“Ang akong mga ginikanan dili ganahan sa musika nga akong gipaminaw. Unsaon namo nga dili mag-away kabahin niini?,” Alang sa Kalig-on sa mga Kabatan-onan, Okt. 2022.
Direkta sa Punto
Ang akong mga ginikanan dili ganahan sa musika nga akong gipaminaw. Unsaon namo nga dili mag-away kabahin niini?
Kon ikaw ug ang imong mga ginikanan dili magkasinabot kabahin sa musika, importante alang sa matag usa kaninyo nga magpabiling kalma, maningkamot nga masabtan ang usag usa, ug likayan ang panagbingkil. Gahini og pipila ka higayon nga hunahunaon gayod kon ngano nga ang imong mga ginikanan dili ganahan sa imong musika. Rebyoha ang mga baroganan diha sa Alang sa Kalig-on sa mga Kabatan-onan nga booklet, ug sa tinud-anay pangutan-a ang imong kaugalingon unsaon nga kini magamit ngadto sa imong musika. Sulayi sa pagpakita sa imong mga ginikanan nga ikaw naminaw gayod nila. Ayaw dayon pagpakiglalis nila. Dayon sila tingali mas andam na nga maminaw nimo.
Samtang ikaw makig-istorya sa imong mga ginikanan kabahin sa musika, mahimo ka nga moistorya kabahin sa positibo nga mga pagbati nga gihatag sa musika nimo ug ang mga paagi nga kini mitabang nimo sa nagkadaiyang mga sitwasyon. Mahimo nimo nga hisgotan kon unsaon sa musika pagtabang nimo nga mabati ang Espiritu ug unsaon nimo sa paglikay sa musika nga makapahilayo sa Espiritu.
Sa kataposan, siyempre, kinahanglan nimo nga hinumdoman nga sila imong mga ginikanan. Buhata ang imong labing maayo aron sa pagtahod nila ug makalikay sa panagbingkil, bisan kon gibati nimo nga kini kabahin lang sa personal nga gusto. Kon imong buhaton, ang Ginoo mopanalangin nimo.