Lēsoni 87: Tokāteline mo e Ngaahi Fuakava 76

Tokāteline mo e Ngaahi Fuakava 76:50–70

“Fakahaohaoaʻi ʻia Sīsū”

ʻI he meʻa-hā-mai ʻo e ngaahi puleʻanga ʻo e nāunaú ʻa ia naʻe mamata ki ai ʻa Siosefa Sāmita mo Sitenei Likitoní, ʻoku tau maʻu ai ha mahino fekauʻaki mo e fatongia mahuʻinga ʻoku fakahoko ʻe Sīsū Kalaisi ʻi he moʻui ʻa kinautolu kotoa te nau maʻu ʻa e puleʻanga fakasilesitialé. ʻOku fakataumuʻa ʻa e lēsoni ko ʻení ke tokoni ke ongoʻi ʻe he kau akó ʻa e ʻamanaki lelei te nau lava ʻo maʻu ʻa e hākeakiʻí ʻo fakafou ʻia Sīsū Kalaisi.

Ngaahi ʻEkitivitī Ako ʻOku Ala Fakahokó

ʻOku lava nai ke maʻu ʻa e puleʻanga fakasilesitialé?

Fakakaukau ke fakaʻaliʻali ʻa e tūkunga ko ʻení pea aleaʻi ʻa e ngaahi fehuʻi ʻoku hoko atu aí. ʻE ʻoange ha faingamālie ki he kau akó ke nau tali lelei ange ʻa e tūkungá ʻamui ange ʻi he lēsoní.

Ko Luké ko ha talavou ʻoku tui ki he ʻOtuá pea fai hono lelei tahá ke moʻui angatonu. ʻOkú ne fie moʻui taau ke nofo mo e ʻOtuá hili ʻa e moʻui ko ʻení. Ka neongo ia, ʻoku fakatokangaʻi ʻe Luke ʻoku ʻikai ke ne tauhi maʻu pē ʻa e ngaahi fekaú pea ʻokú ne mamaʻo mei he haohaoá. ʻOkú ne lotosiʻi ʻi he taimi ʻe niʻihi koeʻuhí ko hono ngaahi vaivaí pea fakakaukau ʻoku faingataʻa ke ne feʻunga ke maʻu ʻa e puleʻanga fakasilesitialé.

• ʻE lava fēfē nai ke fakafekauʻaki ʻa e toʻu tupu kehé ki he ngaahi ongo ʻa Luké?

• Ko e hā ha konga ʻo ʻene fakakaukaú ʻoku ongo tonu pe halá? Ko e hā hono ʻuhingá?

Fakaafeʻi ʻa e kau akó ke fakakaukau ki heʻenau ngaahi ongó pe fehuʻi fekauʻaki mo e lava ke toe foki ki he ʻao ʻo e ʻOtuá mo maʻu ʻa e ngaahi tāpuaki ʻo e hākeakiʻí. Mahalo te ke fie fakamatalaʻi ange ʻoku ʻuhinga ʻa e hākeakiʻí ke nofo taʻengata mo e Tamai Hēvaní ʻi he puleʻanga fakasilesitialé. ʻOku ui foki ʻa e tāpuaki ko ʻení ʻi he folofolá ko e moʻui taʻengatá.

Poupouʻi ʻa e kau akó ʻi heʻenau akó ke kumi ha ngaahi moʻoni ʻe lava ʻo tokoni ke nau ongoʻi ha ʻamanaki lelei lahi ange ʻe lava ke nau maʻu mo e niʻihi kehé ʻa e tāpuaki ko ʻení ʻo fakafou ʻia Sīsū Kalaisi.

Meʻa-hā-mai ʻo e puleʻanga fakasilesitialé

Mahalo te ke manatuʻi naʻe mamata ʻa Siosefa Sāmita mo Sitenei Likitoni ki ha meʻa-hā-mai maʻongoʻonga ʻi heʻena ngāue ki hono liliu ʻo e Tohi Tapú. ʻI he mata meʻa-hā-mai ko ʻení, naʻe kau ai ʻena ʻiloʻi ko hēvaní ʻoku ʻi ai ha ngaahi tuʻunga pe puleʻanga kehekehe ʻo e nāunaú. Te tau tokanga taha ʻi he lēsoni ko ʻení ki he meʻa naʻe ako ʻe Siosefa mo Sitenei fekauʻaki mo e puleʻanga fakasilesitialé pea mo kinautolu te nau maʻu iá.

Ke tokoni ki he kau akó ke teuteu ke ako ʻa e konga ko ʻeni ʻo e meʻa-hā-maí, fakaafeʻi kinautolu ke faʻu ha saati kōlomu ʻe ua ʻo tohi ki ai e ngaahi ʻuluʻi tohi ko ʻení ʻi ha peesi ʻi heʻenau tohinoa akó.

Founga ʻoku aʻu ai ʻa e kakaí ki he puleʻanga fakasilesitialé	Ngaahi tāpuaki ʻoku maʻu ʻe he kakai ʻi he puleʻanga fakasilesitialé

Lau ʻa e Tokāteline mo e Ngaahi Fuakava 76:50–70, pea fakakakato ʻa e sātí ʻo fakatatau mo e meʻa ʻokú ke akó.

Te ke lava ʻo fakaafeʻi ʻa e kau akó ke nau ngāue mo ha hoa ke lau ʻa e ngaahi vēsí pea fakakakato ʻa e sātí. Te ke lava ʻo fakaafeʻi ʻa e kau akó ke nau fai ha ngaahi fehuʻi ʻoku nau ala maʻu fekauʻaki mo e meʻa ʻoku nau laú.

ʻE ala tokoni ha niʻihi ʻo e ngaahi fakamatala ʻi he “Ngaahi Maʻuʻanga Tokoni Kehé” ʻi hono tali e ngaahi fehuʻi ʻa e kau akó.

• Ko e hā naʻá ke fakatokangaʻi ʻi he ngaahi veesi ko ʻení naʻe ʻuhingamālie kiate koé? Ko e hā hono ʻuhingá?

• Te ke fakamatalaʻi fēfē nai ʻa e ivi tākiekina ʻoku maʻu ʻe Sīsū Kalaisi ʻi he moʻui ʻa kinautolu ʻoku nau maʻu ʻa e puleʻanga fakasilesitialé?

  Fakapapauʻi ʻoku mahino ki he kau akó ʻa e moʻoni ko ʻení, ko ha konga ia ʻo e fealeaʻaki ki he fehuʻi kimuʻá: ʻE lava ke fakahaohaoaʻi kitautolu ʻo fakafou ʻia Sīsū Kalaisi pea tau maʻu ʻa e ngaahi tāpuaki ʻo e hākeakiʻí.

• ʻOkú ke pehē ʻoku ʻuhinga ki he hā ke fakahaohaoaʻi ʻia Sīsū Kalaisí?

• ʻE tokoniʻi fēfē nai kitautolu ʻe he moʻoni ko ʻení ke tau ongoʻi ha ʻamanaki lelei lahi ange te tau lava mo e niʻihi kehé ʻo maʻu ʻa e puleʻanga fakasilesitialé ʻi ha ʻaho?

‘Amanaki Lelei ‘ia Sīsū Kalaisi

Ke tokoni ke mahino lelei ange ki he kau akó ʻa e ʻamanaki lelei ʻoku tau maʻu kotoa ʻia Sīsū Kalaisí, fakakaukau ke fakaafeʻi kinautolu ke ako ʻa e ngaahi fakamatala ʻoku maʻu ʻi he laʻipepa tufá. Fakaafeʻi kinautolu ke fakaʻilongaʻi ʻa e ngaahi kupuʻi lea ʻoku ʻuhingamālie kiate kinautolú. Makehe mei hono lau ʻe he kau akó ʻa e lea ʻa ʻEletā J. Tēvini Kōnisí, te ke lava foki ʻo fakakaukau ke huluʻi ʻa e foʻi vitiō “Am I Good Enough?” (3:28), ʻoku maʻu ʻi he ChurchofJesusChrist.org.

‘Amanaki Lelei ‘ia Sīsū Kalaisi

Ko e hā ʻoku ou fiemaʻu ai e tokoni ʻa Sīsū Kalaisí ke u hoko ʻo haohaoá?

Naʻe vahevahe ‘e ‘Eletā J. Tēvini Kōnisi ‘o e Kau Fitungofulύ:

ʻOku … faʻa … fehuʻi ʻe hotau kāingalotú, “Ko ha tokotaha lelei nai au?” pe “Te u aʻu nai ki he puleʻanga fakasilesitialé?” Ko e moʻoni, ʻoku ʻikai foki ha meʻa ia ko e “lelei feʻunga.” He ʻikai pē ke tau teitei lava ʻe kitautolu ia ʻo “ngāueʻi” pe maʻu ha “totonu” ki hotau fakamoʻuí, ka ʻoku angamaheni ʻaki pē ʻetau fifili pe ʻoku tau fakahoifua nai ki he ʻEikí, he ko ʻene mahino ia kiate au ʻa e ngaahi fehuʻí ni. …

Tuku ke u ʻoatu fakahangatonu mo mahino. Ko e tali ki he ongo fehuʻi “Ko ha taha lelei nai au?” mo e “Te u lava nai?” ko e “ʻIo! ʻOkú ke lelei feʻunga” pea “ʻIo, te ke lava ʻo fai ia kapau te ke fakatomala pea ʻoua ʻe kumi-ʻuhinga pe angatuʻu.” Ko e ʻOtua ʻo e langí, ʻoku ʻikai ko ha fakamaau taʻe-ʻofa ʻo kumi ha faʻahinga ʻuhinga ke tuli ai kitautolu mei he vaʻingá. Ko ʻetau Tamai ʻofa hoahaoá Ia, pea ko Hono finangaló pē ke toe foki ange ʻEne fānaú kotoa ki ʻapi ʻo nofo mo Ia ko ha fāmili taʻengata. Naʻá Ne foaki moʻoni Hono ʻAlo pē taha naʻe fakatupú, ke ʻoua naʻa tau ʻauha kae maʻu e moʻui taʻengatá! Tui muʻa ki ai, peá ke maʻu muʻa ha ʻamanaki lelei mo ha fiemālie ʻi he moʻoni taʻengata ko ʻení. Ko e taumuʻa ʻetau Tamai Hēvaní ke tau lava kotoa ia! Ko ʻEne ngāué mo Hono nāunaú ia. (J. Devn Cornish, “ʻOku ou Lelei Feʻunga Nai? Te u Lava Nai?,” Liahona, Nōvema 2016, 32–33)

Ko e hā te u lava ʻo fai ke “fakahaohaoaʻi [au] ʻia Sīsuú”?

Naʻe akonaki ʻa Sisitā Kalo F. Makongikī, ko ha tokoni mālōlō ʻi he Kau Palesitenisī Lahi ʻo e Kau Finemuí ʻo pehē:

ʻOku fakatefito ʻia Kalaisi mo ʻEne ʻaloʻofá mo ʻEne kelesí ʻa ʻetau fakatetuʻa ki he māʻoniʻoní. Te tau lava [ʻo] hoko ʻo maʻa, mo taʻe-mele, ʻi he taimi ʻoku tau fakafisi ai mei he anga taʻe-māʻoniʻoni kotoa pē [vakai, Molonai 10:32–33], ʻi heʻetau tui kia Sīsū Kalaisi mo ʻEne Fakaleleí pea fakatomala moʻoní. ʻOku papitaiso kitautolu ʻi he vaí, ke fakamolemoleʻi ʻetau ngaahi angahalá. ʻOku [fakamāʻoniʻoniʻi] hotau laumālié ʻi he taimi ʻoku tau tali loto fiefia ai ʻa e Laumālie Māʻoniʻoní. ʻOku tau maʻu fakauike ʻa e ouau ʻo e sākalamēnití. ʻI he laumālie ʻo e fakatomala mo e holi moʻoni ki he angamāʻoniʻoní, ʻoku tau fuakava ai ʻoku tau loto fiemālie ke toʻo kiate kitautolu ʻa e huafa ʻo Kalaisí, manatu kiate Ia, mo tauhi ʻEne ngaahi fekaú ke ʻiate kitautolu maʻu ai pē Hono Laumālié. ʻI heʻetau feinga ko ia ʻi he [fakalau] ʻa e taimí ke tau taha mo e Tamaí, mo e ʻAló pea mo e Laumālie Māʻoniʻoní, ʻoku tau ʻinasi ai ʻi Honau natula fakalangí [vakai, 2 Pita 1:4]. (Carol F. McConkie, “Ko e Matamatalelei ʻo e Māʻoniʻoní,” Liahona, Mē 2017, 10)

Naʻe akoʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku tokanga lahi ange ʻa e ʻOtuá ki he tuʻunga ʻoku tau ʻi aí mo e tuʻunga te tau aʻusiá, kae ʻikai ko hotau tuʻunga kimuʻá. ʻOkú Ne finangalo ke ʻoua ʻe tuku ʻetau feingá. (Dale G. Renlund, “Kāingalotu ʻOua Naʻa Tuku e Feingá,” Liahona, Me 2015, 57)

Hili hono maʻu ʻe he kau akó ha taimi ke nau ako aí, fakaafeʻi kinautolu ke aleaʻi ʻa e meʻa naʻa nau ako mo ongoʻí. Ko e founga ʻe taha ke fai ai ʻení ko hono fakamanatu kiate kinautolu ʻa e tūkungá mei he kamataʻanga ʻo e lēsoní. Te ke lava ʻo fakaafeʻi kinautolu ke nau tohi ha tali kia Luke ʻe lava ʻo tokoni ke ne ongoʻi ʻa e ʻamanaki lelei ko ia te ne lava ʻo aʻu ki he puleʻanga fakasilesitialé. Fakaafeʻi kinautolu ke fakakau ʻi heʻenau talí ʻa e ngaahi akonaki mei he Tokāteline mo e Ngaahi Fuakava 76, pea pehē ki ha meʻa mei ha fakamatala ʻe taha pe lahi ange ne nau akó. ʻE lava leva ke vahevahe pe fakamatalaʻi fakanounou ʻe he kau akó ʻenau talí mo ha hoa, pe loto–fiemālie ʻa e kau akó ke vahevahe ia mo e kalasí.

Fakakaukauloto ki he meʻa kuó ke akó

Fakaʻosi ʻa e lēsoní ʻaki hano ʻoange ha taimi ki he kau akó ke fakalaulauloto ai ki he meʻa kuo nau ako mo ongoʻi ʻi he ʻaho ní. ʻE lava ke ke fakaʻaliʻali e ngaahi fehuʻi ko ʻení pea fakaafeʻi ʻa e kau akó ke lekooti ʻenau ngaahi talí ʻi heʻenau tohinoa akó:

• Ko e hā naʻá ke ako pe ongoʻi ʻi he ʻahó ni ʻa ia naʻá ne ʻoatu ha ʻamanaki lelei kiate koe ʻo fakafou ʻia Sīsū Kalaisí?

• ʻE liliu fēfē nai ʻe he meʻa naʻá ke ako pe ongoʻí ʻa e founga ʻokú ke fiemaʻu ki hoʻo moʻui fakaʻahó?

Ngaahi Maʻuʻanga Tokoni Kehé

Ko e hā ʻoku ou fiemaʻu ai ke hoko ʻo haohaoa ʻa e tokoni ʻa Sīsū Kalaisí?

Naʻe pehē ‘e ʻEletā Paula V. Sionisoni ʻo e Kau Fitungofulú:

Mahalo te tau fakahehema ke fakakaukau kuo pau ke tau fakahaohaoaʻi kitautolu, ka ʻoku ʻikai malava ia. He ʻikai hoko ia ʻi hano muimuiʻi ʻa e fokotuʻu kotoa pē ʻi he tohi kotoa pē ʻi he māmaní fekauʻaki mo e tokoniʻi pē kitá. ʻOku taha pē ʻa e foungá pea ʻoku taha pē ʻa e hingoa ʻoku hoko ai ʻa e haohaoá. ʻOku “fakahaohaoaʻi [kitautolu] ʻia Sīsū ko e fakalaloa ʻo e fuakava foʻoú, ʻa ia naʻá ne fakahoko ʻa e fakalelei haohaoa ko ʻení ʻi he lilingi hono taʻataʻa ʻoʻoná” [Tokāteline mo e Ngaahi Fuakava 76:69]. ʻOku toki lava pē hotau fakahaohaoaʻí ʻi he ʻaloʻofa ʻa e ʻOtuá. (Paul V. Johnson, “Hoko ʻo Haohaoa ʻIate Ia,” Liahona, Nov. 2022, 41)

ʻOku ʻi ai nai ha ʻamanaki lelei ke u maʻu ʻa e hākeakiʻí?

Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Neongo pe ko e hā ʻene ngali tōmui kiate koé, neongo pe ko e hā ʻa e ngaahi faingamālie kuo ngali mole meiate koé pe ko e lahi ʻo e ngaahi fehalaaki kuó ke faí pe talēniti ʻokú ke pehē ʻoku ʻikai ke ke maʻú pe ko hoʻo pehē neongo ʻene mamaʻo hoʻo fonongá mei ʻapi mo e fāmilí mo e ʻOtuá, ka ʻoku ou fakamoʻoni atu kuo teʻeki ai ke ke aʻu koe ki ha tuʻunga he ʻikai taʻe-lava ke aʻu atu ki ai e ʻofa ʻa e ʻOtuá. He ʻikai malava ke taʻe-aʻu atu kiate koe ʻa e maama [taʻe-fakangatangata] ia ʻo e Fakalelei ʻa Kalaisí.

Tatau ai pē pe ʻoku tau tui tatau pe ʻikai pe naʻa tau kau fakataha peá ke mavahe atu, kuo teʻeki ai ha meʻa ia kuó ke fai he ʻikai lava ke fakaleleiʻi. ʻOku ʻikai ha palopalema ia te ke taʻe-lava ʻo ikunaʻi. ʻOku ʻikai ha fakaʻānaua ia ʻe taʻe-lava ke fakahoko ʻi he fakalau atu ʻa e taimí. (Jeffrey R. Holland, “Ko e Kau Ngāue ʻi he Ngoue Vainé,” Liahona, Mē 2012, 33)

Tokāteline mo e Ngaahi Fuakava 76:53. Ko e hā hono ʻuhinga ʻo e “fakamaʻu … ʻe he Laumālie Māʻoniʻoni ʻo e talaʻofá”?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e Laumālie Māʻoniʻoni ʻo e Talaʻofá ko e mālohi fakamoʻoni ia ʻo e Laumālie Māʻoniʻoní. ʻI he taimi ʻoku fakamaʻu ai ʻi he Laumālie Māʻoniʻoni ʻo e Talaʻofá, ʻoku fakamaʻu ʻi māmani pea ʻi he langí ha ouau, fakapapau, pe fuakava. (Vakai, T&F 132:7.) Ko hono maʻu e “sitapa fakangofua” ko ʻeni mei he Laumālie Māʻoniʻoní ko e ola ia ʻo e faivelengá, faitotonú, mo e tuʻu taʻe-ueʻia ʻi hono tauhi e ngaahi fuakava ʻo e ongoongoleleí “[ʻi he fakalau atu ʻa e taimí]” (Mōsese 7:21). Ka neongo ia, ʻe malava ke fakataʻeʻaongaʻi ʻe he taʻe-māʻoniʻoní mo e maumau fonó ʻa e fakamaʻu ko ʻení. (David A. Bednar, “Ye Must Be Born Again,” Liahona, May 2007, 22)

Tokāteline mo e Ngaahi Fuakava 76:54. ʻOku ʻuhinga ki he hā ke hoko ko ha mēmipa ʻo e “Siasi ʻo e ʻUluaki Fānaú”?

Ko e Siasi ʻo e ʻUluaki Fānaú “ko ha foʻi lea ia ʻokú ne fakamatalaʻi ʻa kinautolu ʻoku nau maʻu ʻa e kakato mo e nāunau ʻo e ʻOtua ko e Tamaí ʻi he moʻui hili ʻa e maté” (Glossary, “Church of the Firstborn,” The Siosefa Sāmitá Papers, josephsmithpapers.org).

Tokāteline mo e Ngaahi Fuakava 76:64–65. ʻOku ʻuhinga ki he hā ʻa e “toetuʻu ʻa e kau angatonú” pe “ʻuluaki toetuʻú”?

ʻOku ʻiloa foki e Toetuʻu ʻa e kau angatonú ko e “ʻuluaki toetuʻú” (Tokāteline mo e Ngaahi Fuakava 76:64) pea ʻoku kau ai ʻa kinautolu kotoa pē te nau maʻu e puleʻanga fakasilesitialé mo e fakatelesitialé (vakai, Tokāteline mo e Ngaahi Fuakava 88:96–99). Naʻe kamata ʻa e ʻUluaki Toetuʻú ʻi he taimi naʻe fakaava ai ʻa e ngaahi faʻitoka ʻo e kau angatonú hili ʻa e Toetuʻu ʻa Sīsū Kalaisí (vakai, Mātiu 27:52–53; Mōsaia 15:21–24; 3 Nīfai 23:9–10). ʻOku ʻuhinga ʻa e ʻUluaki Toetuʻú ʻi he Tokāteline mo e Ngaahi Fuakavá ki he taimi ʻe ʻalu atu ai ʻa e kau angatonú mei honau faʻitoká ʻi he Hāʻele ʻAnga Ua Mai ʻa Sīsū Kalaisí (vakai, Tokāteline mo e Ngaahi Fuakava 29:13; 45:54; 88:96–99). ʻE kau ʻi he Toetuʻu ʻa e kau taʻe-angatonú, pe ko e “toetuʻu fakaʻosí” (Tokāteline mo e Ngaahi Fuakava 76:85), ʻa kinautolu te nau maʻu e puleʻanga fakatilesitialé mo kinautolu ko e ngaahi foha ʻo e malaʻiá, pea ʻe hoko ia ʻi he fakaʻosinga ʻo e Nofo Tuʻí (vakai, Tokāteline mo e Ngaahi Fuakava 76:85; 88:32, 100–102). (Tokāteline mo e Ngaahi Fuakavá – Tohi Lēsoni ʻa e Tokotaha Akó [2018], 400)

Ngaahi ʻEkitivitī Fakalahi ki he Akó

Ko ha founga ʻe taha ke ako ai e veesi 51–53

Makehe mei hono fakahaaʻi mai kiate kitautolu e tokoni naʻe fai ʻe he ʻOtuá ke tau hoko ai ʻo hangē ko Iá, ʻe lava ke tokoni ʻa e Tokāteline mo e Ngaahi Fuakava 76:51–53 ke mahino kiate kitautolu ʻa e ngaahi fili ʻa kinautolu ʻi he puleʻanga fakasilesitialé. Te ke lava ʻo fakaafeʻi ʻa e kau akó ke nau lau ʻa e ngaahi vēsí, ʻo kumi ʻa e ngaahi fili naʻe fai ʻe kinautolu ʻoku fakamatalaʻi ʻi he ngaahi veesi ko ʻení. Fakakaukau leva ke fakaafeʻi ʻa e kau akó ke nau ngāue mo ha hoa pea maʻu ha fakamatala fakalūkufua lahi ange ki he founga ʻo ʻenau vakai ki he moʻui fakamatelie ʻa kinautolu ʻoku fakamatalaʻi ʻi he puleʻanga fakasilesitialé. ʻOku nau sioloto nai ʻoku fai ʻe he kakai ko ʻení ha ngaahi fehalaaki? ʻOku nau fakakaukauloto nai ki he ngaahi vaivai naʻe hoko ʻi heʻenau moʻui fakaʻahó?

Tokāteline mo e Ngaahi Fuakava 76:53. “Ikuna ʻi he tuí.”

Ke tokoni ke mahino lahi ange ki he kau akó ʻa e founga te nau lava ai ʻo “ikuna ʻi he tuí,” fakakaukau ke fehuʻi ange pe ko e hā ʻe ala fiemaʻu ʻe ha taha ke ikuná. Te ke lava ʻo fakahinohino ange ʻa e Mōsaia 3:19 ke nau sio ki he meʻa naʻe akoʻi ʻe he Tuʻi ko Penisimaní fekauʻaki mo e fiemaʻu ke tau ikunaʻi ʻa e tangata fakakakanó. ʻIkai ngata aí, kae vahevahe mo kinautolu ʻa e founga naʻe lea ai ʻa Palesiteni Lāsolo M. Nalesoni fekauʻaki mo e mahuʻinga ʻo hono ikunaʻi ʻo e māmaní. Fakakaukau ke vahevahe ʻa e fakamatala ko ʻení pe ko ha fakamatala te ke fili mei heʻene leá:

ʻE founga fēfē leva haʻatau ikuʻi ʻa māmaní? Naʻe akoʻi mai ʻe he Tuʻi ko Penisimaní ʻa e foungá. Naʻá ne pehē “ko e tangata fakakakanó ko e fili ia ki he ʻOtuá, … pea ʻe pehē ai pē, ʻo taʻengata “kae ʻoua kuó ne talangofua ki he ngaahi fakahinohino ʻa e Laumālie Māʻoniʻoní, pea liʻaki ʻa e tangata fakakakanó kae hoko ko ha tangata māʻoniʻoni ʻi he fakalelei ʻa Kalaisi ko e ʻEikí” [Mōsaia 3:19]. Ko e taimi kotoa pē te ke feinga ai pea mo muimui ki he ueʻi ʻa e Laumālié, ko e taimi kotoa pē te ke fai ai ha meʻa lelei—ha ngaahi meʻa he ʻikai fai ʻe he “tangata fakakakanó,”—ko hoʻo ikuʻi ia ʻa māmaní. (Russell M. Nelson, “Ikuʻi ʻa Māmani mo Maʻu ha Fiemālie,” Liahona, Nōvema 2022, 97)

Fakakaukau ke fakaafeʻi ʻa e kau akó ke vahevahe ha ngaahi sīpinga ʻo ha lelei kuo nau fai kimuí ni mai he ʻikai fai ʻe he tangata pe fefine fakakakanó.