Leksiyon 85: Doktrina ug mga Pakigsaad 76

Doktrina ug mga Pakigsaad 76:1–19

“Ang mga Mata sa Among mga Pagsabot Nabuksan”

Niadtong Enero 1832, si Propeta Joseph Smith ug Sidney Rigdon namalandong sa kahulogan sa Juan 5:29 samtang nagtrabaho sa dinasig nga hubad sa Biblia. Samtang namalandong sila, nakasinati sila og sunod-sunod nga mga panan-awon diin ang Ginoo mipadayag og importante nga mga kamatuoran mahitungod sa Iyang plano. Kini nga leksiyon makatabang sa mga estudyante nga makakat-on pinaagi sa gahom sa Espiritu Santo samtang sila naggahin og panahon sa pagpamalandong sa mga pulong sa Manluluwas.

Mga Posibleng Kalihokan sa Pagkat-on

Pagtinguha og personal nga pagpadayag

Ikonsiderar ang pagpakita sa mosunod nga mga pangutana diha sa pisara. Ang mga estudyante mahimong morekord sa ilang mga tubag sa mga pangutana diha sa ilang mga journal sa pagtuon. Ikonsiderar ang paghangyo og pipila ka mga estudyante nga buot mopakigbahin og mga tubag nga dili kaayo personal.

• Unsa ang pipila ka mga kahimtang o mga sitwasyon nga imong giatubang, o tingali atubangon, diin gusto ka nga makadawat og giya gikan sa Ginoo pinaagi sa Espiritu Santo?

• Ngano nga nagtinguha ka og tabang sa Ginoo niini nga mga butang?

Karon makakat-on ka mahitungod sa usa ka paagi nga makadapit ka sa Ginoo sa pagpakigsulti kanimo pinaagi sa Espiritu Santo. Sa imong pagtuon, panid-i ang mga pag-aghat gikan sa Espiritu nga makatabang kanimo sa usa sa mga sitwasyon o mga pangutana nga imong nakaplagan.

Ang panan-awon

Ang mosunod nga pagpamubo makatabang sa pag-andam sa mga estudyante sa pagtuon sa Doktrina ug mga Pakigsaad 76. Ikonsiderar kon labing maayo ba nga basahon o ipamubo kini sa imong kaugalingon o magdapit og usa ka estudyante sa pagbuhat niini. Sa laing paagi, mahimo nimong dapiton ang mga estudyante sa pagbasa gikan sa Mga Santos, 1:167 aron makahibalo mahitungod sa mga kahimtang nga mosangpot ngadto niini nga pagpadayag.

Niadtong Pebrero 16, 1832, sila si Joseph Smith, Sidney Rigdon, ug mga 12 pa ka mga kalalakin-an ang anaa sa ibabaw nga lawak sa balay ni John ug Elsa Johnson sa Hiram, Ohio. Samtang si Joseph ug Sidney nagtrabaho sa dinasig nga hubad sa Biblia, sila nagtuon sa Juan 5:29, usa ka kasulatan nga naghulagway sa langit, ug sila gusto nga masayod og dugang pa. Samtang namalandong sila, nakakita sila og usa ka panan-awon, nga girekord diha sa Doktrina ug mga Pakigsaad 76. Ang Manluluwas mipakita ngadto kang Joseph ug Sidney og sunod-sunod nga piho nga mga panan-awon nga nagtudlo kanila og importante nga mga kamatuoran mahitungod sa plano sa Langitnong Amahan sa kaluwasan.

Ipasabot nga samtang magtuon ang mga estudyante sa Doktrina ug mga Pakigsaad 76 sa tibuok semana, makabaton sila og mga kahigayonan sa pagkat-on mahitungod sa daghang nagkalain-laing mga bahin niini nga panan-awon. Ang leksiyon karong adlawa magpunting sa mga pagtulun-an sa Manluluwas ug sa mga kasinatian nga narekord sa sinugdanan sa seksiyon 76.

Ang Doktrina ug mga Pakigsaad 76 nagsugod sa Ginoo nga nagpakigbahin og importante nga mga kamatuoran mahitungod sa Iyang Kaugalingon.

Basaha ang Doktrina ug mga Pakigsaad 76:1–10, mangita og mga pulong nga imong gibati nga nagpakita unsay gusto ni Jesukristo nga atong masabtan mahitungod Kaniya. Timan-i nga ang pagkahadlok ngadto sa Dios (bersikulo 5) nagpasabot sa pagsimba, paghigugma, ug pagbaton og balaang pagtahod Kaniya.

Human nga may igo nang panahon ang mga estudyante sa pagtuon niini nga mga bersikulo, dapita sila sa pagpakigbahin sa ilang mga hunahuna. Ang mga pangutana sama sa mosunod mahimong makatabang sa mga estudyante sa paghisgot sa tinguha sa Manluluwas sa pagpadayag sa kamatuoran ngadto kanila pinaagi sa Espiritu Santo.

• Unsa ang natabang niini nga mga bersikulo nga mas masabtan nimo ang mahitungod sa Manluluwas?

• Sa unsang paagi nga ang pagkahibalo niini nga mga butang mahitungod sa Manluluwas makaapekto kanimo?

Ang pagpamalandong sa mga kasulatan modala ngadto sa pagpadayag

Basaha ang Doktrina ug mga Pakigsaad 76:11–19, mangita sa unsay gibuhat ni Joseph ug Sidney sa wala pa makasinati sa ilang panan-awon.

• Unsa sa imong hunahuna ang mga aksiyon nga nakapahimo kang Joseph ug Sidney nga makasinati sa unsay ilang nasinati?

  Ikonsiderar ang pagpasabot nga bisan og dili kita makasinati sa matang sa panan-awon nga nabatonan ni Joseph ug Sidney, ang ilang kasinatian makatudlo kanato og usa ka baroganan mahitungod sa pag-andam sa atong kaugalingon sa pagdawat og pagpadayag gikan sa Ginoo pinaagi sa Espiritu Santo.

• Unsa nga kamatuoran ang imong nakat-onan gikan niini nga mga bersikulo mahitungod sa usa ka paagi nga kita makaandam sa atong kaugalingon nga makadawat og pagpadayag pinaagi sa Espiritu Santo?

Mahimong maghisgot ang mga estudyante og usa ka kamatuoran nga susama sa mosunod: Samtang mainampoong magtuon ug mamalandong kita sa mga kasulatan, giandam nato ang atong kaugalingon sa pagdawat og pagsabot gikan sa Ginoo pinaagi sa Espiritu Santo.

Si Elder D. Todd Christofferson sa Korum sa Napulog Duha ka Apostoles mihulagway kon unsaon nato sa pagtuon ug pagpamalandong sa mga kasulatan sa paagi nga modala ngadto sa pagpadayag pinaagi sa Espiritu Santo.

Kon mosulti ko nga “magtuon,” nagpasabot kini sa labaw pa sa pagbasa lamang. … Makita ko kamo usahay nga nagbasa og pipila ka mga bersikulo, mohunong sa pagpamalandong niini, mainampingon nga nagbasa sa mga bersikulo pag-usab, ug samtang kamo naghunahuna mahitungod sa unsay gipasabot niini, nag-ampo alang sa pagsabot, nagpangutana sa inyong hunahuna, naghulat sa espirituhanong mga impresyon, ug nagsulat sa mga impresyon ug mga panabot nga miabot aron ikaw makahinumdom ug makakat-on pa. Sa pagtuon niining paagiha, mahimong dili daghan ang imong mabasa nga mga kapitulo o mga bersikulo sulod sa tunga sa oras, pero makahatag ka og luna sa imong kasingkasing para sa pulong sa Dios, ug Siya makigsulti nganha kanimo. (D. Todd Christofferson, “When Thou Art Converted,” Liahona, Mayo 2004, 11)

• Unsa ang pipila ka mga babag nga usahay makapugong kanato sa pagpamalandong? Unsay makatabang kanato sa pagbuntog niini nga mga babag?

Ikonsiderar ang pagpakigbahin og usa ka kasinatian diin ikaw nagtuon ug namalandong sa mainampoong paagi diha sa mga kasulatan ug nakadawat og pagpadayag. Dapita ang mga estudyante sa pagpakigbahin og bisan unsang mga kasinatian nga ilang naagian usab.

Pagbansay nga mainampoong magtuon ug mamalandong

Ikonsiderar ang paghatag sa mga estudyante og panahon diha sa klase, tingali 7–10 ka minuto, sa pagbansay sa mainampoong pagtuon ug sa pagpamalandong sa mga kasulatan. Ipakigbahin ang mosunod nga mga instruksiyon:

Paggahin og panahon sa pagbansay sa pagtuon ug sa pagpamalandong sa mga kasulatan. Hunahunaa ang mga kahimtang o sitwasyon nga imong nahibaloan kaganena nga gusto nimo og panabang sa Ginoo. Pag-ampo alang sa giya, pamalandongi ang unsay imong gibasa, ug bantaye ang mga pag-aghat sa Espiritu nga makahatag kanimo sa direksiyon o tabang nga imong gikinahanglan. Irekord ang imong mga hunahuna ug mga impresyon diha sa imong journal sa pagtuon.

Hatagi ang mga estudyante og kagawasan sa pagpili sa mga kasulatan nga ilang tun-an atol niini nga kalihokan. Alang sa mga estudyante nga gusto og giya kon hain nga mga tudling ang pilion, ikonsiderar ang paghatag og pipila ka mga kapilian, sama sa mosunod:

• Enos 1:1–17 (Si Enos nag-ampo ngadto sa Dios.)

• Mosiah 3:1–20 (Si Hari Benjamin nanagna kabahin ni Jesukristo.)

• Alma 36:1–30 (Si Alma naghulagway sa kapasayloan sa iyang mga sala.)

• Moises 1:1–39 (Si Moises nakigsulti sa Dios ug misukol kang Satanas.)

Human sa igong panahon, ipakita ang mosunod nga mga pangutana ug dapita ang mga estudyante sa pagrekord sa ilang mga tubag diha sa ilang mga journal sa pagtuon.

• Sa unsang paagi nga ang pagtuon ug ang pagpamalandong sa mga kasulatan nagtabang sa pag-andam kanimo nga makadawat og pagpadayag pinaagi sa Espiritu Santo?

• Unsay gitudlo niining kasinatian diha kanimo mahitungod sa Langitnong Amahan, ni Jesukristo, ug sa Espiritu Santo?

• Unsa kaha ang imong buhaton, o padayonon sa pagbuhat, aron makadawat og dugang nga tabang ug pagpadayag gikan sa Ginoo?

Pagpamatuod kon sa unsang paagi nga ang pagpamalandong ug ang pagtuon sa mga kasulatan sa mas tinuyo nga paagi ug sa mas kanunay makapaduol sa mga estudyante ngadto sa Langitnong Amahan ug ni Jesukristo. Dasiga ang mga estudyante sa pagpadayon sa mainampoong pagtinguha sa pagpadayag pinaagi sa kanunay nga pagtuon ug pagpamalandong sa mga kasulatan.

Dugang nga mga Kapanguhaan

Unsa kaha ang gibati nila ni Joseph Smith ug Sidney Rigdon nga nakasinati niini nga panan-awon?

Ang mosunod nga asoy gikan sa Mga Santos, vol. 1 naghulagway sa panag-istoryahay nilang Joseph Smith ug Sidney Rigdon samtang ilang nasinati ang panan-awon:

“Unsay akong nakita?” Nangutana si Joseph samtang siya ug si Sidney nahingangha sa katingalahan nga ilang nakita. Gihulagway dayon niya kon unsay iyang nakita diha sa panan-awon, ug si Sidney miingon, “Mao usab ang akong nakita.” Nangutana dayon si Sidney sa samang pangutana ug mihulagway sa talan-awon sa iyang atubangan. Sa dihang nahuman na siya, miingon si Joseph, “Mao usab ang akong nakita.”

Nagsultihanay sila og sama niini sulod sa usa ka oras. …

Sa dihang natapos na ang panan-awon, daw naluya ug nangluspad si Sidney, gidaog sa unsay iyang nakita. Mipahiyom si Joseph ug miingon, “Dili anad si Sidney niini sama nako.” (Mga Santos, 1:167–68)

Unsa ang epekto sa panan-awon ngadto sa uban?

Si Presidente Brigham Young (1801–1877) mitawag niini nga panan-awon “ang labing dako nga panan-awon nga akong nahibaloan nga gihatag ngadto sa mga katawhan” (Journal of Discourses, 8:34).

Si Presidente Wilford Woodruff (1807–1898) mipasabot:

Akong hisgotan ang “Panan-awon” [sa seksiyon 76] lang, isip usa ka pagpadayag nga naghatag og dugang kahayag, dugang kamatuoran ug dugang baroganan kaysa bisan unsa nga pagpadayag nga anaa sa bisan unsa nga basahon nga atong nabasa. Nakapasayon kini sa atong pagsabot sa atong kahimtang karon, diin kita gikan, nganong ania kita dinhi, ug asa kita paingon. Bisan kinsang tawo mahimong masayod pinaagi niana nga pagpadayag kon unsa unya ang iyang dangatan ug kahimtang. (Mga Pagtulun-an sa mga Presidente sa Simbahan: Wilford Woodruff [2004], 133)

Unsa nga mga panalangin ang moabot gikan sa pagpamalandong ug pagtuon sa mga kasulatan?

Si Presidente Thomas S. Monson (1927–2018) mipakigbahin:

Kon kita magbasa ug mamalandong sa kasulatan, masinati nato ang paghunghong sa Espiritu sa atong kalag. Makaplagan nato ang mga tubag sa atong mga pangutana. (Thomas S. Monson, “Wala Kita Mag-inusara,” Liahona, Nob. 2013, 122)

Si Elder Robert D. Hales (1932–2017) sa Korum sa Napulog Duha ka Apostoles mitudlo:

Kon makigsulti kita sa Dios, mag-ampo kita. Ug kon kita gusto nga Siya makigsulti kanato, mosiksik kita sa mga kasulatan; kay ang Iyang mga pulong gisulti pinaagi sa Iyang mga propeta. Unya Siya dayon motudlo kanato samtang kita maminaw sa mga pag-aghat sa Balaang Espiritu. (Robert D. Hales, “Balaan nga mga Kasulatan: Ang Gahom sa Dios alang sa Atong Kaluwasan,” Liahona, Nob. 2006, 26)

Unsaon man nako pagpamalandong sa epektibong paagi?

Tan-awa ang “Giunsa Nako Pagpaminaw Kaniya pinaagi sa Personal nga Pagtuon ug Pag-ampo” (3:01) aron makakita og ehemplo gikan ni Elder Dale G. Renlund sa Korum sa Napulog Duha ka Apostoles.

Tan-awa ang artikulo nga “Pondering: Giving the Lord Your Full Attention” alang sa mas makatabang nga mga ideya.

Dugang nga mga Kalihokan sa Pagkat-on

Ubang mga ehemplo sa pagpamalandong nga moresulta ngadto sa pagpadayag

Ang mga estudyante mahimong makabenepisyo gikan sa pagtuon sa ubang mga ehemplo diha sa mga kasulatan sa mga tawo nga nakadawat og pagpadayag gikan sa Ginoo isip resulta sa pagpamalandong. Mahimo nimo silang dapiton sa pagtuon sa mosunod nga mga tudling, mangita sa mga pagkaparehas tali niini nga mga asoy ug sa asoy ni Joseph Smith ug Sidney Rigdon diha sa Doktrina ug mga Pakigsaad 76.

• 1 Nephi 10:17–19; 11:1–6

• Doktrina ug mga Pakigsaad 138:1–11

• Joseph Smith—Kasaysayan 1:11–17

Mahimong ilista sa mga estudyante kini nga mga bersikulo isip mga cross-reference tupad sa Doktrina ug mga Pakigsaad 76:19.

Doktrina ug mga Pakigsaad 76:5–7. Ang Ginoo mopadayag sa Iyang mga misteryo ngadto niadtong nagpasidungog ug nagserbisyo Kaniya.

Ang mga pangutana sama sa mosunod mahimong gamiton sa pagtabang sa mga estudyante sa pagtuon ug sa paghisgot sa Doktrina ug mga Pakigsaad 76:5–7:

• Ngano kaha paminaw nimo nga ang Ginoo nahimuot sa pagpasidungog ug sa pagpadayag sa kamatuoran niadtong nahigugma ug nagserbisyo Kaniya?

Ang mga misteryo mahimong magtumong sa espirituhanong mga kamatuoran nga mahibaloan lamang pinaagi sa pagpadayag.

• Unsa ang pipila ka mga ehemplo sa mga misteryo nga mahimong ipadayag sa Dios ngadto niadtong kinsa nagserbisyo Kaniya?

Dapita ang mga estudyante sa paggahin og pipila ka minuto diha sa gagmay nga mga grupo sa paglista og mga paagi nga sila makaserbisyo sa Ginoo sa tanang pagkamatarong sa kanunay. Kon mahuman na sila, mahimo silang mopakigbahin diha sa klase kon unsay ilang nahibaloan.

Usa ka kahigayonan sa pagpasabot ug sa paggamit

Ang Alang sa Kalig-on sa Kabatan-onan nga magasin adunay seksiyon nga “Mga Pangutana ug mga Tubag” diin ang kabatan-onan mangutana ug ang ubang kabatan-onan mohatag sa mga tubag. (Alang sa usa ka pananglitan, tan-awa sa “Mga Pangutana ug mga Tubag” sa Oktubre 2022 nga isyu.)

Dapita ang mga estudyante sa paghanduraw nga kinahanglan silang motubag sa pangutana nga “Unsaon nako sa pagdawat og pagpadayag gikan sa Ginoo?” Dapita sila sa paggahin og pipila ka minuto nga mainampoong magsulat og tubag base sa unsay gitudlo sa Doktrina ug mga Pakigsaad 76:1–19. Hangyoa sila sa pagkonsiderar sa paglakip sa mosunod diha sa ilang tubag:

• Piho nga mga pulong o mga hugpong sa mga pulong gikan sa Doktrina ug mga Pakigsaad 76:1–19

• Unsay ilang nahibaloan mahitungod sa Langitnong Amahan, ni Jesukristo, ug sa Espiritu Santo nga naghatag kanila og pagsalig nga ang mga sugyot nga gihatag epektibo

• Mga kasinatian gikan sa ilang kaugalingong kinabuhi o sa kinabuhi sa uban nga nagpakita sa mga punto nga ilang gipasabot

Hatagi ang mga estudyante og igong panahon sa pagsulat sa ilang mga tubag. Mahimo nimong dapiton ang tanan nga mga estudyante sa pagsulat sa ilang mga tubag sa usa ka papel ug sa paghimo og usa ka “magasin” sa klase kon unsaon pagdawat og pagpadayag. Mahimong tan-awon kini sa mga estudyante kon gikinahanglan nila kini. Ikonsiderar ang pagdapit sa mga estudyante sa paghimo og tumong kon unsaon sa paggahin og panahon sa pagpamalandong sa mga pulong sa Manluluwas.