“Ang Teknolohiya, ang Panagpundok, ug Ikaw” Alang sa Kalig-on sa mga Kabatan-onan, Okt. 2022.
Tabang sa Kinabuhi
Ang Teknolohiya, ang Panagpundok, ug Ikaw
Kabahin kamo sa batalyon sa kabatan-onan sa Ginoo. Ug ang teknolohiya makatabang!
Kahibalo kamo kon makakita kamo og duha ka butang nga gitakda gayod nga mag-uban, sama sa perpekto nga pagkasagol sa peanut butter ug tsokolet, o mga chip ug salsa? Ang kombinasyon naghatag og dako kaayo nga kalipay!
Ang atong propeta nagdapit kanato sa pagpundok sa Israel, sa pag-apil sa “labing dako nga hagit, labing dako nga kawsa, ug labing dako nga buhat sa yuta.”1 Unsa kaha ang resulta kon tiponon ang buhat sa pagpundok sa Israel uban sa teknolohiya?
Sa dihang si Presidente Russell M. Nelson midapit kaninyo nga motabang sa pagpundok sa Israel, siya mihatag og pipila ka pagdapit. Tan-awon nato ang lima ka baroganan base niini nga mga pagdapit, uban ang teknolohiya diha sa hunahuna.
Mga paghulagway pinaagi ni Jarom Vogel
1 Pagdiskonektar aron Makakonektar
Ang atong propeta una nga miawhag alang sa pito ka adlaw nga pagpuasa gikan sa social media. Ganahan ko nga mibuhat niini! Usahay kinahanglan nato nga pahilomon ang tanan aron tinuod nga makapaminaw.
Kon ako mogahin og panahon nga mohilom, akong mabati ang kalinaw sa Espiritu Santo. Ug kasagaran usa ka pag-aghat ang moabot kabahin sa usa ka tawo nga gikinahanglan sa Langitnong Amahan nga akong serbisyohan. Ang pagdiskonektar gikan sa social media aron makakonektar sa Espiritu makahatag nimo og bag-ong mga ideya ug direksiyon.
2 Pagsakripisyo og Gamay aron Makahatag og Daghan
Ang ikaduha nga pagdapit ni Presidente Nelson mao ang “paghimo og sinemana nga sakripisyo sa panahon ngadto sa Ginoo,” sa “[pag-undang] sa usa ka butang nga gusto ninyong buhaton ug gamita kana nga panahon sa pagtabang sa pagpundok sa Israel.”2
Samtang inyong ikonsiderar kon unsa ang inyo tingali nga hunongon, hunahunaa usab kini isip paghatag ngadto sa Ginoo ug sa Iyang buhat. Mahunong ba ninyo ang pagtan-aw sa labing bag-o nga video sa sayaw ug ihatag kana nga oras sa indexing, family history, pagtuon sa ebanghelyo, o pagpaambit sa unsay inyong nakat-onan ngadto sa uban?
Ako mosaad nga kon unsa ang inyong gihunahuna nga inyong gisakripisyo wala lang kon itandi sa mga panalangin nga inyong nadawat.
3 Lig-on nga Mobarog
Ang sunod nga pagdapit ni Presidente Nelson mao ang paghimo og “pagtimbang-timbang sa kinabuhi uban sa Ginoo”3 aron sa pagsiguro nga kamo anaa sa dalan sa pakigsaad. Kabahin sa pagpundok sa Israel mao ang pagpundok sa inyong kaugalingon nga mas duol ngadto sa Manluluwas!
Adunay daghan kaayo nga maayo diha sa internet. Apan dili sekreto nga aduna usab kini daghan nga makadaot nga sulod. Ang pagbarog nga lig-on nagpasabot nga mahimong mas magmabinantayon. Samtang kamo maminaw sa mga pag-aghat sa Espiritu Santo, makahibalo kamo kon ang usa ka butang dili angay, makapamenos, o usik lang sa oras. Hangyoa ang Langitnong Amahan nga padak-an ang imong pagkamabinantayon ug hatagan ka og kalig-on sa pagpalayo o pagpalong niini.
4 Hangad ug Pagpakigdait
Ang atong propeta midapit dayon nato nga “mag-ampo matag adlaw nga ang tanang mga anak sa Dios makadawat sa mga panalangin sa ebanghelyo ni Jesukristo.”4 Oo, gihangyo mo niya tungod kay kabahin kamo niining dako nga buhat, ug ang inyong mga pag-ampo makahimo og kalainan.
Hangad gikan sa inyong celpon ug tan-aw sa mga naa sa inyong palibot. Hangad ngadto sa langit aron sa pagtinguha og direksiyon kon unsaon ninyo nga makatabang. Dayon pagpakigdait—pinaagi man sa video, text, post, tawag, o pagpakig-istorya—ug ipakita ang inyong mga pag-ampo ug ang mga pag-aghat sa Ginoo ngadto sa buhat.
5 Mahimong usa ka Kahayag
Sa kataposan, si Presidente Nelson midapit kanato nga “magpalahi. Pagpalahi. Mahimong usa ka kahayag.”5 Ug kana naglakip sa kon unsaon ninyo paggamit ang teknolohiya! Hinumdomi, ikaw usa ka hinigugmang anak sa langitnong mga ginikanan, nga adunay diosnong kinaiya ug mahangtorong padulngan. Ipakita ang imong kahayag sa matag dapit ug sirkumstansiya.
Si Presidente Nelson mitapos sa iyang mga pagdapit uban sa usa ka pahinumdom nga “apil kamo sa labing maayo nga gipadala sa Ginoo sukad dinhi sa kalibotan. Aduna kamoy kapasidad nga mahimong mas lantip ug mas maalamon ug adunay mas dakong epekto sa kalibotan kay sa nangaging henerasyon!”6
Samtang gamiton ninyo ang teknolohiya alang sa kaayohan, kamo mahimong mahinungdanon nga bahin sa kasundalohan sa Ginoo nga naningkamot sa pagpundok sa Israel. Ang kalibotan nagkinahanglan sa inyong kaayo ug sa kahayag sa Ginoo! Karon, kana usa ka gamhanan nga kombinasyon!