“Leksiyon 86—Doktrina ug mga Pakigsaad 76:19–24: ‘Kini Mao ang Pagpamatuod … Nga Kami Naghatag mahitungod Kaniya,’” Manwal sa Magtutudlo sa Seminary sa Doktrina ug mga Pakigsaad (2025)
“Doktrina ug mga Pakigsaad 76:19–24,” Manwal sa Magtutudlo sa Seminary sa Doktrina ug mga Pakigsaad
Leksiyon 86: Doktrina ug mga Pakigsaad 76
Doktrina ug mga Pakigsaad 76:19–24
“Kini Mao ang Pagpamatuod … Nga Kami Naghatag mahitungod Kaniya”
Lakip sa mga panan-awon nga narekord diha sa Doktrina ug mga Pakigsaad 76, sila si Joseph Smith ug Sidney Rigdon nakakita ni Jesukristo mismo. Ilang nakat-unan kon sa unsang paagi ang Manluluwas mao ang sentro sa atong kaluwasan ug dayon nagpamatuod mahitungod Kaniya. Kini nga leksiyon makatabang sa mga estudyante nga mobati og dugang nga gugma alang ni Jesukristo ug sa Iyang tahas diha sa plano sa Langitnong Amahan.
Mga Posibleng Kalihokan sa Pagkat-on
Importante kanako si Jesukristo
Hatagi og kahigayonan ang mga estudyante sa paghisgot kon nganong importante kanila si Jesukristo. Mahimo nimong ikonsiderar ang paggamit sa mosunod nga senaryo, o mahimo nimong dapiton ang mga estudyante sa paghimo og lahi.
Si Abbey ug Sarika adunay daghang mga klase nga magkauban sa eskwelahan. Usa ka adlaw sa paniudto, si Sarika mitan-aw ni Abbey ug miingon, “Nakadungog ko og mga tawo nga naghisgot mahitungod ni Jesus sa tibuok nakong kinabuhi. Ako nakadungog pa gani nga ikaw miingon nga nagtuo ka Kaniya. Wala pa gyod ko nakahibalo bahin kang Jesus, ug nakuryoso kaayo ko. Unsa man ang imong ikasulti kanako mahitungod Kaniya, o nganong Siya mahinungdanon man kanimo?”
-
Kon ikaw si Abbey, unsay imong ikasulti kang Sarika?
Sa dili pa hangyoon ang pipila ka mga estudyante sa pagtubag, ikonsiderar ang paghatag kanila og panahon sa pagpamalandong sa ilang isulti. Mahimong makatabang sa mga estudyante ang paghimo og lista diha sa ilang mga journal sa pagtuon kon unsa sa ilang hunahuna ang gikinahanglan nga mahibaloan sa tanang mga tawo mahitungod ni Jesus.
Hunahunaa kon unsay imong gibati mahitungod ni Jesukristo ug unsa ka komportable ang imong pagbati mahitungod sa pagpakigsulti sa uban kabahin Kaniya. Sa imong pagtuon karon, pangita og mga pagtulon-an nga makatabang kanimo nga mobati og dugang nga gugma kang Jesukristo.
Usa ka panan-awon sa Anak sa Dios
Mahimong makatabang ang pagdapit sa mga estudyante sa pagpakigbahin kon unsay ilang nahinumdoman mahitungod sa mga kahimtang nga misangpot nga si Joseph Smith ug Sidney Rigdon nakakita sa panan-awon nga narekord diha sa Doktrina ug mga Pakigsaad 76. Kon gikinahanglan, pahinumdomi sila nga samtang sila si Joseph Smith ug Sidney Rigdon namalandong sa mga kasulatan, ang Ginoo “mihikap sa mga mata sa [ilang] pagsabot” (Doktrina ug mga Pakigsaad 76:19), ug sila nakasinati og usa ka dako nga panan-awon.
Ang Doktrina ug mga Pakigsaad 76:22–24 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.
Basaha ang Doktrina ug mga Pakigsaad 76:1–6, 19–24, mangita sa unsay gipahayag nila ni Joseph ug Sidney mahitungod sa Langitnong Amahan ug ni Jesukristo.
Dasiga ang mga estudyante sa pagsuwat sa unsay ilang nadiskobrehan diha sa ilang mga kasulatan. Sama pananglit, mahimo silang maghimo og lista sa ilang mga nakaplagan diha sa ilang mga journal sa pagtuon.
Sa laing paagi, ikonsiderar ang paghatag og pipila ka dagkong mga palid sa papel diin ang mga estudyante makarekord sa unsay ilang nakat-onan. Kon mahuman na ang mga estudyante, mahimo nimong ibutang ang mga papel diha sa mga bungbong sa classroom. Mahimong molibot ang mga estudyante sa lawak klasehanan aron mabasa kon unsay nadiskobrehan sa uban ug dayon modrowing og kasingkasing tupad sa ilang ganahan o gusto nga mahibaloan pa. Hatagi ang mga estudyante og panahon sa paghisgot sa unsay ilang napalgan.
-
Unsa nga mga kamatuoran gikan niini nga mga bersikulo ang mipatigbabaw diha kanimo? Ngano man?
Tingali nakakaplag ka og daghang kamatuoran niini nga mga bersikulo. Lakip niini, tingali namatikdan nimo nga:
-
Si Jesukristo maluluy-on ug malipay sa pagpanalangin kanato kon kita nagtahod ug nagserbisyo Kaniya (bersikulo 5).
-
Si Jesukristo usa ka buhi, mahimayaong binuhat (bersikulo 22).
-
Si Jesukristo mao ang Bugtong Anak sa Amahan (bersikulo 23).
-
Ubos sa direksiyon sa Langitnong Amahan, si Jesukristo mao ang Tiglalang sa tanang butang (bersikulo 24).
-
Unsa ang natabang niini nga mga kamatuoran kanimo nga makasabot kon unsaon ni Jesukristo pagtabang kanimo ug sa uban?
Ang mosunod nga mga kalihokan makatabang sa mga estudyante sa pagpalawom sa ilang pagsabot ug mabati ang kaimportante sa duha sa mga kamatuoran nga gitudlo niini nga mga bersikulo. Mahimo nimong pilion ang usa o ang duha ka mga kalihokan aron dungan nga tun-an isip usa ka klase. O mahimo nimong ipakita ang mga instruksiyon sa kalihokan ug tahasi ang gagmay nga mga grupo o mga manag paresan sa pagkompleto sa usa o sa duha sa mga kalihokan nga magkauban.
Kalihokan A: Si Jesukristo buhi!
Kon gikinahanglan, paghatag og giimprinta nga kopya sa mga liriko sa himno nga “Buhi ang Manunubos Ko, Niini Nasayod Ako” (Mga Himno, nu. 80) aron magamit sa mga estudyante. Kon buhaton ninyo kini nga kalihokan nga magkauban isip usa ka klase, mahimo ninyong kantahon ang himno atol niini nga bahin sa leksiyon.
Agi og dugang sa pagpatuon sa mga estudyante sa himno diha sa lakang 3, mahimo usab nimo silang dapiton sa pagpangita og mga kasulatan o mga pamahayag gikan sa mga lider sa Simbahan nga naghulagway kon unsay mahimo sa Manluluwas alang kanato tungod kay Siya buhi. Ang mga ehemplo sa mga kasulatan nga mahimo nimong isugyot naglakip sa Juan 6:40; Filipos 4:13; Doktrina ug mga Pakigsaad 58:42; 84:88.
Ikonsiderar usab ang paggamit sa usa sa mga bidyo ubos sa ulohan nga “Dugang nga mga bidyo: Siya buhi!” diha sa “Dugang nga mga Kalihokan sa Pagkat-on.”
-
Ikonsiderar ang pagmarka sa mga pulong nga “siya buhi!” sa bersikulo 22 sa paagi nga kini malahi diha sa imong mga kasulatan.
-
Isulat ang hugpong sa mga pulong nga Tungod kay si Jesukristo buhi … diha sa imong journal sa pagtuon.
-
Basaha ang mga liriko sa himno nga “Buhi ang Manunubos Ko, Niini Nasayod Ako” (Mga Himno, nu. 80), mangita og mga ehemplo kon sa unsang paagi si Jesukristo makatabang kanimo tungod kay Siya buhi.
-
Pagsulat og labing menos lima ka mga paagi nga mahimo nimong kompletohon kana nga hugpong sa mga pulong nga labing importante alang kanimo.
Kalihokan B: Si Jesukristo ang Tiglalang sa tanang butang
Aron matabangan ang mga estudyante nga mas maandam sa pagtubag sa lakang 4, ikonsiderar ang pagpakigbahin sa pamahayag ni Presidente Boyd K. Packer diha sa “Dugang nga mga Kapanguhaan.”
-
Ikonsiderar ang pagmarka sa hugpong sa mga pulong nga “pinaagi kaniya, ug ngadto kaniya, ug tungod kaniya, ang mga kalibotan nalalang” (bersikulo 24) sa paagi nga malahi kini nga hugpong sa mga pulong diha sa imong mga kasulatan.
-
Pangita og mga kasulatan o mga pamahayag gikan sa mga lider sa Simbahan nga mas nagpalawom sa imong pagsabot sa tahas ni Jesukristo isip Tiglalang. Ang mga pananglitan sa mga kasulatan nga mahimo nimong tun-an naglakip sa Juan 1:1–3; 3 Nephi 9:15; Doktrina ug mga Pakigsaad 93:9–10; Moises 1:33; 7:30.
-
Hisgoti ang pipila sa mga linalang sa Manluluwas nga nagtabang kanimo nga mobati sa gugma sa Langitnong Amahan ug ni Jesukristo. Ipasabot kon ngano.
-
Pagsulat og labing menos tulo ka mga paagi nga imong gibati nga si Jesukristo makatabang kanimo tungod kay Siya ang Tiglalang sa tanang butang.
Kon mahuman na ang mga estudyante sa kalihokan o mga kalihokan, tugoti sila sa pagpakigbahin sa ilang nakat-onan ug nabati. Seguroha nga dapiton sila sa pagpakigbahin sa unsay ilang nakat-onan kon sa unsang paagi si Jesukristo makatabang kanila tungod kay Siya buhi ug tungod kay Siya ang Tiglalang. Mahimong ipakigbahin sa mga estudyante ang ilang mga panabot diha diin asa sila naglingkod, o mahimo kang magdapit og andam nga mga estudyante sa pagduol sa atubangan sa lawak klasehanan aron ipakigbahin ang ilang mga pagpamatuod ni Jesukristo.
Isag-ulo
Mahimo nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan mao ang “Pinaagi [ni Jesukristo] ang mga kalibotan nalalang.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”