Lesson 79: Doktrina at mga Tipan 64–66

Doktrina at mga Tipan 65

“Ihanda Ninyo ang Daan ng Panginoon … Upang ang Kaharian ng Langit ay Dumating”

Ang isang mahalagang responsibilidad ng Ang Simbahan ni Jesucristo ng mga Banal sa mga Huling Araw at ng mga miyembro nito ay tumulong sa paghahanda sa mundo para sa pagbabalik ng Tagapagligtas. Sa Doktrina at mga Tipan 65, inihayag ng Panginoon ang mahalagang tungkuling ito sa Kanyang Propetang si Joseph Smith at sa mga Banal. Ang lesson na ito ay makatutulong sa mga estudyante na maunawaan ang papel na ginagampanan ng Simbahan sa paghahanda sa mundo para sa Ikalawang Pagparito ni Jesucristo.

Mga Posibleng Aktibidad sa Pag-aaral

Paghahanda sa aktibidad

Ang isang paraan para masimulan ang lesson na ito ay tulungan ang mga estudyante na pag-isipan ang mga sitwasyon kung saan mahalaga ang paghahanda. Maaaring makatulong ang mga sumusunod na tanong.

• Ano ang isang aktibidad na nasisiyahan kang gawin na nangangailangan ng masusing paghahanda?

• Kung tinutulungan mo ang isang tao na maghanda para sa aktibidad na ito, ano ang gusto mong malaman niya? Anong tulong o resources ang ibibigay mo sa kanya?

Bigyan ang mga estudyante ng pagkakataong ibahagi ang kanilang mga sagot sa iba pang mga estudyante.

Tulungan ang mga estudyante na maituon ang isipan tungkol sa kung ano ang itinutulong sa atin ng Ang Simbahan ni Jesucristo ng mga Banal sa mga Huling Araw na paghandaan natin.

Tulad ng iyong aktibidad na kailangang paghandaan nang mabuti, may darating na mga pangyayari na kailangan nating paghandaan. Itinatag ng Panginoon ang Kanyang Simbahan upang tulungan tayong maghanda.

• Para saan tayo inihahanda ng Kanyang Simbahan?

Ipaliwanag sa mga estudyante na inihahanda tayo ng Kanyang Simbahan para sa maraming bagay, at hikayatin silang magbahagi ng maraming bagay hangga’t kaya nila. Sabihin sa kanila na alamin ang isa sa mga ito sa Doktrina at mga Tipan 65.

“Ihanda ninyo ang daan ng Panginoon”

Noong Setyembre 12, 1831, lumipat si Joseph Smith at ang kanyang pamilya nang 30 milya sa timog-silangan ng Kirtland, Ohio, papunta sa tahanan nina John at Alice Johnson sa Hiram, Ohio. Isang service sa simbahan ang ginanap sa tahanan ng mga Johnson sa araw ng Linggo, Oktubre 30, 1831. Sa araw ding iyon, natanggap ng Propeta ang paghahayag na nakatala sa Doktrina at mga Tipan 65.

Maaaring sanayin ng mga estudyante ang kasanayan sa pag-aaral ng mga banal na kasulatan sa paghahanap ng mga paulit-ulit na salita at parirala habang binabasa nila ang mga sumusunod na talata. Maaari mo silang hikayatin na i-highlight ang salitang “ihanda” sa tuwing makikita nila ito sa mga talatang ito. Maaari din nilang isulat ang pariralang “ihanda” sa talata 3.

Basahin ang Doktrina at mga Tipan 65:1, 3 at alamin ang paanyaya ng Tagapagligtas.

• Ano ang nalaman mo?

Basahin ang Doktrina at mga Tipan 65:2, at alamin ang ibinigay sa atin ng Tagapagligtas para tulungan tayong maghanda para sa Kanyang Ikalawang Pagparito.

• Sa anong mga salita o parirala ka may mga tanong?

  Upang matulungan ang mga estudyante na masuri at maunawaan ang mga parirala sa talata 2–3, itanong sa kanila kung ano sa palagay nila ang ibig sabihin ng mga parirala. Maaari mong ibahagi o i-display ang ilan sa mga sumusunod na nilalaman kung kinakailangan:

  1. “Ang mga susi ng kaharian,” o “mga susi ng pagkasaserdote,” ay “mga karapatan ng panguluhan, o ang kapangyarihang ibinigay sa tao ng Diyos upang mamatnugot, at pamahalaan ang pagkasaserdote ng Diyos sa mundo” (Gabay sa mga Banal na Kasulatan, “Susi ng Pagkasaserdote, Mga,” scriptures.ChurchofJesusChrist.org). Tingnan din sa Mateo 16:18–19.

  2. “Ang batong natibag sa bundok, hindi ng mga kamay” ay “ang Simbahan ng Panginoon [na lalaganap] hanggang sa mapuno nito ang buong mundo, ‘na hindi [na] magigiba kailan man … [kundi] lalagi magpakailan man’ [Daniel 2:44]” (Ronald A. Rasband, “Katuparan ng Propesiya,” Liahona, Mayo 2020, 75). Tingnan din sa Daniel 2:31–35, 44–45.

  3. Ang “Maghanda para sa Lalaking Kasintahan” ay tumutukoy sa paraang “isinasagisag si Jesucristo sa mga banal na kasulatan bilang Kasintahang Lalaki. Ang Simbahan ang sumasagisag sa Kanyang kasintahang babae” (Gabay sa mga Banal na Kasulatan, “Kasintahang Lalaki,” scriptures.ChurchofJesusChrist.org). Tingnan din sa Apocalipsis 19:7–9.

  Para sa mga karagdagang ideya kung paano tutulungan ang mga estudyante na matuklas ang paglago ng Simbahan, tingnan ang bahaging “Mga Karagdagang Aktibidad sa Pag-aaral” ng lesson na ito.

• Paano mo ibubuod ang matututuhan natin mula sa mga talatang ito bilang pahayag ng katotohanan?

Maaaring magbahagi ang mga estudyante ng isang buod na tulad ng ipinanumbalik ni Jesucristo ang Kanyang Simbahan upang tulungan tayong ihanda ang ating sarili at ang iba para sa Kanyang Ikalawang Pagparito. Maaari mong ipasulat sa kanila ang katotohanang ito sa tabi ng talata 1–3.

Ipinahayag ni Elder D. Todd Christofferson ng Korum ng Labindalawang Apostol:

Ang Simbahan ni Jesucristo ng mga Banal sa mga Huling Araw ay ang katangi-tanging binigyang-kapangyarihan at inatasan na gawin ang mga kinakailangang paghahanda para sa Ikalawang Pagparito ng Panginoon; tunay ngang ito ay ipinanumbalik para sa layuning iyon. … Ang Simbahan ni Jesucristo ay inatasang maghanda—at inihahanda nito—ang mundo para sa araw na iyon. (D. Todd Christofferson, “Paghahanda para sa Pagbabalik ng Panginoon,” Liahona, Mayo 2019, 82, 84)

• Ano ang naiisip o nadarama mo tungkol sa pahayag na ito?

• Paano naihahanda ng Simbahan ang mundo sa natatanging paraan para sa pagbabalik ng Tagapagligtas?

• Anong mga paghahanda ang sa palagay mo ay kailangan para sa araw na iyon?

Maaari mong ilista sa pisara ang mga paraan na tumutulong ang Simbahan na maihanda ang mga tao para sa Ikalawang Pagparito. Kung nahihirapan ang mga estudyante na mag-isip ng mga ideya, maaari mong ibahagi sa kanila ang apat na responsibilidad na ibinigay ng Diyos sa Simbahan. Kabilang dito ang pagtulong sa gawain ng Diyos sa pamamagitan ng (1) pagsasabuhay ng ebanghelyo ni Jesucristo, (2) pangangalaga sa mga nangangailangan, (3) pag-anyaya sa lahat na tanggapin ang ebanghelyo, at (4) pagbubuklod ng mga pamilya para sa kawalang-hanggan (tingnan sa Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw, 1.2, ChurchofJesusChrist.org). Maaari mong ilista ang mga ito sa pisara at sabihin sa mga estudyante na magbahagi ng iba pang mga partikular na paraan na kabilang sa bawat isa sa mga heading na ito na nakatutulong na maihanda ang mga tao para sa Ikalawang Pagparito ng Panginoon.

“Manawagan sa Panginoon, upang ang Kanyang kaharian ay lumaganap”

Basahin ang Doktrina at mga Tipan 65:4–6, at alamin ang itinuro ng Tagapagligtas na magagawa ng bawat isa sa atin para makatulong na maihanda ang mundo para sa Kanyang Ikalawang Pagparito.

• Ano ang natuklasan mo?

• Ano ang ilan sa “mga kamangha-manghang gawa” ng Tagapagligtas na naisasakatuparan sa pamamagitan ng Kanyang Simbahan? (Tingnan sa Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw, 1.2, 1.3, ChurchofJesusChrist.org.)

• Paano nakatutulong ang mga gawaing ito na ihanda tayo at ang iba para sa Ikalawang Pagparito ng Tagapagligtas?

Maaari mong bigyan ang mga estudyante ng pagkakataon sa loob at labas ng klase na “ipaalam ang kanyang mga kamangha-manghang gawa” (Doktrina at mga Tipan 65:4). Maaari nilang talakayin ang mga paraan para maibahagi sa kanilang pamilya at mga kaibigan o sa iba pa.

Itinuro ni Pangulong Russell M. Nelson na ang isang bagay na magagawa natin ay “manawagan sa Panginoon, upang ang kanyang kaharian ay lumaganap sa mundo” (Doktrina at mga Tipan 65:5).

2018 Pandaigdigang Debosyonal para sa Kabataan

Sina Pangulong Russell M. Nelson at Sister Wendy Nelson ay nagsalita sa Pandaigdigang Debosyonal para sa Kabataan noong ika-3 ng Hunyo, 2018

Ang … paanyaya ko ay na ipagdasal ninyo araw-araw na matanggap ng lahat ng mga anak ng Diyos ang mga biyaya ng ebanghelyo ni Jesucristo. Ikaw at ako ay nabubuhay upang makita, at patuloy na makikita, ang Israel na natipon nang may pambihirang kapangyarihan. At maaari kang maging bahagi ng lakas sa likod ng pagtitipon na iyon! (Russell M. Nelson at Wendy W. Nelson, “Pag-asa ng Israel” [pandaigdigang debosyonal para sa mga kabataan, Hunyo 3, 2018], ChurchofJesusChrist.org)

Sabihin sa mga estudyante na pag-isipan ang paanyaya ni Pangulong Nelson. Matapos silang magkaroon ng pagkakataong mag-isip, anyayahan silang magbahagi ng mga naging karanasan nila sa pagsunod sa kanyang paanyaya.

Maaari mong tapusin ang lesson sa pagpapatotoo na ang Simbahan, o “kaharian ng Diyos,” ay naghahanda ng daan upang dumating ang “kaharian ng langit” kapag bumalik ang Tagapagligtas (tingnan sa Doktrina at mga Tipan 65:6).

Karagdagang Resources

Paano ko matutulungan ang mundo na maghanda para sa Ikalawang Pagparito ng Tagapagligtas?

Itinuro ng Unang Panguluhan:

Alam namin na buhay ang Diyos. Dalangin namin na manatili kayong matatag sa landas ng tipan pabalik sa inyong Ama sa Langit. Sa paggawa nito, magiging impluwensya kayo para sa kabutihan, na masayang nagbabahagi ng ebanghelyo at naghahanda sa mundo para sa Ikalawang Pagparito ng Tagapagligtas. (Para sa Lakas ng mga Kabataan: Isang Gabay sa Paggawa ng mga Pagpili [2022], 2)

Ano ang itinuro ni Joseph Smith tungkol sa pagpuno ng ebanghelyo sa buong mundo?

Ibinahagi ni Wilford Woodruff ang itinuro ni Joseph Smith sa isang pagtitipon ng mga maytaglay ng priesthood sa Kirtland, Ohio, noong Abril 1834:

Pinagtipon ng Propeta ang lahat ng maytaglay ng Priesthood sa munting paaralang yari sa troso na naroon. Maliit ang bahay na iyon, mga 4.25 metro kuwadrado marahil. Gayunman nagkasya roon ang buong Priesthood ng Simbahan ni Jesucristo ng mga Banal sa mga Huling Araw na noon ay nasa bayan ng Kirtland. … Nang magkasama-sama kami nanawagan ang Propeta sa mga Elder ng Israel na patotohanan ang gawaing ito. … Nang matapos sila sinabi ng Propeta, “Mga kapatid, lubos akong nabigyan ng inspirasyon at natuto sa inyong mga patotoo ngayong gabi, ngunit gusto kong sabihin sa inyo sa harap ng Panginoon, na ang nalalaman ninyo hinggil sa tadhana ng Simbahang ito ay katulad lamang ng nalalaman ng isang sanggol na nasa kandungan ng kanyang ina. Hindi ninyo ito nauunawaan.” Medyo nagulat ako. Sabi niya, “Kakaunti lamang ang nakikita ninyo ritong mga Priesthood ngayong gabi, ngunit pupunuin ng Simbahang ito ang Hilaga at Timog Amerika—pupunuin nito ang buong mundo.” (Mga Turo ng mga Pangulo ng Simbahan: Joseph Smith [2007], 160)

Doktrina at mga Tipan 65:6. Ano ang pagkakaiba ng “kaharian ng Diyos” at ng “kaharian ng langit”?

Ang kaharian ng Diyos sa mundo ay Ang Simbahan ni Jesucristo ng mga Banal sa mga Huling Araw (D&T 65). Ang layunin ng Simbahan ay ihanda ang mga kasapi nito na mabuhay magpasawalang-hanggan sa kahariang selestiyal o kaharian ng langit. (Gabay sa mga Banal na Kasulatan, “Kaharian ng Diyos o Kaharian ng Langit,” scriptures.ChurchofJesusChrist.org)

Mga Karagdagang Aktibidad sa Pag-aaral

Paglago ng Simbahan ni Jesucristo

Maaari mong tulungan ang mga estudyante na saliksikin ang paglago ng Simbahan sa nagdaang mga taon upang matulungan silang makita kung paano natutupad ang propesiya ni Daniel (tingnan sa Daniel 2:44–45). Maaari mong tingnan ang istatistikal na ulat sa edisyon sa Mayo ng Liahona.

newsroom.ChurchofJesusChrist.org

Ang isang paraan para makita ang paglaganap ng Simbahan ay tingnan ang pagdami ng itinatayong templo. Maaari mong ikumpara ang bilang ng mga templo sa taon na isinilang ang pinakamatandang estudyante mo sa kasalukuyang bilang ng mga templo. Maaari mo ring gamitin:

• Ang bilang ng mga templong inanunsyo at kasalukuyang itinatayo (ChurchofJesusChrist.org/temples/list).

• “Ginagawang Mas Available ang mga Ordenansa sa Templo” (Liahona, Hulyo 2022, 13).

• “The Gospel Shall Roll Forth” (2:47).

  The Gospel Shall Roll Forth

  A visual depiction of Church growth by temples and stakes (D&C 65).

Ang pagtitipon ng Israel

Maaari mong panoorin ang “Isang Saksi ng Diyos” mula sa time code na 3:30 hanggang 5:14. Maaaring alamin ng mga estudyante kung paanong ang paghahambing ni Elder Neil L. Andersen sa puzzle ay makatutulong sa atin na maunawaan kung paano inihahanda ng pagtitipon ng Israel ang mundo para sa Ikalawang Pagparito. Maaari silang magbahagi ng mga paraan na makatutulong sila na “mailagay ang iba pang mahahalagang piraso” ng puzzle.

Isang Saksi ng Diyos

Itinuro ni Elder Andersen na dapat nating ibahagi ang ebanghelyo sa iba sa pamamagitan ng pagiging mga saksi sa Diyos sa lahat ng panahon at sa lahat ng lugar.

Pagkatapos ay maaari mong panoorin ang video sa time code na 13:24 hanggang 15:33, at alamin ang espesyal na paanyaya ni Elder Andersen sa mga kabataan. Maaaring ibahagi ng mga estudyante kung paano nila nakitang ginamit ang teknolohiya para tipunin ang Israel, pagkatapos ay pag-isipan o talakayin ang mga paraan na magagamit nila ang teknolohiya para makatulong sa pagtitipon ng Israel.

Isang Saksi ng Diyos

Itinuro ni Elder Andersen na dapat nating ibahagi ang ebanghelyo sa iba sa pamamagitan ng pagiging mga saksi sa Diyos sa lahat ng panahon at sa lahat ng lugar.

Doktrina at mga Tipan 66. Alam ng Diyos ang tungkol sa iyo at sa iyong mga pangangailangan

Maaari mong piliing ituro ang Doktrina at mga Tipan 66 bilang bahagi ng lesson na ito. Para magawa ito, isulat sa pisara ang mga sumusunod na tanong, at sabihin sa mga estudyante na ibahagi kung paano nila sasagutin ang mga ito:

• Bakit isang pagpapala ang malaman ang kalooban ng Diyos para sa atin?

• Paano ko malalaman ang kalooban ng Diyos para sa akin?

Upang matulungan ang mga estudyante na maunawaan ang konteksto ng kasaysayan ng bahaging ito, ipaliwanag na matapos siyang mabinyagan, nakilala ni William E. McLellin si Propetang Joseph Smith at hiniling niya sa kanya na magtanong sa Panginoon para sa kanya. Maaaring basahin ng mga estudyante ang section heading, at alamin ang ginawa ni William bago ang kanyang kahilingan kay Joseph.

Maaaring pag-aralan ng mga estudyante ang Doktrina at mga Tipan 66:4–10, at alamin ang ninais ng Panginoon na gawin ni William. Sabihin sa mga estudyante na ibahagi ang nalaman nila. Pagkatapos ay maaari ninyong talakayin ang mga pagpapalang matatanggap natin kapag sinusunod natin ang kalooban ng Panginoon para sa atin. Hikayatin ang mga estudyante na hangarin ang kalooban ng Panginoon para sa kanilang buhay sa pamamagitan ng araw-araw na panalangin.