Lēsoni 86: Tokāteline mo e Ngaahi Fuakava 76

Tokāteline mo e Ngaahi Fuakava 76:19–24

“Ko e Fakamoʻoni [ʻEni] … ʻA ia ʻOkú Ma Fai ʻo Kau Kiate Iá”

ʻI he ngaahi meʻa-hā-mai ʻoku lekooti ʻi he Tokāteline mo e Ngaahi Fuakava 76, naʻe mamata tonu ʻa Siosefa Sāmita mo Sitenei Likitoni kia Sīsū Kalaisi. Naʻá na ako ʻa e founga ʻoku mahuʻinga ai ʻa e Fakamoʻuí ki hotau fakamoʻuí pea fai leva ha fakamoʻoni kiate Ia. ʻE lava ke tokoni ʻa e lēsoni ko ʻení ke ongoʻi ʻe he kau akó ha ʻofa lahi ange kia Sīsū Kalaisi mo Hono fatongia ʻi he palani ʻa e Tamai Hēvaní.

Ngaahi ʻEkitivitī Ako ʻOku Ala Fakahokó

ʻOku mahuʻinga ʻa Sīsū Kalaisi kiate au

ʻOange ha faingamālie ki he kau akó ke nau aleaʻi ʻa e ʻuhinga ʻoku mahuʻinga ai ʻa Sīsū Kalaisi kiate kinautolú. Mahalo te ke fakakaukau ke fakaʻaongaʻi ʻa e tūkunga ko ʻení, pe ko haʻo fakaafeʻi ʻa e kau akó ke faʻu ha tūkunga kehe.

ʻOku kalasi fakataha ʻa ʻEpi mo Salika ʻi ha ngaahi kalasi ʻi he akó. ʻI ha ʻaho ʻe taha ʻi he maʻu meʻatokoni hoʻataá, naʻe sio atu ai ʻa Salika kia ʻEpi mo pehē, “Kuó u fanongo ki he talanoa ʻa e kakaí fekauʻaki mo Sīsū ʻi he kotoa ʻo ʻeku moʻuí. Kuó u fanongo foki ki hoʻo pehē ʻokú ke tui kiate Ia. Kuo teʻeki ai ke u ako moʻoni fekauʻaki mo Sīsū, pea ʻoku ou fie ʻilo ki ai. Ko e hā te ke lava ʻo fakamatalaʻi mai fekauʻaki mo Iá, pe ko e hā ʻokú Ne mahuʻinga ai kiate koé?”

• Kapau ko ʻEpi koe, ko e hā te ke talaange kia Saliká?

Kimuʻa pea kole ki ha niʻihi ʻo e kau akó ke nau talí, fakakaukau ke ʻoange ha taimi ke nau fakakaukau ai ki he meʻa te nau lea ʻakí. Mahalo ʻe tokoni ki he kau akó ke nau faʻu ha lisi ʻi heʻenau tohinoa akó ʻo e meʻa ʻoku nau pehē ʻoku totonu ke ʻilo ʻe he kakai kotoa pē fekauʻaki mo Sīsuú.

Fakakaukau ki he ongo ʻokú ke maʻu fekauʻaki mo Sīsū Kalaisí pea mo hoʻo ongoʻi fiemālie fekauʻaki mo e talanoa ki he niʻihi kehé ʻo kau kiate Iá. ʻI hoʻo ako ʻi he ʻaho ní, kumi ha ngaahi akonaki ʻoku nau tokoniʻi koe ke ke ongoʻi ha ʻofa lahi ange kia Sīsū Kalaisi.

Ko ha mata meʻa-hā-mai ki he ʻAlo ʻo e ʻOtuá

Mahalo ʻe tokoni ke fakaafeʻi ʻa e kau akó ke vahevahe ʻa e meʻa ʻoku nau manatuʻi fekauʻaki mo e ngaahi tūkunga naʻe iku ki he mamata ʻa Siosefa Sāmita mo Sitenei Likitoni ki he meʻa-hā-mai ʻoku lekooti ʻi he Tokāteline mo e Ngaahi Fuakava 76. Kapau ʻe fiemaʻu, fakamanatu ange ʻi he taimi naʻe fakalaulauloto ai ʻa Siosefa Sāmita mo Sitenei Likitoni ki he folofolá, naʻe “ala mai ʻa e ʻEikí ki he mata ʻo [hona] ʻatamaí” (Tokāteline mo e Ngaahi Fuakava 76:19), pea naʻána aʻusia ha meʻa-hā-mai maʻongoʻonga.

Ko e Tokāteline mo e Ngaahi Fuakava 76:22–24 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.

Lau ʻa e Tokāteline mo e Ngaahi Fuakava 76:1–6, 19–24, ʻo kumi ʻa e meʻa naʻe fakahā ʻe Siosefa mo Sitenei fekauʻaki mo e Tamai Hēvaní mo Sīsū Kalaisí.

Poupouʻi ʻa e kau akó ke nau muimuiʻi ʻa e meʻa ʻoku nau ʻilo ʻi heʻenau folofolá. Hangē ko ʻení, te nau lava ʻo faʻu ha lisi ʻo e ngaahi meʻa ne nau maʻú ʻi heʻenau tohinoa akó.

Ko e founga ʻe tahá, fakakaukau ke ʻoange ha ʻū laʻipepa lalahi ʻe lava ke lekooti ai ʻe he kau akó ʻa e meʻa ʻoku nau akó. ʻI he ʻosi ʻa e kau akó, te ke lava ʻo fakaʻaliʻali ʻa e ʻū laʻipepá ʻi he holisi ʻo e loki akó. ʻE lava ke ʻunu takai ʻa e kau akó ʻi he lokí ke lau ʻa e meʻa naʻe ʻilo ʻe he niʻihi kehé pea tā ha foʻi haati ʻi he tafaʻaki ʻo ha meʻa ʻoku nau saiʻia ai pe fie ʻilo lahi ange ki aí. ʻOange ha taimi ki he kau akó ke vahevahe ʻa e meʻa ne nau maʻú.

• Ko e hā ha ngaahi moʻoni mei he ngaahi vēsí ni naʻe makehe kiate koe? Ko e hā hono ʻuhingá?

Mahalo kuó ke maʻu ha ngaahi moʻoni lahi ʻi he ngaahi veesi ko ʻení. Mahalo naʻá ke fakatokangaʻi ai:

• ʻOku ʻaloʻofa mo hōifua ʻa Sīsū Kalaisi ke tāpuakiʻi kitautolu ʻi he taimi ʻoku tau fakaʻapaʻapa mo tauhi ai kiate Iá (veesi 5).

• Ko Sīsū Kalaisí, ko ha tokotaha moʻui mo nāunauʻia (veesi 22).

• Ko Sīsū Kalaisi ʻa e ʻAlo Pē Taha ʻo e Tamaí naʻe Fakatupú (veesi 23).

• ʻI he fakahinohino ʻa e Tamai Hēvaní, ko Sīsū Kalaisi ʻa e Tupuʻanga ʻo e meʻa kotoa pē (veesi 24).

• Ko e hā ʻa e meʻa ʻoku tokoni ai ʻa e ngaahi moʻoni ko ʻení ke mahino kiate koe fekauʻaki mo e founga ʻe lava ke tokoniʻi ai koe mo e niʻihi kehé ʻe Sīsū Kalaisí?

ʻE lava ke tokoni ʻa e ngaahi ʻekitivitī ko ʻení ki he kau akó ke fakaloloto ʻa e mahino ʻoku nau maʻú mo ongoʻi ʻa e mahuʻinga ʻo e ongo foʻi moʻoni ʻoku akoʻi ʻe he ngaahi veesi ko ʻení. Te ke lava ʻo fili ha ʻekitivitī ʻe taha pe fakatouʻosi ʻo e ongo ʻekitivitií ke mou ako fakataha mo e kalasí. Pe te ke lava ʻo fakaʻaliʻali ʻa e ngaahi fakahinohino ki he ʻekitivitií pea vahe ki ha fanga kiʻi kulupu iiki pe ngaahi hoa ke nau fakakakato fakataha ha ʻekitivitī ʻe taha pe fakatouʻosi.

ʻEkitivitī A: ʻOku moʻui ʻa Sīsū Kalaisi!

Kapau ʻe fiemaʻu, ʻoange ha tatau kuo paaki ʻo e ngaahi lea ʻo e himi “ʻOku Moʻui Hoku Huhuʻí” (Ngaahi Himí, fika 68) ke fakaʻaongaʻi ʻe he kau akó. Kapau ʻoku mou fakahoko fakakalasi ʻa e ʻekitivitī ko ʻení, te mou lava ʻo hivaʻi ʻa e himí lolotonga ʻa e konga ko ʻeni ʻo e lēsoní.

Makehe mei hono tuku ke ako ʻe he kau akó ʻa e himí ʻi he sitepu 3, te ke lava foki ʻo fakaafeʻi kinautolu ke kumi ha ngaahi potufolofola pe fakamatala mei he kau taki ʻo e Siasí ʻoku nau fakamatalaʻi ʻa e meʻa ʻe lava ke fai ʻe he Fakamoʻuí maʻatautolu koeʻuhí ʻokú Ne moʻui. ʻOku kau ʻi he sīpinga ʻo e ngaahi folofola te ke lava ʻo fokotuʻu angé ʻa e Sione 6:40; Filipai 4:13; Tokāteline mo e Ngaahi Fuakava 58:42; 84:88.

Fakakaukau ke fakaʻaongaʻi foki ha taha ʻo e ngaahi vitiō ʻi he ʻuluʻi tohi “Ngaahi vitiō kehé: ʻOkú Ne moʻui!” ʻi he “Ngaahi ʻEkitivitī Fakalahi ki he Akó.”

1. Fakakaukau ke fakaʻilongaʻi ʻa e ngaahi lea “ʻokú ne moʻui!” ʻi he veesi 22 ʻi ha founga ʻokú ne ʻai ke nau ʻasi makehe ʻi hoʻo folofolá.

2. Hiki ʻa e kupuʻi lea Koeʻuhí ʻoku moʻui ʻa Sīsū Kalaisi … ʻi hoʻo tohinoa akó.

3. Lau ʻa e lea ʻo e himi “ʻOku Moʻui Hoku Huhuʻí” (Ngaahi Himí, fika 68), ʻo kumi ha ngaahi sīpinga ʻo e founga ʻe lava ke tokoniʻi ai koe ʻe Sīsū Kalaisi koeʻuhí ʻokú Ne moʻui.

4. Hiki ha founga ʻe nima te ke lava ʻo fakakakato ai ʻa e kupuʻi lea ʻoku mahuʻinga taha kiate koé.

ʻEkitivitī E: Ko Sīsū Kalaisi ʻa e Tupuʻanga ʻo e meʻa kotoa pē

Ke tokoni ki he kau akó ke nau mateuteu lelei ange ke tali ki he sitepu 4, fakakaukau ke vahevahe ʻa e lea ʻa Palesiteni Poiti K. Peeka ʻi he “Ngaahi Maʻuʻanga Tokoni Kehé.”

1. Fakakaukau ke fakaʻilongaʻi ʻa e kupuʻi lea “ʻoku fakatupu pea naʻe fakatupu ʻe ia, pea ʻiate ia, pea meiate ia, ʻa e ngaahi māmá” (veesi 24) ʻi ha founga ke ʻasi makehe ai ʻa e kupuʻi lea ko ʻení ʻi hoʻo folofolá.

2. Kumi ha ngaahi potufolofola pe fakamatala mei he kau taki ʻo e Siasí ʻoku nau fakaloloto ʻa e mahino ʻokú ke maʻú ki he fatongia ʻo Sīsū Kalaisi ko e Tupuʻangá. ʻOku kau ʻi he ngaahi sīpinga ʻo e ngaahi potufolofola te ke lava ʻo akó ʻa e Sione 1:1–3; 3 Nīfai 9:15; Tokāteline mo e Ngaahi Fuakava 93:9–10; Mōsese 1:33; 7:30.

3. Aleaʻi ha niʻihi ʻo e ngaahi fakatupu ʻa e Fakamoʻuí ʻoku tokoni atu ke ke ongoʻi e ʻofa ʻa e Tamai Hēvaní mo Sīsū Kalaisí. Fakamatalaʻi hono ʻuhingá.

4. Hiki ha founga ʻe tolu pe lahi ange ʻokú ke ongoʻi ʻe lava ke tokoniʻi ai koe ʻe Sīsū Kalaisi koeʻuhí ko Ia ʻa e Tupuʻanga ʻo e ngaahi meʻa kotoa pē.

ʻI he taimi kuo fakakakato ai ʻe he kau akó ʻa e ʻekitivitií pe ngaahi ʻekitivitií, tuku ke nau vahevahe ʻa e meʻa kuo nau ako mo ongoʻí. Fakapapauʻi ke fakaafeʻi kinautolu ke vahevahe ʻa e meʻa ne nau ako fekauʻaki mo e founga ʻe lava ke tokoniʻi ai kinautolu ʻe Sīsū Kalaisi koeʻuhí ʻokú Ne moʻui pea koeʻuhí ko Ia ʻa e Tupuʻangá. ʻE lava ke vahevahe ʻe he kau akó ʻenau ngaahi fakakaukaú mei honau nofoʻangá, pe te ke fakaafeʻi ʻa e kau akó ke nau omi ki muʻa ʻi he lokí ke vahevahe ʻenau fakamoʻoni kia Sīsū Kalaisí.

Ako Ma‘uloto

Mahalo te ke fie tokoni ki he kau akó ke ako maʻuloto ʻa e fakamoʻoni fakafolofola ki he fakataukei fakatokāteliné mo e kupuʻi lea mahuʻinga ʻo e potufolofolá lolotonga ʻa e lēsoni ko ʻení pea toe vakaiʻi ia ʻi he ngaahi lēsoni ʻi he kahaʻú. Ko e kupuʻi lea fakafolofola mahuʻingá ko e “ʻOku fakatupu pea naʻe fakatupu ʻe [Sīsū Kalaisi] ʻa e ngaahi māmá” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Tokāteline mo e Ngaahi Fuakava 76:23. Ko e hā ʻoku ui ai ʻa Sīsū ko e “ʻAlo pē Taha naʻe Fakatupu ʻo e Tamaí”?

ʻOku ui hotau Fakamoʻui ko Sīsū Kalaisí ko e ʻAlo pē Taha naʻe Fakatupú koeʻuhí he ko Ia pē ʻa e tokotaha ʻi he māmaní naʻe ʻaloʻi ʻe ha faʻē fakamatelie mo ha Tamai taʻe-faʻa-mate. Naʻá Ne maʻu ʻa e ngaahi mālohi fakalangi mei he ʻOtua ko ʻEne Tamaí (vakai, Sione 10:17–18). Naʻá Ne maʻu mei Heʻene faʻē ko Melé ʻa e moʻui fakamatelié pea naʻá Ne moʻulaloa ki he fiekaiá, fieinuá, ongosiá, mamahí, mo e maté. (“Ko e Misiona Fakalangi ʻo Sīsū Kalaisí: Ko e ʻAlo pē Taha Naʻe Fakatupú,” Liahona, Tīsema 2013, 7)

Tokāteline mo e Ngaahi Fuakava 76:24. Ko e hā ʻoku tau ʻilo fekauʻaki mo hono fakatupu ʻe Sīsū Kalaisi ha ngaahi māmani kehé?

Naʻe akoʻi ʻe ʻEletā Niila A. Mekisuele (1926–2014) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

“Naʻe ngaohi ʻe Kalaisi ko e ʻEiki ʻo e ʻunivēsí ha ngaahi māmani taʻe-faʻa-laua, ʻo fakatatau mo e fakahinohino ʻa e Tamaí—ʻa ia ko hotau māmaní ko e taha ia ʻo kinautolu (vakai, ʻEfesō 3:9; Hepelū 1:2).

Ko e māmani ʻe fiha ʻi he ʻunivēsí ʻoku nofo ai ha kakai? ʻOku ʻikai ke tau ʻilo, ka ʻoku ʻikai ko kitautolu pē ʻi he ʻunivēsí! Ko e ʻOtuá ʻoku ʻikai ko e ʻOtua ia ʻo ha māmani pē ʻe taha! (Neal A. Maxwell, “Special Witnesses of Christ,” Ensign, Apr. 2001, 6)

ʻE tokoniʻi fēfē nai au ʻe he mahino ko ia ko Sīsū Kalaisi ʻa e Tupuʻangá?

Naʻe hoko ʻa Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá (1924–2015) ko ha tokotaha tā tongitongi lelei naʻe fiefia ʻi hono tā tongitongi ʻo e fanga manupuna papá. ʻI ha ʻaho ʻe taha, naʻá ne heka ai ʻi ha kā naʻe fakaʻuli ai ʻa ʻEletā A. Fiotoa Tatolo, pea naʻe ʻi ai ha tā tongitongi fakaʻofoʻofa ʻi he sea muí. Naʻe fakamatala ʻa Palesiteni Peeka ki he meʻa naʻe hokó:

ʻI ha mangafā ʻe taha, naʻe moloki ʻe [ʻEletā Tatolo] ʻa e taʻofí pea tō ʻa e tā tongitongí ki he falikí ʻo movete. Naʻá ne afe ki he tafaʻakí ʻo ne vakaiʻi. Naʻá ne loto-mamahi ʻaupito. Naʻe ʻikai ke u loto-mamahi au.

Naʻe ʻikai ke u fakakaukau, peá u pehē ange, “Sai pē ia. Ko au naʻá ku taá. Te u lava ʻo fakaleleiʻi ia.” Pea ne u fai ia. Naʻá ku ngaohi ia ke fefeka ange ʻi he tuʻunga naʻe ʻi aí. Naʻá ku fakaleleiʻi ia ʻo toe kiʻi lelei ange.

Sai, ko hai leva naʻá ne ngaohi koé? Ko hai ho Tupuʻangá? ʻOku ʻikai ha meʻa ʻi hoʻo moʻuí ʻe ngaofe pe maumau te Ne taʻe lava ʻo ngaohi pea mo fakaleleiʻi. (Boyd K. Packer, “The Instrument of Your Mind and the Foundation of Your Character” [Fakataha lotu ʻa e ʻUnivēsiti Pilikihami ʻIongí, 2 Fēpueli 2003], 9, speeches.byu.edu)

Ngaahi ʻEkitivitī Fakalahi ki he Akó

Fakaʻuhingaʻi pea mahino ʻa e ngaahi foʻi lea fakafolofolá

Mahalo ʻe ʻi ai ha ngaahi fehuʻi ʻa e kau akó fekauʻaki mo e ngaahi foʻi lea ʻoku fakaʻaongaʻi ʻi he Tokāteline mo e Ngaahi Fuakava 76:24 ʻoku fekauʻaki mo e ngaahi ngāue ʻa e Fakamoʻuí ki he fakatupú. Fakakaukau ke fakaafeʻi ʻa e kau akó ke fakaʻaongaʻi ʻenau ngaahi meʻangāue toʻotoʻó ke maʻu ha ngaahi fakaʻuhinga ki he ngaahi foʻi lea ko ʻení (ngaahi fakaʻuhinga ʻoku maʻu ʻi he merriam-webster.com):

• ʻe (meʻangāue pau ʻo e fakatupú)

• ʻiate (koeʻuhí ko e)

• meiate (tupuʻangá)

• fakatupu (ʻomi ke moʻuí ʻe)

• ki he (fakafehokotaki pe fakakau ki he)

Hili hono fakaʻuhingaʻi ʻe he kau akó ʻa e ngaahi foʻi leá, tokoni ke mahino kiate kinautolu ʻa e founga ʻe lava ke nau fakafekauʻaki ai ki hono fakatupu ʻe he Fakamoʻuí.

Ko Hono Fakahoungaʻi e ngaahi fakatupu ʻa e ʻEikí

Hili hono ako ʻe he kau akó ʻa e ngaahi potufolofola fekauʻaki mo e Fakamoʻuí ko e Tupuʻangá, fakakaukau ke vahevahe ʻa e fakamatala ko ʻení. Naʻe fakamoʻoni ʻa ʻEletā Niila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ou manako ke lea fekauʻaki mo e Fakamoʻuí. Naʻá Ne fakatupu ʻa e māmaní maʻatautolu ʻi he malumalu ʻo e fakahinohino ʻa e Tamaí. Naʻá Ne vaheʻi ʻa e māmá mei he fakapoʻulí, ʻa e vaí mei he fonuá.

Ko Ia naʻá Ne ʻomi ʻa e māú mo e fakaʻofoʻofá, ʻa e ʻakaú mo e fanga monumanú.

Ko e Tupuʻanga ʻeni naʻá Ne tali ʻa e ui ʻa ʻetau Tamaí ʻaki ha ngaahi lea ʻo e ʻofa mo e loto-fakatōkilalo: “Ko au ʻeni, fekauʻi au” [ʻĒpalahame 3:27]. “ʻE Tamai, ke fai pē ʻa ho finangaló, pea ke ʻoʻou ʻa e lāngilangí ʻo taʻengata” [Mōsese 4:2].

Kuo pau pē ne tau ongoʻi houngaʻia moʻoni ʻi heʻetau ʻiloʻi naʻá Ne hōifua lelei ke fakahoko e palani taʻengata ʻa ʻetau Tamai Hēvaní ki he fakamoʻuí maʻatautolú, ʻa ia ko e ʻAlo Tofu pē Taha ʻo e Tamaí, naʻe ʻofeina mo fili talu mei he kamataʻangá. (Neil L. Andersen, “Time for the Savior at Christmas” [Fakataha lotu ʻa e ʻUnivēsiti Pilikihami ʻIongí, 7 Tīsema 2021], 6, speeches.byu.edu)

Fakakaukau ke huluʻi ha taha ʻo e ongo foʻi vitiō ko ʻení:

• “We Lived with God” (4:00)

  We Lived With God

  A renowned scientist testifies of our premortal life, our divine Creator, and the limitless perspective of eternal life.

• “God’s Greatest Creation” (2:51)

  God's Greatest Creation

  As children of God, we are His greatest creation. "Anyone who studies the workings of the human body has surely seen God moving in His majesty and power." -Elder Russell M. Nelson

Ngaahi vitiō kehé: ʻOkú Ne moʻui!

ʻOku fakamamafaʻi ʻe he ngaahi vitiō ko ʻení ʻa e founga ʻoku tāpuekina ai kitautolu ʻe ha Fakamoʻui ʻoku moʻui, ʻi he moʻuí ni pea mo e taʻengatá fakatouʻosi.

• “He Lives Again and So Will You” (2:28)

  He Lives Again and So Will You

  ʻOku moʻui ʻa Sīsū Kalaisi tuʻunga ʻi he Toetuʻú. Ko Ia ʻoku malava ai ke ke ikunaʻi e angahalá mo e fiefia tuʻuloá. ʻIlo lahi ange ki he founga ʻe lava ke ke ʻiloʻi, tali mo vahevahe atu ai e fiefia ʻo e Toetuʻú ʻi he helives.mormon.org.

• “Principles of Peace: Faith” (3:12)

  Principles of Peace: Faith #PrinceofPeace

  Many people, if they were given only 15 months to live, would sink into despair. But through her faith in Jesus Christ, Kristin found the strength to carry on. Learn how her faith helped her to trust in God’s plan for her family.

• “The Savior Heals All Wounds” (11:48)

  The Savior Heals All Wounds

  When the Brussels international airport was bombed in 2016, missionary Richard Norby was terribly burned and injured by shrapnel. Yet in that moment, he knew the Savior was there for him and everything would be OK. The Savior is there for you, too.

ʻOku ou lava ʻo fakamoʻoni kia Sīsū Kalaisi

Fakamahinoʻi ange ʻa e kupuʻi lea “hili ʻa e ngaahi fakamoʻoni lahi” ʻi he veesi 22. Fakaafeʻi ʻa e kau akó ke nau fakakaukau ki he ngaahi fakamoʻoni lahi kuo ʻomi fekauʻaki mo Sīsū Kalaisi ʻi he folofolá. Mahalo te ke fie fokotuʻu ange ke nau kumi mo ako ha niʻihi ʻo e ngaahi meʻá ni.

Fakaafeʻi ʻa e kau akó ke nau fakakaukau ki heʻenau fakamoʻoni kia Sīsū Kalaisí. Fakakaukau ke ʻoange ha taimi ke nau hiki ai ʻenau fakamoʻoní mo poupouʻi kinautolu ke vahevahe ia mo e niʻihi kehé, hangē ko honau fāmilí, ʻi he lotú, pe ʻi he mītia fakasōsialé. Te ke lava foki ʻo ʻoange ha taimi ki he kau akó ke vahevahe ʻenau fakamoʻoní lolotonga ʻa e kalasí.