Lesson 84: Doktrina at mga Tipan 71–75

I-assess ang Iyong Pagkatuto 5

Doktrina at mga Tipan 51–75

Ang pagninilay at pag-assess sa espirituwal na pagkatuto ay makatutulong sa atin na mas mapalapit sa Tagapagligtas. Ang lesson na ito ay makatutulong sa mga estudyante na maalala at masuri kung paano nakatulong sa kanila ang kanilang mga karanasan sa pag-aaral ng Doktrina at mga Tipan na umunlad sa espirituwal.

Mga Posibleng Aktibidad sa Pag-aaral

Paalala: Maaaring hindi sapat ang oras sa klase para magawa ang bawat oportunidad sa pag-assess na ibibigay sa lesson na ito. Piliin ang mga bahagi na sa palagay mo ay magiging lubos na kapaki-pakinabang sa iyong mga estudyante sa pag-assess ng kanilang pagkatuto.

I-assess ang iyong pag-unlad

Maaari kang magbigay ng pagkakataon sa mga estudyante na magbahagi ng mga sagot sa mga sumusunod na tanong sa maraming kaklase. Magagawa ito sa pamamagitan ng pagbibigay sa kanila ng isang minuto para maghanap ng kaklase at ibabahagi ng bawat isa ang kanilang mga sagot. Maaaring ulitin ito nang maraming beses.

(Maaari kang magbigay ng halimbawa sa pamamagitan ng pagbabahagi ng isang aktibidad na nasisiyahan kang gawin. Maaari kang magdispley o magpakita ng larawan ng isang kasangkapang ginagamit para sukatin ang progreso sa iyong aktibidad. Halimbawa, kung nasisiyahan kang tumakbo, maaari kang magpakita ng stopwatch at ipaliwanag kung paano ito magagamit upang masukat ang iyong bilis sa pagtakbo.)

• Ano ang isang aktibidad na nasisiyahan kang lahukan?

• Paano mo malalaman kung humuhusay ka? Mayroon ka bang partikular na mga kasangkapan na ginagamit para masukat ang iyong progreso?

Tulad ng pagsukat sa ating pisikal na pag-unlad upang matulungan tayong makita ang ating paghusay, kailangan nating maglaan ng oras na suriin ang ating espirituwal na pag-unlad. Ang Espiritu Santo ay kasangkapan sa pagtulong sa atin na sukatin ang ating espirituwal na pag-unlad. Ang isang paraan na maaanyayahan natin ang Espiritu Santo na tulungan tayong makita ang ating pag-unlad ay sa pamamagitan ng mapanalanging pagninilay tungkol sa mga espirituwal na aral na natutuhan natin at pag-iisip kung paano tayo umuunlad sa espirituwal habang ipinamumuhay natin ang mga aral na iyon.

Sabihin sa mga estudyante na basahin ang kanilang mga isinulat at mga banal na kasulatan mula sa nakaraang ilang linggo ng seminary (Doktrina at mga Tipan 51–75), at tingnan ang mga aral na natutuhan nila at ang mga mithiing itinakda nila. Ipakita ang mga sumusunod na tanong upang matulungan ang mga estudyante na pagnilayan ang kanilang espirituwal na pag-unlad. Maaaring piliin ng mga estudyante na isulat ang kanilang mga sagot sa study journal o pagnilayan ang kanilang mga sagot.

• Ano ang ilan sa mga bagay na nagawa mo para maipamuhay ang mga espirituwal na katotohanang natutuhan mo sa seminary? Paano nakatutulong ang pagpapamuhay ng mga katotohanang ito sa pag-unlad mo sa espirituwal?

• Paano mo napansin na tinutulungan ka ng Ama sa Langit at ng Tagapagligtas habang ipinamumuhay mo ang natututuhan mo sa iyong mga pagsisikap na maging higit na katulad Nila?

Bigyan ng pagkakataon ang mga estudyante na magbahagi ng mga sagot na hindi masyadong personal. Hikayatin ang mga estudyante na maging sensitibo sa Espiritu habang naghahanap sila ng mga paraan para mas maipamuhay ang mga aral na ito.

Ipaliwanag ang layunin ng mga kautusan

Maaari mong ipakita ang unang pangungusap ng sumusunod na pahayag ni Pangulong Russell M. Nelson, at gawing blangko ang salitang “mga batas.” Maaaring magmungkahi ang mga estudyante ng mga posibleng opsiyon para sa nawawalang salita. Matapos subukang tukuyin ng mga estudyante ang nawawalang salita, ipakita ang buong pahayag.

Dahil walang katapusan at sakdal ang pagmamahal sa atin ng Ama at ng Anak at dahil alam Nila na hindi natin nakikita ang lahat ng nakikita Nila, binigyan Nila tayo ng mga batas na gagabay at poprotekta sa atin. May matibay na kaugnayan sa pagitan ng pagmamahal ng Diyos at ng Kanyang mga batas. (Russell M. Nelson, “The Love and Laws of God” [Brigham Young University devotional, Set. 17, 2019], 2, speeches.byu.edu)

• Ano ang isang kautusan na nakatulong sa iyo na madama na pinoprotektahan at minamahal ka ng Diyos?

  Sabihin sa mga estudyante na gamitin ang kanilang mga banal na kasulatan at mga isinulat para mahanap ang sagot sa sumusunod na tanong.

• Ano ang ilan sa mga batas ng Diyos na napag-aralan natin kamakailan sa Doktrina at mga Tipan?

Maaari mong ipasulat sa isang estudyante ang mga sagot sa tanong sa pisara. Maaari nilang banggitin ang ilan sa mga sumusunod: pagsisisi (58:42–43), pagpapanatiling banal ng araw ng Sabbath (59:9–13), kalinisang-puri (63:13–16), at pagpapatawad sa iba (64:9–11).

Magdispley ng isang sitwasyon na tulad ng sumusunod. Sabihin sa mga estudyante na sanayin kung paano nila ipaliliwanag ang layunin ng mga kautusan sa kanilang kaibigan. Maaaring makatulong sa kanilang mga sagot ang mga tanong na kasunod ng sitwasyon.

Isipin kunwari na ibinahagi sa iyo ng isa sa mga kaibigan mo ang kanyang pagkainis sa isang kautusan. Iniisip niya kung bakit nag-abala pa ang Diyos na bigyan tayo ng mga kautusan.

Pumili ng isang kautusan na napag-aralan mo sa Doktrina at mga Tipan sa taon na ito at ibahagi:

• Paano naging proteksyon at gabay mula sa ating Ama sa Langit ang kautusang iyan.

• Paano naging katibayan ng pagmamahal ng Diyos ang kautusang iyan.

Pagbibigay ng iyong puso at may pagkukusang isipan sa Panginoon

Bilang bahagi ng pag-aaral ng Doktrina at mga Tipan 64:20–43, maaaring inanyayahan ang mga estudyante na magdrowing ng mga larawan na tulad ng mga sumusunod sa kanilang study journal. Maaari mong ipakita ang larawang ito at sabihin sa mga estudyante na ibahagi ang naaalala nila tungkol sa lesson na iyon. Inanyayahan silang kulayan kung gaano kalaking bahagi ng kanilang puso at isipan ang sa palagay nila ay ibinibigay nila sa Panginoon.

Sabihin sa mga estudyante na hanapin ang kanilang idinrowing o subukang tandaan kung ano ang hitsura nito. Tulungan ang mga estudyante na maalala na ang pagkulay nila sa kanilang puso at isipan noon ay representasyon lamang ng isang sandali. Nababago ito, hindi permanente. Maaari nilang hingin ang tulong ng Tagapagligtas para maging handa silang magbigay ng mas higit pa ng kanilang puso at isipan sa Kanya. Hikayatin ang mga estudyante na pag-isipan ang kanilang mga karanasan sa pamamagitan ng pagsagot sa ilan sa mga sumusunod na tanong sa kanilang study journal.

• Ano ang ginawa o magagawa mo para maragdagan ang iyong hangaring ibigay sa Tagapagligtas ang iyong puso at isipan?

• Anong mga pagbabago ang napansin mo sa hangarin mong ibigay ang iyong puso at isipan sa Tagapagligtas?

• Paano nakaimpluwensya ang iyong mga iniisip at ikinikilos sa pakikipag-ugnayan mo sa iba at kay Jesucristo?

Bigyan ang ilang estudyante ng pagkakataong ibahagi kung ano ang makabuluhan sa kanila tungkol sa karanasang ito at kung paano ito nakaapekto sa kanila.

Pagkatapos ay maaaring magdrowing ang mga estudyante ng pangalawang puso at isipan sa kanilang study journal sa tabi ng kanilang orihinal na drowing. Sabihin sa kanila na kulayan kung gaano kalaking bahagi ng kanilang puso at isipan ang ibinibigay nila ngayon sa Tagapagligtas bilang resulta ng kanilang pagsisikap na magpakabuti pa. Maikukumpara ng mga estudyante ang dalawang larawan at matutukoy nila kung nadagdagan ang kahandaan nilang ibigay sa Tagapagligtas ang kanilang puso at isipan.

Pagpapanatiling banal ng araw ng Sabbath

Maaari mong ipakita ang sumusunod na bahagi ng isang tanong sa temple recommend at anyayahan ang mga estudyante na ibahagi ang natutuhan nila tungkol sa pagpapanatiling banal ng araw ng Sabbath sa taon na ito. (Kung kinakailangan, maaari mong bigyan ng oras ang mga estudyante na mabilisang rebyuhin ang Doktrina at mga Tipan 59 o ang kanilang mga journal entry mula sa lesson tungkol sa bahaging iyon.)

Sinisikap mo bang panatilihing banal ang araw ng Sabbath, kapwa sa tahanan at sa simbahan…

Bilang bahagi ng lesson sa Doktrina at mga Tipan 59, maaaring inanyayahan ang mga estudyante na gumawa ng plano na igalang ang Tagapagligtas sa araw ng Sabbath. Kung inanyayahan sila, sabihin sa kanila na pagnilayan ang naging resulta ng ginawa nila. Maaaring makatulong sa mga boluntaryo na ibahagi sa klase ang bahagi ng kanilang plano.

Maaari mong ipakita ang mga sumusunod na tanong upang matulungan ang mga estudyante na ma-assess ang kanilang mga pagsisikap sa pagpapanatiling banal ng araw ng Sabbath. Sabihin sa mga estudyante na pumili ng dalawa o tatlong tanong mula sa listahan na sasagutin nila sa kanilang study journal.

• Mag-isip ng isang bagay na ginawa mo para mapanatiling banal ang araw ng Sabbath. Paano mas gumanda ang karanasan mo sa araw ng Sabbath dahil dito?

• Paano ka napalapit sa Ama sa Langit at sa Tagapagligtas ng iyong mga pagsisikap na panatilihing banal ang araw ng Sabbath?

• Ano ang ilang hamon na nararanasan mo sa pagpapanatiling banal ng araw ng Sabbath?

• Ano ang isang bagay na gusto mong simulang gawin para mapanatiling banal ang araw ng Sabbath?

• Bakit mahalaga na panatilihing banal ang araw ng Sabbath?

• Ano ang isang bagay sa listahan mo na hindi mo pa nagagawa na maaari mong simulang gawin sa Linggong ito para mapanatiling banal ang araw ng Sabbath?

• Paano mo mas naigalang ang Ama sa Langit at si Jesucristo nang magsimula o tumigil ka sa paggawa ng ilang bagay sa araw ng Sabbath?

Bagama’t layunin ng mga tanong na ito na ma-assess ng mga estudyante ang kanilang sariling mga pagsisikap sa pagpapanatiling banal ng araw ng Sabbath, kung naaangkop, maaari mong anyayahan ang mga estudyante na gustong magbahagi ng ilan sa kanilang mga sagot at karanasan.

Hikayatin ang mga estudyante sa kanilang mga pagsisikap upang matanggap ang mga pagpapala ng paggalang sa araw ng Sabbath, lalo na ang mga estudyante na hindi pa nagawa ito. Maaari mo silang anyayahang mag-set ng paalala sa kanilang telepono na gumawa ng isang bagay para mas mapanatiling banal ang susunod na araw ng Sabbath. Patotohanan ang hangarin ng Tagapagligtas na lumapit sila sa Kanya at na ang pagpapanatiling banal ng araw ng Sabbath ay isang paraan para mapalapit tayo sa Kanya.