapatan.

Kung mahal natin ang Panginoon nang buong puso natin, handa tayong ibigay sa Kanya ang lahat ng pag-aari natin. …

Ang pagkakaroon ng “may pagkukusang isipan” ay nagpapahiwatig na ginagawa natin ang lahat at iniisip natin ang pinakamaganda at hinahangad natin ang karunungan ng Diyos. Ito ay nagpapahiwatig na ang dapat na patuloy nating masigasig na pinag-aaralan ay ang mga bagay na pangwalang-hanggan. Ibig sabihin nito, kailangang may isang hindi mapaghihiwalay na kaugnayan sa pagitan ng pakikinig sa salita ng Diyos at pagsunod dito. (Donald L. Hallstrom, “The Heart and a Willing Mind,” Ensign, Hun. 2011, 31–32)

Upang mas maunawaan kung paano natin maibibigay ang ating puso at isipan sa Panginoon, maaari mong panoorin ang “Buong Puso Natin” ni Elder Dieter F. Uchtdorf ng Korum ng Labindalawang Apostol mula sa time code na 12:25 hanggang 13:37.

Mga Karagdagang Aktibidad sa Pag-aaral

Mga Halimbawa mula sa kasaysayan ng Simbahan

Maaari mong pagpartner-partnerin ang mga estudyante. Bigyan ang bawat isa sa magkapartner na estudyante ng magkaibang kuwento mula sa kasaysayan ng Simbahan, tulad ng mga nakalista sa ibaba. Sabihin sa mga estudyante na basahin ang kuwento at pagkatapos ay ibahagi ito sa kanilang kapartner kasama ang paliwanag kung paano naging mabubuting halimbawa ang mga taong ito ng pagbibigay ng kanilang puso at isipan sa Panginoon. Pagkatapos ay maaaring magbahagi ang mga estudyante ng personal na halimbawa mula sa sarili nilang buhay o sa isang taong kilala nila.

Isaac at Lucy Morley

Matapos lumipat sa Missouri, ang pamilya nina Isaac at Lucy Morley ay naharap sa matinding pag-uusig sa relihiyon. Palagi silang natatakot na susunugin ng mga mandurumog ang kanilang tahanan. Nagtago si Isaac sa isang taniman ng mais nang isang buwan para makatakas sa mga mandurumog. Sa lahat ng pag-uusig, nanatiling tapat ang mga Morley sa kanilang pananampalataya. Sa isang okasyon, si Isaac ay kabilang sa anim na kalalakihan na nag-alok na ibibigay ang kanilang buhay kung pakakawalan ng mga mandurumog ang kanilang mga kaibigan. Ilang beses pang inilipat nina Isaac at Lucy ang kanilang pamilya, habang palaging inaalala ang kapakanan ng iba na nagsisikap ding matakasan ang pang-uusig. Kalaunan ay naglakbay sina Isaac at Lucy pakanluran kasama ang mga Banal. Sa ilalim ng pamamahala ni Brigham Young, tumulong sila sa paninirahan sa Manti, Utah. (Tingnan sa Susan Easton Black, Who’s Who in the Doctrine and Covenants [1997], 199–200.)

Edward at Lydia Partridge

Habang naglalakbay kasama si Propetang Joseph, iniutos kay Edward Partridge na manatili sa Independence, Missouri, at tumulong sa pagtatayo ng Sion. Nag-alala si Edward na hindi niya kaya ang gawain. Sa isang liham sa kanyang asawang si Lydia, isinulat niya, “Ako ay natatakot na ang atas sa akin ay higit pa sa kaya kong gawin upang maging katanggap-tanggap sa aking Ama sa Langit. Ipagdasal mo ako na hindi ako mabigo” (Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 [2018], 149). Natanggap ni Lydia ang liham at inihanda niya ang kanyang pamilya na lumipat sa Independence at samahan ang kanyang asawa. Hindi makapaniwala ang mga kapitbahay na iiwan ng mga Partridge ang kanilang magandang tahanan at maunlad na negosyo. Alam ni Lydia na ang pag-iwan sa kanyang tahanan ay isang pagsubok, ngunit naniniwala siya na isang karangalan ang maglatag ng saligan ng lunsod ng Diyos. (Tingnan sa Mga Banal, 1:130–31, 149–50.)

Bilang alternatibo, maaari ninyong panoorin ang “The Heart and a Willing Mind” (7:57) o “Your Day for a Mission” (3:31) bilang isang klase. Sabihin sa mga estudyante na maghanap ng mga halimbawa kung paano ibinigay ng mga tao sa Panginoon ang kanilang puso at may pagkukusang isipan.

Doktrina at mga Tipan 64:34. Ang puso, may pagkukusang isipan, at pagtanggap ng paghahayag

Kung nais ng iyong mga estudyante na mas maunawaan kung paano tumanggap ng paghahayag mula sa Ama sa Langit, matutulungan mo silang ikonekta kung ano ang hinihingi ng Panginoon sa Doktrina at mga Tipan 64:34 sa kung paano nakikipag-ugnayan sa atin ang Ama sa Langit, tulad ng itinuro sa Doktrina at mga Tipan 8:2–3. Matapos pag-aralan ng mga estudyante ang ibig sabihin ng ibigay sa Panginoon ang kanilang puso at may pagkukusang isipan sa bahagi 64, maaari mong talakayin kung paano ito makatutulong sa kanila na makatanggap ng paghahayag. Bilang bahagi ng talakayang ito, maaari mong anyayahan ang mga estudyante na rebyuhin ang talata 1–3 sa bahaging “Pagtatamo ng Espirituwal na Kaalaman” ng Doctrinal Mastery Core Document (2023), at alamin ang huwarang itinakda ng Panginoon para makatanggap tayo ng paghahayag mula sa Kanya.

• Paano nakatutulong sa iyo ang pagbibigay sa Panginoon ng iyong puso at may pagkukusang isipan para makatanggap ka ng paghahayag mula sa Kanya sa iyong isipan at sa iyong puso?

Doktrina at mga Tipan 64:33. “Mula sa maliliit na bagay nagmumula ang yaong dakila”

Maaari mong ipanood ang “Flecks of Gold” (3:15). Sabihin sa mga estudyante na alamin ang mga katotohanan mula sa Doktrina at mga Tipan 64:33 na makikita sa video na ito. Pagkatapos ay maaari silang magbahagi ng mga halimbawa ng “maliliit na bagay” na magagawa natin na nakagagawa ng malaking kaibhan sa ating mga pagsisikap na sundin si Jesucristo.

Maaari mo ring sabihin sa mga estudyante na basahin ang Alma 37:6–7 o magbahagi ng mga kuwento mula sa sarili nilang buhay o sa mga banal na kasulatan na naglalarawan sa katotohanang ito.

Isang paulit-ulit na paanyaya

Maaari mong sabihin sa mga estudyante na markahan ang magkatulad na parirala na inulit sa Doktrina at mga Tipan 64:22 at Doktrina at mga Tipan 64:34. Pagkatapos ay maaari mong ipaliwanag na paulit-ulit tayong inaanyayahan ng Tagapagligtas na ibigay sa Kanya ang ating puso at isipan sa buong banal na kasulatan. Sabihin sa mga estudyante na iugnay ang Doktrina at mga Tipan 64:34 sa Doktrina at mga Tipan 4:2 at Mateo 22:36–39. Sabihin sa kanila na magbahagi ng mga karagdagang kaalaman mula sa mga talatang ito o sa iba pang mga talata na makatutulong o makahihikayat sa atin na ibigay sa Panginoon ang ating puso at isipan.

Doktrina at mga Tipan 64:41–43. Isang sagisag sa mga tao

Anyayahan ang mga estudyante na basahin ang Doktrina at mga Tipan 64:41–43 at alamin kung paano inilarawan ng Panginoon ang Sion. Maaari mong ipaliwanag na ang sagisag ay “isang watawat o bandila kung saan ang mga tao ay nagtitipon sa pagkakaisa ng layunin o pagkakakilanlan” (Gabay sa mga Banal na Kasulatan, “Sagisag,” scriptures.ChurchofJesusChrist.org). Maaari mong anyayahan ang mga estudyante na saliksikin ang “Mga Kasaysayan mula sa Iba’t Ibang Panig ng Mundo” sa bahaging “Kasaysayan ng Simbahan” ng Gospel Library para maghanap ng mga salaysay tungkol sa mga tao mula sa maraming bansa na nagtitipon sa Simbahan ng Tagapagligtas. Maaari nilang basahin ang isang kuwento at ibahagi ito sa kapartner o sa maliliit na grupo.