Leksiyon 88: Doktrina ug mga Pakigsaad 76

Doktrina ug mga Pakigsaad 76:71–112

“Maisog diha sa Pagpamatuod ni Jesus”

Human makakita og daghang mga panan-awon, lakip ang mga panan-awon sa himaya sa Amahan ug Anak, pagkapukan ni Lucifer, ug sa celestial nga gingharian,si Joseph Smith ug si Sidney Rigdon nakakita niadtong kinsay makapanunod sa terrestrial ug telestial nga mga gingharian. Usa ka nakalahi nga kinaiya niadtong anaa sa gingharian nga terrestrial mao nga sila dili maisogon sa ilang pagpamatuod ni Jesus. Kini nga leksiyon makatabang sa mga estudyante nga mahimong mas maisogon sa ilang pagpamatuod ni Jesukristo.

Mga Posibleng Kalihokan sa Pagkat-on

Usa ka pagpamatuod kang Jesukristo

Ikonsiderar ang pagsulat sa mga pulong nga Pagpamatuod ni Jesukristo diha sa pisara. Pangutan-a ang mga estudyante kon unsa sa ilang hunahuna ang gipasabot niini nga magbaton og pagpamatuod mahitungod sa Manluluwas. Kon gikinahanglan, ipasabot nga ang pagpamatuod usa ka butang nga atong nahibaloan nga tinuod sa atong mga kasingkasing ug mga hunahuna nga gihatag kanato pinaagi sa pagsaksi sa Espiritu Santo (tan-awa sa Doktrina ug mga Pakigsaad 8:2). Dayon hisgoti ang mosunod nga pangutana:

Pangutana og mga pangutana nga nagdapit og pagpamalandong: Alang sa dugang nga pagbansay kon unsaon sa pagbuhat niini, tan-awa ang pagbansay nga giulohan og “Paghimo og mga sitwasyon ug mga oportunidad alang sa mga tigkat-on nga matudloan pinaagi sa Espiritu Santo” nga makita sa Pagpalambo sa mga Kahanas sa Magtutudlo: Pagtudlo pinaagi sa Espiritu. Ikonsiderar ang pagpraktis sa kahanas pinaagi sa paghimo og mga pagtimbang-timbang sa kaugalingon alang sa estudyante mahitungod sa usa ka doktrina, kamatuoran, o baroganan.

• Sa unsang paagi nga ang pagpamatuod mahitungod sa Manluluwas makaapekto kanimo niini nga kinabuhi ug sa tibuok kahangtoran?

Dapita ang mga estudyante sa paghunahuna mahitungod sa ilang kaugalingong mga pagpamatuod ni Jesukristo, lakip kon sa unsang paagi ang ilang mga pagpamatuod nakaapekto sa ilang mga binuhatan. Mahimo usab nimo silang dapiton sa paghunahuna mahitungod sa mga tinguha nga anaa kanila alang sa ilang mga pagpamatuod.

Dasiga ang mga estudyante samtang sila nagtuon sa pagpangita og mga pagtulun-an nga makatabang kanila nga mailhan ang kaimportante sa pagbaton og pagpamatuod ni Jesukristo ug sa pagkinabuhi sumala sa ilang nahibaloan.

Panan-awon sa mga gingharian sa himaya

Ikonsiderar ang pagdapit sa mga estudyante sa pagpamubo sa unsay ilang natun-an sa pagkakaron mahitungod sa panan-awon nga narekord diha sa Doktrina ug mga Pakigsaad 76. Dayon ipasabot ang mosunod.

Mahimong imong nahinumdoman nga ang Doktrina ug mga Pakigsaad 76 adunay usa ka paghulagway sa usa ka dako nga panan-awon nga gihatag sa Ginoo ngadto ni Joseph Smith ug ni Sidney Rigdon. Isip kabahin sa ilang panan-awon, nahibaloan nila ni Joseph ug ni Sidney ang mga kinaiya sa mga tawo kinsa makapuyo sa lain-laing mga gingharian sa himaya human sa Pagkabanhaw.

Mahimong makatabang ang pagpasabot nga dili tun-an sa mga estudyante ang tanang mga bersikulo nga naghulagway sa mga gingharian sa himaya niini nga leksiyon. Ang celestial nga himaya gihulagway diha sa mga bersikulo 50–70, 92–96; ang terrestrial nga himaya diha sa mga bersikulo 71–80; ug ang telestial nga himaya diha sa mga bersikulo 81–90, 98–112. Ikonsiderar ang pagdapit sa mga estudyante sa pagmarka o pagbutang og timaan niini nga mga bersikulo diha sa ilang mga kasulatan aron ilang tun-an kini sa mas detalyado diha sa ilang kaugalingon.

Basaha ang mosunod nga mga kasulatan, mangita sa mga kalainan sa mga pagpamatuod sa mga nagpuyo sa matag usa sa mga gingharian sa himaya:

• Doktrina ug mga Pakigsaad 76:51–52 (celestial)

• Doktrina ug mga Pakigsaad 76:75, 79 (terrestrial)

• Doktrina ug mga Pakigsaad 76:82, 101–103 (telestial)

Kon mahuman na ang mga estudyante sa pagtuon, dapita sila sa paghisgot sa mosunod nga mga pangutana isip usa ka klase o diha sa gagmay nga mga grupo:

• Unsa nga mga kalainan ang inyong namatikdan tali sa mga pagpamatuod niini nga mga grupo?

• Unsa ang matudlo niini kaninyoo mahitungod sa matang sa pagpamatuod nga gikinahanglan aron mapanunod ang celestial nga gingharian?

Tabangi ang mga estudyante sa pag-ila og usa ka kamatuoran sama sa mosunod: Kon kita maisogon sa pagpamatuod ni Jesukristo, atong maangkon ang celestial nga gingharian sa Dios.

Maisog diha sa atong pagpamatuod ni Jesukristo

• Unsa sa imong hunahuna ang gipasabot nga magmaisog diha sa atong mga pagpamatuod ni Jesukristo?

Isip kabahin sa inyong panaghisgotan sa miaging pangutana, ikonsiderar ang pagdapit sa mga estudyante sa pagtuon sa 2 Nephi 31:20–21 ug sa pagpangita og mga pagtulun-an nga makadugang sa ilang pagsabot. Ang mosunod nga pamahayag mahimong makatabang usab.

Si Elder Quentin L. Cook sa Korum sa Napulog Duha ka Apostoles nagtabang kanato nga makasabot kon unsay buot ipasabot nga magmaisug diha sa pagpamatuod ni Jesus:

Ang Ika-76 nga seksiyon sa Doktrina ug mga Pakigsaad miklaro niini nga ang “[pagka]maisog diha sa pagpamatuod ni Jesus” [Doktrina ug mga Pakigsaad 76:79] mao ang yano, mahinungdanon nga pagsulay tali niadtong makapanunod sa panalangin sa celestial nga gingharian ug niadtong anaa sa mas ubos nga terrestrial nga gingharian. Aron mahimong maisug, kita kinahanglang magtutok sa gahom ni Jesukristo ug sa Iyang maulaon nga sakripisyo sa pagbuntog sa kamatayon ug, pinaagi sa paghinulsol, aron malimpyo kita gikan sa sala, ug mosunod sa doktrina ni Kristo. [tan-awa sa 2 Nephi 31:17–21]. Nagkinahanglan usab kita sa kahayag ug kahibalo sa kinabuhi sa Manluluwas ug sa mga pagtulun-an nga maggiya nato sa dalan sa pakigsaad, lakip sa sagradong mga ordinansa sa templo. Kinahanglan kitang magmakanunayon kang Kristo, magbusog sa Iyang pulong, ug molahutay sa kataposan [2 Nephi 31:20–21]. (Quentin L. Cook, “Maisug diha sa Pagpamatuod ni Jesus,” Liahona, Nob. 2016, 43)

• Unsa ang makapalisod niini kanimo o sa uban nga magpabiling maisogon sa inyong pagpamatuod ni Jesukristo?

• Unsa ang nakatabang kanimo nga maningkamot nga magmaisogon sa imong pagpamatuod mahitungod sa Manluluwas?

Isip kabahin sa panaghisgotan sa miaging pangutana, ikonsiderar ang pagdapit sa mga estudyante sa pagpangita ug sa pagpaambit og mga kasulatan nga nagdasig kanila nga magmaisogon sa ilang pagpamatuod ni Jesukristo. Mahimo nimong isugyot nga magsugod sila sa Helaman 5:12.

Paghimo og plano

Paggahin og kadiyot sa pagpamalandong kon unsa ang imong mabuhat aron mahimong mas maisugon sa imong pagpamatuod mahitungod ni Jesukristo. Kompletoha ang mosunod nga tulo ka pamahayag diha sa imong journal sa pagtuon.

1. Ako mahimong magmaisogon sa akong pagpamatuod kang Jesus karon pinaagi sa …

2. Ako mahimong magmaisogon sa akong pagpamatuod kang Jesus sa mosunod nga pipila ka bulan pinaagi sa …

3. Makatabang ako sa uban nga magpabiling maisogon sa ilang mga pagpamatuod ni Jesus pinaagi sa …

Ikonsiderar ang pagdapit og pipila ka estudyante kinsa komportable nga mopakigbahin sa usa o sa daghan pa sa ilang nahuman nga mga pamahayag. Sa pagtapos, pagdapit og usa ka tawo nga mopakigbahin sa iyang pagsaksi ni Jesukristo o ipakigbahin ang imong kaugalingong pagsaksi Kaniya.

Dugang nga mga Kapanguhaan

Unsa ang epekto sa mga pagtulun-an sa Doktrina ug mga Pakigsaad 76 ngadto sa unang mga miyembro sa Simbahan?

Si Presidente Wilford Woodruff (1807–1898) namulong mahitungod sa iyang mga impresyon niini nga pagpadayag:

Gitudloan ako gikan sa akong pagkabata nga adunay usa ka Langit ug usa ka Impiyerno, ug gisultihan nga ang daotan tanan adunay usa ka silot ug ang matarong usa ka himaya. …

… Sa dihang akong nabasa ang panan-awon … , kini naglamdag sa akong salabutan ug mihatag kanako og dako kaayong hingpit nga kalipay, kini nagpakita kanako nga ang Dios kinsa mipadayag niana nga baroganan ngadto sa tawo maalamon, makiangayon ug matinuoron, naghupot sa labing maayo nga mga hiyas ug maayong panghunahuna ug kahibalo, gibati ko nga Siya makanunayon uban ang gugma, kaluoy, hustisya ug paghukom, ug gibati ko ang labaw nga paghigugma sa Ginoo sukad masukad sa akong kinabuhi. (Wilford Woodruff, “Remarks,” Deseret News, May 27, 1857, 91)

Doktrina ug mga Pakigsaad 76:72–74. Unsay buot ipasabot nga kadtong kinsa “namatay nga wala masayod sa balaod” mapanunod ang terrestrial nga gingharian?

Gikan sa Doktrina ug mga Pakigsaad 76:72–74, atong makat-onan nga ang ubang mga tawo sa terrestrial nga gingharian mao kadtong “namatay nga wala masayod sa balaod” ug “wala modawat sa pagpamatuod ni Jesus diha sa unod” apan midawat niini diha sa kalibotan sa espiritu. Bisan pa man, kini importante nga masabtan nga ang ubangmga katawhan kinsa gitudloan sa ebanghelyo didto sa kalibotan sa espiritu makapanunod sa celestial nga gingharian. Pinaagi ni Propeta Joseph Smith, ang Ginoo mipadayag nga ang “tanan kinsa namatay nga walay kahibalo niini nga ebanghelyo, kinsa unta makadawat niini kon sila gitugotan pa sa pagpabilin, mahimo nga manununod niana nga gingharian sa Dios” (Doktrina ug mga Pakigsaad 137:7).

Doktrina ug mga Pakigsaad 76:79. Unsaon nako pagkahimong maisogon sa akong pagpamatuod ni Jesus?

Si Presidente Ezra Taft Benson (1899–1994) mipasabot:

Sila nga mga [maisogon diha sa pagpamatuod ni Jesus] mao ang adunay kaisog sa pagpanalipod sa kamatuoran ug sa pagkamatarong. Kini ang mga miyembro sa Simbahan kinsa nagtuman sa ilang mga calling diha sa Simbahan (tan-awa sa Doktrina ug mga Pakigsaad 84:33), nagbayad sa ilang ikapulo ug mga halad, nagkinabuhi nga limpyo sa moral nga paagi, nagpaluyo sa ilang mga lider sa Simbahan pinaagi sa pulong ug sa buhat, naghupot sa Igpapahulay isip balaan nga adlaw, ug nagsunod sa tanang mga sugo sa Dios. (Ezra Taft Benson, “Valiant in the Testimony of Jesus,” Ensign, May 1982, 63)

Sa unsang paagi nga ang akong pagpamatuod kang Jesukristo makaapekto sa akong kinabuhi?

Si Elder Dieter F. Uchtdorf sa Korum sa Napulog Duha ka Apostoles mitudlo:

Ang pagpamatuod naghatag og tukmang panglantaw, kadasig, ug usa ka solidong pundasyon diin pagatukuran og kinabuhi nga may katuyoan ug personal nga kalamboan. Usa kini ka makanunayong tinubdan sa pagsalig, usa ka tinuod ug matinud-anong kauban atol sa maayong mga panahon ug sa dili maayo. Ang pagpamatuod naghatag kanato og rason alang sa paglaom ug pagkamaya. Nagtabang kini kanato sa pag-ugmad og usa ka diwa sa pagka-positibo ug kalipay ug nakapahimo kanato sa pagmaya diha sa mga katahom sa kinaiyahan. Ang pagpamatuod nagdasig kanato sa pagpili sa matarong sa tanang mga higayon ug diha sa tanang mga kahimtang. Nagdasig kini kanato nga mas mapaduol ngadto sa Dios, nga magtugot Kaniya nga mas mapaduol ngari kanatoo (tan-awa sa Santiago 4:8).

Ang atong personal nga pagpamatuod usa ka mapanalipdon nga taming, ug sama sa usa ka gunitanan nga puthaw naggiya kini kanato nga luwas tabok sa kangitngit ug kalibog. (Dieter F. Uchtdorf, “Ang Gahom sa Personal nga Pagpamatuod,” Liahona, Nob. 2006, 39)

Dugang nga mga Kalihokan sa Pagkat-on

Doktrina ug mga Pakigsaad 76:40–43. Maayo nga mga balita alang sa tanan

Mahimong mangandam ang mga estudyante sa pagtuon sa mga bersikulo 40–43 pinaagi sa paghisgot og mga pangutana sama sa mosunod:

• Unsa ang pipila ka maayong balita nga imong nadawat bag-o lang?

• Unsa ang pipila ka mga ehemplo sa labing importante nga mga balita nga gihatag ngadto sa kalibotan?

Dapita ang mga estudyante sa pagpangita sa Doktrina ug mga Pakigsaad 76:40–43, mangita sa maayong balita gikan sa langit. Ipasabot nga ang pulong nga ebanghelyo sa bersikulo 40 nangahulogan og “maayong balita.”

• Unsa nga maayong mga balita ang inyong nakita niini nga mga bersikulo?

Aron matabangan ang mga estudyante nga makasabot kon unsay gipasabot nga si Jesukristo “nagtubos sa tanan nga mga binuhat sa iyang mga kamot” (Doktrina ug mga Pakigsaad 76:43), ipatin-aw nga kadto kinsa makapanunod sa celestial nga gingharian makadawat sa mga panalangin sa kahimayaan, o kinabuhi nga dayon, uban sa Langitnong Amahan. Apan pinaagi sa Iyang kaluoy, ang Manluluwas nagtanyag usab og laing mga panalangin sa kaluwasan sa ubang mga gingharian sa himaya alang niadtong dili takos sa celestial nga gingharian.

Ikonsiderar ang pagpakita sa bidyo nga “Kaluwasan ug Kahimayaan” gikan sa time code 2:55 hangtod sa 6:05 aron matabangan ang mga estudyante nga mas masabtan ang kaluwasan nga gihatag sa Manluluwas ngadto sa mga anak sa Langitnong Amahan.

Doktrina ug mga Pakigsaad 76:75. “Nabutaan pinaagi sa pagkamalimbungon sa mga tawo”

Aron matabangan ang mga estudyante nga mas makasabot sa simbolismo sa bersikulo 75, ikonsiderar ang pagdapit sa usa ka andam nga estudyante sa pagtabon sa iyang mga mata gamit ang taptap. Dayon, pagdapit og laing estudyante sa paghatag sa unang estudyante og mga i nstruksiyon sa yano nga mga buluhaton, sama sa pagdrowing og yano nga hulagway o pagpahimutang og butang sa usa ka dapit sa lawak. Human sa igong panahon, kuhaa ang taptap ug hangyoa ang estudyante nga gitaptapan sa paghulagway kon unsa ang kasinatian.

Mahimo dayong tun-an sa mga estudyante ang Doktrina ug mga Pakigsaad 76:75, mangita og paghulagway niadtong kinsa makapanunod sa terrestrial nga gingharian. Ikonsiderar ang paghangyo sa mga estudyante sa paghisgot kon unsa sa ilang hunahuna ang gipasabot sa espirituhanong pagkabuta ug sa unsang paagi nga ang espirituhanong pagkabuta mo limita kanila. Dayon hangyoa ang mga estudyante sa pag-ila sa pipila ka mga butang nga mahimong hinungdan sa espirituhanong pagkabuta sa mga tin-edyer sa karong panahona.

Doktrina ug mga Pakigsaad 76:111. “Diha sa mga mansyon nga giandam”

Human matun-an sa mga estudyante ang tulo ka ang-ang sa himaya, ikonsiderar ang pagtabang kanila sa pagkonektar sa unsay ilang nakat-onan ngadto sa mga pagtulun-an sa Manluluwas diha sa Bag-ong Tugon. Dapita ang usa ka estudyante sa pagbasa og kusog sa Juan 14:2 ug hangyoa ang mga sakop sa klase sa pagpakigbahin unsay ilang nasabtan gikan sa mga pulong sa Manluluwas. Dapita sila sa pagtandi sa Juan 14:2 ngadto sa Doktrina ug mga Pakigsaad 76:111 ug mangita sa mga pagkaparehas tali sa duha ka mga tudling.