“Unsaon nako nga magpabiling malaomon kon wala nako makuha ang mga panalangin nga akong gipangandoy?,” Alang sa Kalig-on sa mga Kabatan-onan, Okt. 2022.
Mga Pangutana ug Mga Tubag
“Unsaon nako nga magpabiling malaomon kon wala nako makuha ang mga panalangin nga akong gipangandoy?”
Batoni ang Hugot nga Pagtuo ug Pagsalig
“Makapadayon kita sa atong mga paglaom pinaagi sa pagbaton og hugot nga pagtuo ug pagbutang sa atong pagsalig sa Dios. Bisan kon kita wala mapanalangini karon, atong maangkon kadtong mga panalangin sa hustong panahon.”
Poerani S., 15, Tahiti
Pag-ampo alang sa Kahupayan
“Ako makapadayon sa paglaom pinaagi sa kinasingkasing nga pag-ampo alang sa kahupayan gikan sa Langitnong Amahan. Ako makabasa usab og mga pakigpulong sa komperensiya o mga pagpamatuod gikan sa ubang mga tawo nga nakasinati og susama nga mga sitwasyon, aron akong makita kon sa unsang paagi sila nakahimo sa pagpabiling malaomon.”
Heinarii S., 16, Tahiti
Pagpokus kang Jesukristo
“Importante ang pagbaton og paglaom, ilabi na kon kana nga paglaom naka-pokus kang Jesukristo. Usahay ang mga panalangin nga atong gilaoman dili moabot sa panahon nga gusto nato. Kon kita adunay paglaom sa Ginoo—ug dili lamang sa mga panalangin nga gusto natong madawat gikan Kaniya—kita makadawat og labaw pa kay sa atong gilaoman.”
Nilton R., 19, Argentina
Pagbaton og Mahangturon nga Panglantaw
“Usahay, makaguol kini ug okay ra. Magtan-aw sa unahan ug maghupot og mahangturong panglantaw. Makatabang ang paghupot ug positibong kinaiya. Adunay usa ka higayon nga wala ako nadawat sa team sa basketball sa eskwelahan ug lisod kadto. Apan sa pagdagan sa tuig, akong naamgohan nga mas maglisod unta ko sa basketball kaysa wala kini. Tan-awa pag-ayo ug tan-awa ang gagmay nga mga panalangin nga moabot gikan niini.”
Candice N., 16, Utah, USA
Hibaloi Nga Siya Adunay Plano
“Nagpadayon ko sa akong paglaom pinaagi sa pagkasayod nga ang Langitnong Amahan nahigugma gihapon kanako ug nagpanalangin kanako sa ubang mga paagi. Sa wala pa mamatay ang akong igsoong lalaki, nag-ampo ko nga mabuhi siya, apan nasayod ko nga ang Langitnong Amahan adunay laing plano alang kaniya ug kanako. Ang Langitnong Amahan mipanalangin kanako og kalinaw, ug ako nasayod nga ako makakita pag-usab sa akong igsoon nga lalaki.”
Aaron P., 12, Utah, USA
Ang Dios Naghatag Kanato sa Atong Gikinahanglan
“Nakatabang kini kanako sa paghinumdom nga ang Dios mohatag kanato sa atong gikinahanglan, dili sa kanunay ang unsay atong gusto. Makakita kita og mga ehemplo sa mga tawo diha sa mga kasulatan kinsa gihikawan sa mga panalangin nga ilang gihunahuna nga ilang gusto apan sa kaulahian nakadawat sa mga panalangin nga ilang gikinahanglan gayod—mga panalangin nga haom gayod alang kanila.”
Maria B., 18, Uruguay