Leksiyon 87: Doktrina ug mga Pakigsaad 76

Doktrina ug mga Pakigsaad 76:50–70

“Nahimo nga Hingpit pinaagi ni Jesus”

Diha sa panan-awon sa mga gingharian sa himaya nga nakita nila ni Joseph Smith ug Sidney Rigdon, atong nasabtan ang kritikal nga tahas ni Jesukristo sa kinabuhi sa tanan kinsa makapanunod sa celestial nga gingharian. Kini nga leksiyon gituyo aron sa pagtabang sa mga estudyante nga mobati og paglaom nga sila makadawat sa kahimayaan pinaagi ni Jesukristo.

Mga Posibleng Kalihokan sa Pagkat-on

Makaya ba nga makab-ot ang celestial nga gingharian?

Ikonsiderar ang pagpakigbahin sa mosunod nga senaryo ug ang paghisgot sa mga pangutana nga nagsunod. Mahatagan ang mga estudyante og oportunidad sa mas pormal nga pagtubag sa senaryo sa ulahing bahin sa leksiyon.

Si Lucas usa ka batan-ong lalaki nga adunay hugot nga pagtuo sa Dios ug nagbuhat sa iyang labing maayo aron magkinabuhi nga matarong. Gusto niya nga mahimong takos sa pagpuyo uban sa Dios human niining kinabuhia. Apan, kahibalo si Lucas nga dili siya kanunay nga nagtuman sa mga sugo ug nga siya layo sa pagkahingpit. Usahay mawad-an siya sa kadasig tungod sa iyang mga kahuyang ug naghunahuna nga imposible nga mahimong takos alang sa celestial nga gingharian.

• Sa unsang paagi kaha nga ang ubang mga tin-edyer makasabot sa mga pagbati ni Lucas?

• Unsa nga bahin sa iyang panghunahuna ang mura og tukma o dili tukma? Ngano man?

Dapita ang mga estudyante sa paghunahuna sa ilang kaugalingong mga pagbati o mga pangutana mahitungod kon makahimo ba sa pagbalik sa presensiya sa Dios ug sa pagdawat sa mga panalangin sa kahimayaan. Mahimo nimong ipasabot nga ang kahimayaan nagkahulogan nga mopuyo sa kahangtoran uban sa Langitnong Amahan sa celestial nga gingharian. Ang mga kasulatan nagtumong usab niini nga panalangin isip kinabuhing dayon.

Dasiga ang mga estudyante samtang sila nagtuon sa pagpangita og mga kamatuoran nga makatabang nila nga mobati og mas dakong paglaom nga sila ug ang uban makadawat niini nga panalangin pinaagi ni Jesukristo.

Panan-awon sa celestial nga gingharian

Mahimong imong nahinumdoman nga sila si Joseph Smith ug Sidney Rigdon nakakita og usa ka dako nga panan-awon samtang sila nagtrabaho sa ilang dinasig nga paghubad sa Biblia. Isip kabahin niini nga panan-awon, ilang nahibaloan nga ang langit adunay nagkalainlaing mga ang-ang o mga gingharian sa himaya. Niini nga leksiyon, atong pagatutokan ang unsay nahibaloan nila ni Joseph ug Sidney mahitungod sa celestial nga gingharian ug niadtong makapanunod niini.

Aron matabangan ang mga estudyante nga maandam sa pagtuon niini nga bahin sa panan-awon, dapita sila sa paghimo og duha ka kolum nga tsart nga adunay mosunod nga mga ulohan diha sa usa ka panid sa ilang journal sa pagtuon.

Unsaon sa mga tawo sa pagsulod sa celestial nga Gingharian	Mga panalangin nga madawat sa mga tawo sa celestial nga gingharian

Basaha ang Doktrina ug mga Pakigsaad 76:50–70 ug sulati ang tsart base sa unsay imong nakat-onan.

Mahimo nimong dapiton ang mga estudyante sa pagpakigtinabangay uban sa usa ka kapares sa pagbasa sa mga bersikulo ug sa pagkompleto sa tsart. Mahimo nimong dapiton ang mga estudyante sa pagpangutana mahitungod sa unsay ilang nabasa.

Pipila sa mga pamahayag nga anaa sa “Dugang nga mga Kapanguhaan” mahimong makatabang sa pagtubag sa mga pangutana sa mga estudyante.

• Unsa ang imong napalgan niini nga mga bersikulo nga makahuloganon kanimo? Ngano man?

• Unsaon nimo paghulagway ang impluwensiya ni Jesukristo diha sa mga kinabuhi niadtong kinsa makapanunod sa celestial nga gingharian?

  Isip kabahin sa panaghisgotan sa miaging pangutana, seguroha nga ang mga estudyante makasabot sa mosunod nga kamatuoran: Pinaagi ni Jesukristo kita mahimong hingpit ug makadawat sa mga panalangin sa kahimayaan.

• Unsa sa imong hunahuna ang gipasabot nga mahimong hingpit pinaagi ni Jesukristo?

• Sa unsang paagi kini nga kamatuoran makatabang kanato nga mobati og mas dakong paglaom nga kita ug ang uban makapanunod sa celestial nga gingharian sa umaabot?

Paglaom pinaagi ni Jesukristo

Aron matabangan ang mga estudyante nga mas masabtan ang paglaom nga anaa kanatong tanan pinaagi ni Jesukristo, ikonsiderar ang pagdapit kanila sa pagtuon sa mga pamahayag nga makita sa kauban nga handout. Dapita sila sa pagmarka sa mga hugpong sa mga pulong nga makahuloganon ngadto kanila. Imbis nga ipabasa sa mga estudyante ang pamahayag ni Elder J. Devn Cornish, mahimo usab nimong ikonsiderar ang pagpakita kanila sa bidyo nga “Am I Good Enough?”” (3:28), nga anaa sa ChurchofJesusChrist.org.

Paglaom pinaagi ni Jesukristo

Nganong ako nagkinahanglan sa tabang ni Jesukristo aron mahimong hingpit?

Si Elder J. Devn Cornish sa Seventy mipakigbahin:

Ang atong mga miyembro kanunayng mangutana, “Igo ba ang akong kamaayo isip tawo?” o “Makasulod ba gyud ko sa celestial nga gingharian?” Siyempre, walay matawag nga “igo ang kamaayo.” Walay usa nato nga mahimong “makakuha” o “angayan” sa atong kaluwasan, apan normal lang nga maghunahuna kita kon madawat ba kita sa Ginoo, nga maoy akong pagsabot niini nga mga pangutana. …

Akong himoong direkta ug klaro. Ang mga tubag sa mga pangutana nga “Igo ba ang akong kamaayo?” ug “Makasulod ba ko didto?” mao ang “Oo! Mahimong igo ang inyong kamaayo” ug “Oo, makasulod mo didto basta padayon kamong maghinulsol ug dili mangatarungan o mosukol.” Ang Dios sa langit dili usa ka walay pagbati nga referee nga mangita og rason nga mapagawas kita sa dula. Siya ang atong hingpit nga mahigugmaong Amahan, nga nangandoy labaw sa tanan nga ang tanan Niyang mga anak makauli ug makapuyo uban Kaniya isip mga pamilya sa kahangtoran. Tinud-anay Siyang mihatag sa Iyang Bugtong Anak aron dili kita malaglag apan makabaton og kinabuhing walay kataposan! Palihog tuo, ug palihog pagkuha og paglaom ug kahupayan gikan niining mahangtorong kamatuoran. Gusto sa atong Langitnong Amahan nga makasulod kita didto! Kana ang Iyang buhat ug ang Iyang himaya. (J. Devn Cornish, “Igo Ba Ang Akong Kamaayo? Makasulod Ba Ko Didto?,” Liahona, Nob. 2016, 32–33)

Unsa man ang akong mabuhat aron “mahimong hingpit pinaagi ni Jesus”?

Si Sister Carol F. McConkie, kanhi sa Kinatibuk-ang Kapangulohan sa Young Women, mitudlo:

Ang atong paglaom sa pagkabalaan nasentro diha ni Kristo, sa Iyang kaluoy ug sa Iyang grasya. Uban sa hugot nga pagtuo kang Jesukristo ug sa Iyang Pag-ula, malimpyo kita, walay lama, kon ilimod nato sa atong mga kaugalingon ang tanan nga dili diosnon [tan-awa sa Moroni 10:32–33] ug sinsero nga maghinulsol. Gibunyagan kita pinaagi sa tubig alang sa kapasayloan sa mga sala. Ang atong mga kalag gibalaan sa dihang gidawat nato ang Espiritu Santo uban sa bukas nga mga kasingkasing. Kada semana, nag-ambit kita sa ordinansa sa sakramento. Diha sa espiritu sa paghinulsol uban ang sinserong mga tinguha alang sa pagkamatarong, nakigsaad kita sa pagdala diha kanato sa ngalan ni Kristo, paghinumdom Kaniya, ug paghupot sa Iyang mga sugo aron sa kanunay makabaton sa Iyang Espiritu uban kanato. Sa kadugayan, samtang kita maninguha nga mahiusa sa Amahan, sa Anak, ug sa Espiritu Santo, mahimo kitang tig-ambit sa Ilang diosnong kinaiyahan [tan-awa sa 2 Pedro 1:4]. (Carol F. McConkie, “Ang Katahom sa Pagkabalaan,” Liahona, Mayo 2017, 10)

Si Elder Dale G. Renlund sa Korum sa Napulog Duha ka Apostoles mitudlo:

Mas naghunahuna ang Dios kon si kinsa kita ug kinsa kita sa umaabot, kay sa unsa kita kaniadto. Gusto Niya nga kita magpadayon sa pagpaningkamot. (Dale G. Renlund, “Ang mga Santos sa Ulahing mga Adlaw Magpadayon sa Pagpaningkamot,” Liahona, Mayo 2015, 57)

Human ang mga estudyante nakagahin na og panahon sa pagtuon, dapita sila sa paghisgot kon unsa ang ilang nakat-onan ug gibati. Usa ka paagi sa pagbuhat niini mao ang pagpahinumdom kanila sa senaryo gikan sa sinugdanan sa leksiyon. Mahimo nimo silang dapiton sa pagsulat og tubag ngadto ni Lucas nga makatabang kaniya nga mobati og paglaom nga makaabot siya sa celestial nga gingharian. Dapita sila sa paglakip sa mga pagtulun-an gikan sa Doktrina ug mga Pakigsaad 76, ingon man usab sa usa ka butang gikan sa usa o labaw pa sa mga pamahayag nga ilang gitun-an, sa ilang tubag. Mahimo dayong ipakigbahin o i-summarize sa mga estudyante ang ilang tubag ngadto sa usa ka pares, o ang andam nga mga estudyante mahimong mopakigbahin niini ngadto sa klase.

Pamalandongi ang unsay imong nakat-onan

Taposa ang leksiyon pinaagi sa paghatag og panahon sa mga estudyante sa pagpamalandong sa ilang nakat-onan ug nabati karon. Mahimo nimong ipakita ang mosunod nga mga pangutana ug hatagan og panahon ang mga estudyante aron irekord ang ilang mga tubag ngadto niini diha sa ilang mga journal sa pagtuon:

• Unsa ang imong nakat-onan o nabati karon nga nagtanyag kanimo og paglaom pinaagi ni Jesukristo?

• Sa unsang paagi nga ang imong nakat-onan o nabati makaapekto sa imong tinguha sa pagpuyo sa imong adlaw-adlaw nga kinabuhi?

Dugang nga mga Kapanguhaan

Nganong ako nagkinahanglan sa tabang ni Jesukristo aron mahimong hingpit?

Si Elder Paul V. Johnson sa Seventy mipahayag:

Kita mahimong adunay kalagmitan nga maghunahuna nga kinahanglang hingpiton nato ang atong kaugalingon, apan dili kana posible. Ang pagsunod sa matag sugyot sa matag libro sa kalibotan bahin sa pagtabang sa kaugalingon dili makahimo niini. Adunay usa lang ka paagi ug usa ka ngalan diin moabot ang pagkahingpit. Kita “[mahimo] nga hingpit pinaagi ni Jesus ang tigpataliwala sa bag-o nga pakigsaad, kinsa nagbuhat niini nga hingpit nga pag-ula pinaagi sa pagpaagas sa iyang kaugalingon nga dugo” [Doktrina ug mga Pakigsaad 76:69]. Ang atong pagkahingpit posible lamang pinaagi sa grasya sa Dios. (Paul V. Johnson,“Paghingpit diha Kaniya,” Liahona, Nob. 2022, 41)

Aduna bay paglaom alang kanako nga makabaton og kahimayaan?

Si Elder Jeffrey R. Holland sa Korum sa Napulog Duha ka Apostoles mitudlo:

Bisan nagtuo ka nga ulahi ka na, bisan pila pa ka mga oportunidad wala ninyo mapahimusli, mga sayop nga inyong nahimo o mga talento nga wala ninyo, o unsa ka kalayo sa panimalay ug pamilya ug sa Dios, mopamatuod ko nga wala pa kamo malayo sa balaanong gugma. Imposible nga ang mahangtorong kahayag sa Pag-ula ni Kristo dili moabot kaninyo.

Bisan dili kamo miyembro o dili aktibo sa Simbahan, walay gayuy butang nga inyong nabuhat nga dili ninyo mausab. Walay problema nga dili ninyo mabuntog. Walay damgo nga inig-abot sa panahon ug sa kahangtoran dili matuman. (Jeffrey R. Holland, “Mga Mamumuo sa Ubasan,” Liahona, Mayo 2012, 33)

Doktrina ug mga Pakigsaad 76:53. Unsa ang gipasabot nga “gibugkos pinaagi sa Balaan nga Espiritu sa saad”?

Si Elder David A. Bednar sa Korum sa Napulog Duha ka Apostoles mitudlo:

Ang Balaang Espiritu sa Saad mao ang nagpamatuod nga gahom sa Espiritu Santo. Kon giselyohan sa Balaang Espiritu sa Saad, usa ka ordinansa, panaad, o pakigsaad ang nagbugkos sa yuta ug sa langit. (Tan-awa sa D&P 132:7.) Ang pagdawat sa ‘selyo sa pag-uyon’ gikan sa Espiritu Santo mao ang resulta sa pagkamatinud-anon, integridad, ug sa pagkamakanunayon sa pagtahod sa mga pakigsaad sa ebanghelyo “diha [sa] pagpadayon sa panahon” (Moises 7:21). Hinoon, kini nga pagkabugkos mawala pinaagi sa pagkadautan ug kalapasan. (David A. Bednar, “Kinahanglang Matawo Kamo Pag-usab,” Liahona, Mayo 2007, 21-22)

Doktrina ug mga Pakigsaad 76:54. Unsay buot ipasabot nga mahimong miyembro sa “Simbahan sa Unang Natawo [Church of the Firstborn]”?

Ang Simbahan sa Unang Natawo mao ang “usa ka termino nga naghulagway niadto kinsa nakadawat sa kahingpitan ug himaya sa Dios nga Amahan sa pagkabanhaw” (Glossary, “Simbahan sa Unang Natawo [Church of the Firstborn],” The Joseph Smith Papers, josephsmithpapers.org).

Doktrina ug mga Pakigsaad 76:64–65. Unsa ang gipasabot sa “pagkabanhaw sa mga makiangayon” o “una nga pagkabanhaw”?

Ang Pagkabanhaw sa mga makiangayon nailhan usab nga “una nga pagkabanhaw” (Doktrina ug mga Pakigsaad 76:64) ug naglakip sa tanan niadto kinsa makapanunod sa celestial ug terrestrial nga mga gingharian (tan-awa sa Doktrina ug mga Pakigsaad 88:96–99). Ang Una nga Pagkabanhaw nagsugod sa dihang ang mga lubnganan sa mga matarong gibuksan human sa Pagkabanhaw ni Jesukristo (tan-awa sa Mateo 27:52–53; Mosiah 15:21–24; 3 Nephi 23:9–10). Ang Doktrina ug mga Pakigsaad nagpasabot sa Una nga Pagkabanhaw ingon nga panahon diin ang mga makiangayon mogawas gikan sa ilang mga lubnganan sa Ikaduhang Pag-anhi ni Jesukristo (tan-awa sa Doktrina ug mga Pakigsaad 29:13; 45:54; 88:96–99). Ang Pagkabanhaw sa mga dili makiangayon, o ang “kataposan nga pagkabanhaw” (Doktrina ug mga Pakigsaad76:85), maglakip niadto kinsa makapanunod sa telestial nga gingharian ug niadto kinsa mga anak sa kapildihan, ug kini mahitabo sa kataposan sa Milenyum (tan-awa sa Doktrina ug mga Pakigsaad 76:85; 88:32, 100–102). (Manwal sa Estudyante sa Doktrina ug mga Pakigsaad [2018], 400)

Dugang nga mga Kalihokan sa Pagkat-on

Usa ka alternatibo nga paagi sa pagtuon sa mga bersikulo 51–53

Dugang pa sa pagpakita kanato sa tabang nga gihatag sa Dios aron mahimong sama Kaniya, ang Doktrina ug mga Pakigsaad 76:51–53 makatabang kanato nga makasabot sa mga pagpili niadto nga anaa sa celestial nga gingharian. Mahimo nimong dapiton ang mga estudyante sa pagbasa sa mga bersikulo, mangita sa mga pagpili nga gihimo niadtong gihulagway niini nga mga bersikulo. Dayon ikonsiderar ang pagdapit sa mga estudyante sa pakigtinabangay kauban sa usa ka kapares ug sa paghimo og mas kinatibuk-ang paghulagway kon sa unsang paagi nila nakita kadtong gihulagway sa celestial nga gingharian nga nagpuyo sa ilang kinabuhi sa mortalidad. Nahunahuna ba nila nga kini nga mga tawo nakahimo og mga sayop? Naghunahuna ba sila og mga kahuyang nga kauban sa inadlaw nilang pagpuyo sa kinabuhii?

Doktrina ug mga Pakigsaad 76:53. “Nakabuntog pinaagi sa hugot nga pagtuo.”

Aron matabangan ang mga estudyante nga mas makasabot kon sa unsang paagi sila “nakabuntog pinaagi sa hugot nga pagtuo,” ikonsiderar ang pagpangutana kanila kon unsay gikinahanglan nga mabuntog sa usa ka tawo. Mahimo nimong itudlo sila ngadto sa Mosiah 3:19 aron makita kon unsay gitudlo ni Hari Benjamin mahitungod sa atong panginahanglan sa pagbuntog sa kinaiyanhon nga tawo. Dugang pa, ipakigbahin kanila kon sa unsang paagi si Presidente Russell M. Nelson namulong mahitungod sa kamahinungdanon sa pagbuntog sa kalibotan. Hunahunaa ang pagpakigbahin sa mosunod nga pamahayag o lain sa imong pagpili gikan sa iyang pakigpulong:

Unsaon, man, nato sa pagbuntog sa kalibotan? Si Hari Benjamin mitudlo kanato unsaon. Siya miingon nga “ang kinaiyanhon nga tawo mao ang usa ka kaaway sa Dios” ug magpabilin sa kahangtoran “gawas kon siya motugyan ngadto sa mga pagdani sa Balaang Espiritu, ug isalikway ang iyang kinaiyanhon nga pagkatawo ug mahimo nga usa ka santos pinaagi sa pag-ula ni Kristo ang Ginoo” [Mosiah 3:19]. Matag higayon nga kamo magtinguha ug mosunod sa mga pag-aghat sa Espiritu, matag higayon nga kamo mobuhat og bisan unsa nga maayong—mga butang nga dili buhaton “sa kinaiyanhon nga tawo”—kamo nagbuntog sa kalibotan. (Russell M. Nelson, “Buntoga ang Kalibotan ug Pangita og Kapahulayan,” Liahona, Nob. 2022, 97)

Ikonsiderar ang pagdapit sa mga estudyante sa pagpakigbahin og bisan unsa nga mga ehemplo sa kaayohan nga ilang nahimo bag-ohay lang nga dili buhaton sa kinaiyanhon nga lalaki o babaye.