Lēsoni 85: Tokāteline mo e Ngaahi Fuakava 76

Tokāteline mo e Ngaahi Fuakava 76:1–19

“Naʻe Fakaava [ʻa e Mata ʻo Homa ʻAtamaí]”

ʻI Sānuali 1832, naʻe fakalaulauloto ai ʻa e Palōfita ko Siosefa Sāmitá mo Sitenei Likitoni ki he ʻuhinga ʻo e Sione 5:29 lolotonga ʻena ngāue ki hono liliu ʻo e Tohi Tapú. ʻI heʻena fakalaulaulotó, naʻá na aʻusia ha ngaahi meʻa-hā-mai hokohoko naʻe fakahā ange ai ʻe he ʻEikí ha ngaahi moʻoni mahuʻinga fekauʻaki mo ʻEne palaní. ʻE lava ke tokoni ʻa e lēsoni ko ʻení ki he kau akó ke nau ako ʻi he mālohi ʻo e Laumālie Māʻoniʻoní ʻi heʻenau tuku ha taimi ke fakalaulauloto ai ki he ngaahi folofola ʻa e Fakamoʻuí.

Ngaahi ʻEkitivitī Ako ʻOku Ala Fakahokó

Ko e fekumi ki ha fakahā fakatāutahá

Fakaʻaliʻali pe hiki e ngaahi fehuʻi ko ʻení ʻi he palakipoé. ʻE lava ke lekooti ʻe he kau akó ʻenau tali ki he ngaahi fehuʻí ʻi heʻenau tohinoa akó. Fakakaukau ke kole ki ha kau ako ʻe loto-fiemālié ke vahevahe ha ngaahi tali ʻoku ʻikai fuʻu fakatāutahá.

• Ko e hā ha ngaahi tūkunga ʻokú ke fehangahangai mo ia, pe te ke ala fehangahangai mo ia, ʻa ia te ke fiemaʻu ai ha fakahinohino mei he ʻEikí ʻo fakafou ʻi he Laumālie Māʻoniʻoní?

• Ko e hā ʻokú ke fiemaʻu ai e tokoni ʻa e ʻEikí ʻi he ngaahi meʻá ni?

Te ke ako ʻi he ʻahó ni fekauʻaki mo ha founga ʻe taha te ke lava ai ʻo fakaafeʻi ʻa e ʻEikí ke folofola atu kiate koe ʻo fakafou ʻi he Laumālie Māʻoniʻoní. ʻI hoʻo akó, tokanga ki he ngaahi ueʻi mei he Laumālié ʻe lava ke tokoni atu ai kiate koe ʻi ha taha ʻo e ngaahi tūkunga pe ngaahi fehuʻi naʻá ke ʻiló.

Ko e mata meʻa-hā-maí

ʻE lava ke tokoni ʻa e fakamatala fakanounou ko ʻení ke teuteuʻi ʻa e kau akó ke ako e Tokāteline mo e Ngaahi Fuakava 76. Fakakaukau pe ʻe lelei taha ke ke lau pe fakamatalaʻi fakanounou ia pe fakaafeʻi ha tokotaha ako ke ne fai ia. Pe ko hoʻo fakaafeʻi ha kau ako ke nau lau mei he Kau Māʻoniʻoní, 1:147 ke ako fekauʻaki mo e ngaahi tūkunga ʻoku iku ki he fakahā ko ʻení.

ʻI he ʻaho 16 ʻo Fēpueli 1832, naʻe fakataha ʻa Siosefa Sāmita, Sitenei Likitoni pea mo ha kau tangata kehe nai ʻe toko 12 ʻi he loki ʻi ʻolunga ʻo e ʻapi ʻo Sione mo ʻElesā Sionisoní, ʻi Hailame, ʻOhaiō. Lolotonga e ngāue ʻa Siosefa mo Sitenei ki hono liliu ʻo e Tohi Tapú, naʻá na ako ʻa e Sione 5:29, ko ha potufolofola naʻe fakamatalaʻi ai ʻa hēvani, pea naʻá na fie ʻilo lahi ange ki ai. ʻI heʻena fakalaulaulotó, naʻá na mamata ki ha meʻa-hā-mai, ʻa ia ʻoku lekooti ʻi he Tokāteline mo e Ngaahi Fuakava 76. Naʻe fakahā ʻe he Fakamoʻuí kia Siosefa mo Sitenei ha ngaahi meʻa-hā-mai makehe naʻá ne akoʻi kiate kinaua ha ngaahi moʻoni mahuʻinga fekauʻaki mo e palani ʻo e fakamoʻui ʻa e Tamai Hēvaní.

Fakamatalaʻi ange ʻi hono ako ʻe he kau akó ʻa e Tokāteline mo e Ngaahi Fuakava 76 ʻi he lolotonga ʻo e uiké, te nau maʻu ha ngaahi faingamālie ke ako fekauʻaki mo e ngaahi konga kehekehe ʻo e mata meʻa-hā-mai ko ʻení. ʻE nofotaha ʻa e lēsoni ʻo e ʻaho ní ʻi he ngaahi akonaki ʻa e Fakamoʻuí mo e ngaahi aʻusia ʻoku lekooti ʻi he kamataʻanga ʻo e vahe 76.

ʻOku kamata ʻa e Tokāteline mo e Ngaahi Fuakava 76 ʻaki hono vahevahe ʻe he ʻEikí ha ngaahi moʻoni mahuʻinga fekauʻaki mo Ia.

Lau ʻa e Tokāteline mo e Ngaahi Fuakava 76:1–10, ʻo kumi ʻa e ngaahi foʻi lea pe ngaahi kupuʻi lea ʻokú ke ongoʻi ʻoku nau fakahaaʻi ʻa e meʻa ʻoku finangalo ʻa Sīsū Kalaisi ke mahino kiate kitautolu fekauʻaki mo Iá. Fakatokangaʻi ange ʻoku ʻuhinga ʻa e manavahē ki he ʻOtuá (veesi 5) ke hū, ʻofa, mo pikitai kiate Ia ʻi he ofo.

Hili hano maʻu ʻe he kau akó ha taimi feʻunga ke ako ai ʻa e ngaahi veesi ko ʻení, fakaafeʻi kinautolu ke vahevahe ʻenau ngaahi fakakaukaú. ʻE ala tokoni ʻa e ngaahi fehuʻi hangē ko ʻení ki he kau akó ke nau aleaʻi e finangalo ʻa e Fakamoʻuí ke fakahā ʻa e moʻoní kiate kinautolu ʻo fakafou ʻi he Laumālie Māʻoniʻoní.

• Ko e hā ʻa e meʻa ʻoku tokoni ai ʻa e ngaahi veesi ko ʻení ke mahino lelei ange kiate koe fekauʻaki mo e Fakamoʻuí?

• ʻE tokoniʻi fēfē nai koe ʻi hoʻo ʻiloʻi ʻa e ngaahi meʻa ko ʻení fekauʻaki mo e Fakamoʻuí?

ʻOku iku ʻa e fakalaulauloto ki he folofolá ki he fakahaá

Lau ʻa e Tokāteline mo e Ngaahi Fuakava 76:11–19, ʻo kumi ʻa e meʻa naʻe fai ʻe Siosefa mo Sitenei kimuʻa peá na aʻusia ʻena mata meʻa-hā-maí.

• ʻOkú ke pehē ko e hā ha ngaahi meʻa naʻá ne tataki ʻa Siosefa mo Sitenei ke na aʻusia ʻa e meʻa naʻá na faí?

  Fakakaukau ke fakamatalaʻi ange neongo he ʻikai ke tau aʻusia ʻa e faʻahinga mata meʻa-hā-mai naʻe maʻu ʻe Siosefa mo Siteneí, ka ʻe lava ke akoʻi mai ʻe he meʻa naʻá na aʻusiá ha tefitoʻi moʻoni fekauʻaki mo hono teuteuʻi kitautolu ke maʻu ha fakahā mei he ʻEikí ʻo fakafou ʻi he Laumālie Māʻoniʻoní.

• Ko e hā ha moʻoni ʻokú ke ako mei he ngaahi veesi ko ʻení fekauʻaki mo ha founga ʻe taha te tau lava ai ʻo teuteuʻi kitautolu ke maʻu ha fakahā ʻo fakafou ʻi he Laumālie Māʻoniʻoní?

ʻE lava ke talaatu ʻe he kau akó ha tefitoʻi moʻoni faitatau mo ʻení: ʻI heʻetau ako mo fakalaulauloto ki he folofolá ʻi he faʻa lotú, ʻoku tau teuteuʻi ai kitautolu ke maʻu ha mahino mei he ʻEikí ʻo fakafou ʻi he Laumālie Māʻoniʻoní.

Naʻe fakamatalaʻi ʻe ʻEletā D. Toti Kulisitofāsoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga te tau lava ai ʻo ako mo fakalaulauloto ki he folofolá ʻi ha founga ʻoku iku ki he fakahaá ʻo fakafou ʻi he Laumālie Māʻoniʻoní.

ʻI heʻeku pehē “akó”, ʻoku ou ʻuhinga ki ha meʻa ʻoku toe mahulu ange ʻi he laukongá ʻataʻatā pē. … ʻOku ou ʻilo ʻokú ke faʻa lau ha ngaahi veesi ʻi he taimi ʻe niʻihi, pea kiʻi mālōlō ʻo fakalaulauloto ki ai, pea toe lau fakalelei ange ʻa e ngaahi vēsí, pea ʻi hoʻo fakakaukau ko ia ki hono ʻuhingá, mo lotua ke mahinó, pea mo fehuʻi ʻi ho ʻatamaí, mo tatali ki ha ueʻi fakalaumālié, pea mo hiki ʻa e ngaahi ongo mo e ngaahi ʻilo ʻoku hokó, koeʻuhí ke ke lava ʻo manatuʻi mo ako lahi ange ai. ʻI hoʻo ako ʻi he founga ko ʻení, mahalo he ʻikai te ke lau ha ngaahi vahe pe veesi lahi ʻi ha haafe houa, ka te ke fakaʻataʻatā ai ha potu ʻi ho lotó maʻá e folofola ʻa e ʻOtuá, pea te Ne folofola atu kiate koe. (D. Todd Christofferson, “When Thou Art Converted,” Liahona, May 2004, 11)

• Ko e hā ha ngaahi fakafeʻātungia te nau ala taʻofi kitautolu ʻi he taimi ʻe niʻihi mei he fakalaulaulotó? Ko e hā ʻe lava ʻo tokoni ke tau ikunaʻi ai ʻa e ngaahi fakafeʻātungia ko ʻení?

Fakakaukau ke vahevahe ha aʻusia kuó ke ako mo fakalaulauloto ai ʻi he faʻa lotu ki he folofolá mo maʻu ha fakahā. Fakaafeʻi ʻa e kau akó ke vahevahe ha faʻahinga aʻusia foki kuo nau maʻu.

Fakaangaanga ʻa e ako mo fakalaulauloto ʻi he faʻa lotu

Fakakaukau ke ʻoange ha taimi ki he kau akó ʻi he kalasí, mahalo ko ha miniti ʻe 7–10, ke nau fakaangaanga ai ʻa e ako ʻi he faʻa lotu mo fakalaulauloto ki he folofolá. Vahevahe ʻa e ngaahi fakahinohino ko ʻení:

Tuku ha taimi ke fakaangaanga ai hono ako mo fakalaulauloto ki he folofolá. Fakakaukau ki he tūkunga naʻá ke ʻiloʻi kimuʻa ʻokú ke fiemaʻu ai e tokoni ʻa e ʻEikí. Lotua ha fakahinohino, fakalaulauloto ki he meʻa ʻokú ke laú, pea tokanga ki he ngaahi ueʻi ʻa e Laumālié ʻa ia te ne lava ʻo ʻoatu ʻa e fakahinohino pe tokoni ʻokú ke fiemaʻú. Lekooti hoʻo ngaahi fakakaukaú mo e ueʻi fakalaumālié ʻi hoʻo tohinoa akó.

Tuku ke fili ʻe he kau akó ʻa e ngaahi potufolofola te nau ako lolotonga e ʻekitivitī ko ʻení. Ki he kau ako ʻoku nau fiemaʻu ha fakahinohino fekauʻaki mo e ngaahi potufolofola ke filí, fakakaukau ke ʻoange ha ngaahi meʻa ke fili mei ai, hangē ko ʻení:

• ʻĪnosi 1:1–17 (Ko e lotu ʻa ʻĪnosi ki he ʻOtuá.)

• Mōsaia 3:1–20 (Ko e kikite ʻa e Tuʻi ko Penisimaní kia Sīsū Kalaisí.)

• ʻAlamā 36:1–30 (Ko e fakamatalaʻi ʻe ʻAlamā ʻa hono fakamolemoleʻi ʻene ngaahi angahalá.)

• Mōsese 1:1–39 (Ko e fefolofolai ʻa Mōsese mo e ʻOtuá pea tekeʻi ʻa Sētané.)

Hili ha taimi feʻunga, fakaʻaliʻali ʻa e ngaahi fehuʻí ni pea fakaafeʻi ʻa e kau akó ke lekooti ʻenau ngaahi talí ʻi heʻenau tohinoa akó.

• Naʻe tokoni fēfē nai hono ako mo fakalaulauloto ki he folofolá ke teuteuʻi koe ke maʻu ha fakahā ʻo fakafou ʻi he Laumālie Māʻoniʻoní?

• Ko e hā naʻe akoʻi atu ʻe he aʻusia ko ʻení fekauʻaki mo e Tamai Hēvaní, Sīsū Kalaisi, mo e Laumālie Māʻoniʻoní?

• Ko e hā te ke lava ʻo fai, pe hokohoko atu ke fai, ke maʻu ha toe tokoni mo ha fakahā mei he ʻEikí?

Fakamoʻoni ki he founga ʻe lava ai ʻe he fakalaulaulotó mo hono ako maʻu pē ʻo e folofolá ʻo ʻomi e kau akó ke nau ofi ange ki he Tamai Hēvaní mo Sīsū Kalaisí. Poupouʻi ʻa e kau akó ke hokohoko atu ʻenau fekumi ʻi he faʻa lotu ki he fakahaá ʻaki ʻenau ako mo fakalaulauloto maʻu pē ki he folofolá.

Ngaahi Maʻuʻanga Tokoni Kehé

Naʻe anga fēfē nai kia Siosefa Sāmita mo Sitenei Likitoni ke na aʻusia ʻa e mata meʻa-hā-mai ko ʻení?

ʻOku fakamatalaʻi ʻe he fakamatala ko ʻeni mei he Kau Māʻoniʻoní, voliume 1, ʻa e fetalanoaʻaki ʻa Siosefa Sāmita mo Sitenei Likitoni ʻi heʻena aʻusia ʻa e mata meʻa-hā-maí:

“Ko e hā ʻoku ou vakai ki aí?” Ko e ʻeke ia ʻa Siosefa ʻi heʻene ofo mo Sitenei ʻi he ngaahi meʻa fakaofo naʻá na mamata ki aí. Naʻá ne fakamatalaʻi ʻa e meʻa naʻá ne mamata ki ai ʻi he meʻa-hā-maí, pea naʻe pehē ange ʻe Sitenei, “ʻOku ou sio ki he meʻa tatau.” Naʻe ʻeke leva ʻe Sitenei ʻa e fehuʻi tatau peá ne fakamatalaʻi ʻa e meʻa naʻá ne mamata ki aí. ʻI he ʻosi ʻene fakamatalá, naʻe pehē ange ʻa Siosefa, “ʻOku ou sio ki he meʻa tatau.”

Naʻá na talanoa peheni ʻi ha houa ʻe taha. …

ʻI he ʻosi ʻa e mata meʻa-hā-maí, naʻe hangē ʻoku tea maté pea tāvaivaia ʻa Sitenei, koeʻuhí ko e meʻa kuó ne mamata ki aí. Naʻe malimali ʻa Siosefa mo ne pehē, “ʻOku ʻikai anga ki ai ʻa Sitenei ʻo hangē ko aú.” (Kau Māʻoniʻoní, 1:160–61)

Ko e hā ha liliu naʻe fakahoko ʻe he mata meʻa-hā-maí ʻi he niʻihi kehé?

Naʻe ui ʻe Palesiteni Pilikihami ʻIongi (1801–1877) ʻa e mata meʻa-hā-mai ko ʻení “ko e vīsone maʻongoʻonga taha ia kuó u ʻiloʻi kuo foaki ki he fānau ʻa e tangatá” (Journal of Discourses, 8:34).

Naʻe fakamatalaʻi ʻe Palesiteni Uilifooti Utalafi (1807–1898) ʻo pehē:

Te u lave ʻataʻata pē ki he “Meʻa hā mai” [ʻi he vahe 76], ko ha fakahā ʻokú ne ʻomi ha maama lahi ange, ha moʻoni mo ha tefitoʻi moʻoni lahi ange ʻi ha toe fakahā pē ʻoku ʻi ha toe tohi kuo tau lau. ʻOkú ne fakamaama ke mahino kiate kitautolu ʻa hotau tuʻunga lolotongá, feituʻu ne tau omi mei aí, ʻuhinga ʻoku tau ʻi heni aí, pea mo e feituʻu te tau ʻalu atu ki aí. ʻE lava ʻe ha tangata pē ʻo ʻiloʻi ʻi he fakahaá ni ʻa hono tufakangá pea mo e tuʻunga ʻe hoko mai ki aí. (Ngaahi Akonaki ʻa e Kau Palesiteni ʻo e Siasí: Uilifooti Utalafi [2004], 135)

Ko e hā ʻa e ngaahi tāpuaki ʻoku maʻu mei he fakalaulaulotó mo hono ako ʻo e folofolá?

Naʻe vahevahe ʻe Palesiteni Tōmasi S. Monisoni (1927–2018) ʻo pehē:

Te tau maʻu e fanafana vanavanaiki ʻa e Laumālié ki heʻetau moʻuí ʻi heʻetau lau mo fakalaulaulotoa ʻa e folofolá. Te tau lava ʻo maʻu e tali ki heʻetau ngaahi fehuʻí. (Thomas S. Monson, “ʻOku ʻIkai ʻAupito ke Tau Tuenoa,” Liahona, Nōvema 2013, 122)

Naʻe akoʻi ʻe ʻEletā Lopeti D. Heili (1932–2017) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehe:

ʻOku tau lotu ʻi he taimi ʻoku tau fie fakataufolofola ai ki he ʻOtuá. Pea ko e taimi ʻoku tau fiemaʻu ai ke Ne folofola mai kiate kitautolú, ʻoku tau fakatotolo ʻi he folofolá; he ʻoku fakafou mai ʻEne folofolá ʻi he lea ʻa ʻEne kau palōfitá. Te Ne toki akoʻi leva kitautolu ʻi heʻetau fakafanongo ki he ngaahi ueʻi ʻa e Laumālie Māʻoniʻoní. (Robert D. Hales, “Holy Scriptures: The Power of God unto Our Salvation,” Liahona, Nov. 2006, 26–27)

ʻE founga fēfē nai ʻeku fakalaulauloto leleí?

Mamata ʻi he “How I Hear Him through Personal Study and Prayer” (3:01) ke vakai ki ha sīpinga meia ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá.

Vakai ki he fakamatala “Pondering: Giving the Lord Your Full Attention” ki ha ngaahi fakakaukau ʻaonga lahi ange.

Ngaahi ʻEkitivitī Fakalahi ki he Akó

Ngaahi sīpinga kehe ʻo e fakalaulaulotó ʻoku fakaiku ki he fakahaá

Mahalo ʻe ʻaonga ki he kau akó hano ako ha ngaahi sīpinga kehe ʻi he folofolá ʻo ha kakai ʻoku nau maʻu fakahā mei he ʻEikí ko ha ola ʻo e fakalaulaulotó. Te ke lava ʻo fakaafeʻi kinautolu ke nau ako ʻa e ngaahi potufolofola ko ʻení, ʻo kumi e ngaahi meʻa ʻoku faitatau ai ʻa e ngaahi fakamatala ko ʻení pea mo e fakamatala ʻa Siosefa Sāmita mo Sitenei Likitoni ʻi he Tokāteline mo e Ngaahi Fuakava 76.

• 1 Nīfai 10:17–19; 11:1–6

• Tokāteline mo e Ngaahi Fuakava 138:1–11

• Siosefa Sāmita—Hisitōlia 1:11–17

ʻE lava ke hiki ʻe he kau akó ʻa e ngaahi veesi ko ʻení ko ha ngaahi potufolofola fakafekauʻaki ʻi he tafaʻaki ʻo e Tokāteline mo e Ngaahi Fuakava 76:19.

Tokāteline mo e Ngaahi Fuakava 76:5–7. ʻE fakahā ʻe he ʻEikí ʻEne ngaahi meʻa liló kiate kinautolu ʻoku fakaʻapaʻapa mo tauhi kiate Iá.

ʻE lava ke fakaʻaongaʻi ʻa e ngaahi fehuʻi hangē ko ʻení ke tokoni ki he kau akó ke nau ako mo aleaʻi ʻa e Tokāteline mo e Ngaahi Fuakava 76:5–7:

• Ko e hā ʻokú ke ongoʻi ai ʻoku hōifua ʻa e ʻEikí ke fakaʻapaʻapaʻi mo fakahā ʻa e moʻoní kiate kinautolu ʻoku ʻofa mo tauhi kiate Iá?

ʻOku lava ke ʻuhinga ʻa e ngaahi meʻa liló ki he ngaahi moʻoni fakalaumālie ko ia ʻoku toki lava pē ke ʻiloʻi ʻi he fakahaá.

• Ko e hā ha ngaahi sīpinga ʻo e ngaahi meʻa lilo ʻe lava ke fakahā ʻe he ʻOtuá kiate kinautolu ʻoku tauhi kiate Iá?

Fakaafeʻi ʻa e kau akó ke nau fakaʻaongaʻi ha ngaahi miniti siʻi ʻi he fanga kiʻi kulupú ke lisi ha ngaahi founga te nau lava ai ʻo tauhi maʻu ai pē ki he ʻEikí ʻi he māʻoniʻoni kotoa pē. ʻI heʻenau ʻosí, te nau lava ʻo vahevahe mo e kalasí ʻa e meʻa ne nau ʻiló.

Ko ha faingamālie ke fakamatalaʻi mo fakaʻaongaʻi

ʻOku ʻi he makasini Ki Hono Fakamālohia ʻo e Toʻu Tupú ha konga ko e “Ngaahi Fehuʻí mo e Talí” ʻa ia ʻoku fai ai ʻe he toʻu tupú ha ngaahi fehuʻi kae tali ʻe ha toʻu tupu kehe. (Hangē ko ʻení, vakai ki he “Ngaahi Fehuʻí mo e Talí” ʻi he makasini ʻo ʻOkatopa 2022.)

Fakaafeʻi ʻa e kau akó ke fakakaukauloto ʻoku fiemaʻu ke nau tali ʻa e fehuʻi “Te u maʻu fēfē nai ha fakahā mei he ʻEikí?” Fakaafeʻi kinautolu ke tuku ha ngaahi miniti siʻi ke nau tohi ʻi he faʻa lotu ha tali ʻo makatuʻunga ʻi he meʻa ʻoku akoʻi ʻi he Tokāteline mo e Ngaahi Fuakava 76:1–19. Kole ange ke nau fakakaukau ke fakakau ʻa e ngaahi meʻá ni ʻi heʻenau talí:

• Ngaahi foʻi lea pe ngaahi kupuʻi lea pau mei he Tokāteline mo e Ngaahi Fuakava 76:1–19

• Ko e meʻa ʻoku nau ʻilo fekauʻaki mo e Tamai Hēvaní, Sīsū Kalaisi, mo e Laumālie Māʻoniʻoní ʻokú ne ʻoange kiate kinautolu ʻa e loto-falala ʻe ʻaonga ʻa e ngaahi fokotuʻu ʻoku ʻoangé

• Ngaahi aʻusia mei heʻenau moʻuí pe moʻui ʻa e niʻihi kehé ʻokú ne fakatātaaʻi ʻa e ngaahi meʻa ʻoku nau faí

ʻOange ha taimi feʻunga ki he kau akó ke tohi ai ʻenau ngaahi talí. Te ke lava ʻo fakaafeʻi kotoa e kau akó ke hiki ʻenau ngaahi talí ʻi ha laʻipepa pea fokotuʻutuʻu fakataha ha “makasini” fakakalasi ʻi he founga ke maʻu ai ʻa e fakahaá. ʻE lava ke vakai ʻa e kau akó ki heni ʻi he taimi te nau fiemaʻu aí. Fakakaukau ke fakaafeʻi ʻa e kau akó ke fokotuʻu ha taumuʻa ki he founga ke tuku ai ha taimi ke fakalaulauloto ki he folofola ʻa e Fakamoʻuí.