“Lēsoni 88—Tokāteline mo e Ngaahi Fuakava 76:71–112: ‘Toʻa ʻi he Fakamoʻoni ʻo Sīsuú,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 76:71–112,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 88: Tokāteline mo e Ngaahi Fuakava 76
Tokāteline mo e Ngaahi Fuakava 76:71–112
“Toʻa ʻi he Fakamoʻoni ʻo Sīsuú”
Hili e mamata ʻa Siosefa Sāmita mo Sitenei Likitoni ki ha ngaahi meʻa-hā-mai lahi, kau ai ha ngaahi meʻa-hā-mai ki he nāunau ʻo e Tamaí mo e ʻAló, ko e tō ʻa Lusifaá, mo e puleʻanga fakasilesitialé, naʻá na mamata kiate kinautolu te nau maʻu ʻa e ngaahi puleʻanga fakatelesitialé mo e fakatilesitialé. Ko ha ʻulungaanga makehe ʻo kinautolu ʻi he puleʻanga fakatelesitialé naʻe ʻikai ke nau toʻa ʻi heʻenau fakamoʻoni kia Sīsuú. ʻE lava ke tokoni ʻa e lēsoni ko ʻení ke loto-toʻa ange ʻa e kau akó ʻi heʻenau fakamoʻoni kia Sīsū Kalaisí.
Ngaahi ʻEkitivitī Ako ʻOku Ala Fakahokó
Ko ha fakamoʻoni kia Sīsū Kalaisi
Fakakaukau ke hiki ʻa e ngaahi lea Fakamoʻoni kia Sīsū Kalaisí ʻi he palakipoé. Fehuʻi ki he kau akó pe ʻoku nau pehē ʻoku ʻuhinga ki he hā ke maʻu ha fakamoʻoni ki he Fakamoʻuí. ʻO ka fiemaʻu, fakamatalai ange ko e fakamoʻoní, ko ha meʻa ia ʻoku tau ʻiloʻi ʻoku moʻoni ʻi hotau lotó mo e ʻatamaí ʻi hono fakamoʻoniʻi mai ʻe he Laumālie Māʻoniʻoní (vakai, Tokāteline mo e Ngaahi Fuakava 8:2). Pea aleaʻi leva e ngaahi fehuʻi ko ʻení:
ʻEke ha ngaahi fehuʻi fakatupu fakakaukau: Ki ha ako lahi ange ki he founga hono fakahoko ʻení, vakai ki he ako “Fokotuʻu ha ngaahi feituʻu mo ha ngaahi faingamālie maʻá e kau akó ke akoʻi kinautolu ʻe he Laumālie Māʻoniʻoní” ʻoku maʻu ʻi he Fakatupulaki Ngaahi Taukei ʻa e Faiakó. Fakakaukau ki hono akoako ʻo e taukeí ʻaki hano faʻu ha ngaahi sivi fakaekita ʻa e tokotaha akó fekauʻaki mo ha tokāteline, moʻoni, pe tefitoʻi moʻoni.
-
ʻE tokoniʻi fēfē koe ʻe ha fakamoʻoni ki he Fakamoʻuí ʻi he moʻuí ni pea ki he taʻengatá?
Fakaafeʻi ʻa e kau akó ke fakakaukau ki heʻenau ngaahi fakamoʻoni kia Sīsū Kalaisí, kau ai ʻa e founga kuo tākiekina ai ʻe heʻenau ngaahi fakamoʻoní ʻenau ngaahi ngāué. Te ke lava foki ʻo fakaafeʻi kinautolu ke fakakaukau ki he ngaahi holi ʻoku nau maʻu ki heʻenau ngaahi fakamoʻoní.
Poupouʻi ʻa e kau akó ʻi heʻenau akó ke kumi ha ngaahi akonaki ʻe lava ʻo tokoni ke nau fakatokangaʻi ai ʻa e mahuʻinga ʻo e maʻu ha fakamoʻoni kia Sīsū Kalaisí pea mo e moʻui ʻo fakatatau mo e meʻa ʻoku nau ʻiló.
Mata meʻa-hā-mai ki he ngaahi puleʻanga ʻo e nāunaú
Fakakaukau ke fakaafeʻi ʻa e kau akó ke fakamatalaʻi fakanounou ʻa e meʻa kuo nau ako fekauʻaki mo e meʻa-hā-mai ʻoku lekooti ʻi he Tokāteline mo e Ngaahi Fuakava 76. Hili iá pea fakamatalaʻi ʻa e ngaahi meʻa ko ʻení.
Mahalo te ke manatuʻi ʻoku ʻi he Tokāteline mo e Ngaahi Fuakava 76 ha fakamatala ki ha mata meʻa-hā-mai maʻongoʻonga naʻe fakahā ʻe he ʻEikí kia Siosefa Sāmita mo Sitenei Likitoni. Naʻe ako ʻe Siosefa mo Sitenei ʻa e ngaahi ʻulungaanga ʻo e kakai te nau nofo ʻi he ngaahi puleʻanga kehekehe ʻo e nāunaú hili ʻa e Toetuʻú, ko ha konga ʻo ʻena mata meʻa-hā-maí.
Mahalo ʻe tokoni ke fakamatalaʻi ange he ʻikai ako ʻe he kau akó ʻa e ngaahi veesi kotoa pē ʻokú ne fakamatalaʻi ʻa e ngaahi puleʻanga ʻo e nāunaú ʻi he lēsoni ko ʻení. ʻOku fakamatalaʻi ʻa e nāunau fakasilesitialé ʻi he veesi 50–70, 92–96; ko e nāunau fakatelesitialé ʻi he veesi 71–80; pea mo e nāunau fakatilesitialé ʻi he veesi 81–90, 98–112. Fakakaukau ke fakaafeʻi ʻa e kau akó ke fakaʻilongaʻi ʻa e ngaahi veesi ko ʻení ʻi heʻenau folofolá koeʻuhí ke nau lava ʻo ako fakaʻāuliliki ange ia ʻiate kinautolu pē.
Lau ʻa e ngaahi potufolofola ko ʻení, ʻo kumi ʻa e ngaahi faikehekehe ʻi he ngaahi fakamoʻoni ʻa e kakai ʻo e puleʻanga takitaha ʻo e nāunaú:
-
Tokāteline mo e Ngaahi Fuakava 76:51–52 (fakasilesitiale)
-
Tokāteline mo e Ngaahi Fuakava 76:75, 79 (fakatelesitiale)
-
Tokāteline mo e Ngaahi Fuakava 76:82, 101–103 (fakatilesitiale)
ʻI he ʻosi e ako ʻa e kau akó, fakaafe‘i kinautolu ke aleaʻi ʻa e ongo fehu‘i ko ʻení ko ha kalasi pe ʻi ha fanga kiʻi kulupu iiki:
-
Ko e hā ha ngaahi faikehekehe naʻá ke fakatokangaʻi ʻi he ngaahi fakamoʻoni ʻa e ngaahi kulupu ko ʻení?
-
Ko e hā ʻe lava ke akoʻi atu ʻe he meʻá ni fekauʻaki mo e faʻahinga fakamoʻoni ʻoku fiemaʻu ke maʻu ai ʻa e puleʻanga fakasilesitialé?
Tokoni ke ʻilo ʻe he kau akó ha foʻi moʻoni hangē ko ʻení: Kapau ʻoku tau toʻa ʻi he fakamoʻoni kia Sīsū Kalaisí, te tau lava ʻo maʻu ʻa e puleʻanga fakasilesitiale ʻo e ʻOtuá.
Loto-toʻa ʻi heʻetau fakamoʻoni kia Sīsū Kalaisí
-
ʻOkú ke pehē ʻoku ʻuhinga ki he hā ʻa e loto-toʻa ʻi heʻetau ngaahi fakamoʻoni kia Sīsū Kalaisí?
Fakakaukau ke fakaafeʻi ʻa e kau akó ke ako e 2 Nīfai 31:20–21 ko ha konga ʻo hoʻomou aleaʻi e fehuʻi kimuʻá, pea kumi e ngaahi akonaki ʻe lava ʻo tānaki ki he mahino ʻoku nau maʻú. ʻE lava foki ke tokoni mo e fakamatala ko ʻení.
ʻOku tokoni mai ʻa ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ke mahino kiate kitautolu ʻa e ʻuhinga ʻo e loto-toʻa ʻi he fakamoʻoni kia Sīsuú:
ʻOku fakamahino ʻe he vahe 76 ʻo e Tokāteline mo e Ngaahi Fuakavá ko e “toʻa ʻi he fakamoʻoni ʻo Sīsuú” [Tokāteline mo e Ngaahi Fuakava 76:79] ʻa e sivi faingofua mo mahuʻinga ki he niʻihi te nau maʻu e ngaahi tāpuaki ʻo e puleʻanga fakasilesitialé mo kinautolu ʻi he puleʻanga fakatelesitiale maʻulalo angé. Ke lototoʻá, ʻoku fiemaʻu ia ke tau nofotaha he mālohi ʻo Sīsū Kalaisí mo ʻEne feilaulau fakalelei ke ikunaʻi e maté, ʻo fakafou heʻetau fakatomalá, kae fakamaʻa ʻetau angahalá pea ʻoku fie maʻu ke tau muimui he tokāteline ʻo Kalaisí [vakai, 2 Nīfai 31:17–21]. ʻOku tau toe fiemaʻu foki e maama mo e ʻilo ki he moʻui mo e ngaahi akonaki ʻa e Fakamoʻuí ke tataki kitautolu ʻi he hala ʻo e fuakavá, kau ai e ngaahi ouau toputapu ʻo e temipalé. Kuo pau ke tau tuʻu maʻu ʻia Kalaisi, keinanga ʻi Heʻene folofolá, pea kātaki ki he ngataʻangá [2 Nīfai 31:20–21]. (Quentin L. Cook, “Toʻa ʻi he Fakamoʻoni ʻo Sīsuú,” Liahona, Nōvema 2016, 43)
-
Ko e hā te ne lava ʻo ʻai ke faingataʻa kiate koe pe ko e niʻihi kehé ke kei loto-toʻa ʻi hoʻo fakamoʻoni kia Sīsū Kalaisí?
-
Ko e hā ʻoku tokoni kiate koe ke ke fāifeinga ke loto-toʻa ʻi hoʻo fakamoʻoni ki he Fakamoʻuí?
Fakakaukau ke fakaafeʻi ʻa e kau akó ke nau kumi mo vahevahe ha ngaahi potufolofola ʻokú ne fakaʻaiʻai kinautolu ke nau toʻa ʻi heʻenau fakamoʻoni kia Sīsū Kalaisí, ko ha konga ʻo e fealeaʻaki ʻi he fehuʻi kimuʻá. Te ke lava ʻo fokotuʻu ange ke nau kamata ʻaki ʻa e Hilamani 5:12.
Faʻu ha palani
Fakaʻaongaʻi ha kiʻi taimi ke fakalaulauloto ki he meʻa te ke lava ʻo fai ke ke loto-toʻa ange ai ʻi hoʻo fakamoʻoni kia Sīsū Kalaisí. Fakakakato ‘a e fakamatala ʻe tolu ko ‘ení ʻi hoʻo tohinoa akó.
-
Te u lava ʻo loto-toʻa ʻi heʻeku fakamoʻoni kia Sīsū ʻi he ʻaho ní ʻaki …
-
Te u lava ʻo loto-toʻa ʻi heʻeku fakamoʻoni kia Sīsū ʻi he ngaahi māhina siʻi ka hokó ʻaki …
-
Te u lava ʻo tokoni ki he niʻihi kehé ke nau loto-toʻa maʻu ai pē ʻi heʻenau fakamoʻoni kia Sīsuú ʻaki …
Fakakaukau ke fakaafeʻi ha kau ako ʻe niʻihi ʻoku nau fiemālie ke vahevahe ha taha pe lahi ange ʻo ʻenau ngaahi fakamatala kuo kakató. Ke fakaʻosí, fakaafeʻi ha taha ke vahevahe ʻene fakamoʻoni kia Sīsū Kalaisí pe vahevahe hoʻo fakamoʻoni kiate Iá.